Kiyariwe mu 19 a Maiyu a 1940 mu epooma emoha yawiichaniwa Amioûn o Lipano. Iyaakha vakhaani ohoolo waya, naathaamela epooma yo Tripoli. Kiphwiwale mu emusi yoosivela ni yoohakalala yeeyo yaamurumeela Yehova. Kaari a mukhaani wa anamwane athanu, aasithiyana araru ni aasilopwana eeli. Wa asitiithi aka okhalano ikhorowa hiyaari echu yoochuneyaxa. Hiyaano naaweiwa ni omuhuserya Piipiliya, oya mmithukumano ni olaleerya michaka yaphaama.

Mmuloko ahu yaakhalamo anna ancipale oothanliwa nave mmoha a yaawo aari Michel Aboud yoowo eeciha yoohuserya yeeyo niichanaahu yoohuserya ya liivuru. Michel aahusenrye eparipari o Nova York, nave ti yoowo aaruuhale eparipari o Lipano, mu eyaaka ya 1920. Voocharela muloko ahu wawaakhela arokora eeli yaawo yaakwaanxe Exikola ya o Kiliyati, Anne ni Gwen Beavor. Miyaano kinnuupuwela mukhalelo Michel aakhaliheiye mwa ncicimiho nave ilukuluku soothene aakhala ooreheryeya waakhaviherya. Nave awo yaakhala asinthamwene ahu aphaama. Iyaakha ohoolo waya, kaakhala ohakalala vaava naakumannaahu wanaawiili ni Anne o Estatu Unitu. Nave elukuluku vakhaani ohoolo waya, kaakumana ni Gwen yoowo aarumeela o Epeteli yo Londres, o Inklatera vamoha ni aiyawe Wilfred Gooch.

Vaava kaaryaaka mmiravo, yaariwo anamoona vakhaani o Lipano. Nyenya naari amvai mmuteko woolaleerya. Ilukuluku soothene naanaloca sa Piipiliya ni akina, moohipwacha wiiciwa ni ahooleli a malapelo. Miyaano nlelo kinnuupuwela ichu ikina seiho seeren’ye ni hiyaano.

Nihiku nimoha, miyaano ni murokoraka Sana naalaleerya mu eperetiyu emoha yeeyo achu yaalukaaraayamo. Voocharela, patiri mmoha aarwa o empa yoosulu yeeyo naalaleeryaahumo. Akhweya okhala aamulenle sa muteko ahu woolaleerya. Patiri aapacerya omuruwana murokoraka. Voocharela aanyeenyeya nave amukakhela Sana va exikata ya vathi, nave aaphoreya. Vaava yeereyaaya yeela, muchu mmoha ahaalikaarela mapilisa. Vaava mapilisa yaaphin’yaaya mooreera murima yaaveka wi Sana akhapeleliwe, nave yaamukuxa patiri emukeriha onipuro naya noothoriha. Vaava yaaphin’yaaya onipuro noothoriha mapilisa yaahoona wi patiri aakhalano kapwichi. Mutokweene a mapilisa amukoha: “Onleele weyaano waani, wa muhooleli a ekerexa naari wa muhooleli a nikhuuru na mapantitu?”

Kinnuupuwela tho nihiku nimoha naapankaahu mukwaha n’yaaka mmuteko woolaleerya. Muloko ahu waahaalukaara ekaaro emoha wi n’ye epooma yoorakamela. Ichu saaneeca phaama, ophiyerya vaava patiri a epooma yeele aasuwenleiye wi naari mmuceche yoole. Owo aathukumanya nikhuuru na achu nave yaarwa wi enihiphele. Ophiyerya wi yaanivonya maluku. Apapa aka yaaphoreihiwa variyari va ohiphela yoole. Kinnawuupuwela esaren’ye nikhami owano woothene. Awo yaakookela mukaaroni ni amamaaka, nave anna oothene yaaheerano emohamoha. Voocharela kaahoona echu yeeyo kihinahaalaaka ocuwala. Vaavaa amama yaapupucaaya wiithoni wa apapa, awo yaaloca: “Khoo Yehova, mwaakhurumuwele achu yaala. Awo hanasuwela echu aneeraaya.”

