1. Mwawiiwanana ni 1 Petru 5:2, muteko taani woochuneya atokweene anapharaaya?

 ATOKWEENE a muloko aavahiwa murici wa okhapelela ipucepuche soochuneya sa Yehova. Alopwana yaawo oororomeleya annavaha esisapo ekari aryaayano ya waarumeela anna ni arokora, nave annalapa mwakuru wi ekhale “akukhula . . . oothokororya.” (Yer. 23:4, PMM; mwaalakhanye 1 Petru 5:2.) Ninnatepa othamalela okhalano alopwana yaala mmilokoni mwahu!

2. Makacamiho taani atokweene akina anahoolelaaya?

² Vaavaa atokweene anathokororyaaya mirici saya, awo annahoolela makacamiho mancipale. Mmukhalelo mukina, okhapelela muloko onnavolowela ichu sincipale. Toni, mutokweene mmoha o Estatu Unitu, aanaphwanela ohuserya okhala oophimelela vooloca sa waaca wa miteko seiho owo eemereryeiye. Owo onnathariha: “Woopaceryani wa epahu ya Koronaviru, kaaneererya opaka miteko mincipale wi kirehererye mithukumano ni muteko woolaleerya. Nyenya moohiphwacha ichu sincipale kaapakaaka, saanakhalavo ikina wi kipake. Vakhaani-vakhaani, omwaalakhanya waka Piipiliya, yoohuserya ya muchu mukhateiye ni ovekela, saapacerya ocakanela.” Ilir, mutokweene mmoha o Kosovo, aahoolela nikacamiho noohiyana. Vaavaa aakhaleiye mmukuma waawaniwawo ekhoco, aanoona okhala woovila wiiwelela ohoolela wa marehereryo. Owo ooloca: “Olipa waka murima waaheehiwa vaavaa efiliyale yaakivanhaaya murici wa waakhaviherya anna ni arokora yaawo yaari mmapuro awoopiha. Kaari awoova, nave waakhala ntoko wi ohoolela hiwaari wa mphurelo.” Misiyonaariyo mmoha o Asiya awiichaniwa Tim, aanoona okhala woovila opaka ichu soothene aachuneiye nihiku nnihiku. Owo ooloca: “Ikwaha ikina kaaniisoona okhala oovelavela wi kaakhapelele anna ni arokora.” Tiheeni enahaala waakhaviherya atokweene yaawo anahoolela makacamiho oolikana?

3. Ti mwawiihai oothene ahu nneeraahu niphure orweela wa othokororya yootakiherya ya Muthoriha Kiteyoni?

 ³ Atokweene a mmulokoni ananwerya ohuserya orweela wa yootakiherya ya Muthoriha Kiteyoni. (Ahe. 6:12; 11:32) Owo aanaakhapelela ni waakukhula achu a Muluku mu elukuluku emohamoha. (Amut. 2:16; 1 Math. 17:6) Hiihaa ntoko Kiteyoni, atokweene a mmulokoni aathanliwa wi yaakhapeleleke achu a Muluku variyari va ilukuluku soovilaxa. (Saw. 20:28; 2 Tim. 3:1) Nnanwerya ohuserya orweela wa ophimelela, wiiyeviha ni wiiwelela wa Kiteyoni. Ovilela wawe waaheehiwa vaavaa aathokororyeiye mirici sawe. Moohipwacha waakhanle wi nnarumeela ntoko atokweene a mmulokoni naari hooye, nnanwerya wunnuwiha othamalela wahu ntakhara atokweene ahu. Nnanwerya waakhaviherya alopwana yaala awuunuwa omunepani awiilipixerya.—Ahe. 13:17.

4. Ti mwawiihai Kiteyoni oonihenryeiye ophimelela ni wiiyeviha?

⁴ Kiteyoni aari mulopwana oophimelela ni awiiyeviha. b Vaavaa munkeelo a Yehova aamulenleiye Kiteyoni wi owo aahithanliwa wi oopole muloko wa Isarayeli wa amwiicani oowerya Amitiyani, mulopwana ola awiiyeviha aahaakhula: “Nloko naka tinoohaawasha na aManaashe nave miyo ka mukhaani wa ahimaaka.” (Amut. 6:15, PMM) Owo hiisoona okhala oophwanelela ntakhara murici, nave Yehova aamusuwela phaama yoowo. Nnikhaviheryo na Yehova, Kiteyoni aahikwaaxa mirici sawe nave aahikhumelela phaama.

