Alaleeryi ancipale annampharihela aplikativo JW Library^® wi erehererye mithukumano. Aplikativo yoola onnanikeriha wa mwaha ti mwaha wa yoohuserya ya Mulipeleli, nave eyo ennanikhaviherya vancipale. Nyenya erevista ya Mulipeleli ennaruuha tho miyaha mikina seiho tho siri soolya soomunepani. Ti mwawiihai nneeraahu niphwanye miyaha seiha ni okumiha mphurelo nimpharihelaka JW Library?

• Omakuchuwelo wa yoohuserya ya Mulipeleli annaphwanyeya masu ani “Miyaha Sawaaceererya”. Vathi vaya mumphinye linkhi “Miyaha Mikina mu Erevista Yeela”. Munahaala woona miyaha soothene inaphwanyeya mu erevista yeeyo. Moone wi miyaha sa soohuserya inarwa ni manumero. Nyenya, seiho ihinaruuha manumero ti miyaha mikina. Mphinye mwaha yoowo munachunaanyu waalakhanya.

• Yoothanla ekina ori oya o “Mapacereryo” mu JW Library, wi mphwanye makupa ani “Yeeyo Eri Evyaani” wi mpaxaare erevista ya Mulipeleli ikwaha soothene vaavaa enavonyiwaaya. Voocharela mphinye yoolaleeryiwa mmanlaanyu opaxaara wi moone miyaha soothene siri mwemmo. Mweerano hiihaa, moohikhwa minikwa nyuwaano munahaala woona wi munnaphura phaama miyaha soothene wa yoolaleriwa eri yoothene.