Yaakhalavo tho ekwaha ekina vaavaa naakelaahu waaxekurya amusi ahu mu epooma yeeyo kaayariwaakawo. Vaavaa naaphin’yaahu vaate wa avovo aka, naamphwanya muhooleli a malapelo mutokweene, pispu. Pispu aasuwela wi asitiithi aka yaari Anamoona a Yehova. Naamwi kaarino iyaakha thanu nammoha, owo aakikeriha okhwipi nave aakikoha: “Ntakhara heeni weyaano nlelo hopatisiwe?” Kaahaakhula: “Tiwi nlelo ka mwaana. Wi kipatisiwe, kinaphwanela osuwela sincipale vooloca sa Piipiliya ni okhalano nroromelo noolipa.” Pispu haasiveliwe ni mukhalelo kaamwaakhunlaaka. Owo aahaaleela avovo aka wi nkaarino ncicimiho.

Moohakalaliha, saweereya sooceecheiha ntoko seiha saari savakhaani. Mweeparipari, achu a o Lipano yaari oonthamwene ni oowaakhela aleco. Yaari yawunlaana okhalano ochekula waphaama vooloca sa Piipiliya nave naaneeciha soohuserya sa Piipiliya sincipale.

Vaavaa kaahuseryaaka, munna mmoha yoowo ari mmiravo o Venesuwela aanixekurya o Lipano. Owo naathukumana vamoha mmuloko ahu, nave moovira wa elukuluku, aapacerya omuurya murokora aka Wafa. Ohoolo waya, awo yaathelana, nave yaaya okhala o Venesuwela. Wafa aanakhalano munkhela ni hiyaano, mwa yeeyo, mu ikaarata sawe, owo aaneererya waalekecha atiithi aka wi nthaamele o Venesuwela. Wookuchulani, owo aaneeriha othaamela o Venesuwela!

 Naaphiya o Venesuwela mu 1953 nave naakhala o Karaka, waacamela empa ya presidente. Woona wi kaari mmiravo, kaanakhala ootikhiniheya vaavaa kaawoonaaka a presidente eviraka ni ekaaro aya yavasulu, eteexiwe ni motorista avameekheiye. Nyenya hiwaari wookhweya wa asitiithi aka wiikhoveleliha ni elapo, elocelo, sookhovelela, yoolya ni mukhalelo wa elapo. Mweeparipari, “vaavaa yaapacenryaaya wiikhoveleliha,” echu yoothananiha yaaheereya.

Atiithi aka yaapacerya ohoona phaama mmwiilini. Eyo yaari echu yaahintoko weereya, woona wi atiithi aka yaari akuru ni yaakhalano ekumi yaphaama. Kiloce wi, nkaantonko owoona yiiceliwaka. Voocharela awo yaaphwanyiwano kanser va ipankreiya, nave waanachuneya wooperariwa. Moothananiha, awo yaakhwa mu esumana yoocharela.

Ti woovila othariha mukhalelo naathanannaahu. Miyaano kaarino pahiru iyaakha 13. Naakhala oohaleeliheya. Nuupuwela wi hinaahaala okhalano ohakalala wanaawiili. Yaaviravo elukuluku yincipale, wi amama yeemererye wi apapa yaakhwa. Naahiiwexexa wi naaphwanela ohiya wuupuwela sa muculi, nave nnikhaviheryo na Yehova naawerya ocuwala vakhaani. Vaavaa kaaryaakano iyaakha 16, kaaya mu exikola yavasulu o Karaka. Kaanachuna okhaviherya ovakulela emusi aka.

Mu elukuluku yeeyo murokora aka Sana aatheliwa ni Rubén Araujo, yoowo aakwanxe exikola yo Kiliyati nave akookela o Venesuwela. Awo yaalakelela othaamela o Nova York. Emusi aka yaalakelela wi kapake exikola yavasulu o Nova York, nave kaaya kanakhala ni murokora aka ni amulamu. Awo yaakikhaviherya wunnuwa mmakupa oomunepani. Ohiya yeeyoru, naakhala mmuloko waaloca elocelo ya Espanyola o Brooklyn nave yaakhalamo anna ancipale a mavyakelo. Anna eeli yaawo kaaryaakano ekari ya waasuwela phaama yaari Milton Henschel ni Frederick Franz, ooweeli yaarumeela o Peteli ya Brooklyn.

