1. Ti heeni nnaphwanelaahu weera wi nivuluxiwe mu nihiku na Yehova?

 VAAVAA Piipiliya onaloceiye sa “nihiku na Yehova,” onaloca sa elukuluku yeeyo Yehova onahaaleiye waathoriha amwiicani awe ni waavuluxa achu awe. Khalai, Yehova aahilaka maloko makina. (Yes. 13:1, 6; Ese. 13:5; Sof. 1:8) Mmahiku ahu, “nihiku na Yehova” nnahaala opacerya ni ohiphela wa Papulu Mutokotoko, nave nnahaala okuchula ni ekhoco ya Armaketo. Wi nivuluxiwe mu “nihiku” nenlo, hiyaano nnaphwanela wiirehererya hiihaano. Yesu oohusiha wi nnaphwanela ohiya pahiru wiirehererya ntakhara, “yoohooxa etokotoko” nyenya tho otitelela okhala ‘ooreheryeya’ ntakhara eyo.—Mat. 24:21; Luka 12:40.

2. Ntakhara heeni nnanwerya ophura orweela wa 1 Atesalonika?

² Mu ekaarata awe yoopacerya yooveereliwa wa Atesalonika, murummwa Paulo aahipharihela maphwanaphwaniho mancipale wi aakhaviherye Akristu otitelela okhala oorehereya ntakhara nihiku ntokweene na othoriha wa Yehova. Paulo aasuwela wi nihiku na Yehova hinaahaala ophiya mu elukuluku yeele. (2 Ate. 2:1-3) Naamwiihiiha, aahaalopola annawe okhala awiirehererya ntakhara nihiku nenlo ntoko wi naahaala ophiya mu nihiku noocharela, nave hiyaano tho nnanwerya opharihela ekano awe. Hankooni nthokororye othariha wawe vooloca sa miyaha inacharela: (1) ti mwawiihai nihiku na Yehova nnahaalaaya orwa, (2) taani oni ahivuluwe mu nihiku nenlo nave (3) nni niwerye hai wiirehererya wi nivuluwe.

3. Ti mwawiihai nihiku na Yehova nnahaalaaya orwa ntoko mpava ohiyu? (Moone tho eruku.)

³ “Ntoko mpava” ohiyu. (1 Ate. 5:2) Ala masu oopacerya a masu mararu oosiphela anaphariheliwa wi elociwe sa orwa wa nihiku na  Yehova. Ampava ikwaha sincipale annapharihela epiiphi ya ohiyu wi ewiiyere achu mu elukuluku yeeyo ehinawehereryaaya. Nihiku na Yehova tho nnahaala orwa moohiwehereryeya, naaphwanyaka achu ancipale mootutuxa. Ophiyerya tho wi Akristu eeparipari ananwerya okhala ootikhiniheya vaavaa anahaalaaya woonaka ichu iha seereyaka. Nyenya, moohiyana ni ootakhala, hiyaano hintoloxiwa.

4. Mmukhalelo taani nihiku na Yehova nryaaya ntoko masooso a oyara?

⁴ “Ntoko masooso a oyara anamurweelaaya muthiyana orupanle.” (1 Ate. 5:3) Muthiyana orupanle hanasuwelaru elukuluku yeeyo owo onahaaleiye oyara. Naamwiihiiha, owo hanakhwa minikwa wi onahaala oyara. Vaava eyo enahaalaaya weereya, mwawooneya, oyara onahaala okhala wootutuxa, wawiicelaxa ni woohimaaliheya. Mmukhalelo mmohamoha, hannasuwela nihiku ni ewora yeeyo nihiku na Yehova nnahaalaaya opacerya. Mwawiihiiha, nri oolekecheya wi orwa wa nihiku na othoriha wa Muluku wa achu ootakhala onahaala okhala wootutuxa ni ohiwerya okophola.

