1. Ti mwawiihai Yehova onalikaneiye ni maayi onaamwiha?

“MAAYI onaamwiha, onnamucuwala mwanawe?” Yehova aapaka nikoho nenla mmahiku a mulipa a miririmu Isaiya. Voocharela Muluku aaloca wa achu awe: “Nari owo amucuwalaka, miyo nkirwa koocuwala weyo.” (Isa. 49:15) Tahi wi wiiliwiili owo onniilikanyiha ni maayi. Nyenya, owo aaheerano mu ekwaha yeele. Owo aapharihela niphwanya maayi onakhaleiyeno ni mwanawe wi ooniherye mukhalelo onaathokororyeiye akapuro awe. Asimaayi ancipale, aakhalano moonelo mmohamoha ntoko wa murokora awiichaniwa Hasimina, yoowo aariye: “Vaavaa maayi onaamwiheiye, onnakhalano niphwanya ntokweene ni mwanawe, nenlo nihinamala.”

2. Yehova onoona hai wakhala wi mmoha a anamwane awe ooceecheya?

² Yehova onnasuwela wakhala wi mwanawe oohiya ophiya mmithukumano ni oya mmuteko woolaleerya. Vano, mwaanyiherye wiicela Yehova onooneiye vaavaa onawooneiye akapuro awe macikhwi macikhweene ekhalaka ooceecheya * eyaakha ti eyaakha.

3. Tiheeni Yehova onachuneiye?

³ Ancipale a anna ni arokora yaala ari ooceecheya, annaakheliwa phaama vaavaa anakookelaaya mmulokoni! Yehova onachuna wi ekooke, ti yeeyo tho hiyaano nnachunaahu. (1 Ped. 2:25) Nni naakhaviherye hai wi ekooke? Nihaakumve waakhula nikoho nenla, yaahaala okhala yaphaama osuwela mathowa aweerinhe akina omaala ophiya mmithukumano ni oya mmuteko woolaleerya.

4. Muteko wa elapo oni omvolowele hai muchu?

⁴ Akina aaceecheya nthowa na okuha muteko wa elapo mu nipuro noopacerya. Munna mmoha awiichaniwa Hunku, * yoowo onakhala o Asiya ooloca: “Kaaheemererya wi muteko aka okivolowele vancipale. Moolosowa, kaaloca mukhataaka kiriki, kakhalano muhakhu kineeraaka kiwerye omurumeela phaama Yehova. Mwawiihiiha, kaanalapa iwora sincipale. Kipacerya oyeleela mithukumano sincipale, nave ohoolo waya kaahiya oya mmithukumano. Enakhala ntoko wi yoolakelela ya elapo ori waahuweliha achu a Muluku vakhaani-vakhaani.”

5. Makacamiho matokweene yamvolowenle hai murokora mmoha?

⁵ Anna ni arokora akina annaceecheya nthowa na makacamiho. Murokora mmoha o Krapretanya awiichaniwa Anne, yoowo orino anamwane athanu ooloca: “Mwanaka mmoha toorakala, nave moovira wa elukuluku mwanaka mmoha amwaamuthiyana aahiikariwa mmulokoni, nave mukina amwaamulopwana aakhalano masooso a mmuupuwelo. Kaanatepa wuukhuwa ophiyerya kihiya ophiya mmithukumano ni olaleerya. Mwawiihiiha, kaaceecheya.” Ninnakhupanyerya emusi ya Anne vamoha tho ni akina yaawo anahoolela makacamiho ntoko yaala!

6. Ntakhara heeni muchu oneereiye iivalaanye ni achu a Yehova wakhala wi hanapharihela yoorepa ya Kolosi 3:13?

⁶ Mwaalakhanye Kolosi 3:13. Anamoona a Yehova akina, aaceecheya nthowa na yeeyo eereliwaaya ni Akristu akhwaaya. Murummwa Paulo aaheemererya wi vakina vaya, nnamukhalakano “mwaha” ni annihu naari ni arokora ahu. Naari akhweya nnamukhalihiwa moonanara. Naahikhalano ekaasoope, nnamukuhaka mathowa. Moovira wa elukuluku, onyeenyeya onammweeriha muchu wiivalaanya ni achu a Yehova. Muthokororye yaweereya ya munna Pablo onakhala o Amerika Oohico. Aahootheriwa wi aaheerano echu yoonanara, ntoko yookhumelela, aayeleela mirici sawe mmulokoni. Tiheeni eenreiye? Owo onnaloca: “Kaanyeenyeya, nave vakhaani-vakhaani kaahiya oya mmithukumano.”

