1. Tiheeni Yehova eenreiye wa mmoha ti mmoha a hiyo?

YEHOVA oomukeriha mmoha ti mmoha a hiyo wa yene. (Yoh. 6:44) Muupuwele tiheeni yeela enataphulelaaya. Vaavaa Yehova aavareryeiye moopwacha amilyawu ancipale a achu veelaponi yavathi, owo aahoona echu yasisapoxa mwa nyuwo—murima anyu waphaama wa omusivela yoowo. (1 Math. 28:9) Yehova ohoosuwelaani, onnawiiwexexaani, nave onnoosivelaani. Ela ti yoolipihaxa!

2. Ti mwawiihai Yesu aaphwanaphwaninheiye opwacha wa Yehova ntakhara ipuchepuche Sawe soothene?

² Yehova onnoopwachaani vancipale, nave tho onneerano emohamoha wa anna ni arokora anyu Eekristu. Wi aphwanaphwanihe mwaha yoola, Yesu aamulikanyiha Yehova ni mukukhula. Wakhala wi epuchepuche emoha wa ipuchepuche 100 yoorimeela, tiheeni mukukhula onahaaleiye weera? Owo hanahaala ‘ohiya omiyaakoni ihe makhumi mathanu na masheshe ni ipuchepuche thanu nasheshe, aya anaavya yeele erimeenle?’ Vaavaa mukukhula onaphwanyeiye epuchepuche, owo hananyeenyeya ni yeeyo. Owo onnahakalala. Tiheeni nnahuseryaahuvo? Epuchepuche eri yoothene ti yoochuneya wa Yehova. Yesu aaloca: “Hiiha tho atiithinyu a wirimu hanakhwela wi arimeele naari mmoha a asikhaani yaala.”—Mat. 18:12-14.

3. Tiheeni nnahaalaahu othokororya mmwaha yoola?

³ Mweeparipari hiyaano hinnachuna waaceecheiha anna naari arokora ahu. Nni nsepe hai waakwaculiha akina? Nave tiheeni nnaphwanelaahu weera wakhala wi muchu mukina ooninyeenyeiha? Nnahaala waakhula makoho yaala mmwaha yoola. Nyenya woopaceryani, hankooni nthokororye vooloca sa “akhani ala” analociwa mu Mateu ekapitulu 18.

4. “Akhani ala” taani?

⁴ “Akhani ala” oohuserya a Yesu arino iyaakha soohiyanahiyana. Moohipwacha iyaakha saya, oothene yaawo “anamwane  akhaani” nthowa nawi annachuna ohusihiwa ni Yesu. (Mat. 18:3) Naamwi awo eri a ilapo soohiyanahiyana ni sookhovelela soohiyanahiyana nave erino miyoonelo soohiyanahiyana ni omuchu woohiyana, awo aakhalano nroromelo mwa Kristu. Nave Kristu onnaasivela vancipale.—Mat. 18:6; Yoh. 1:12.

5. Yehova onoona hai vaavaa muchu mukina onamukwaculiheiye naari omuhooxa mmoha a achu Awe?

⁵ “Akhani ala” oothene toochuneyaxa wa Yehova. Wi niiwexexe mukhalelo owo onooneiye, nthokororye mukhalelo hiyaano nnoonaahu vooloca sa anamwane. Awo toochuneyaxa wa hiyo. Ninnachuna waakhapelela woona wi haano ikuru, haano mavyakelo, nave haano miruku ntoko achu awunnuwelavo. Mweeparipari hiyaano hinnasiveliwa vaavaa nnamoonaahu muchu amuhooxaka mukhwaawe, nyenya nnanwerya onyeenyeyaxa wakhala wi muchu onnaahooxa anamwane. Mmukhalelo woolikana, Yehova onachuna onikhapelela. Owo hanasiveliwa—ophiyerya tho onnanyeenyeya—vaavaa muchu mukina onamukwaculiheiye naari omuhooxa mmoha a achu Awe!—Isa. 63:9; Mar. 9:42.

6. Mwawiiwanana ni 1 Korinto 1:26-29, elapo enawoona hai oohuserya a Yesu?

⁶ Mmukhalelo taani mukina oohuserya a Yesu aryaaya “akhaani”? Achu taani elapo enawoonaaya okhala oochuneyaxa? Alipa a muhakhu, oovuwa, ni oowerya. Nyenya oohuserya a Yesu hanooniwa hiiha. Achu a mulaponi anawoona awo ntoko achu oohichuneya,oohiphwanelela ni “akhaani.” (Mwaalakhanye 1 Korinto 1:26-29.) Nyenya Yehova hanawoona mmukhalelo yoowo.