5. Mmukhalelo taani yoohoosa etokotoko eryaaya ntoko oyaaka nuuxa?

⁵ Ntoko oyaaka nuuxa. Mu niphwanaphwaniho naneeraru, murummwa Paulo onnaaloca wanaawiili ampava yiiyaka ohiyu. Nyenya Paulo aahitoroka moonelo awe nave alikanyiha nihiku na Yehova ntoko oyaaka nuuxa. (1 Ate. 5:4) Ampava yaawo anarwa ohiyu anatikitheryeya ni wiiya ophiyerya oyeleela ovareryela elukuluku. Waarya wa nsuwa wa nihiku nivyaani onanwerya waaphwanya mootutuxa ni waasuwanyeiha. Yoohooxa etokotoko enamwaasuwanyeiha tho yaale eri ntoko ampava, anakhala mu epiiphi ni etitelelaka opaka miteko sihinamuhakalaliha Muluku. Moohiyana ni yaawo, nnanwerya okhala oorehereryeya okhooca meecelo oonanara yaawo ahinamuhakalaliha Yehova ni waavyaka “yoothene eri yaphaama, ya wookololowa ni yeeparipari.”  (Aef. 5:8-12) Voocharela, Paulo onnapharihela maphwanaphwaniho meeli wi aaloce yaale ahinahaala okophola.

6. Mmukhalelo taani achu ancipale anarupaaya? (1 Atesalonika 5:6, 7)

⁶ “Yaawo anarupa.” (Mwaalakhanye 1 Atesalonika 5:6, 7.) Paulo ohaalikanyiha yaale anahaala otoloxiwa mu nihiku na Yehova ni achu yaawo anaamurupa. Awo hanasuwela ichu saarukurenrye naari ovira wa elukuluku. Awo hanasuwela vaavaa ichu soochuneya ineereyaaya nave hanawerya waakhulela seiho. Achu ancipale mmahiku ahu yaala anamurupa mmukhalelo woomunepani. (Aro. 11:8) Awo hanavaha esisapo sawooniherya wi nnakhala “mmahiku ookuchula” ni wi yoohooxa etokotoko enahaala orwa moohilekela. Saweereya itokweene sa elapo sinanwerya waaviiha akina mu ikhove soomunepani ni waaceenyerya wooniherya nchuno na vakhaani wa michaka sahu sa Omwene. Nyenya, achu ancipale annatitelela orupa ohiya ovinya omunepani. Naamwi akina yeemereryaka sa nihiku na othoriha, awo anoona wi noorakamela. (2 Pet. 3:3, 4) Nyenya, ninnasuwela wi nlakiheryo niveereliwe wi nikhale oovinya, ninnakhala noochuneya nihiku ti nihiku nnavira.

7. Ti mwawiihai yaale anahoolela esara ya Muluku aryaaya ntoko achu oohapaliwa?

⁷ “Yaawo anahapaliwa.” Murummwa Paulo ohaalikanyiha yaale enahaala ohoolela esara ya Muluku ntoko yaale anahapaliwa. Achu ehapaliwe hanawerya waakhulela ichu saarukurenrye nave annapaka soolakelela soonanara. Mmukhalelo mmohamoha, achu oonanara hanaakhulela malakiheryo a Muluku. Awo annathanla ephiro enaakeriha wootoloxiwani waya. Nyenya, Akristu annahusihiwa otitelela okhapelela mavyakelo aya a wuupuwela. (1 Ate. 5:6) Mulipa oomutholathola Piipiliya mmoha olonce wi muchu yoowo onakhapelela mavyakelo awe a wuupuwela “ti yoole oneeriha muupuwelo awe okhala woomaaleleya nave hanakhala oohaleeliheya. Owo tooreheryeya wuupuwela phaama, mwawiihiiha, onnapaka soolakelela saphaama.” Ntakhara heeni nnaphwanelaahu okhala oomaaleleya ni oohihaleeliheya? Wi nihiivoliiherye mmiyaha sa ipoliitika naari sa elapo yeela. Vaavaa nihiku na Yehova nnaacamelaaya, okhinyereryiwa opaka makupa a epoliitika onahaala waaceereryeya. Naamwiihiiha, hannaphwanela wuukhuwa vooloca sa mukhalelo nnahaalaahu waakhulela. Munepa wa Muluku onanwerya onikhaviherya okhalano muupuwelo woomaaleleya, ohikhala oohaleeliheya ni opaka soolakelela mwa miruku.—Luka 12:11, 12.

