1. Woova taani ori wawunlaana?

 MUTHOKORORYE saweereya seeparipari sa okumi sinacharela. Nestor ni mwaariye María, yaanachuna orumeela weiwo waariwo othowa otokweene. * Nyenya wi yaakhwaniherye yeela, awo yaaphwanela okhweiha okumi aya. Nto awo yaanoova wi akhweya hiyaahaala ohakalalaka chiryene wakhala wi arino ikhorowa savakhaani. Vaavaa Biniam aakhanleiye mmoha a Anamoona a Yehova mu elapo yeeyo muteko ahu oniiciwaayawo, owo aahisuwela wi ntoko mmoha a achu a Muluku, aahaala wiikariwaka. Eyo yaanamuceecheiha. Nyenya aatepa woova vooloca sa mukhalelo amusi awe yaahaalaaya woona vaavaa yeeraaya esuwele sa malapelo awe mavyaani. Valérie aaphwanyiwano ereca yawoopiha ya kanser, nave owo aaniilipixerya wi amphwanye totore yoowo aahaala ocicimiha soororomela sawe inathipeleya Mpiipiliyani vooloca sa nikhami. Mwawooneya, owo aanoova wi aahaala okhwa.

2. Ntakhara heeni nnaphwanelaahu wiilipixerya ovootha woova wahu?

² Apwanne mohintoko okhalano woova ntoko yoola? Ancipale a hiyo ahintoko okhalano. Wakhala wi hannasuwela ovareryela woova wahu, mwawooneya nnahaala opaka soolakelela soonanara seiho sinahaala onanariha onthamwene ahu ni Yehova. Ti yeeyo Satana onachuneiye. Owo tho onneererya opharihela woova wahu wi aneerihe ohiiwelela malamulo a Yehova, ophitaanyerya nlamulo na olaleerya michaka saphaama. (Wup. 12:17) Satana toonanara murima, awiikhoma ni oowerya. Nyenya munanwerya wiikhapelela wa yoowo. Mwawiihai?

3. Tiheeni enahaala onikhaviherya ovootha woova wahu?

³ Vaavaa nnalekecheyaahu wi Yehova onnanisivela ni wi owo ori ni hiyo, nnanwerya ovootha wiilipixerya wa Satana. (Sal. 118:6) Ntoko yaatakiherya, namarepa a Salumu 118 aakumanano  saweereya ikina sooceecheihaxa. Owo aakhalano amwiicani ancipale, ophitaanyerya akina yaawo yaari oovuwa (iversikulu 9, 10). Vakina vaya, owo aanahoosiwa (eversikulu 13). Nave owo aahaakhela olaka wakuru woorweela wa Yehova (eversikulu 18). Naamwi hiiha, mulipa oomurepa salumu yoola aaceenyeryeya wiipa ariki: “Nkinoovaru echu.” Tiheeni yaamweerinhe owo wiisoona okhala ookhapeleleya? Owo aahisuwela wi naamwi Yehova aamulanke, Atiithi awe a wirimu yaanamusivela vancipale. Mulipa a masalumu yoola aalekecheya wi moohipwacha makacamiho yaawo aakumaneiyeno, Muluku awe oosivela aahaala omukhaviherya.—Sal. 118:29.

4. Woova taani nneeraahu nivoothe wakhala wi ninnaroromela wi Muluku onnanisivela?

⁴ Nnaphwanela olekecheya wi Yehova onnanisivela. Olekecheya yoola onahaala onikhaviherya ovootha woova wa mikhalelo miraru sawunlaana, seiho iri, (1) woova wa ohiwerya ovakulela echoko ahu, (2) owoova achu ni (3) woova okhwa. Anna ni arokora alociwe mu eparakrafo yoopacerya yaawerya ovootha woova waya nthowa nawi yaalekecheya wi Muluku onnaasivela.