Kihanle vakhaani okwaaxa mahusiheryo aka a vasulu mu eyaakha yoopacerya o Nova York, kaapacerya okhwa minikwa vooloca sa yeeyo kaapakaaka mu okumi aka. Kaahaalakhanya miyaha sa Mulipeleli saaloca sa otikitherya soolakelela soomunepani nave kaanuupuwelela vancipale seiho. Vaavaa kaawoonaaka mapiyoneero ni mapetelita a mmulokoni, kaanoona wi awo yaari oohakalala, nave kaanachuna okhala ntoko yaawo, nyenya nlelo kiiha kihipatisiwe. Vano kaahiiwexexa wi kaaphwanela oveleela ekumi aka wa Yehova. Ti yeeyo kenraaka. Nave mu 30 a Marsu a 1957, kaapaka yoolakelela yoochuneyaxa, kaapatisiwa.

Kimanle opaka yoolakelela yeela yoochuneya, kaahuupuwelela teevi yaahaala okhala yoocharela—ovolowa mmuteko wa elukuluku yoothene. Nchuno naka na okhala piyoneero naanaaceereryeya, nyenya kaahiiwexexa wi opaka yoolakelela yeela waahaala okhala woovila. Ki kiwerye hai waakhwaniha muteko woopiyoneero ni mahusiheryo aka a vasulu? Naapacerya orepelana ikaarata, kaatharihelaka amama ni asinnaka wi kaapaka yoolakelela ya ohiya mahusiheryo a vasulu, wi kikookele o Venesuwela nave kakhale piyoneero.

Kaahichikela o Karaka mu Yunyu a 1957. Nyenya kaahoona wi mukhalelo wa amusi aka hiwaari  waphaama. Waari woochuneya wi mmoha a emusi ahu apacerye olapa. Ki kikhaviherye hai? Kaavahiwa ekari wi kalapeke opanku, nyenya miyo kaachuna okhala piyoneero. Chiryene, ela yaari echu yeeyo yaakeerinhe okookela o Venesuwela. Nto kaalakelela opaka soopiili. Mu iyaakha sincipale, kaanalapa mu ilukuluku soothene opanku nave kaarumeela ntoko piyoneero. Yaari elukuluku ya ekumi aka kaakhalaaka ooweiwa, nyenya tho oohakalala!

Echu yaaceerenrye ohakalala waka yaari vaavaa kaamusuwenlaaka Sylvia, murokora aphaama a wa Alemanya yoowo aamusivela vancipale Yehova. Owo aahithaamela o Venesuwela vamoha ni asitiithi awe. Naahithelana nave, mu elukuluku vakhaani ohoolo waya, naahikhalano anamwane apiili, mwaana a mwaamulopwana Michel ni mwaana a mwaamuthiyana Samira. Nave tho waari woochuneya wi kinaakhapelela amama aka, mwawiihiiha awo yaarwa enakhala ni hiyaano. Wa nthowa na waakhapelela amusi aka, kaalakelela ohiya muteko wa elukuluku yoothene, nyenya nlelo kaahikhalano nchuno na opiyoneero. Mu elukuluku ya ifeeriya, Sylvia ni miyaano naanapharihela yeeyo wi nrumeele ntoko mapiyoneero ookhaviherya.

Nlelo anamwane aka yiiha ehuseryaka, vaavaa yeeren’yaaya echu yeeyo kiloncaaka woopaceryani wa mwaha yoola. Mweeparipari ekumi aka yaari mmukhalelo waphaama. Nave kaakhalano meecelo aphaama variyari va achu yaawo kaalapaakano opanku. Naamwi hiihaa, echu kaachunaakaxa waari wi achu ekooneke ntoko mulapeli a Yehova. Muupuwelo yoole kaaryaakano hiwaapwanhemo mmuruni mwaka. Mwawiihiiha, miyaano ni amwaaraka naahivaanela vooloca sa ikhorowa. Waakhanle wi kookhumawo opanku, kaahaala waakhela ikhorowa sa waacereryiwa. Woona wi hinaawaarino ivaale, hiyo naahaanyiherya wi, wakhala wi nookhweiha okumi ahu, nlelo naahaala okhalano ikhorowa sawaakhwanela wi ititelele onikhaviherya mu elukuluku yincipale.

