1. Mwawiiwanana ni Eklesiyaste 7:20, eparipari taani Mwene Soolomoni otharinheiye?

 MWENE Soolomoni oorepa: “Haamo muchu awookololowa murima mweelaponi oneera saphaama ohintonko ocheka.” (Ekle. 7:20) Ela eparipari chiryene! Oothene ahu ninnacheka. (1 Yoh. 1:8) Mwawiihiiha oothene ahu ninnachuna okhurumuweliwa ni Muluku ni achu akhwiihu.

2. Ti mwawiihai mwiisoonnaanyu vaavaa mwaakhurumuweliwaanyu ni nthamwene anyu avamurimani?

² Moohikhwa minikwa nyuwaano munnuupuwela elukuluku yeeyo mwamunyenyeihalaanyu nthamwene anyu avamurimani. Nyuwaano mwaanachuna orehererya mwaha ni nthamwene anyu, mwawiihiiha mwamveka nikhurumuwelo ni murima woothene. Ti mwawiihai mwiisoonnaanyu vaavaa nthamwene anyu ookhurumuwenleiyeni moomalela? Apwanne mwaahikhala ootaphuwa? Aai, nave tho mwaahakalala!

3. Tiheeni nnahaalaahu othokororya mmwaha yoola?

³ Ninnachuna wi Yehova akhale Nthamwene ahu avamurimani, nyenya ilukuluku ikina nnanwerya oloca naari weera ichu seiyo inahaala omunyeenyeiha yoowo. Ntakhara heeni nnanwerya ororomela wi Yehova ori oorehereya onikhurumuwela? Mmukhalelo taani okhurumuwela wa Yehova oryaaya woohiyana ni okhurumuwela wa achu? Nave wookuchulani, taani Muluku onaakhurumuweleiye?

4. Ntakhara heeni ninnaphwanela ororomela wi Yehova ori oorehereya okhurumuwela?

⁴ Masu a Muluku annaniroromeliha wi Yehova ori oorehereya onikhurumuwela. Vaavaa Yehova iisuupulunleiye wa Mose va Mwaako Sinai, owo aaloca moorweela wa munkeelo ariki: “Ka Apwiya, Apwiya Muluku, a ikharari, a mahala, ohaakuva  onanariwa, oosivelasha ni oororomeleya. Oosivela waka oniikhalelaru wa achu ancipale. Kinakhurumuwela opahuwa, ohiiwelela ni ocheka.” (Muk. 34:6, 7) Yehova Muluku ooreera murima ni a ikharari yoowo ilukuluku soothene ori oorehereya waakhurumuwela anamacheka oocharuwa.—Neh. 9:17; Sal. 86:15.

5. Mwawiiwanana ni Salumu 103:13, 14, tiheeni Yehova oneereiye nthowa na osuwela echu yeeyo achu analikanaayano?

⁵ Ntoko Mpatuxa ahu, Yehova oosuwela echu eri yoothene vooloca sa hiyo. Pahiru muupuwele! Owo oosuwela echu eri yoothene vooloca sa achu oothene ari veelaponi. (Sal. 139:15-17) Mwawiihiiha, owo onanwerya woona ohiphaameya ori woothene yoowo nramvaahu orweela wa asitiithi ahu. Ophiyerya tho wi owo onnasuwela echu yeeyo yeeren’ye mu okumi ahu enaneeriha okhala muchu a mukhalelo nryaahu. Tiheeni Yehova oneereiye nthowa na onisuwela phaama? Eyo ennamuceenyerya okhala a ikharari ni hiyaano.—Sal. 78:39; mwaalakhanye Salumu 103:13, 14.

6. Ti mwawiihai Yehova oonihenryeiye wi onnachuna okhurumuwela?

⁶ Yehova ohooniherya wi ori oorehereya okhurumuwela. Owo onniiwexexa wi nthowa na saweera sa mulopwana oopacerya, Atamu, oothene ahu ninnacheka nave ninnakhwa. (Aro. 5:12) Hiyaavo echu nnahaalaahu weera wi niisaakihe naari omwaakiha muchu mukina ntakhara ocheka ni okhwa. (Sal. 49:7-9) Nyenya Muluku ahu oosivela aahooniherya ikharari nave aaheeravo echu wi nikhale ootaphuwa. Tiheeni owo eenreiye? Ntoko enatharihiwaaya mu Yohani 3:16, Yehova aamurumiha Mwanawe ooyariwa mmoharu wi akhwe ntakhara hiyo. (Mat. 20:28; Aro. 5:19) Yesu aakhwa mu nipuroni nahu wi awoopole oothene yaawo arino nroromelo mwa yoowo. (Ahe. 2:9) Yaari yawiicelaxa wa Yehova omoona Mwanawe oosiveliwa akhwaaka mmukhalelo wawiicela ni wawuuliha muru! Mweeparipari, Yehova hi eemererye wi Mwanawe akhwe waakhanle wi Owo hanachuna onikhurumuwela.