8. Ti mwawiihai 1 Atesalonika 5:8 onooniheryeiye mikhalelo saphaama seiyo inahaala onikhaviherya okhala oolipelela ni okhapelela mavyakelo ahu a wuupuwela? (Moone tho eruku.)

⁸ “Owara yawiisaakihano . . . ni . . . kapaseti.” Paulo oonilikanyiha ni anakhoco yaawo evyakihiwe ni ewanre ntakhara ekhoco. (Mwaalakhanye 1 Atesalonika 5:8.) Achu anaweherya wi nakhoco akhale ooreheryeya owaniha mu elukuluku vyakala enakhumelelaaya ekhoco. Ela tho emohamoha wa hiyaano. Ninnatitelela okhala ooreheryeya ntakhara nihiku na Yehova moorweela wa owara yawiisaakihano ya nroromelo ni osivela ni kapasete a ewehereryo. Mikhalelo seiya sinanwerya onikhaviherya vancipale.

9. Ti mwawiihai nroromelo nahu nnanikhapelelaaya?

⁹ Yawiisaakihano yaanakhapelela murima wa nakhoco. Nroromelo ni osivela sinnakhapelela murima ahu woosiphela. Iho inahaala onikhaviherya otitelela omurumeela Muluku ni omuchara Yesu. Nroromelo ninnanlekecha wi Yehova onahaala onreeliha vaavaa nnamwaavyaahu ni murima ahu woothene. (Ahe. 11:6) Nroromelo nnamuniceenyerya wi ntitelele okhala oororomeleya wa Muhooleli ahu, Yesu, naamwi eyo evolowelaka ovilela makacamiho. Nnanwerya oteka nroromelo vaavaa nnahoolelaahu makacamiho  a okumi, nivareryaka sootakiherya sa achu a mmahiku ahu, yaawo yaavilenle moororomeleya moohipwacha wiikariwa naari makacamiho a ikhorowa. Nave nnanwerya osepa muraakho wa wiithukumanyerya naatakiheryaka yaale anakhweiha okumi aya wi ekuhe soochuna sa Omwene mu nipuro noopacerya. b

10. Ti mwawiihai omusivela Muluku ni mwaacamani ahu onanikhaviheryaaya ovilela?

¹⁰ Osivela tho ti woochuneya wi ntitelele okhala awiilipelela ni okhapelela mukhalelo ahu wa wuupuwela. (Mat. 22:37-39) Omusivela Muluku onnanikhaviherya ovilela mmuteko woolaleerya moohipwacha makacamiho muteko yoowo onanruuhelaaya. (2 Tim. 1:7, 8) Wa nthowa na waasivela yaale ahinamurumeela Yehova, ninnatitelela olaleerya ni otitelela olapa mu ekulucu ahu naamwi nivahaka onamoona moorweela wa telefoni ni ikaarata. Hannayeleela ewehereryo wi nihiku naya achu anahaala opaka matorokelo ni opacerya opaka yeeyo eri yaphaama.—Ese. 18:27, 28.