7. Tiheeni eni yeereye ni muchu yoowo oniiphwanyerya mathowa?

⁷ Yawuupuxerya-ya-murima enanwerya omuhooxa muchu yoowo aachekenle malamulo a Muluku khalai, aniisoona wi hanaphwanela waakhela osivela wa Muluku. Naamwi acharunwe ni omoreliwa ikharari, owo onanwerya wiisoona wi hari oophwanelela okhala vamoha ni achu a Muluku. Munna awiichaniwa Francisco aakhalano moonelo mmohamoha. Owo ooloca: “Kaalakiwa nthowa na opaka mararuwo, naamwi kaaya mmithukumano woopaceryani, kaaceecheya ophiyerya wi kiniisoona wi nkinaphwanela okhala vamoha ni achu a Yehova. Nlelo kaaniisoona okhalano nthowa, nave kuupuwela wi Yehova haakilevelenle. Moovira wa elukuluku, kaahiya oya mmithukumano.” Munawoona hai anna ni arokora yaawo anahoolela makacamiho ntoko yaala nimanlaahu othokororya? Munnamoriwa ikharari ni yaawo? Echu yoochuneyaxa, Yehova onawoona hai?

8. Apwanne Yehova onnaacuwala yaale amurumeenle? Mutharihe.

⁸ Yehova harwa aacuwala yaale amurumeenle yoowo nave hiihaano yiivalaanya ni achu awe, naari mano hacuwala yeeyo eenraaya mmuteko awe. (Ahe. 6:10) Mulipa a miririmu Isaiya, ooloca niphwanaphwaniho naphaama nenlo nnooniherya mukhalelo Yehova onaakhaliheiye achu awe. Isaiya aarepa: “Ntoko mukukhula, annalyiha ipucepuche saya, annaathukumanya asaana, yaakusha, ewuupaara.” (Isa. 40:11)  Vano, Mukukhula Mutokotoko onoona hai wakhala wi epucepuche awe yohiivalaanya ni muhuwo? Yesu aahooniherya moonelo wa Yehova vaavaa aakonheiye oohuserya awe ariki: “Nkha nyuwo munoona hayi? Muchu orino ipucepuche nsana, emoha yarimeela, owo hanahiya omiyaakoni iye makhumi mathanu nasheshe ni ipucepuche thanu nasheshe, aya anaavya yeele erimenle? Aphwanya, chiri kinnooleelaani wi onamuhakalalasha ni yeeyo, opwaha iye ihirimeenle makhumi mathanu na masheshe ni ipucepuche thanu nasheshe.”—Mat. 18:12, 13.

9. Ti mwawiihai akukhula aphaama mmahiku akhalai yaathokororyaaya ipucepuche saya? (Moone eruku va ekaapa.)

⁹ Ntakhara heeni ti woophwanelela omulikanyiha Yehova ni mukukhula? Nthowa nawi mukukhula aphaama a mmahiku akhalai aanathokororya phaama ipucepuche sawe. Ntoko yootakiherya, Tavite aawana ni mwaco vamoha ni ursu wi aakihe epucepuche awe. (1 Sam. 17:34, 35) Mukukhula aphaama onnasuwela waakhala wi epucepuche enachuna opheruwa. (Yoh. 10:3, 14) Mukukhula ntoko yoowo onnahiya ipucepuche makhumi mathanu namaxexe ni ipucepuche thanu naxexe mu nipuro nookhapeleleya naari ni nthamwene awe wi aavye yeele emoha erimeenle. Yesu aapharihela niphwanaphwaniho nenla wi anihusihe eparipari ela yoochuneya: “Atiithinyu awirimu hanakhwela wi arimeele nari mmoha asikhaani yaala.”—Mat. 18:14.

