Piipiliya hanaloca mathowa ene. Nto onnavahererya sooleeliherya sookhweleya seiho saahaala ovolowela yoothanla aya.

Munkeelo aahimuleela Mariya wi owo aahaala orupala ni omuyara mwaana. Vaavaa munkeelo aalokonheiye muchaka yoola, Mariya ni Yosefe yiiso ekhalaka o Nasareti, epooma ya Yosefe o Kalileya. (Luka 1:26-31; 2:4) Ohoolo waya, vaavaa awo yaakonkaaya o Yikuputu, awo yaakele o Nasareti. Yesu aahinnuwa weiwo nave akhala Munaasareti. (Mat. 2:19-23) Ti nthowa nene vaavaa nnuupuwelaahu o Nasareti, mwawaakuveya nnamuupuwela, Yesu, Yosefe ni Mariya.

Mariya aahikhalano muhima awe awiichaniwa Elisapeti, yoowo aakhala o Yuta. Elisapeti aari mwaara a mulipa a mukucho Sakariya nave aahikhala maayi a Yohani Mpatisi. (Luka 1:5, 9, 13, 36) Mariya aahimuxekurya Elisapeti nave aahikhala ni yoowo mu miyeeri miraru o Yuta. Voocharela, Mariya aakookela o Nasareti. (Luka 1:39, 40, 56) Ti nthowa nene Mariya aasuwenleiye o Yuta.

Ohoolo waya, Yosefe aakhuma o Nasareti ayaaka o Petelehemu nthowa nawi Aroma yaahilamulela wi muchu ti muchu aaphwanela “orepeliwa” mu “elapo awe.” O Petelehemu naari nipuro nenlo Yesu aahaaleiye oyariwawo mwawiiwanana ni masu a miririmu. (Luka 2:3, 4; 1 Sam. 17:15; 20:6; Mik. 5:2) Yesu amanle oyariwa weiwo, Yosefe haachuna wi Mariya apake mukwaha woorekama ekookelaka o Nasareti nnikwiya. Awo yaakhala o Petelehemu, mukwaha wa akilomeetru athanu naxexe oya o Yerusalemu. Ohiya yeeyoru, woona wi Nlamulo naanaloca wi ovahiweke mukucho nthowa na oyariwa mwaana, okhala o Yerusalemu, waahaala okhala wookhweya wa yaawo oya o Empa ya Muluku.—Ona. 12:2, 6-8; Luka 2:22-24.

Wuupaceryani, munkeelo a Muluku aahimuleela Mariya wi mwanawe aahaala waakhela “munyukhu wa Tavite” nave aahaala ‘olamulela ntoko Mwene.’ Akhweya Yosefe ni Mariya yaahoona okhala yaphaama Yesu oyariwa mu epooma ya Tavite. (Luka 1:32, 33; 2:11, 17) Akhweya yuupuwela wi yaahaala okhala ya miruku otitelela okhala weiwo ophiyerya esuwenle yeeyo Muluku aachuneiye wi yeere voocharela.

Hiyaano hinnasuwela elukuluku yaamalinhaaya o Petelehemu vaavaa yaakhenlaaya oxekurya wa alipa oovarerya ineneeryo sa itheneeri. Nto noosuwela wi emusi yaakhala mu empa nave wi Yesu aari “mwaana” ohiya nikwiya. (Mat. 2:11) Enakhala woona wi ohiya wi ekookele o Nasareti, awo yaahikhala o Petelehemu mu elukuluku yawaaca wi epooma yeele ekhale nipuro naya mvyaani.

Heroti aahilamulela wi “yiiphiwe anamwane oothene o Petelehemu . . . a iyaakha piili oya vathi.” (Mat. 2:16) Munkeelo aahimulopola Yosefe vooloca sa yeeyo. Mwa yeeyo, Yosefe ni Mariya yaahichawela o Yikuputu ophiyerya okhwa wa Heroti. Voocharela, Yosefe aahikusa echoko awe eya o Nasareti. Ntakhara heeni awo yahaakookenlaaya o Petelehemu? Nthowa nawi mu elukuluku yeele, mwaana a Heroti, Arkelawu taalamulela o Yuteya nave aari muchu oonanara murima. Ohiya yeeyoru, munkeelo aahimulopola Yosefe yawoopiha ya okookela weiwo. Mwa yeeyo, awo yaatitelela okhala o Nasareti. Weiwo, naari nipuro nookhapeleleya wi emphuwe Yesu ntoko mulapeli a Muluku.—Mat. 2:19-22; 13:55; Luka 2:39, 52.

Mwawooneya, Yosefe aakhwile Yesu ahaakumve ohula ephiro ya okumi wa wirimu. Mwa yeeyo, Yosefe onahaala oviihiwa wi akhaleke veelaponi yavathi. Achu ancipale anahaala omoona ni osuwela sooleeliherya sincipale vooloca sa ntakhara heeni owo ni Mariya yaatitelenlaaya okhala o Petelehemu Yesu amanle oyariwa.