5. Ti mwawiihai ophimelela ni wiiyeviha wa mutokweene a mmulokoni oneehiwaaya?

⁵ Atokweene annapaka owetha waya wi yooniherye ophimelela ni wiiyeviha mu ichu soothene. (Mik. 6:8; Saw. 20:18, 19) Awo haniirumiha ni mavyakelo aya naari ni ichu seiyo anaweryaaya waakhwaniherya, naari mano heniiphwanyerya mathowa mu soohesa ni mmiyoonelo saya. Nyenya, mutokweene onanwerya ohoolela saweeha. Ntoko yootakiherya, owo onanwerya weemererya mirici mincipale, nave voocharela, oone okhala woovila okhwaaniherya soothene. Owo onanwerya olociwa mmukhalelo woohiphwanelela nthowa na mukhalelo aakhwaanihenryeiye murici awe naari othamaleliwa nthowa na mukhalelo aakhwanihenryeiye murici mukina. Tiheeni atokweene anahuseryaaya orweela wa yootakiherya ya Kiteyoni yeeyo enahaala waakhaviherya mmikhalelo ntoko seiha?

6. Tiheeni atokweene anahuseryaaya orweela wa Kiteyoni vooloca sa ophimelela? (Moone tho eruku.)

 ⁶ Mvekeke nikhaviheryo. Muchu oophimelela onnasuwela okotakota wawe. Kiteyoni aari oophimelela moorweela wa okhala ooreheryeya oveka nikhaviheryo wa akina. (Amut. 6:27, 35; 7:24) Atokweene amiruku anneerano emohamoha. Toni, yoowo oromoliwe woopaceryani, ooloca: “Nthowa na mukhalelo kaaphwiiwalaaka, miyaano kaaneemererya miteko mincipale opwaha vaavaa kaahaalaaka owerya. Mwawiihiiha, kaahilakelela ophitaanyerya mmalapelo a echoko mwaha vooloca sa ophimelela nave kaahaakoha amwaaraka moonelo aya. Miyaano tho kaahuuluulela woona exilema mu jw.org, yeeyo erino muru: Mmutakiherye Yesu Mmukhalelo wa Ovyakiha, Ororomela ni Waavaha Muteko Akina.” Toni ahipacerya waawopa achu akina wi emukhaviherye mmirici aapakeiye. Tiivi yaari yookhumelela? Toni ooloca: “Muteko wa muloko onnapakiwa, nave miyo kookhalano elukuluku wi kiitikitherye mmukhalelo aka woomunepani.”

7. Ti mwawiihai atokweene aneeraaya emutakiherye Kiteyoni vaavaa analociwaaya moonanara? (Tiyaku 3:13)

⁷ Mwaakhuleke mmukhalelo waphaama vaavaa munalociwaanyu moonanara. Yaweeha ekina atokweene anahoolelaaya ori vaavaa awo analociwaaya moonanara. Yootakiherya ya Kiteyoni enanwerya tho okhaviherya. Moohikhwa minikwa, asuwelaka ohiphaameya wawe, owo aahaakhula mwaphaama vaavaa a Efarayimu yaamulocaaya mmukhalelo woonanara. (Amut. 8:1-3) Kiteyoni haawaakhunle moowali. Owo aahooniherya wi aari awiiyeviha, moorweela wa owiriyana miyoonelo saya nave aahiloca ni yaawo mmukhalelo waphaama. Eyo yaahiweeriha awo okhala oomaaleleya. Atokweene a miruku annamutakiherya Kiteyoni vaavaa anawiriyanaaya moopwacha nave yaakhulaka mwaphaama vaavaa analociwaaya moonanara. (Mwaalakhanye Tiyaku 3:13.) Moorweela wa weerano yeela, annatikitherya murecele mmulokoni.