7. Mmukhalelo taani Yehova onachuneiye wi niwooneke anna ni arokora ahu?

⁷ Yehova onnaasivela alapeli awe oothene, moohipwacha waakhanle wi anamurumeela yoowo mu iyaakha sincipale naari avyaani mu eparipari. Anna ni arokora ahu oothene toochuneya wa Yehova, mwawiihiiha awo anaphwanela okhala oochuneya tho wa hiyo. Nnaphwanela ‘waakhwelaka tho anna oothene,’ ohiya pahiru akina a yaawo. (1 Ped. 2:17) Nnaphwanela okhala oolakelela weera echu vyakala wi naakhapelele ni waapwacha yaawo. Wakhala wi nohoona wi noomuhooxa naari noomphuca muchu mukina, hannaphwanela ohipwacha yeeyo ni wuupuwela wi muchu owo onaphwanela onikhurumuwela ni ocuwala yeeyo nimweerenlaahu. Ntakhara heeni akina ananwerya onyeenyeya? Akhweya nthowa na mukhalelo awo aphwiiwalaaya, anna ni arokora akina anniisoona okhala oohichuneya wa akina. Akina avyaani mu eparipari; awo hasuwenle mukhalelo wa ovilela ni ohiphaameya wa achu. Moohipwacha mukhalelo nniisoonaahu, naari echu eweerinhe akina onyeenyeya, nnaphwanela weererya otikitherya murecele. Mwawaaceererya, muchu yoowo ophuciwe ni akina onaphwanela osuwela wi ti woochuneya wiilipixerya wi ahikuhe mathowa. Eerano hiiha owo onahaala okhalano ohakalala ni onthamwene waphaama ni anna.

8. Mukhalelo taani wawunlaana waavolowenle oohuserya a Yesu?

⁸ Tiheeni yaamweerinhe Yesu oloca sa “akhani ala”? Ohuserya awe yaampakela nikoho nna: “Taani ori mutokweenesha mu omwene wa wirimu?” (Mat. 18:1) Ayuta ancipale mu elukuluku yeele yiisoona okhala a vasuluxa nave yaachuna wi akina ewooneke okhala oochuneyaxa. Mulipa oohuserya mmoha ooloca: “Waakhela ncicimiho orweela wa akina ni okhala oovuwa yaari echu yoochuneyaxa mu ikumi saya.”

9. Tiheeni oohuserya a Yesu yaaphwanelaaya weera?

⁹ Yesu aanasuwela wi Ayuta ancipale yiisoona okhala oochuneyaxa waapwaha akina nave oohuserya awe yaaphwanela wiilipixerya wi etoroke moonelo aya. Yesu aaloca wa yaawo: “Yoowo ori mutokweene mwa nyuwo, akhale ntoko mukhaani nave yoole ori muhooleli, akhale ntoko  namuteko.” (Luka 22:26) Hiyaano ninnakhala ‘akhaani’ vaavaa nnawoonaahu akhwiihu okhala ‘oonipwaha.’ (Fil. 2:3) Wakhala wi ninnannuwiha mukhalelo yoola, hanni nikhale yookwaculiha wa akina.

10. Miruku taani sa murummwa Paulo nnaphwanelaahu othokororya moopwacha?

¹⁰ Anna ni arokora ahu oothene toonipwaha mmikhalelo mikina. Ti wookhweya wiiwexexa yeela wakhala wi nnatikitheryeya mmikhalelo saya saphaama. Nnaphwanela othokororya moopwacha miruku seiho murummwa Paulo aavanheiye Akristu o Korinto: “Taani ooleenle wi onnaapwaha achu akina? Tisheeni oryaaweno, ohivahiwaa? Waavahiwe, nthowa taani wiithamalela, ntoko horimvahiwa?” (1 Kor. 4:7) Nnaphwanela okhalano ekaasoope ntakhara yaweeha ya wiiruuhela ncicimiho mukhatiihu naari wiisoona okhala oochuneyaxa waapwaha akina. Ntoko yootakiherya, anna yaawo arino mavyakelo a operekha phaama miyaha naari arokora yaawo arino mavyakelo a opaceryiha soohuserya sa Piipiliya sincipale anaphwanela omvahaka ncicimiho Yehova wa yeeyo anaweryaaya weera.

