Asitiithi aka yaakhuma o Estoniya variyari va Ekhoco Etokweene Yanawiili nave ethaamela o Alemanya weiwo kaayariwaakawo. Vano kimanle oyariwa, awo yaari ooreheryeya othaamela o Kanata. Empa ahu yoopacerya, waacamela Ottawa, o Kanata, naari nipuro nenlo anakhu yaakhalaayamo. Naatepa ohaawa, nyenya naanawerya olya mooce va yoolya ya wooxixelo.

Nihiku nimoha, Anamoona a Yehova yaamwaalakhanya Wupulula 21:3, 4 wa amama aka. Awo yaahakalala ni yeeyo yaahusenryaaya ophiyerya epacerya winla. Mmiso wa eparipari waahunnuwa, ophiyerya wi amama ni apapa yaaya vahoolo mwawaakuveya wi epatisiwe.

Asitiithi aka hiyiiwexexa phaama Enklesi, nyenya yaanayano vahoolo eparipari. A nawoorowa oothene, naamwi emanle olapa ohiyu woothene mmuteko wa fundição de níquel o Sudbury, Ontário, apapa yaanakikusa miyaano ni murokora aka mukhaani, Sylvia, mmuteko woolaleerya. Esumana ti esumana naanamuhuserya Mulipeleli ntoko emusi. Amama ni apapa yaahikihusiha omusivela Muluku. Eyo yaahikeeriha oveleela okumi aka wa Yehova mu 1956 kirino iyaakha khumi. Osivela waya woolipa ntakhara Yehova waakilipiha mu okumi aka woothene.

Kimanle omaliha exikola, kaarino nchuno na vakhaani mmuteko wa Yehova. Miyaano kaahuupuwela wi kakhala piyoneero, nkirwa kikhalano ikhorowa sawaakhwanela wi kaakhwaniherye yoochunaaka ya ovava ni woona elapo. Kaahiphwanya muteko o raatiyu a vanipuroni vaava kaarumihaakawo macipo ookaravaariwa, muteko yoowo kaasiveliwaakano. Nyenya kaalapa ohiyu, mwa yeeyo, wiiliwiili kaanacompela mithukumano nave kaanakhala vamoha ni yaale yahaamusivela Muluku. Wookuchulani, yawuupuxerya-ya-murima aka evyakihiwe ni Piipiliya yaakeeriha opaka matorokelo.

Kaahithaamela o Oshawa, Ontariyu. Ti weiwo kaamusuwenlaakawo Ray Norman, murokora awe Lesli ni mapiyoneero makina. Oothene yaala yaanakithokororya. Woona mukhalelo yaaryaaya oohakalala yaahikeeriha ovareryela soolakelela saka. Awo yaahikiceenyerya ovolowa mmuteko wa opiyoneero, yeeyo keenraakano mu Setempuru a 1966. Kaari oohakalala, nave okumi aka waari waphaama. Nyenya, ichu soohiwehereryeya seiyo saatoronke okumi aka saanakiwehererya.

Vaavaa kaahuseryaaka, kaahirepela epetisawu o Peteli yo Toronto, o Kanata. Ohoolo waya, vaavaa kaaryaaka piyoneero, kaahiwompwa orumeela o Peteli  mu iyaakha xexe. Nyenya kaanamusivelaxa Lesli, nave kaanoova wi, waakhanle wi koheemererya nwopelo yoole, nki kimoone tho. Kimanle opaka mavekelo oorweela vathi va murima, wookuchulani kaaheemererya nwopelo wa oya o Peteli nave kaahimulaanya Lesli moohica.

Kaahilapa mu nipuro na ocapa ikuwo nave voocharela ntoko namarepa. Mu elukuluku yeeyo, Lesli aahikhala piyoneera avameekheiye o Katineyawu, Kepeki. Ilukuluku sincipale kaaniikoha wa yeeyo owo aapakeiye nave waakhanle wi kaahipaka yoolakelela yaphaama. Voocharela yaakhumelela yaweereya yaphaamaxa yoohiwehereryeya mookumini mwaka. Ray, munnawe Lesli aahiwompwa oya o Peteli. Owo aahikhala nthamwene aka a ekwartu! Eyo yaahikeeriha okookela onthamwene aka ni Lesli. Naahipaka othela mu 27 a Fevereru a 1971, nihiku nookuchula na muteko aka wa iyaakha xexe o Peteli.