5. Mikhalelo taani inahaala omweeriha muhooleli a echoko okhala awuukhuwaxa? (Moone eruku va ekaapa.)

⁵ Mukristu yoowo ori muhooleli a emusi, onnacicimiherya murici awe wa ovakulela echoko awe. (1 Tim. 5:8) Waakhanle wi mwa muhooleli a echoko, akhweya variyari va epahu yahiihaanoru mwaanoova wi mwaahaala oyeleela muteko. Mwaanoova wi himwaahaala oweryaka ovakulela echoko naari ophwanya nipuro wi echoko anyu ekhalekevo. Akhweya mwaanoova tho wi wakhala wi mooyeleela muteko anyu, himwaahaala owerya ophwanya muteko mukina. Naari ntoko Nestor ni María aromoliwe woopaceryani, mwaanoovelela opaka matorokelo mmuteko anyu yaawo yaahaala oweerihaani ohikhalano ikhorowa sincipale. Satana onnatepa okhumelela phaama mu opharihela woova ntoko yoowo.

6. Tiheeni Satana oneereryeiye oneeriha weemererya?

⁶ Satana onneererya oneeriha weemererya wi Yehova hananisivela nave wi hani anikhaviherye okhapelela echoko ahu. Ntoko yookhumelela, nnanwerya ophiyerya makuchuwelo wi nnaphwanela opaka echu eri yoothene wi nipharelele muteko ahu, naamwi eyo etaphulelaka ohiiwelela malakiheryo a mu Soorempwa.

7. Tiheeni Yesu oniroromelinheiye?

⁷ Yesu yoowo aasuwenle phaama Atiithi ompwaha muchu ori oothene, ooloca ariki: “Muhaakunve oveka, atiithinyu aasuwela yeeyo enoothowaani.” (Mat. 6:8) Nave Yesu oosuwela wi Yehova ori ooreheryeya ovahererya soothowa sahu. Ntoko Akristu, hiyaano naachu a veemusini ya Yehova. Nnanwerya ororomela wi ntoko Muhooleli a emusi, Yehova onahaala ocicimiha nlakiheryo nenlo olonceiye mu 1 Timóteo 5:8.

8. (1) Tiheeni enahaala onikhaviherya ovootha woova wawi hinnahaala owerya ovakulela echoko ahu? (Mateu 6:31-33) (2) Nni nimutakiherye hai mutheli ori va eruku yoowo onamvaha yoolya murokora mmoha?

⁸ Vaavaa nnalekecheyaahu wi Yehova onnanisivela nave wi onnasivela emusi ahu, nnahaala ororomelaka wi nnarwa nikhalano ichu inanthowa. (Mwaalakhanye Mateu 6:31-33.) Yehova onnachuna onivakulela, owo toosivela nave Namavaha amahala! Vaavaa owo aapatunxeiye elapo yavathi, aapaka sincipale ohiya pahiru onivaha ichu savakhaani seiho naahaalaahu ochunaka wi nikhale. Moosivela owo oosareiha elapo yavathi  ni ichu seiho sinanivaha ohakalala wawaaca. (Map. 2:9) Naamwi ilukuluku ikina nrinono pahiru yeeyo nnachunaahu, nnaphwanela wuupuwela wi yeeyo nryaahuno Yehova tonivanhe. (Mat. 6:11) Nnaphwanela otitelela wuupuwela wi wiilipixerya vyakala woomwiilini yoowo nnapakaahu hiihaano tahi echu naalikanyihaka ni yeeyo Muluku ahu oosivela onahaaleiye onivaha, hiihaano ni omwaahiyu. Ti yeeyo Nestor ni María yaaroromenlaaya.—Isa. 65:21, 22.

9. Tiheeni munahuseryaanyu orweela wa yootakiherya ya Nestor ni María?

⁹ Nestor ni María yaanapuha okumi waphaama o Kolompiya. Awo eriye: “Naahuupuwela sa okhweiha okumi ahu ni waaceererya orummwa ahu nyenya naanoova wi hinaahaala okhala oohakalala ni ikhorowa vakhaani.” Tiheeni yaakhavihenrye ovootha woova waya? Awo yaahuupuwelela mikhalelo mincipale seiho Yehova oonihenryeiye osivela wawe wa yaawo. Elekechen’ye wi Yehova aahaala waakhapelela, awo yaahiya miteko saya seiho saavaha ikhorowa sincipale. Yaatumiha empa aya nave ethaamela makupa makina a elapo aya weiwo waariwo othowa otokweene wa alaleeryi a Omwene. Awo yoonne hai vooloca sa yoolakelela aya? Nestor ooloca: “Nohoona wi masu a Mateu 6:33 teeparipari. Hinintonko othoiwa echu vyakala yoomwiilini. Nave vano ninnahakalala mookumini.”

