1-2. Hiihaa ntoko Loti, nikacamiho taani Akristu anahoolelaaya olelo?

 VAAVAA nnoonaahu meecelo aphaama ekukuceyaka mmahiku ahu yaala, ninniisoona ntoko Loti. Owo “aari oothananaxa wa nthowa na meecelo awuuliha muru a achu ootakhala murima,” tiwi owo aanasuwela wi Tiithi ahu awirimu onniica mukhalelo yoola woonanara. (2 Pet. 2:7, 8) Omoova ni omusivela Muluku saahimukhaviherya Loti okhooca meecelo oonanara a achu yaamurukurenrye. Hiyaano tho nrukureryiwe ni achu yaawo ahinacicimiha meecelo aphaama a Yehova. Naamwiihiiha, nnanwerya okhala aweela mmeecelo, wakhala wi nootitelela omusivela Muluku ni ohuserya omoova yoowo mmukhalelo waphaama.—Mas. 14:2.

² Wi neereno yeela, nookhalano nikhaviheryo na Yehova. Owo onnampharihela liivuru a Masiposipo wi aniceenyerye. Akristu oothene, alopwana ni athiyana, amiravo ni awunnuwelavo, ananwerya ohuserya vancipale orweela mu omuhuserya liivuru yoola.

3. Mwawiiwanana ni Masiposipo 17:3, nthowa taani noochuneya nryaahuno na okhapelela murima ahu? (Moone tho eruku.)

³ Nthowa nimoha noochuneya nnaneeriha okhapelela murima ahu, tiwi Yehova onnaalikhela murima ahu. Moohiyana ni achu akina yaawo anoona mukhalelo ahu wa vaate, Yehova onnawerya waalikhela mukhalelo ahu wa mpuwa. (Mwaalakhanye Masiposipo 17:3.) Wakhala wi noosareiha muupuwelo ahu ni ikano sa miruku sa Yehova, owo onahaala onsivelaka nave tho onivaha ekumi yoohimala. (Yoh. 4:14) Mwawiihiiha, meecelo oohiphwanelela ni sawootha sa Satana hasinipahula nthowa nawi hinivahaka esisapo ichu seiha. (1 Yoh. 5:18, 19) Vaavaa nnamwaacamelaahu Yehova, omusivela ni omucicimiha wahu onahaala wunnuwa. Ninnamusivela vancipale Tiithi ahu Yehova, ophiyerya wi ninniica  muupuwelo vyakala wa opaka yoocheka. Wakhala wi ninneehiwa wi nipake echu yoonanara, nnaphwanela wuupuwelela: ‘Ntakhara heeni kaahaalaaka omuthananiha muchu yoowo oonihenrye osivela wa miyo ikwaha sincipale?’—1 Yoh. 4:9, 10.

4. Ti mwawiihai omoova Yehova waamukhavihenryaaya murokora okhooca opaka yoocheka?

⁴ Murokora mmoha awiichaniwa Marta onakhala o Krowasiya yoowo eehiwe wi apake ocapaheya, ooloca: “Wa miyaano, waari woovila wuupuwela phaama ni owaniha ni nchuno na opaka echu yoonanara pahiru mu ohakalala wa elukuluku ya vakhaani. Nto omoova Yehova waahikikhapelela.” b Nyenya ti mwawiihai omoova Yehova waamukhavihenryaaya Marta? Marta ooloca wi aanuupuwelela sookhumelela sa opaka yoohesa. Nave hiyaano nnaphwanela opaka emohamoha. Nnaphwanela wuupuwela yookhumelela yoothananiha, naari wi, echu enahaala weereya, ori omuhiciha Yehova ni oyeleela ekari ya omurumeela okhala wookhala.—Map. 6:5, 6.

5. Tiheeni nnahuseryaahu ni yaweereya ya Leyo?

⁵ Vaavaa nnamoovaahu Yehova, hiyaano ninnakhalano ekaasoope wi nihiikupheleleke ntakhara meecelo oonanara. Ley, yoowo onakhala o Konku, oohuseryavo echu mu yaweereya ela. Ivinrevo iyaakha sese amanle opatisiwa, owo aahivoloweliwa ni onthamwene woonanara. Owo uupuwela wi wakhala wi hapanke echu yoonanara, hinaari nikacamiho opaka onthamwene yoowo, nave hiyaari yoochekeya wa Yehova. Nyenya ehivinrevo elukuluku yincipale, onthamwene yoowo woonanara waahimvolowela Leyo mu ohapaliwa ni ocapaheya. Yaari elukuluku yeeyo owo aapacenryeiye wuupuwela yeeyo aahusenryeiye ni asitiithi awe ni mukhalelo aareiye oohakalala vaavaa aamurumeeleiye Yehova. Tiivi yaari yookhumelela? Owo aahiisuupuwelela nave ahiya opaka yoonanara.  Nnikhaviheryo na atokweene a muloko, owo aahimukookela Yehova. Olelo, owo ori oohakalala amurumeelaka Yehova ntoko mutokweene a muloko ni piyoneero avameekhaaya.

