OOTHENE ahu ninneemererya wi Yehova onnaahoolela ni waakhaviherya achu awe oomunepani variyari va “mmahiku ookuchula” yaala. (2 Tim. 3:1) Nyenya murici ti wa muchu ti muchu a hiyo waakhulela. Nnanwerya olikanyiha mukhalelo ahu ni wa Aisarayeli elukuluku yaaryaaya mutakhwani. Awo yaanaakhulela oruma wa nipenka.

Yehova aamuruma Mose ohana mapenka meeli a eparata “wi yiichaniwekeno achu, voothukumana ni voocimula mukwahaaya.” (Nam. 10:2) Alipa a mukucho yaanoopa mapenka mmukhalelo woohiyanahiyana wi yooniherye echu achu yaaphwanelaaya weera. (Nam. 10:3-8) Olelo, achu a Muluku annaakhela ohoolela mmikhalelo mincipale. Muthokororye mikhalelo miraru sa seiha, seiho inanuupuserya oruma wa mapenka akhalai. Achu a Muluku olelo annawompwa mmithukumano mitokweene, oohoolela anathanliwa annavyakihiwa, nave marehereryo oomuluku mmiloko soothene annatorokeya.

Vaavaa Yehova aachuneiye wi “achu oothene” ethukumane vamulako wa muxakala, alipa a mukucho yaanoopa mapenka oomeeli. (Nam. 10:3) Mahimo oothene, yaawo yaakhala moorukurerya wa musakala mmakupa masese, yaaniiwa oruma yoola woohiyana wa mapenka. Yaale yaakhala vakhiviru va mulako akhweya yaanayawo vahilekenle. Akina yaakhala moorakamela akhweya yaanamaliha elukuluku yincipale ni wiilipiserya wi ephiye. Moohipwacha nipuro yaakhalaayawo, Yehova aachuna wi oothene ethukumane ni okumihavo mphurelo.

Olelo, hannathukumana mmusakalani, nyenya ninnawompwa othukumana ni achu a Muluku. Iho inavolowela mithukumano sa miceche ni saweereya ikina savameekhaaya, mwemmo nnaakhelaahumo sooleeliherya soochuneya ni ohoolela. Mmapuro oothene orukurerya elapo, achu a Yehova annapuha marehereryo mamohamoha. Hiihaa, oothene yaale aneemererya nwopelo wa mithukumano seiha annapuha okhala vamoha nnikhuuru noohakalala. Akina anneeca mastatiya mancipale waapwaha akina. Nyenya yaale aneemererya nwopelo, anneemererya wi wiilipixerya woothene ti wamphurelo.

Hanka vooloca sa yaale anakhala mmakhuuru oorakamela nnipuro na mithukumano? Nnikhaviheryo na ikhankoonya sa mutano, ancipale a anna yaala annaphura orweela wa marehereryo mamohamoha ophiyerya wiisoona wi anakhala variyari va mithukumano mitokweene. Ntoko yootakiherya, variyari va oxekurya wa aweemelela a nipuro ntokweene, anna o Arlit, makupa o Nigeriya, epooma ekhaani enakhala o Ntakhwa no Sahara, yaanoonihiwa ichu seereya o efiliyale yo Peni mu elukuluku emohamoha. Anna ni arokora makhumi meeli nammoha vamoha ni oowompwa yaathukumana. Naamwi yaari  woorakamela, awo yaahiisoona okhala vamoha ni muloko wa achu awaakhwana 44.131. Munna mmoha aarepa: “Ninnathamalela ni murima woothene, woonihiwa yaweereya yeela. Eyo yoonooniherya ophiyerya mweeryo taani munanuupuwelaanyu.”

Vaavaa alipa a mukucho a Isarayeli yoopaaya nipenka nimoha, yaawiichana “ahooleli a maloko aIsarayeli wi erwe yaaworu” mmusakala wa muthukumano. (Nam. 10:4) Weiwo, awo yanwerya waakhela sooleeliherya ni ovyakiha orweela wa Mose. Eyo yaahaala waakhaviherya waakhwaniherya mirici saya mmahimo aya. Waakhanle wi mwa mmoha a ahooleli yaale, apwanne himwaahaala opaka soothene munaweryaanyu wi mphwanyeye va muthukumano wi mukhaviheryeye?