10. Ntakhara heeni ti yawiiwexexeya wi achu annoovana mukina ni mukhwaawe?

¹⁰ Ovinyerya vaavaa Atamu ni Hava yaammwarenlaaya Yehova, achu annahooxana mukina ni mukhwaawe. (Ekle. 8:9) Achu annapharihela otokweene aya moonanara, achu oonanara murima anneera ichu sa nlala, anaxikola ooroxa annaaruwana anaxikola akhwaaya nave achu akina annaphiyerya waahoosa a veechokoni vaya. Hisaavo minikwa wi achu annawoova achu akina! Satana oneererya hai ophwanyavo mphurelo owoova wahu achu?

11-12. Satana onapharihela hai owoova wahu achu wi anceecheihe?

¹¹ Satana onnapharihela owoova achu wi eererye onimaaliha olaleerya naari onimaaliha weera ichu seiho Yehova onileenleiye wi neereke. Nthowa na ovoloweliwa ni Satana, alamuleli annawatiiha muteko ahu nave annaniica. (Luka 21:12; Wup. 2:10) Achu ancipale mweelapo ya Satana annapharihela miselo soohuweliha ni sawootha vooloca sa Anamoona a Yehova. Achu yaawo anaroromela  sawootha seiha ananwerya onnyemula naari ophiyerya tho onihooxa. (Mat. 10:36) Apwanne ninnatikhiniheya ni miraakho sa Satana? Hooye. Owo aanapharihela miraakho seiho mu nsana noopacerya.—Saw. 5:27, 28, 40.

¹² Woova wiiciwa ni alamuleli tahi pahiru muraakho yoowo Satana onaphariheleiye. Wa akina, woova mukhalelo amusi aneeraaya yaakhulele vaavaa anahuseryaaya eparipari onakhala otokweene opwaha ohooxiwa vyakala woomwiilini. Awo annaasivela vancipale amusi aya nave annachuna wi emusuwele ni omusivela Yehova. Ennatepa owiicela vaavaa anawiiwaaya ahima aya emulocaka mwa munyemu Muluku eeparipari vamoha ni alapeli awe. Nyenya mmikhalelo mikina, amusi yaawo woopaceryani yiica eparipari ohoolo waya annahuserya eparipari. Hanka wakhala wi amusi ahu aahiya onilociha moomalela nthowa na soororomela sahu ivyaani? Naahaala waakhulela hai?

13. Ororomela wahu osivela wa Muluku oni onikhaviherye hai ovilela vaavaa nnanyanyaliwaahu ni amusi? (Salumu 27:10)

¹³ Nnanwerya ohakararyeya orweela wa masu anaphwanyeya mu Salumu 27:10. (Mwaalakhanye.) Vaavaa nnuupuwelelaahu mukhalelo Yehova onansiveleiye, hannoova yeeyo enahaala weereya, naamwi amusi ahu eninyanyanle. Nave ninnaroromela wi Yehova onahaala onivaha mareeliho nthowa na ovilela wahu. Yehova onahaala othokororyaka phaama soothowa sahu soomwiilini, sa mmuupuweloni ni soomunepani, ompwaha muchu mukina! Ti yeeyo Biniam oromoliwe woopaceryani, oonneiye.