10. Mwawiiwanana ni Ezekiyeli 34:11-16, tiheeni Yehova ororomelinheiye weera wa ipucepuche sawe soorimeela?

¹⁰ Yehova onnamusivela mmoha ti mmoha a hiyo, ophitaanyerya “asikhaani” yaale aniivalaanya ni muhuwo awe. Moorweela wa mulipa a miririmu Esekiyeli, Muluku aaroromeliha wi aahaala waavya ipucepuche sawe soorimeela ni okhaviherya okhalano onthamwene woolipa ni yoowo. Owo tho aaloca mooluluwanya meerelo aahaaleiye ochara wi oopole ipucepuche, meerelo yaawo tho mukukhula o Isarayeli aahaaleiye ochariha wi aphwanye epucepuche erimenle. (Mwaalakhanye Ezekiyeli 34:11-16.) Yoopacerya, mukukhula aaphwanela waavya epucepuche, weiwo waahaala ochuneya elukuluku ni wiilipixerya. Yanaawiili, amanle  ophwanya epucepuche yoorimeela, mukukhula aaphwanela okuxa wi yakhale ni muhuwo. Yaneeraru, wakhala wi epucepuche eyo yoohooxeya naari ohorokonyeya, mukukhula aaphwanela ovaha nikhaviheryo moosivela, omaka makhwaca a mwaaxinama, okhapelela ni olyiha. Atokweene, yaawo ari akukhula a “muloko wa Muluku” anaphwanela ochariha meerelo mamohamoha wi emukhaviherye yoowo ohin’ye othukumana ni muloko. (1 Ped. 5:2, 3) Atokweene annawaavya, waakhaviherya okookela mmulokoni, ni wooniherya osivela wa yaawo moorweela wa waakhaviherya okhala asinthamwene a Yehova. *

11. Tiheeni mukukhula aphaama oniiwexexeiye?

¹¹ Mukukhula aphaama onniiwexexa wi epucepuche enanwerya orimeela. Vano, wakhala wi epucepuche yoorimeela, mukukhula hanakhaliha moowali. Muthokororye yeeyo Muluku enreiye wi amukhaviherye mulapeli awe, yoowo ekwaha emoha, aahin’ye opaka yoochuna ya Yehova.

12. Yehova aamukhalinhe hai Yona?

¹² Mulipa a miririmu Yona aachawa muteko aavahiweiye. Naamwi hiiha, Yehova haamuhin’ye mwawaakuveya Yona. Ntoko mukukhula aphaama, Yehova aamukhaviherya okookela wanaawiili ikuru aachuneiye wi aakhwaniherye muteko awe. (Yona 2:7; 3:1, 2) Ohoolo waya, Muluku aapharihela mwiri wi amukhaviherye Yona wiiwexexa esisapo ya okumi wa muchu ti muchu. (Yona 4:10, 11) Tiheeni nnahuseryaahu? Atokweene hanaphwanela waahiya mwawaakuveya yaale aceechen’ye. Ohiya yeeyo, atokweene anneererya wiiwexexa echu yeerinhe wi epucepuche yiivalaanye ni muhuwo. Nave wakhala wi epucepuche eyo yookookela wa Yehova, atokweene annatitelela wooniherya osivela ni opwacha.

13. Tiheeni nnahuseryaahu orweela wa yeeyo Yehova eenreiye wa namarepa a Salumu 73?

¹³ Namarepa a Salumu 73 aanaakhalela nrima achu oonanara murima vaavaa aawooneiye wi yaanakhumelela phaama. Owo aaniikoha waakhanle wi weera yoochuna ya Muluku yaari echu yoophwanelela. (Sal. 73:12, 13, 16)  Tiheeni Yehova eenreiye? Owo haamuthorinhe. Nyenya, aaheeriha wi masu awe erempwe Mpiipiliyani. Ohoolo waya, owo aahiiwexexa wi hiyaavo echu yaphaamaxa mweekumini opwaha okhala nthamwene a Yehova. (Sal. 73:23, 24, 26, 28) Tiheeni nnahuseryaahu? Atokweene hanaphwanela waathoriha mwawaakuveya yaale anapacerya okhwa minikwa vooloca sa mphurelo wa omurumeela Yehova. Ohiya waathoriha, atokweene anaphwanela weererya wiiwexexa mathowa anaweeriha oloca naari weera mmukhalelo yoowo. Voocharela, atokweene ananwerya ompharihela Piipiliya wi yaalipihe.