11. Tiheeni nnahuseryaahu orweela wa niphwanaphwaniho na Yesu vooloca sa mwene ni namuteko awe?

¹¹ Amanle waalopola oomuchara awe wi hiyaaphwanela okhala yookwaculiha wa akina, Yesu aavaha niphwanaphwaniho vooloca sa mwene ni namuteko awe. Mwene aakhurumuwela evaale etokweene yeeyo namuteko ahaahaaleiye owerya oliva. Voocharela, namuteko mmohamoha aakhooca okhurumuwela evaale ekhaani ya namuteko mukhwaawe. Vookuchula, mwene aamukeriha mukariposo namuteko yoola oohimoriwa ikharari. Tiheeni nnahuseryaahuvo? Yesu aaloca: “Hiihaa tho atiithi aka a wirimu, anamuweerelaani nyuwo, mmoha ni mmoha, mwaahimukhurumuwela munninyu ni murima woothene.”—Mat. 18:21-35.

12. Wakhala wi nookhooca okhurumuwela, ti mwawiihai nnaahooxaahu akina?

¹² Saweera sa namuteko yoole hisaamuhoonxe yene pahiru nyenya tho akina. Yoopacerya, owo hoonihenrye oreera murima ni ikharari moorweela wa ‘omphariha mukhwaawe amuwaleliha mukariposo, ophiyerya alimve mankaawu yaale.’ Yanaawiili, owo aahaahooxa anamuteko akina yaawo yoonne yeeyo owo eenreiye. Vaavaa ‘anamuteko akhweiye yoonnaaya soothene seeren’ye, yaathananasha.’ Moolikana, saweera sahu sinnaavolowela akina. Wakhala wi muchu mukina oonikhaliha moonanara nave hiyaano nikhooca omukhurumuwela, tiheeni enahaala weereya? Yoopacerya, ninnamuhooxa yene nthowa nawi nookhooca omukhurumuwela, nave akhweya nnampacerya omusepa ni ohimooniherya osivela. Yanaawiili, ninnaweeriha akina mmulokoni okhala awuukhuwa vaavaa anoonaaya wi hiyaano hanri mmureceleni ni muchu yoowo.

13. Tiheeni nnahuseryaahu orweela wa yaweereya ya piyoneera mmoha?

¹³ Vaavaa nnaakhurumuwelaahu anna ni arokora ahu, ninnakhala phaama nave tho ninnaakhaviherya akina okhala phaama. Hankooni noone yaweereya ya piyoneera mmoha awiichaniwa Crystal. Owo aakhalihawa moonanara ni murokora mukina a mmulokoni. Crystal onnuupuwela: “Masu awe yaanaakeeriha wiisoona ntoko wi kiphoreihiwe ni mwaalo. Ophiyerya wi nkaachuna okhuma ni yene mmuteko woolaleerya. Nave kaapacerya oyeleela mvai aka ni ohakalala.” Crystal uupuwela wi ookhalano mathowa aphaama a okhala oonyeenyeya. Nyenya owo haatitelenle okhala oonyeenyeya ni murokora owo naari otikitheryeya wa yene mukhateiye ni mmiyoonelo sawe. Owo mwawiiyeviha owo aapharihela malakiheryo a mu Soorempwa anaphwanyeya mmwaha “Perdoe de coração” mu Mulipeleli a 15 a Otupuru a 1999. Owo aamukhurumuwela murokora awe. Crystal ooloca: “Vano  kinniiwexexa wi oothene ahu ninniilipixerya wi nipake matorokelo, nave Yehova ari oorehereya onikhurumuwela nihiku ti nihiku. Kaahiisoona okhala ootaphuwa. Nave kaakookela okhala oohakalala.”

14. Mwawiiwanana ni Mateu 18:21, 22, nikacamiho taani akhweya murummwa Petru aareiyeno nave tiheeni owo aahusenryeiye orweela wa naakhulo na Yesu?