6. Athiyana a mukhalelo taani Masiposipo ekapitulu 9 enaalocaaya?

⁶ Vano nnahaala woona ekapitulu 9 ya Masiposipo vaavaa nnaalakhanyaahu vooloca sa athiyana eeli. Mmoha oneemelela miruku nave mukina oneemelela ololo. (Mulikanyihe ni Aroma 5:14; Akalatiya 4:24) Vaavaa nnathokororyaahu ekapitulu yeela, muupuwele wi elapo ya Satana enavoloweliwa ni ocapaheya vamoha ni epwitikiri. (Aef. 4:19) Mwawiihiiha, ti woochuneyaxa otitelela omoova Muluku ni okhala ocai wa yeeyo eri yoonanara. (Mas. 16:6) Mwa yeeyo, oothene ahu, alopwana vamoha ni athiyana, nnanwerya okumihavo mphurelo wa yeeyo ekapitulu ela enahusihaaya. Athiyana yaala apiili annaawopa alolo—yaale ‘muru aya ohinlapa.’ Ari ntoko analoca wi: ‘Orwe owannyaka wi olye echu.’ (Mas. 9:1, 5, 6, 13, 16, 17, TNM) Moohipwacha nwopelo muchu oneereiye eemererye, sookhumelela sinahaala okhala soohiyanaxa.

7. Mwawiiwanana ni Masiposipo 9:13-18, tiivi eri yookhumelela ya weemererya nwopelo wa muthiyana ori mulolo? (Moone tho eruku.)

⁷ Wuupaceryani nnahaala woona nwopelo wa “muthiyana ori mulolo” onapakeiye. (Mwaalakhanye Masiposipo 9:13-18, TNM.) Owo hanuuliwa muru waawopa alolo ntakhara yoolya, ariki: ‘Mvolowe va.’ Nto tiivi eri yookhumelela? “Achu ookhwa ari vaate vawe.” Akhweya nyuwaano munnuupuwela wi mu liivuru a Masiposipo ninnaphwanyamo soolikanyiha ntoko yaala. Hiyaano ninnalopoliwa vooloca sa “muthiyana oocheka” ni “muthiyana aweeca pure.” Nave ninnaleeliwa wi “empa awe enakeriha wookhwani.” (Mas. 2:11-19, TNM) Masiposipo 5:3-10 onnaphwanyeyamo olopola vooloca sa “muthiyana” mukina “oocheka” nave elonce wi “meecelo awe anakeriha o Mahiye.”

8. Yoolakelela taani nnaphwanelaahu opaka?

⁸ Yaale ananwiriyana “muthiyana ori mulolo” anaphwanela olakelela waakhanle wi anahaala weemererya naari hooye nwopelo owo onapakeiye. Nave akhweya hiyaano tho nnaphwanela opaka yoolakelela yoolikana. Ntoko yootakiherya, tiheeni nnahaalaahu weera wakhala wi muchu onneererya oneeriha ocapaheya naari mootutuxa nohoona eruku ya epwitikiri?

9-10. Mathowa taani nryaahuno a osepa ocapaheya?

⁹ Nookhalano mathowa aphaama a osepa ocapaheya. “Muthiyana ori mulolo” oni: “Maahi awiiyiwa tawi vyaa.” Taavi ari “maahi awiiyiwa”? Piipiliya onnalikanyiha okonihana wa achu athelanne ni maahi ooriiryela. (Mas. 5: 15-18) Mulopwana ni muthiyana yaawo athelanne mwawiiwanana ni nlamulo anneemereryiwa okonihana. Nto “maahi awiiyiwa” ari oohiyanaxa vancipale. Awo ananwerya olikanyihiwa ni ocapaheya naari okonihana wooheemereryiwa. Achu yaawo anacapaheya, wiiliwiili anneererya wiipithiha wa akina, hiihaa ntoko mpava oneereryeiye wiiya ahooniwe ni muchu. Nave vaavaa achu anoonaaya wi haavo onahaala osuwela wa yeeyo eenraaya, “maahi” yaawo “awiiyiwa” ananwerya okhala ntoko wi toosivaxa. Yoohesa etokweene wuupuwela hiihaa! Yehova onnoona soothene, hiyaavo eri “yoosiva” wa yeeyo. Moohiyana, oyeleela onthamwene ni Yehova eri echu yoothananihaxa. (1 Ako. 6:9, 10) Nyenya tahi yeeyoru.