14. Tiheeni munahuseryaanyu orweela wa yootakiherya ya Biniam?

¹⁴ Biniam aahikhala mmoha a Anamoona a Yehova naamwi asuwelaka wi aahaala wiiciwa ni alamuleli a elapo awe. Muthokororye ti mwawiihai osuwela wi Yehova aanamusivela waamukhavihenryaaya Biniam ovootha owoova achu. Owo ooloca: “Wiica waahipwaha mummo kaanyiheryaakamo. Nyenya echu koovaakaxa vancipale waari wiica woorweela wa amusi aka opwaha wa alamuleli. Kaanoova wi yoolakelela aka ya okhala mmoha a Anamoona a Yehova yaahaala waanyeenyeiha apapa aka yaawo yaahaari Namoona nave amusi aka hiyaahaala okicicimihaka.” Nyenya Biniam aanaroromela wi Yehova ilukuluku soothene onnaapwacha yaale Owo onaasiveleiye. Biniam oothariha: “Kaanuupuwelela mukhalelo Yehova aakhavihenryeiye akina ovilela makacamiho a ophwanya ikhorowa,  okhalihiwa mwa nthalu ni moowali. Kaahisuwela wi wakhala wi kootitelela okhala oororomeleya wa Yehova, owo aahaala okireeliha. Vaavaa kaaphariwaaka wiiliwiili nave ophiyerya ohooxiwa, kaanoona mukhalelo Yehova onanikhaviheryeiye wakhala wi nootitelela okhala oororomeleya.” Yehova aahikhala Tiithi eeparipari a Biniam nave achu Awe yaahooniherya okhala amusi eeparipari wa yene.

15. Ntakhara heeni nnoovaahu okhwa?

¹⁵ Piipiliya onnaloca wi okhwa mwiicani. (1 Kor. 15:25, 26) Akhweya nnamukhala awuukhuwa vaavaa nnuupuwelaahu sa okhwa, xaxaxa vaavaa hiyaano naari oosiveliwa ahu onatepeiye wiiceliwa. Ntakhara heeni nnoovaahu okhwa? Nthowa nawi Yehova onipatunse ni nchuno na opuha okumi okhala wookhala. (Ekle. 3:11) Nto woova okhwa onanwerya onikhaviherya okhapelela okumi ahu. Ntoko yootakiherya, eyo enanwerya onceenyerya opaka soolakelela saphaama vooloca sa mukhalelo wa othanlela yoolya ni ovyakiha mwiili, waavya nikhaviheryo wa mameetiku ni murece wakhala woochuneya ni osepa ohela okumi ahu va yawoopiha.

16. Satana oneererya hai opharihela woova wahu okhwa?

¹⁶ Satana oosuwela wi ninnasivela okumi ahu. Nave owo ooloca wi nnahaala ohiya ichu soothene nryaahuno, ophiyerya tho onthamwene ahu ni Yehova, pahiru wi nikhapelele okumi ahu. (Yobi 2:4, 5) Nto Satana oohesa! Naamwi hiiha, woona wi owo ookhalano “ikuru sa okhwa,” onneererya opharihela woova wahu okhwa wi aneerihe omuhiya Yehova. (Ahe. 2:14, 15) Vaavaa alapeli a Yehova aniilipixeryaaya okhapelela nroromelo naya, achu a Satana annawoopopiha wi anahaala owiipha. Vakina vaya, Satana onanwerya woona wi ninnachuna oloola wawaakuveya nave apharihele eyo wi eererye omaliha ororomeleya wahu. Mameetiku naari amusi ahiri Anamoona ananwerya onikhinyererya ovahiwa nikhami, yeeyo yaahaala ovuhana ni nlamulo na Muluku. Naari muchu mukina onamweererya onlekecha weemererya mukhalelo mukina wa oloola yoowo ohiniiwanana ni malakiheryo a mu Soorempwa.