8. Ti mwawiihai atokweene anaphwanelaaya waakhulela vaavaa anavahiwaaya ncicimiho? Mvahe yootakiherya.

⁸ Mumvahe Yehova ncicimiho noothene. Vaavaa Kiteyoni aavahiweiye ncicimiho ntakhara waavootha a Mitiyana, owo aahimvaha Yehova ncicimiho noothene. (Amut. 8:22, 23) Ti mwawiihai atokweene aneeraaya emutakiherye Kiteyoni? Awo anaphwanela omvaha ncicimiho Yehova wa nthowa na miteko anaakhwaniheryaaya. (1 Ako. 4:6, 7) Ntoko yootakiherya, wakhala wi mutokweene oothamaleliwa ntakhara muteko awe wa ohusiha, owo onanwerya oveleela ncicimiho noothene wa Yehova, yoowo ori ehime ya mahusiheryo oothene, Masu Awe ni ovyakiha yoowo nnaakhelaahu mmarehereryo Awe. Atokweene anaphwanela wiisaalikhela wi yoone waakhanle wi mukhalelo aya wa ohusiha onnamucicimiha Yehova naari wi anachuna wiivuwiha. Muthokororye yaweereya emoha ya mutokweene awiichaniwa Timotiyu. Amanle othanliwa ntoko mutokweene, Timotiyu aanasiveliwa operekha miyaha wa achu oothene. Owo ooloca: “Kaanapharihela mapaceryiho ootannya nchuno ni maphwanaphwaniho aphaama. Wiiliwiili achu yaanakithamalela. Moothananiha eyo yaaheriha wi achu etikitheryeyeke wa miyaano ohiya wa Piipiliya naari Yehova.” Moovira wa elukuluku, Timotiyu aahoona wi waanachuneya opaka matorokelo mmukhalelo aahusiheiye, wi asepe wiiruuhela ncicimiho noohiphwanelela. (Mas. 27:21) Ni yookhumelela taani? Owo ooloca: “Ancipale aawerya okileela mukhalelo miyaha saka iwenryaaya waakhaviherya ohoolela saweeha, ovilela makacamiho naari omwaacamela Yehova. Kiri oohakalala ni masu yaala, ohiya othamalela yoowo kaakhelaaka mu iyaakha sa muculi.”

9. Ti mwawiihai wiiwelela ni olipa murima wa Kiteyoni weehiwaaya? (Moone eruku ya ekaapa.)

⁹ Kiteyoni amanle othanliwa ntoko muthoriha, wiiwelela wawe ni olipa wawe murima waaheehiwa. Owo aahivahiwa murici woovilaxa wa omutoloxa altare a muluku Paala yoowo atiithi awe  yaamulapelaaya. (Amut. 6:25, 26) Ohoolo vaya, amanle waathukumanya anakhoco awe, Kiteyoni mu ikwaha piili aahaakhela sooleeliherya sa waavukula anakhoco awe. (Amut. 7:2-7) Wookuchulani owo aahileeliwa wi aahiphele amwiichane awe mmiceche mwaya mu ohiyu eriyari.—Amut. 7:9-11.

10. Ti mwawiihai wiiwelela wa atokweene akhweya onahaalaaya weehiwa?

¹⁰ Atokweene anaphwanela okhala ‘ooreheryeya wiiwelela.’ (Tiy. 3:17) Atokweene ari ooreheryeya wiiwelela yeeyo soorepa sinalocaaya ni ohoolela woorweela mmarehereryo a Muluku. Hiihaa, awo tho annatikitherya yootakiherya yaphaama wa akina. Nlelo, wiiwelela waya onanwerya weehiwa. Ntoko yootakiherya, awo akhweya ananwerya woona okhala woovila ochariha ohoolela yoowo anaakhelaaya. Mmikhalelo mikina, awo ananwerya wiikoha waakhanle wi ohoolela owo chiryeene ti woophara muteko naari wamiruku. Naari awo yaahaala wiikoha waakhanle wi yaahaala weemererya murici yoowo akhweya waahaala okuha va yawoopiha otaphuwa waya. Ti mwawiihai atokweene anatakiheryaaya wiiwelela wa Kiteyoni mmikhalelo ntoko seiya?