14. Ntakhara heeni Eliya aanachuna nikhaviheryo, nave Yehova aavaherenrye hai?

¹⁴ Mulipa a miririmu Eliya aamuchawa Mwene amwaamuthiyana Yesapeli. (1 Mam. 19:1-3) Owo uupuwela wi haarivo muchu mukina aarumeela ntoko mulipa a miririmu a Yehova, nave oona wi muteko awe hiwaarino mphurelo. Eliya aatepa wuukhuwa, ophiyerya anachuna okhwa. (1 Mam. 19:4, 10) Ohiya omuthoriha Eliya, Yehova aamuroromeliha wi owo haari meekheiye, wi aaphwanela ororomela ikuru sa Muluku, nave wi nlelo waakhalavo muteko wawaaca wi apake. Yehova aawiriyana moonelo wa Eliya moopixa murima nave aahimvaha muteko muvyaani. (1 Mam. 19:11-16, 18) Tiheeni nnahuseryaahu? Oothene hiyo, xaxaxa atokweene, anaphwanela okhalihaka moopixa murima ipucepuche sa Yehova. Vaavaa muchu onaloceiye sawuukhula sawe naari vaavaa oniisooneiye wi hanaphwanela waakhela ikharari sa Yehova, atokweene anahaala onwiriyana vaavaa onaloceiye eri mmurimani mwawe. Voocharela, awo anahaala ororomeliha epucepuche yoorimeela wi Yehova onnavaha esisapo.

15. Mwawiiwanana ni Yohani 6:39, Yesu oona hai ipucepuche sa Atiithi awe?

¹⁵ Yehova onachuna wi nooneke hai epucepuche awe erimeenle? Yesu oonivaha yootakiherya. Owo aanasuwela wi ipucepuche soothene sa Yehova ti soochuneya vamiithoni va Muluku. Mwawiihiiha, owo aaheera soothene aaweryeiye wi akhaviherye “ipucepuche soorimeela sa muloko wa Isarayeli” okookela wa Yehova. (Mat. 15:24; Luka 19:9, 10) Ntoko mukukhula aphaama, Yesu aaheera soothene aaweryeiye wi ehikhale epucepuche ya Yehova eni erimeele.—Mwaalakhanye Yohani 6:39.

16-17. Atokweene anaphwanela woonaka hai vooloca sa waakhaviherya yaale apherunwe? (Moone ekaaxa “ Epucepuche Yoorimeela Eniisoona Hai?”)

¹⁶ Murummwa Paulo aahaaceenyerya atokweene a muloko wo Efeso ochariha yootakiherya ya Yesu. Owo aaloca: ‘Munaphwanela waakhaviherya oocecheya. Muupuwele masu Apwiya Yesu yaaloncaaya, eriki: “Ooreeriwa ti yoowo onavaha, ompwaha onaamwaakhela.”’ (Saw. 20:17, 35) Mweeparipari, mmahiku yaala, atokweene aakhalano muteko wavameekhaaya mmwaha yoola. Mutokweene mmoha awiichaniwa Salvador, o Espanya ooloca: “Kaawuupuwelaka mukhalelo Yehova onakhapeleleiye ipucepuche sawe soorimeela, kinnaceenyeryeya opaka soothene kinaweryaaka wi kikhaviherye. Ntoko mukukhula oomunepani, koolekecheya wi Yehova onachuna tho wi kithokororyeke seiho.”

¹⁷ Oothene alociwe mmwaha yoola yaawo yaapherunwe, yaakhaviheryiwa okookela wa Yehova. Mu elukuluku yeela, ancipale yaawo apherunwe annachuna weerano emohamoha. Mwaha onacharela onahaala othokororya ichu ikina nnaphwanelaahu weera wi naakhaviherye okookela wa Yehova.