Hiwaari wookhweya opaka yoolakelela yeela, nyenya amwaaraka ni amama aka yaahikikhaviherya. Mwawiihiiha, wanaawiili, miyaano kaahaala ovolowa mu nikhuuru na alapeli a elukuluku yoothene. Yaari yoohakalaliha! Ichu naaweheryaahu ohoolo waya saari saphaamaxa, nyenya mu elukuluku vakhaani, naahaakhela muchaka yoowo waantikhininhe oothene ahu.

Nihiku nimoha, totore ahu aahinileela wi Sylvia oorupala. Yaari yootikhiniha etokweene wa hiyaano! Naahitepa ohakalalaxa. Naamwi hiiha, kaahititelela wuupuwelela yoolakelela aka yeele kaapankaaka ya okookela okhala piyoneero. Apwanne kaahaala  owerya okookela mmuteko wa elukuluku yoothene? Hiyaano naahiikhoveleliha mwawaakuveya mwaha yoola nave naahipacerya oweherya okhalano mwaana mukina mu emusi ahu. Hanka vooloca sa yoolakelela kaapankaaka wi kirumeele ntoko piyoneero?

Nimanle ovaanela vooloca sa soolakelela sahu, naahoona wi naaphwanela otikitheryeya mu marehereryo yaawo naapankaahu voopaceryani. Mwanihu Gabriel aayariwe mu a Apirili a 1985. Voocharela miyaano kaahikhumawo opanku nave kipacerya orumeela ntoko piyoneero ookilaatheya wanaawiili mu Yunyu a 1985. Evinrevo elukuluku, kaahaakhela ekari ya opaka makupa a Nikhuuru na Efiliyale. Nyenya woona wi epeteli hiyaari o Karaka, ikwaha piili naari raru va esumana, kaaphwanela weeca mukwaha wa ikilomeeturu 80 wi kaphiye weiwo.

Epeteli yaakhala mu epooma ya La Victoria. Nyenya, wi nikhuveele, naalakelela othaamela weiwo. Ala yaari matorokelo matokweene wa hiyaano. Nkinawerya othariha otikhina ni othamalela kiryaakano wa amusi aka. Nikhaviheryo naya naakikhaviherya vancipale. Murokora aka Baha aahiivaha wi aakhapeleleke amama ahu. Michel iiha athenle, nyenya Samira ni Gabriel yaakhala ni hiyo, naari wi, othaamela o La Victoria yaaheeriha wi yaahiye asinthamwene aya oothene. Ohiya yeeyoru, amwaaraka oochuneya Sylvia yaawo yaakhovelenle okhala mu epooma yawaaciwamo, yaaphwanela wiikhoveleliha mu epooma ekhaani. Nave oothene ahu naaphwanela wiikhoveleliha okhala mu empa ekhaani. Moohikhwa minikwa, othaama o Karaka n’yaaka o La Victoria naari nikacamiho ntokweene.

Voocharela, ichu saahitorokeya wanaawiili. Gabriel aathela nave Samira aahaala owerya okhalaka mukhateiye. Voocharela, miyaano ni Sylvia, naahiwompwa wi napake makupa a emusi yo Peteli mu 2007, nave ti weiwo nnakhalaahuwo ophiyerya olelo. Michel, mwanihu a mutokweene, onarumeela ntoko mutokweene a mmulokoni ni piyoneero vamoha ni amwaariye, Monica. Gabriel mutokweene tho a mmulokoni, nave onakhala o Italiya, vamoha ni amwaariye Ambra. Samira, naamwi ari piyoneera, onarumeela ntoko mukhaviheryi Opeteli.

Mookumini mwaka, miyaano koopaka ichu sincipale soochuneya. Nyenya nkaano ekeerelani. Waakhanle woochuneya kaahaala opaka soolakelela imohamoha soothene wanaawiili. Kinnathamalela vancipale ikari seiho ni mirici kaaryaakano mmuteko aka wa Yehova. Moovira wa iyaakha, koowerya wiiwexexa wi ti woochuneya okhalano onthamwene woolipa ni Yehova. Nave wakhala wi nnachuna opaka yoolakelela vyakala, moohipwacha waakhanle wi ekhaani naari etokweene, Yehova onanwerya onivaha murecele, yoowo ‘onapwaha osuwela woothene.’ (Fil. 4:6, 7) Sylvia ni miyaano ninnasiveliwa vancipale orumeela Opeteli. Nave ninneemererya wi Yehova oonireeliha ni oonihoolela mu soolakelela soothene nipankaahu.