17. Mwawiiwanana ni Aroma 8:37-39, ntakhara heeni haavo mathowa a woova okhwa?

¹⁷ Naamwi nihichunaka okhwa, noosuwela wi Yehova hani ahiye onisivela wakhala wi nookhwa. (Mwaalakhanye Aroma 8:37-39.) Vaavaa asinthamwene a Yehova anakhwaaya, owo onnatitelela owuupuwela, ntoko wi nlelo akumi. (Luka 20:37, 38) Owo ookhalano munkhela wa waakookiherya okumi. (Yobi 14:15) Yehova oovaha nlivelo nasisapo wi ‘nikhaleno okumi woohimala.’ (Yoh. 3:16) Ninnasuwela mukhalelo Yehova onansiveleiye vancipale ni onithokororya. Mwawiihiiha, opwahana omuhiya Yehova vaavaa nniiceliwaahu naari nnoopopihiwaahu wiiphiwa, ninnamuroromela yoowo wi anihakararye, anivahe miruku ni onilipiha. Ti yeeyo Valérie ni aiyawe yeenraaya.—Sal. 41:3.

18. Tiheeni munahuseryaanyu orweela wa yootakiherya ya Valérie?

¹⁸ Vaavaa Valérie aareiyeno iyaakha 35, aaphwanyiwano ereca ya kanser. Moone mukhalelo osivela waamukhavihenryaaya ovootha woova okhwa. Owo ooloca: “Vaavaa kaasuwenlaaka wi kookhalano kanser, yaatepa okithananiha vamoha ni aiyaka. Wi kipenuwe waanachuneya wi kooperaariwe. Kaahaakoha matotore mancipale, nto oothene yaahikhooca ompaka operasau ehipharihenle nikhami. Kaari awoova, nyenya mwawiiwanana ni nlamulo na Muluku, hiyaarivo meerelo makina wi keemererye oheliwa nikhami! Variyari va  okumi aka, Yehova ohooniherya wi onnakisivela vancipale. Vano kookhalano ekari ya wooniherya osivela waka wa yoowo. Ilukuluku soothene kiniiwaaka michaka soothananiha, ennakeeriha okhala oolakelela omweeriha Yehova wiirumiha nave oheemererya wi Satana avoothe. Mweelukuluku aya, operasau aka aahikhumelela phaama kihivahiwe nikhami. Naamwi makacamiho a okumi aka etitelelaka, Yehova ilukuluku soothene onnavahererya yeeyo nnachunaahu. Ntoko yootakiherya, kihaakumve ophwanyiwano ereca aka, mmithukumano sahu sa veeri va esumana naahithokororya mwaha waarino muru: ‘Enfrentem com coragem os problemas actuais.’ * Mwaha ola waatepa onihakararya. Naanaalakhanya mwaha owo wiiliwiili. Miyaha ntoko yoola ni sookhovelela saphaama soomunepani saahinivaha murecele wampuwa nave saanikhaviherya okhala oophimelela ni opaka soolakelela saphaama.”

19. Tiheeni enahaala weereya moohilekela?

¹⁹ Nnikhaviheryo na Yehova, Akristu a elapo yoothene annavootha makacamiho ni annakhumelela phaama mu omvaanya Musaserya. (1 Ped. 5:8, 9) Nyuwaano tho munanwerya. Moohilekela, Yehova onahaala omulamulela Yesu vamoha ni alamuleli akhwaawe ‘wi enyaanye miteko sa Musaserya.’ (1 Yoh. 3:8) Voocharela achu a Muluku anahaala omurumeelaka yoowo veelaponi yavathi woona wi ‘herwa yoovaru naari otuthuwa hophiya wa yaawo.’ (Isa. 54:14; Mik. 4:4) Mwawiihiiha, ophiyerya nihiku nenlo, nnaphwanela wiilipixerya ovootha woova wahu.

20. Tiheeni enahaala onikhaviherya ovootha woova wahu?

²⁰ Nnaphwanela otitelela olipiha olekecheya wahu wawi Yehova onnaasivela ni waakhapelela alapeli awe. Nnahaala okhaviheryeya weerano yeela moorweela wa wuupuwelela ni oloca sa mukhalelo Yehova aakhapelenleiye alapeli awe khalai. Nave nnanwerya wuupuwelela mukhalelo owo onikhavihenryeiye ovootha makacamiho oovila. Nnikhaviheryo na Yehova nnanwerya ovootha woova wahu!—Sal. 34:4.