¹⁰ Ocapaheya onanwerya omweeriha muchu okhala awuuliheya muru ni wiisoona ohikhala echweenevo. Ohiya yeeyoru, ocapaheya onanwerya okumiherya orupala woohilakelela ni omwarya ichoko. Mweeparipari, echu eri yamiruku weera, ori oheemererya nwopelo wa muthiyana ori mulolo. Ohiya pahiru okhwa omunepani, naari wi, oyeleela onthamwene ni Yehova, achu ancipale anacapaheya annarava ireca nave ananwerya okhwa. (Mas. 7:23, 26) Yoorepa ya Masiposipo 9:18 ennakuchula eriki: “Oowompwa awe ari Mmahiye awiixa.” Waakhanle wi yookhumelela ya nwopelo owo ti yoothananiha, vano ntakhara heeni achu aneemereryaaya?— Mas. 9:13-18, TNM.

11. Ntakhara heeni epwitikiri eryaaya yawoopiha?

¹¹ Echu eri yawunlaana olelo, nnaphwanelaahu osepa eri epwitikiri. Akina anoona wi hiyaavoru yawoopiha woona epwitikiri. Nto mweeparipari, epwitikiri ennatannya makacamiho mancipale; ennamweeriha muchu oyeleela ncicimiho wa yene ni wa achu akina nave ennakhala eviisiyu yoovila ohiya. Muchu amanle woona epwitikiri onakhala woovila oviihamo mmuupuweloni iruku seiho sa ocapaheya. Ohiya yeeyoru, epwitikiri henamaliha nchuno noonanara, moohiyana enamvira erikimwaacererya. (Ako. 3:5; Tiy. 1:14, 15) Ti nthowa nene achu ancipale anoona epwitikiri anapakaaya ocapaheya.

12. Nni nsepe hai iruku inatannya nchuno na okonihana?

¹² Tiheeni Mukristu onaphwaneleiye weera wakhala wi eruku ya epwitikiri yookhumelela mu telefoni naari mu komputatore mwawe? Nnaphwanela ohiya oweha mwawaakuveya. Enamukhala yookhweya weerano yeeyo wakhala wi nohuupuwela wi echu yoochuneyaxa ori onthamwene ahu ni Yehova. Iruku ikina inanwerya wooniwa ntoko wi tahi sa epwitikiri, naamwi hiihaa, iho inanwerya oneeriha okhalano nchuno na okonihana. Ntakhara heeni nnaphwanelaahu osepa iruku sa mukhalelo yoowo? Naamwi eri echu ekhaani, hinnachunaru weera echu enahaala oneeriha wuupuwela naari opaka ocapaheya. (Mat. 5:28, 29) Mutokweene mmoha o Tailantiya, awiichaniwa David, oriye: “Miyaano kinnamaala nave kuupuwela: ‘Naamwi iruku seiha ihiri sa epwitikiri, apwanne Yehova onahaala ohakalala wakhala wi kinnatitelela oweha?’ Wuupuwela mmukhalelo yoola ennakikhaviherya opaka soolakelela mwa miruku.”

13. Tiheeni enanikhaviherya opaka soolakelela saphaama?

¹³ Woova opaka echu vyakala enahaala omuthananiha Yehova enahala onikhaviherya opaka soolakelela saphaama. Omoova Yehova “mapacereryo,” naari mathipelo “a miruku.” (Mas. 9:10, TNM) Eyo ennakhala yawooneya mu iversikulu soopacerya sa Masiposipo ekapitulu 9, mummo nnaalakhanyaahumo vooloca sa “miruku seeparipari” inamweemelela muthiyana mukina.

14. Nwopelo taani mukina nnaphwanyaahu mu Masiposipo 9:1-6?

¹⁴ Mwaalakhanye Masiposipo 9:1-6. Va ninnoona nwopelo wa Yehova, yoowo ori  Mpatuxa ahu ni Mwaneene a miruku. (Mas. 2:6; Aro. 16:27) Iversikulu iha sinnaloca sa empa etokweene ni apoco aya athanu napiili. Empa ela ennanikhaviherya wiiwexexa wi Yehova tamahala nave onnawaakhela phaama oothene yaawo anachuna ohuserya vooloca sa yoowo ni okhala a miruku.