¹⁴ Ninnasuwela wi hiyaano nnaphwanela okhurumuwela; ela echu yoophwanelela weerano. Nyenya eyo enanwerya okhala yoovila weerano. Murummwa Petru akhweya aaniisoona mmukhalelo yoola ilukuluku ikina. (Mwaalakhanye Mateu 18:21, 22.) Tiheeni enahaala onikhaviherya? Yoopacerya, muupuwelele mukhalelo Yehova ookhurumuwenleiyeeni. (Mat. 18:32, 33) Hiyaano hinaaphwanela okhurumuweliwa ni yoowo, nyenya owo onnanikhurumuwela moomalela. (Sal. 103:8-10) Mweelukuluku emohamoha, nnaphwanela ‘okhwelanaka tho mukina ni mukhweiye.’ Mwawiihiiha okhurumuwela tahi echu yeeyo nnaamuthanlaahu wooniherya naari hooye. Nnaphwanela waakhurumuwela anna ni arokora ahu. (1 Yoh. 4:11) Yanaawiili, muupuwelele mphurelo onakhalavo wakhala wi ninnakhurumuwela. Nnanwerya omukhaviherya muchu yoowo oneerenle yoonanara, weeriha muloko okhala wawiiwanana, okhapelela onthamwene ahu ni Yehova, ni okhala ootaphuwa. (2 Kor. 2:7; Kol. 3:14) Yookuchula, mvekele wa Yoowo onaniveka wi nikhurumuweleke. Muheemererye wi Satana aakanyerye murecele ni ohakalala ni anninyu a munroromeloni. (Éfe. 4:26, 27) Ninnachuna nikhaviheryo na Yehova wi nsepe oheiwa ni miraakho sa Satana.

15. Mwawiiwanana ni Kolosi 3:13, tiheeni nnaphwanelaahu weera wakhala wi nookwaculeya ni saweera sa munna naari murokora?

¹⁵ Hanka wakhala wi mukhwinyu a munroromeloni oheera echu mmukhalelo yoowo owuukhunleeni? Tiheeni munaphwaneelaanyu weera? Mpake owetha wanyu wi mutikitherye murecele. Mmuleele Yehova mukhalelo muniisoonaanyu. Mumveke Yehova wi amukhaviherye muchu yoowo oophunceni ni  wookhaviheryaani woona mikhalelo saphaama seiho muchu owo oreiyeno—mikhalelo seiho sinamweeriha Yehova omusivela yoowo. (Luka 6:28) Wakhala wi hamunawerya ocuwala yeeyo munninyu eenreiye, muupuwele vooloca sa mukhalelo waphaama wa oloca ni yoowo. Ti yaphaama ilukuluku soothene wuupuwela wi tahi yaari yoolakelela ya munninyu wi oophuceeni. (Mat. 5:23, 24; 1 Kor. 13:7) Vaavaa munalocaanyu ni yoowo, mooniherye wi owo aakhalano mathowa aphaama. Hanka wakhala wi owo hanachuna opaka murecele? “Mukhale òvilela ni” yoowo. Mutitelele okhala oopisa murima ni munninyu. (Mwaalakhanye Kolosi 3:13, BNM.) Echu yoochuneyaxa, muhititelele okhala oonyeenyeya ni yoowo, woona wi eyo enahaala onanariha onthamwene anyu ni Yehova. Muheemererye wi echu vyakala yookwaculiheeni. Mu weerano yeela, munahaala wooniherya wi munnamusivela vancipale Yehova opwaha echu eri yoothene.—Sal. 119:165.

16. Murici taani mmoha ti mmoha a hiyo oreiyeno?

¹⁶ Ninnathamalela vancipale wi nnanwerya omurumeela Yehova ni anna ni arokora ahu ntoko “muhuwo mmoha” nihooleliwaka ni “mukukhula” mmoha! (Yoh. 10:16) Liivuru Oorehereya wi Yeereno Yookhwela ya Yehova, epaaxina 165, onnaloca: “Woona wi munnaphura wiiwanana yoola, mookhalano murici wa okhaviherya wi otitelele.” Mwawiihiiha, nnaphwanela ‘wiivyakiha wi niwooneke anna ni arokora ahu ntoko Yehova onawooneiye.’ Wa Yehova, oothene ahu na “akhaani” oochuneyaxa. Apwanne ti hiiha munawoonaanyu anna ni arokora anyu? Yehova onnoona nave onnavaha esisapo echu vyakala muneeraanyu wi mwaakhaviherye yaawo ni waakhapelela.—Mat. 10:42.

17. Tiheeni nnaphwanelaahu olakelela weera?

¹⁷ Ninnaasivela akhwiihu a munroromeloni. Mwawiihiiha “nasye merelo ohakwatxulihano akhwihu, nari ohiwuwiheryano motxhekani.” (Aro. 14:13, BNM) Ninnawoona anna ni arokora ahu okhala oonipwaha, nave ninnachuna waakhurumuwela yaawo ni murima ahu woothene. Hinnaphwanela weemererya wi nikwaculeye ni akina. Ohiya yeeyo, hankooni “nchariheke ichu sa murecele ni soolipihana mukina ni mukhwaawe.”—Aro. 14:19.