11. Tiheeni enahaala waakhaviherya atokweene okhala awiiwelela?

¹¹ Muwiriyaneke moomaaleleya ohoolela nave mphariheleke seiho. Muluku aamuleela Kiteyoni mukhalelo wa omutoloxa altare a muluku a atiithi awe, ni weiwo aaphwaneleiyewo ompakawo altare muvyaani a Yehova, ni enama taani yaahaala ophariheliwa ntoko mukucho. Kiteyoni hoonne wi ohoolela aavahiweiye waari woonanara. Aaheerano hiihaa ntoko Yehova aalonceiye wa yene. Mmahiku ahu, atokweene annaakhela ohoolela wa marehereryo a Yehova moorweela wa ikaarata, soolokoha, ni sooleeliherya vooloca sa okhala wahu phaama omwiilini ni omunepani. Hiyaano ninnaasivela atokweene nthowa nawi awo annachariha moororomeleya ohoolela wa marehereryo. Muloko woothene onnaphura.—Sal. 119:112.

12. Ti mwawiihai atokweene anampharihelaaya Ahepri 13:17 wakhala wi aapakiwa matorokelo mmarehereryo?

¹² Mukhale oorehereya opaka matorokelo. Muupuwele wi Yehova aahimveka Kiteyoni wi aarowihe anakhoco awe ancipale. (Amut. 7:8) Akhweya owo aahuupuwela: ‘Apwanne matorokelo yaala toochuneya? Apwanne matorokelo yaala toophara muteko?’ Naamwi hiihaa, Kiteyoni aahiiwelela. Mmahiku ahu atokweene annamutakiherya Kiteyoni moorweela wa opharihela malakiheryo avahereryiwe mmarehereryo. (Mwaalakhanye Ahepri 13:17.) Ntoko yootakiherya mu 2014, Nikhuuru Noolamulela naahitoroka mukhalelo wa oliveliwa otekiwa wa Ipa sa Omwene ni Ipa sa Muthukumano wa Ekulucu. (2 Ako. 8:12-14) Miloko hisaahaala olivaka ivaale. Opwaha yeeyo, miloko soothene veelaponi saahaala othukumanya ikhorowa saya ntakhara oteka wa mmarehereryo wi iwerye otekiwa weiwo waariwo othowa, moohipwacha olivela wa muloko wa vanipuroni. Vaavaa José aasuwenleiye sa matorokelo yaala, aahikhwa minikwa waakhanle wi yaahala okhumelela phaama, uupuwelaka: ‘Hewerya otekiwa naari  mano Empa emoha ya Omwene. Ichu hineereya hiihaa mmakupa yaala a elapo.’ Tiheeni yaamukhavihenrye José wiiwelela ohoolela? Owo ooloca: “Masu anaphwanyeya mu Masiposipo 3:5, 6 annakuupuxerya omuroromela Yehova. Nave yookhumelela ene yaari yooreera! Ohiya pahiru oteka Ipa sincipale sa Omwene, ninnahuserya okhala awiiwanana mmikhalelo soohiyanahiyana wi oothene ahu nikhale oolikana.”

13. (1) Kiteyoni aalekechen’ye ni eheeni? (2) Ti mwawiihai atokweene aneeraaya emutakiherye Kiteyoni? (Moone tho eruku.)

¹³ Mpake yookhwela ya Yehova moolipa murima. Kiteyoni aahimwiiwelela Yehova moohipwacha woova wawe ni sawoopiha seiyo saavolowelavo. (Amut. 9:17) Amanle waakhela yoororomeliha ya Yehova, Kiteyoni aahilekecheya moomalela wi Yehova aahaala omukhaviherya waakhapelela achu awe. Atokweene yaawo anakhala makupa yaawo muteko ahu onawatiihiwaaya annachariha yootakiherya ya Kiteyoni. Awo moolipa murima annatitelela ohoolela muteko woolaleerya ni mithukumano, moohipwacha woopopihiwa ntakhara owaleliwa mukariposo, othorihiwa, oyeleela muteko naari nlala. c Variyari va yoohooxa etokotoko, onahaala okhala woochuneya wa atokweene olipa murima wi yiiwelele sooleeliherya seiyo anahaalaaya waakhela—moohipwacha ipahu seiho sinahaala ovolowelavo. Ntoko yootakiherya, nnanwerya waakhela sooleeliherya vooloca sa olaleerya muchaka woolipa wa othoriha ni yeeyo nnaphwanelaahu weera wi nivuluwe mu ohiphela wa Koki a Makoki.—Ese. 38:18; Wup. 16:21.