15. Tiheeni Yehova onachuneiye wi nipake?

¹⁵ Yaweereya enaphwanyeya mu Masiposipo ennamuloca muthiyana a mahala yoowo onarehererya yoolya, aakanyerya eviinyu awe nave akuha vameesa. Muthiyana yoola oneemelela “miruku seeparipari,” inalociwa mu Masiposipo ekapitulu 9 nave yootakiherya awe tho ennanihusiha wi Yehova tamahala wa soothene onanivaheiye. (Mas. 9:2, masu a vathi.) Ohiya yeeyoru, mwawiiwanana ni iversikulu 4 ni 5, owo onnaloca wa “yaale ahinalapa muru: ‘Murwe, mukhuure epaau aka.’” Ntakhara heeni nnaphwanelaahu weemererya nwopelo yoola? Yehova onachuna wi anamwane awe ekhale amiruku. Owo onachuna onikhapelela. Owo hanachuna wi nihuserye ichu mmukhalelo woovilaxa. Mwawiihiiha, hinikhala oothanana mu ekumi ahu yoothene, okhalano ekeerelani wa yeeyo neenraahu naari wuupuwelaka soohesa sahu. Ti nthowa nene “owo onnaakuherya eekhaikhai miruku soophara muteko”. (Mas. 2:7, TNM) Wakhala wi ninnamoova Yehova mmukhalelo waphaama, nnahaala ochuna omuhakalaliha. Hiyaano nnahaala owiriyanaka miruku sawe nave nnahaala osiveliwaka opharihela muteko mu ekumi ahu miruku seiho.— Tiy. 1:25.

16. Ti mwawiihai omoova Yehova waamukhavihenryaaya Alain opaka yoolakelela ya miruku nave tiivi yaari yookhumelela?

¹⁶ Moone mukhalelo omoova Muluku waamukhavihenryaaya Alain opaka yoolakelela ya miruku. Alain, yoowo ori mutokweene nave onalapa ntoko purusoore, oriye: “Asinthamwene aka oomutekoni yuupuwela wi ifilme sa epwitikiri saahusiha vancipale vooloca sa okonihana.” Nto Alain aanasuwela wi eyo tahi eparipari. Owo oriye: “Miyaano kinnamusivela ni omucicimiha Yehova, nave nkeemerenrye woona ifilme seiho. Miyaano tho kaahaatharihela asinthamwene aka oomutekoni ntakhara heeni kahaahaalaaka weerano yeeyo.” Alain aanapharihela ekano ya “miruku seeparipari,” ya ‘ocharaka ephiro ya osuwelaxa’. (Mas. 9:6, TNM) Mapurusoore makina yaahikhala ootikhiniheya nave vano annamuhuserya Piipiliya ni oya mmithukumano.

17-18. Ichu taani saphaama ineereya ni yaale aneemererya nwopelo wa “miruku seeparipari,” nave tiheeni anawehereryaaya omwaahiyu? (Moone tho eruku.)

¹⁷ Yehova onnaapharihela athiyana yaale apiili wi anooniherye mukhalelo nneeraahu nikhaleno omwaahiyu woohakalaliha. Yaale aneemererya nwopelo wa “muthiyana ori mulolo”  anaavya soochuna sawi “vyaa” naari sawiiphiini, ntoko ocapaheya. Awo anaweiwa ni ichu sa elukuluku yeeyo nave hanuupuwela wa sookhumelela soothene sa omwaahiyu. Yookhumelela ti yawi, mukhalelo yoowo wa okumi onahaala waakeeriha “mmahiye awiixa.”— Mas. 9:13, 17, 18, TNM.

¹⁸ Nto yaale aneemererya nwopelo wa muthiyana amiruku, naari wi “miruku seeparipari”, yookhumelela enakhala yoohiyana! Owo onnarehererya yoolya ntakhara oowompwa awe, soothene awo anachunaaya wi etitelele omwaacamela Yehova. (Yes. 65:13) Moorweela wa mulipa a miririmu Yesaya, Yehova oriye: “Mukiwiriyane nave munamulya phama, munanvona solya sosiva.” (Yes. 55:1, 2; BNM) Weerano hiihaa, nnahuserya osivela yeeyo Yehova onasiveleiye ni wiica yeeyo oniiceiye. (Sal. 97:10) Nave ninnasiveliwa waawopa akina ohuserya “miruku seeparipari.” Ori ntoko wi hiyaano ‘nnakhuwela mmapuro oocukhuwa a epooma nriki: Achu oothene oohisuwela, murwe nno!’ Nave miphurelo nnakhalaahuno vamoha ni yaale aneemererya nwopelo tahi sa elukuluku ya vakhaani. Iho ti soohimala nave sinnanikhaviherya okhala, okhala wookhala ‘ncharaka ephiro ya osuwelaxa.’—Mas.  9:3, 4, 6, TNM.

19. Mwawiiwanana ni Eklesiyaste 12:13, 14, tiheeni nnaphwanelaahu olakelela opaka? (Moone tho ekaaxa “ Miphurelo sa Omoova Muluku.”)

¹⁹ Mwaalakhanye Eklesiyaste 12:13, 14. Omoova Yehova onahaala okhapelela murima ahu nave onahaala onikhaviherya otitelela okhala aweela mmeecelo ni omunepani variyari va mahiku yaala ookuchula. Hankooni naawope achu ancipale wi ehuserye “miruku seeparipari.” Ninneerano yeeyo, nthowa nawi ninnamoova Yehova mmukhalelo woophwanelela nave ninnamusivela ni murima woothene.