7. Sootakiherya taani sa Mpiipiliyani sa achu yaawo Yehova aakhurumuwenleiye moomalela?

⁷ Mpiipiliyani, sookhalamo sootakiherya sincipale sa achu yaawo Yehova aakhurumuwenleiye moomalela. (Éfe. 4:32) Taani munamuupuwelaanyu? Akhweya munnamuupuwela  Mwene Manase. Mulopwana yoola oonanara murima, aamuchekela Yehova mmikhalelo soonanaraxa. Owo aanaalapela amuluku atheru nave ahaaceenyerya akina weerano emohamoha. Owo aawiipha anaawe, aavaha ntoko mikucho wa amuluku atheru. Ophiyerya tho wi owo aakuha eruku yoopachiwa ya muluku atheru mu empa yaweela ya Yehova. Alocaka sa yoowo, Piipiliya oni: “Ahaachekelasha Apwiya, atannya esara aya.” (2 Math. 33:2-7) Nyenya vaavaa Manase oonihenryeiye wi oocharuwa ni murima woothene, Yehova aamukhurumuwela moomalela. Ophiyerya tho wi Yehova aamukookiherya omwene awe. (2 Math. 33:12, 13) Akhweya tho munnamuupuwela Mwene Tavite, yoowo aapanke soocheka itokweene ntakhara Yehova, ophitaanyerya mararuwo ni wiipha. Nyenya vaavaa Tavite aacharunweiye mweeparipari nave eemererya yoocheka awe, Yehova aamukhurumuwela moomalela. (2 Sam. 12:9, 10, 13, 14) Chiryene, nnanwerya ororomela wi Yehova onnachuna okhurumuwela. Nave ntoko nnahaalaahu woona, vaavaa Yehova onakhurumuweleiye, eyo henalikana ni vaavaa achu anakhurumuwelaaya.

8. Ti mwawiihai mukhalelo wavameekhaaya wa Yehova ntoko muthoriha onavolowelaaya okhurumuwela wawe?

⁸ Yehova ‘Muthoriha a elapo yoothene.’ (Map. 18:25) Muthoriha aphaama onaphwanela osuwela malamulo mwawiiseela. Yehova Muthoriha ahu, nave onniiwexexa moomalela malamulo nthowa nawi owo tonavaha malamulo. (Isa. 33:22) Haavo onasuwela yeeyo eri yaphaama ni yoonanara hiiha ntoko Yehova. Echu taani ekina muthoriha aphaama onaphwaneleiye oosuwela? Owo onaphwanela osuwela soothene sinavolowela mwaha ahaakumve opaka yoolakelela. Mwawiihiiha, Yehova Muthoriha aphaama, woona wi ilukuluku soothene owo onnasuwela soothene sinavolowela mwaha.

9. Sooleeliherya taani Yehova onakhaleiyeno vaavaa onalakeleleiye omukhurumuwela muchu naari hooye?

⁹ Moohiyana ni athoriha oomuchu, Yehova ilukuluku soothene onnasuwela ichu soothene inavolowelavo va mwaha vyakala. (Map. 18:20, 21; Sal. 90:8) Owo hanatikitheryeya wa yeeyo achu anoonaaya naari aniiwaaya. Owo onniiwexexa moomalela mukhalelo saweera sa muchu sinavoloweliwaaya ni mikhalelo ni meerelo yaawo owo oramveiye orweela wa asitiithi awe, mahusiheryo aakhenleiye, weiwo onakhaleiyewo nave tho mukhalelo awe wa mmuupuweloni. Yehova tho onnasuwela yeeyo eri mmurimani mwa muchu. Owo onniiwexexa phaameene ntakhara heeni muchu oneereiye echu yammoori. Hiyaavo echu eri yookhuweya wa Yehova. (Ahe. 4:13) Mwawiihiiha vaavaa Yehova onamukhurumuweleiye muchu, owo oneerano yeeyo nthowa nawi oosuwela soothene sinavolowela mwaha owo.

10. Ntakhara heeni nnanwerya oloca wi othoriha wa Yehova ilukuluku soothene ti wawookololowa? (Malamulo 32:4)

¹⁰ Othoriha wa Yehova ilukuluku soothene ti wawookololowa. Owo haanoru nthalu. Yehova hanamukhurumuwela muchu nthowa na mukhalelo awe, muhakhu, ochuneya naari okhalano mavyakelo mancipale. (1 Sam. 16:7; Tiy. 2:1-4) Haavo muchu onawerya omukhinyererya Yehova weera echu naari omvaha makhwankwa. (2 Math. 19:7) Soolakelela sawe hasinavoloweliwa ni onyeenyeya naari mukhalelo owo oniisooneiye. (Muk. 34:7) Moohikhwa minikwa, Yehova Muthoriha aphaama nthowa nawi onniiwexexa echu eri yoothene vooloca sa hiyaano ni mukhalelo ahu.—Mwaalakhanye Malamulo 32:4.