11. Ti mwawiihai waasivela akhwiihu a munroromeloni onanikhaviheryaaya? (1 Atesalonika 5:11)

¹¹ Waasivela amwaacamani ahu onnaphitaanyerya tho Akristu akhwiihu. Ninnooniherya osivela yoola moorweela wa “olipihana mukina ni mukhwaawe ni otikitheryana mukina ni mukhwaawe.” (Mwaalakhanye 1 Atesalonika 5:11.) Hiihaa ntoko anakhoco anakhaviheryanaaya mu ikhoco, hiyaano ninnalipihana mukina ni mukhwaawe. Mweeparipari, nakhoco onanwerya omphoreiha nakhoco mukhwaawe vaavaa anawanihaaya, nyenya owo harwa eerano yeeyo moolakelela. Moolikana, hinrwa nimphoreiha munna naari murokora moolakelela naari okookiheryana yoonanara ni yoonanara. (1 Ate. 5:13, 15) Hiyaano tho ninnooniherya osivela wahu moorweela wa waacicimiha anna yaawo anahoolela mmulokoni. (1 Ate. 5:12) Vaavaa Paulo aarempeiye ekaarata yeela, muloko wo Tesalonika hiwaamalinhe eyaakha emoha vaavaa waatikitheryiwaaya. Atokweene a muloko yoole hiyaarinono mavyakelo nave akhweya yaanapaka soohesa. Naamwiihiiha, awo yaanaphwanela ocicimihiwa. Vaavaa yoohoosa etokotoko enaacamelaaya, akhweya nnahaala  ochuna pahiru nikhaviheryo na atokweene a vanipuroni wi enivahe ohoolela opwaha yoowo ananivahereryaaya hiihava. Moohipwacha yeeyo eni yeereye, hankooni ntitelele okhapelela mavyakelo ahu a wuupuwela, ohiya otikitheryeya mu ohiphaameya waya, nyenya ntikitheryeyaka mu eparipari yawi Yehova, orweela wa Kristu onnaahoolela alopwana yaala oororomeleya.

12. Ti mwawiihai ewehereryo ahu enakhapelelaaya muupuwelo ahu?

¹² Hiihaa ntoko kapasete onakhapeleleiye muru wa nakhoco, ewehereryo ahu ya ovuluxiwa ennakhapelela muupuwelo ahu. Ni ewehereryo yoolipa, ninnawerya woona wi ichu seiyo elapo yeela enavahaaya tahi echweenevo. (Afi. 3:8) Ewehereryo ahu ennanikhaviherya otitelela okhala oororomeleya ni awiithipela. Ela yaaheereya ni Wallace vamoha ni Laurinda, yaawo anarumeela o Afrika. Mpuwa mwa isumana raru, oothene yaahaayeleela mmoha a asitiithi aya. Nthowa na epahu ya Koronaviru hiyaawenrye oya owaani wi yakhale ni amusi aya. Wallace oorepa: “Ewehereryo ya ovinya mookhwani yookikhaviherya wuupuwelelaka sa awo ohiya mmukhalelo ntoko awo yaaryaaya mmahiku ookuchula a elapo yeela, nyenya mmukhalelo aya wa okhala mu nihiku noopacerya na elapo evyaani. Ewehereryo yeela ennakimaaliha vaavaa kinakhalaaka oothanana ni wiisoona oyeleela.”

13. Tiheeni nnaphwanelaahu weera wi naakhele munepa waweela?

¹³ “Muhixipihe mooro wa munepa.” (1 Ate. 5:19) Murummwa Paulo oolikanyiha munepa waweela ni mooro onavarela mpuwa mwahu. Vaavaa hiyaano nnakhalaahuno munepa wa Muluku, ninnakhalano mvai ni nchuno na weerano yeeyo eri yaphaama, nyenya owo onnanceenyerya olapa ntakhara Yehova. (Aro. 12:11) Tiheeni nnaphwanelaahu weera wi naakhele munepa waweela? Nnanwerya ovekela ntakhara munepa waweela, ohuserya Masu ooveereliwa a Muluku, ni okhala mmarehereryo yaawo anahooleliwa ni munepa awe. Weerano yeela enahaala onikhaviherya winnuwiha “yawiima ya munepa.”—Aka. 5:22, 23.

