Paulo aarepa: “Kiri ookhweene ni ichu sa malamulo wi kikhale mukumi wa Muluku.”—Gal. 2:19.

Paulo aarepenle masu yaala wa miloko so Roma mu eprovinsiya yo Kalata. Akristu akina a weiwo yaapacerya ovoloweliwa ni ahusiha oowoka. Achu yaala yaahusiha wi muchu aachunaka ovuluxiwa aaphwanela ocharihaka Nlamulo na Mose, xaxaxa othikiliwa. Nyenya Paulo aahisuwela wi Muluku haachuna wi achu etitelele ororomela othikiliwa. Owo aaloca mmukhalelo woolekecha ni aahooniherya wi mahusiheryo yaale yaari atheru nave aahaalipiha anna ororomela mukucho wa woopola wa Yesu Kristu.—Gal. 2:4; 5:2.

Piipiliya onnaloca mookwakwaleya wi vaavaa muchu onakhweiye, hanasuwelaru echu naari wi hanoona echu emurukurenrye. (Ekle. 9:5) Vaavaa Paulo aalonceiye wi: “Kiri ookhweene mu ichu sa malamulo,” owo aataphulela wi Nlamulo na Mose hinaarino owerya ori woothene wa yene. Moohiyana, Paulo aahilekecheya wi moorweela wa nroromelo nawe mwa mukucho wa woopola, owo ‘aari mukumi wa Muluku.’

Nlamulo naahitoroka mukhalelo wa Paulo. Mwawiihai? Owo aathariha wi “muchu haneeriwa oohikhalano nthowa vamiithoni wa Muluku mwa miteko sa malamulo a Mose, nto mwa ororomeleya wa Yeesu Kristu.” (Gal. 2:16) Mweeparipari, Nlamulo naakhwaniherya echu ekina yoochuneya. Paulo aahithariha wa Akristu o Kalata: “[Malamulo] yáhácheryeryiwa ntakhara a sotcheka, ophiyerya epyo erúle yeyo alakanenliye.” (Gal. 3:19, NN) Chiryene, Nlamulo naanooniherya wi achu oohiphaameya hiyaahaala owerya ochariha mwawaakhwanela Nlamulo, nave wi yaanachuna mukucho woophaameya. Mwawiihiiha Nlamulo naahaahoolela achu wa “epyo,” Kristu. Moorweela wa okhalano nroromelo mwa Yesu Kristu, muchu onanwerya weeriwa awookololowa ni Muluku. (Gal. 3:24) Paulo aahiloca mwaha ola nthowa nawi moorweela wa Nlamulo owo aaheemererya nave aakhalano nroromelo mwa Yesu. Paulo mwawaakuveya ‘aakhwa mu ichu sa malamulo’ nave ‘aakhala mukumi wa Muluku.’ Nlamulo hinaarino owerya mwa yene, nyenya Muluku taarino.

Paulo aaloca moonelo woolikana mu ekaarata awe wa Aroma. “Asinnaka, nyuwo tho mookhwa omalamuloni mwa mwiili wa Kristu . . . Vano ntaphuliwaahu wa malamulo, nri okhwa ene wa seiye saaniphara.” (Aro. 7:4, 6) Yoorepa yeela ni Galasya 2:19, ennooniherya wi Paulo haaloca sa okhwa ntakhara ochekela Nlamulo. Moohiyana, owo aaloca sa otaphuliwa orweela wa Nlamulo. Nlamulo hinaarino owerya wa yoowo ni wa akina ntoko yoowo. Awo yaari ootaphuwa moorweela wa ororomela mukucho wa Kristu.