11. Mmukhalelo taani okhurumuwela wa Yehova oryaaya woohiyana ni wa achu?

 ¹¹ Anamarepa a Soorempwa sa Ehepiri yaanasuwela wi okhurumuwela wa Yehova ti wavameekhaaya. Mmikhalelo mikina, awo yaapharihela nsu na Ehepiri nenlo mu ereferensiya emoha nnaloca wi “nnaphariheliwa pahiru wi ntharihe mukhalelo Muluku onaakhurumuweleiye anamacheka. Nsu nenla hannathariha mukhalelo wookotakota yoowo muchu onamukhurumuweleiye muchu mukina.” Pahiru Yehova torino owerya wa omukhurumuwela moomalela namacheka oocharuwa. Sookhumelela taani inakhalavo vaavaa Yehova onanikhurumuweleiye?

12-13. (1) Tiheeni muchu onapuheiye vaavaa onakhurumuweliweiye ni Yehova? (2) Mano miphurelo inarweela mu okhurumuwela wa Yehova iniikhalelaru ophiyerya liini?

¹² Wakhala wi noheemererya eparipari yawi Yehova onnanikhurumuwela, ninnapuha “ilukuluku sookurunusha murima,” ophitaanyerya murecele wa mmuupuweloni ni yawuupuxerya-ya-murima yaphaama. Hiyaano pahiru nnahaala okhalano moonelo yoola, wakhala wi “Apwiya [Yehova]” aanikhurumuwela. (Saw. 3:20; 3:19, TNM) Vaavaa Yehova onanikhurumuweleiye, owo onnaneemererya okhala asinthamwene awe wanaawiili nave enakhala ntoko wi hinintonko ocheka.

¹³ Yehova amanle onikhurumuwela, harwa aniphwanyerya nthowa naari onlaka wanaawiili wa yoocheka emohamoha yeeyo. (Isa. 43:25; Yer. 31:34) Yehova onnariha soocheka sahu “ntoko onarekamelaya onakhumawo nsuwa ni weiwo nnaneelaayawo.” * (Sal. 103:12) Vaavaa nnuupuwelelaahu mukhalelo okhurumuwela wa Yehova oryaaya otokweene, ninnamuthamalela vancipale ni omucicimiha. (Sal. 130:4) Nyenya taani Yehova onaakhurumuweleiye?

14. Echu taani nihusenryaahu ophiyerya vaavaa vooloca sa yoolakelela ya Yehova ya okhurumuwela?

¹⁴ Ntoko nonnaahu, Yehova alakelela okhurumuwela hanapwacha waakhanle wi yoocheka ekhaani naari etokweene. Ohiya yeeyoru, noohuserya tho wi Yehova onnapharihela masuwelelo awe ntoko Mpatuxa ahu, Namavaha a malamulo ni Muthoriha vaavaa onalakeleleiye waakhanle wi onahaala  okhurumuwela. Ichu taani Yehova onathokororyeiye ahaakumve olakelela waakhanle wi onahaala okhurumuwela naari hooye?

15. Mwawiiwanana ni Luka 12:47, 48, echu taani emoha Yehova onathokororyeiye ahaakumve olakelela waakhanle wi onahaala okhurumuwela naari hooye?

¹⁵ Echu emoha Yehova onathokororyeiye ori waakhanle wi namacheka aanasuwela wi yeeyo eereiye ti yoonanara. Yesu oohiya yeela mookwakwaleya, ntoko enatharihiwaaya mu Luka 12:47, 48. (Mwaalakhanye.) Vaavaa muchu onalakeleleiye weera echu yeeyo onasuweleiye wi Muluku haneemererya, owo onapaka yoocheka etokweene. Yehova onanwerya olakelela ohimukhurumuwela muchu yoowo. (Mar. 3:29; Yoh. 9:41) Nyenya, ikwaha ikina nnanwerya weemererya wi yeeyo nipankaahu ti yoonanara. Mmukhalelo yoola apwanne nookhalano ewehereryo? Aai! Nave eyo ennanikeriha mu echu ekina Yehova onathokororyeiye.