14. Tiheeni nnaphwanelaahu osepa wakhala wi ninnachuna otitelela waakhela munepa wa Muluku? (Moone tho eruku.)

¹⁴ Muluku amanle onivaha munepa awe waweela,  nnaphwanela okhalano ekaasoope wi ‘nihixipihe mooro wa munepa.’ Muluku onaavaha munepa awe waweela pahiru yaale arino muupuwelo waphaama ni meecelo aphaama. Owo hatitelela onivaha munepa awe waweela wakhala wi ninnatitelela wuupuwela ichu sooriipiheya ni opaka ichu mwawiiwanana ni seiho. (1 Ate. 4:7, 8) Wi ntitelele waakhela munepa waweela, hannaphwanela ‘okhaliha mwa munyemu masu a miririmu.’ (1 Ate. 5:20) “Masu a miririmu” va, inaahiwa michaka seiho sinavahereryiwa ni munepa wa Muluku, ophitaanyerya seiyo sinaloca sa nihiku na Yehova ni waakuveya wa elukuluku ahu. Hannaphwanela wuupuwela wi nihiku na Yehova naari Armaketo herwa mmahiku nnakhalaahu. Ohiya yeeyo, ninnooniherya wi ninnasuwela wi owo onahaala orwa moohilekela moorweela wa otitelela okhala ooweiwa mmuteko woolaleerya ni okhalano “meecelo aweela” mahiku oothene.—2 Pet. 3:11, 12.

15. Ti mwawiihai nneeraahu nsepe owokiwa ni soolokoha sawootha sa masololo? (1 Atesalonika 5:21)

¹⁵ Mu omwaahiyu onoorwa, amwiicani a Muluku anahaala oloca wi aakhalano “Murecele ni Okhapeleleya!” mmukhalelo wammoori. (1 Ate. 5:3) Masu ooveereliwa ni masololo anahaala osareya veelaponi yavathi, yaawokaka achu ancipale. (Wup. 16:13, 14) Hanka vooloca sa hiyo? Hiyaano hiniwokiwa wakhala wi ‘nohaalikhela ichu soothene.’ (Mwaalakhanye 1 Atesalonika 5:21;.) Masu a Ekiriki ataphuleliwe ntoko ‘waalikhela’ aaphariheliwa mwawiiwanana ni ovarerya mithipo sasisapo. Mwawiihiiha, nnaphwanela waalikhelaka yeeyo nniiwaahu ni yeeyo nnaalakhanyaahu wi noone waakhanle wi ti yaphaama. Eyo yaari yoochuneya wa Atesalonika, nave ti yoochuneyaxa wa hiyaano, xaxaxa vaavaa yoohooxa etokotoko enaacamelaaya. Ohiya weemererya ichu vyakala seiho achu akina analocaaya, ninnapharihela mavyakelo ahu awuupuwela wi nlikanyihe yeeyo nnaalakhanyaahu naari yeeyo nniiwaahu ni yeeyo Piipiliya ni marehereryo a Yehova analocaaya. Neerano yeela, hinirwa niwokiwa ni soolokoha vyakala sa masololo naari mavyakelo aya.—Mas. 14:15; 1 Tim. 4:1.

16. Ewehereryo taani nryaahuno, nave eyo enanceenyerya weera eheeni?

¹⁶ Ntoko nikhuuru, achu a Muluku anahaala okophola mu yoohooxa etokotoko. Nyenya, hannasuwela yeeyo enahaala weereya ni mmoha ti mmoha a hiyo omeelo. (Tiy. 4:14) Moohipwacha waakhanle wi nnahaala okhala variyari va yoohooxa etokotoko naari ehaakumve, nnahaala oreelihiwa ni ekumi yoohimala wakhala wi nootitelela okhala oororomeleya. Oothanliwa anahaala okhala ni Yesu wirimu. Ipucepuche ikina inahaala okhala mparataiso veelaponi yavathi. Oothene ahu nnaphwanela otikitheryeya mu ewehereryo ahu yaphaamaxa ni otitelela okhala ooreheryeya ntakhara nihiku na Yehova!