14. Ti mwawiihai ovilela wa Kiteyoni weehiwaaya?

¹⁴ Kiteyoni aahiilipixerya vancipale wi arumeele ntoko muthoriha. Vaavaa a Mitiyana yaachawaaya variyari va ekhoco ya ohiyu, Kiteyoni aahiwiikara mmukuma wa Xesereyeli ophiyerya o Muhice Yortano, yoowo akhweya waarukureryiwe ni ntakhwa. (Amut. 7:22) Apwanne Kiteyoni aaheemela mu Yortano? Hooye! Naamwi yaari oovelavela, owo ni alopwana awe 300 yaalapuwa nave etitelela owiikara. Vookuchulani, awo  yaahaaphwanya a Mitiyana nave yaahaavootha.—Amut. 8:4-12.

15. Ntakhara heeni ilukuluku ikina honakhala wookhweya wi mutokweene avilele?

¹⁵ Mutokweene ilukuluku ikina akhweya onamwiisoona okhala ookotakota omwiilini, mmuupuweloni wi akhapelele muloko ni echoko awe. Mmikhalelo seiya, atokweene eni emutakiherye hai Kiteyoni?

16-17. Tiheeni yaamukhavihenrye Kiteyoni ovilela, nave tiheeni atokweene anaphwanelaaya ororomela? (Yesaya 40:28-31) (Moone tho eruku.)

¹⁶ Muroromele wi Yehova onamoolipihaani. Kiteyoni aahimuroromela Yehova wi aahaala omvaha ikuru nave owo haawaarino ekeerelani. (Amut. 6:14, 34) Mu elukuluku emoha, Kiteyoni ni alopwana awe yaahiwiikara ni meco mamwene meeli a Amitiyani, nave awo yiiha echawaka yaawenle akameelo. (Amut. 8:12, 21) Naamwi hiiha, nnikhaviheryo na Yehova a Isarayeli yaahaaphara ni waavootha yaawo. Atokweene tho anaphwanela omuroromela Yehova, yoowo ‘ohinavelavela nave ohinaphweeleya.’ Owo onahaala waavaha ikuru vaavaa awo anachunaaya.—Mwaalakhanye Yesaya 40:28-31, PMM.

¹⁷ Muthokororye yaweereya ya Mateyu munna mmoha a Nikhuuru Nawiiwanana ni Exipitali. Tiheeni emukhavihenrye ovilela? Mateyu ooloca: “Kaahikhalano ikuru soorweela wa Yehova seiyo sinalociwa mu Afilipi 4:13. Mu ikwaha sincipale, vaavaa kiniisoonaaka okhala oovelavela ni ookotakotasa, kinnavekela mwawiiseela wa Muluku kimvekaka ikuru soomwiilini ni sa mmuupuweloni seiyo kinachunaaka wi kaakhaviherye annaka. Mu ilukuluku seiya, kinnoona munepa wa Yehova okivahaka ikuru, okikhaviheryaka wi kivilele.” Hiihaa ntoko Kiteyoni, atokweene ahu awiiveleela ananwerya ohoolela makacamiho vaavaa anakukhulaaya ipucepuche moosivela. Mwawiihiiha, awo anaphwanela osuwela okotakota waya omwiilini ni mmuupuweloni nave okukhulaka seiyo mwawiiwanana ni mikhalelo saya. Ananwerya tho, ororomela wi Yehova onahaala waakhula mavekelo aaya ntakhara nikhaviheryo nave onahaala waalipiha wi evilele.—Sal. 116:1; Afi. 2:13.

18. Mwa mukwasu, atokweene eni emutakiherye hai Kiteyoni?

¹⁸ Sookhalavo miyaha soochuneya ni soophara muteko seiho atokweene anahuseryaaya orweela wa Kiteyoni. Atokweene anaphwanela wooniherya ophimelela ni wiiyeviha vooloca sa mirici anaakhelaaya ni mukhalelo anaakhulelaaya vaavaa analociwaaya moonanara naari anathamaleliwaaya. Awo anaphwanela wooniherya wiiwelela ni olipa murima, xaxaxa vaavaa makuchuwelo a mukhalelo yoola wa ichu onaacamelaaya. Nave awo anaphwanela ororomela wi moohipwacha makacamiho taani anahoolelaaya, Muluku onanwerya waalipiha. Mweeparipari ninnaathamalela akukhula yaala analapa moowetha nave nnaphwanela ‘otitelela waacicimiha alopwana ntoko yaawo.’—Afi. 2:29.