16. Ocharuwa onataphulela eheeni, nave ntakhara heeni ti woochuneya waakhala wi ninnachuna wi Yehova anikhurumuwele?

¹⁶ Echu ekina Yehova onathokororyeiye ori waakhanle wi namacheka oocharuwa mweeparipari. Ocharuwa onataphulela eheeni? Ocharuwa onataphulela “otoroka muupuwelo, mikhalelo naari soolakelela.” Eyo enaphitaanyerya muchu okhala oothanana mweeparipari wa ichu seiho soonanara enreiye naari wa ohipaka ichu seiho saphaama aaphwaneleiye weera. Muchu oocharuwa onnahooxeya ohiya pahiru wa ichu soonanara opankeiye, nyenya tho mukhalelo ichu seiho soonanara sivolowenlaaya onthamwene awe ni Yehova. Muupuwele wi Mwene Manase ni Tavite yaahipaka soocheka itokotoko, nyenya naamwiihiiha Yehova aahaakhurumuwela nthowa nawi awo yaahicharuwa mweeparipari. (1 Mam. 14:8) Chiryene, Yehova onnanikhurumuwela pahiru waakhala wi ohoona wi noocharuwa. Nyenya honaakhwana pahiru othanana vooloca sa soocheka nipankaahu. Nnaphwanela okhala ooreheryeya wi neerevo echu. * Nave ela echu ekina yeeyo Yehova onathokororyeiye.

17. Orukunuxa murima tiheeni nave ntakhara heeni oryaaya woochuneya waakhala wi ninnachuna osepa ochikela opaka soocheka imohamoha sa khalai? (Isaiya 55:7)

¹⁷ Echu ekina yoochuneya Yehova onathokororyeiye  ori orukunuxa murima. Orukunuxa murima enataphulela “okooka.” Mmasu makina, muchu onaphwanela ohiya opaka ichu soonanara ni opacerya okhala mmukhalelo Yehova onachuneiye wi achu ekhaleke. (Mwaalakhanye Isaiya 55:7.) Muchu onaphwanela otoroka muupuwelo awe wi ahooleliweke ni muupuwelo wa Yehova. (Aro. 12:2; Éfe. 4:23) Owo onaphwanela olakelela ohiya muupuwelo ni saweera sawe soonanara sakhalai. (Kol. 3:7-10) Chiryene, nroromelo nahu mwa mukucho wa Kristu nnamweeriha Yehova onikhurumuwela ni oneeliha wa soocheka. Yehova onahaala onikhurumuwela orweela wa mukucho vaavaa owo onanooneiye nipakaka owetha wahu wi ntoroke meecelo ahu.—1 Yoh. 1:7.

18. Tiheeni nthokoronryaahu vooloca sa okhurumuwela wa Yehova?

¹⁸ Hankooni nipake mukwasu wa iponto soochuneya nimanlaahu othokororya. Mweeparipari Yehova tookhurumuwelaxa waapwaha oothene wirimu ni veelaponi ya vathi. Ntakhara heeni nnanwerya oloca yeela? Yoopacerya, owo ilukuluku soothene ori oorehereya okhurumuwela. Yanaawiili, owo oosuwela soothene vooloca sa hiyaano. Woona wi onnasuwela soothene vooloca sa hiyo, owo muchu oophwanelela olakelela waakhanle wi noocharuwa mweeparipari. Nave yaneeraru, vaavaa Yehova onanikhurumuweleiye, owo onnacuwala moomalela nave wa yoowo onakhala ntoko wi hanipanke yoocheka. Eyo ennaneeriha okhalano yawuupuxerya-ya-murima yaphaama ni okhalano weemereryiwa wawe.

19. Naamwi ntitelelaka ocheka nthowa na ohiphaameya, ntakhara heeni nnanwerya okhala oohakalala?

¹⁹ Mweeparipari, woona wi naachu oohiphaameya, nnahaala otitelela ocheka. Nyenya, nnanwerya ophwanya nihakararyo orweela mmasu a mu liivuru Estudo Perspicaz das Escrituras Volume 1, epaaxina 210: “Woona wi mwa ikharari Yehova onnathokororya ohiphaameya wa akapuro awe, awo hanaphwanela okhalaka oothananaxa nthowa na soohesa saya inakhumelela nthowa na ohiphaameya aramvaaya. (Sal. 103:8-14; 130:3) Wakhala wi awo annapaka owetha waya wi ekhaleke mwawiiwanana ni malakiheryo a Muluku, awo ananwerya okhalaka oohakalala. (Fil. 4:4-6; 1 Yoh. 3:19-22).” Ela chiryene ti yoolipiha!

20. Tiheeni nnahaalaahu othokororya mmwaha onacharela?

²⁰ Ninnamuthamalela Yehova nthowa nawi ori oorehereya onikhurumuwela wa soocheka seiho nipankaahu wakhala wi noocharuwa mweeparipari. Ti mwawiihai nneeraahu ntakiherye mukhalelo wa okhurumuwela wa Yehova? Mmukhalelo taani okhurumuwela wahu onalikanaaya ni okhurumuwela wa Yehova, nyenya mmukhalelo taani oryaaya woohiyana? Ntakhara heeni wiiwexexa ohiyana yoola ti woochuneya? Mwaha onacharela onahaala waakhula makoho yaala.