Olelo, atokweene a mmulokoni hari ntoko “ahooleli” akhalai; naari mano haniiseera okhala pwiya a muhuwo wa Muluku yoowo anakhapelelaaya. (1 Ped. 5:1-3) Nyenya awo annapaka owetha waya woothene wi ekukhule muhuwo. Hiihaa, awo anneemererya vaavaa anawompwaaya wi evyakihiwe, ntoko Exikola ya Orummwa wa Omwene. Variyari va ovyakihiwa yoola, atokweene annahuserya mukhalelo wa okhumelela phaama mu okhapelela waya miyaha sa muloko. Ela ennakhaviherya wunnuwa omunepani wa oothene. Naamwi muhivolonwe mu ixikola seiho, woonaru munnaakhela mphurelo orweela wa anna yaawo avyakihiwe.

Ikwaha ikina, alipa a mukucho a Isarayeli yaanoopa nipenka mootitelela. Ela yooniherya wi Yehova onachuna wi muloko woothene ocimule. (Nam. 10:5, 6) Vaavaa achu yaacimulaaya, yeerano mmukhalelo wooreheryeya, nyenya waanakhalavo muteko mutokweene. Vakina vaya, akina yaanoona okhala woovila ocimula. Ntakhara heeni?

Akhweya akina yoona wi oruma wa nipenka wi ecimule weereya wiiliwiili, nave mu elukuluku yoohiwehereryeya. ‘Nari tho, neeku neemela ohiyu omoha, nari nihiku nimoha.’ Vakina vaya “mahiku meeli nari mweeri nari mahiku mancipale” ehicimunle. (Nam. 9:21, 22) Vano, ikwaha kavi muloko waaphwanelaaya othaama? Liivuru a Namarepela ekapitulu makhumi mararu nararu ennaloca mapuro makhumi masese Aisarayeli yeemenlaayamo.

Vakina vaya, akina yaanaphwanya nipuro orivo muuruxi. Eyo yaanwerya okhala echu yaphaama woona wi yaari mu elapo yawuuma mu ‘ntakhwa ntokotoko ni nawoopiha.’ (Malam. 1:19) Ocimula mapuro ntoko yaala waahaala okhala woovila. Awo yaahaala wuupuwelaka wi hiyaahaala ophwanya nipuro nikina ntoko nenle.

Vaavaa mahimo yaapaceryaaya ocimula, akhweya akina yaanoona okhala woovila oweherya wi ephiye elukuluku aya ya ocimula. Oothene yaaniiwa oruma wootitelela wa nipenka, nyenya tahi wi oothene yaanawerya ocimula mu elukuluku emohamoha. Oruma iwo wootitelela wa nipenka, yaari eneneeryo wi mahimo yaawo yaamanke makupa onakhumawo nsuwa, ntoko, Yuta, Isakari, ni Sepuloni, yaaphwanela ocimula. (Nam. 2:3-7; 10:5, 6) Awo emanle ocimula, alipa a mukucho yaanarumiha nipenka mootitelela ekwaha yanaawiili, evahaka eneneeryo wa mahimo mararu yaari makupa onayawo nsuwa. Alipa a mukucho yaanatitelela weerano yeela ophiyerya muloko woothene ocimunle.

Akhweya nyuwaano montoko woona okhala woovila ochariha matorokelo makina mmarehereryo a Yehova. Akhweya mwaahaleeliheya vaavaa moonnaanyu matorokelo mancipale oohiwehereryeya. Akhweya mwaanasiveliwa ni meerelo akhalai ophiyerya munachuna wi yahipakiwe matorokelo. Akhweya mwaakhalano mathowa yaaweerinheeni wuupuwela wi opixa wanyu murima waaneehiwa, nave yaaviravo elukuluku wi mwiikhovelelihe matorokelo mavyaani. Nyenya naamwi hiiha, wakhala wi ninniilipixerya ochariha yeeyo nsuwenlaahu wi ti yaphaama, nnahaala woona wi Yehova onnanreeliha.

Mmahiku a Mose, Yehova aahaahoolela macikhwi macikhweene a alopwana, athiyana, ni anamwane ovira mutakhwani. Ohirivo okhapelela ni ohoolela wa Yehova, awo hiyaahaala okophola. Olelo, ninnakophola omunepani moorweela wa ohoolela wa Yehova. Chiryene owo onnanikhaviherya olipiha nroromelo nahu ni onthamwene ahu ni yoowo! Mwawiihiiha, oothene ahu nikhale oolakelela waakhulela hiiha ntoko Aisarayeli oororomeleya yeeraaya vaavaa yiiwaaya oruma wa nipenka!