Lesli ni miyaano naahiwompwa orumeela mu muloko wa elocelo ya Efransa o Kepeki. Ivinre iyaakha vakhaani, kaatikhiniheya vaavaa kaawompwaaka orumeela ntoko ooweherya a ekulucu kirino iyaakha 28. Miyaano kiisoona okhala mmiravo nave oohiphwanela, nyenya masu a Yeremiya 1:7,  8 yaahikilipiha. Nyenya, Lesli aahimpaka asitenti ni ekaaro nave aahikhalano nikacamiho na ophwanya ikhove. Vano, naahaala waakhwaniherya hai muteko mu ekulucu? Mwawiihiiha, Lesli aahi: “Wakhala wi Yehova ooniwopa opaka echu, hannaphwanela weererya opaka?” Naaheemererya murici nave naahisiveliwano muteko wa weeceeca mu iyaakha 17.

Kaanakhala awaaceliwa vaavaa kaaryaaka ooweherya a ekulucu, nave nkaakhalano elukuluku yawaakhwanela ntakhara mwaaraka. Kaaphwanela ohuserya nihusiheryo nikina. Noomorela muteko woosiiselo, ekampaanya yaahiruma. Haavo aari vaate, pahiru esestu yaarimo ekuwo ya vameesa, ifruta, ekeixu, ipaau, nipotoro na eviinyu, akoopho ni ekaarata emoha yaahirino nsina, yaaloca eriki: “Omukuxe mwaaraa oyeno omathatelo.” Naari nihiku naphaama nave tho na nsuwa. Nnya kaahimuleela mwaaraka wi nkaahaala oyawo woona wi kaakhalano miyaha wi kirehererye. Owo aahiiwexexa, nyenya aahithanana vakhaani. Vaavaa kaakiraanthaaka vameesa kaarehereryaakavo miyaha, yawuupuxerya-ya-murima aka yaanakuukhula. Kaahuupuwela yoorepa ya Aefesu 5:25, 28. Kaahuupuwela wi soorepa seiya sa Mpiipiliyani waari mukhalelo Yehova aakuupuseryeiye wi kithokororyeke soochuna sa amwaaraka. Kimanle ovekela, kaaloca wa mwaaraka: “Nipwaheke,” nave owo aatepa ohakalala. Naakele nipuro nenlo naari nooreeraxa waacamela muhice, naatelela ekuwo ya vameesa. Nave nlo naari nihiku naphaamaxa naamalinhaahu vamoha. Nave naamwiihiiha, kaahirehererya miyaha saka.

Orummwa ahu ntoko ooweherya a ekulucu waari woohakalaliha, ovinyerya o Kolompiya ophiyerya o Terra Nova. Nchuno naka na opaka mikwaha naanaakhwaniheryeya. Kaanuupuwela ovolowa mu Exikola ya Kiliyati, nyenya nkaarino nchuno na okhala misiyonaariyo mu elapo ekina. Miyaano nkiisoona okhala awaakhwanela okhala misiyonaariyo. Ohiya  yeeyoru, kaanoova wi naahaala orumiheliwa mu elapo yo Afrika yeeyo yaavoloweliwe ni ireca vamoha ni ikhoco. Kaari oohakalala o Kanata.

Mu 1992, Anamoona a Yehova yaanawerya olaleerya wanaawiili mootaphuwa mu ilapo ikina so Uniyawu Soviyetika. Voocharela, anna yaahinikoha waakhanle wi naahaala othaamela o Estoniya wi nakhale mamisiyonaariyo. Naahitikhiniheya, nave naavekela vooloca sa yeeyo. Wanawiili naahuupuwela: ‘Wakhala wi Yehova ooniveka opaka echu, hinaahaala weererya opaka?’ Hiyaano naaheemererya, nave kaahuupuwela: ‘Nnya tahi wi nnaya o Afrika.’

Mwawaakuveya naapacerya ohuserya elocelo yo Estoniya. Ivinre miyeeri vakhaani ohoolo waya mu elapo yeele, naahiwompwa wi nalape muteko wa ekulucu. Naaphwanela oxekurya miloko sawaakhwana 46 ni makhuuru makhaani mu ilapo raru sa o Paltiku, hiihaa ntoko o Kalininkratu, o Rusiya. Eyo yaataphulela weererya ohuserya vakhaani oloca Eletawu, Elituwaniya ni Erusu. Eyo yaari yoovila. Naamwi hiihaa, anna ni arokora yaahisiveliwa nthowa na weererya oohuserya elocelo aya nave yaahinikhaviherya. Mu 1999, o Estoniya yaahitikitheryiwa efiliyale nave miyaano kaahithanliwa wi kikhale mmoha a nikhuuru na efiliyale vamoha ni Toomas Edur, Lembit Reile, ni Tommi Kauko.

Naahaasuwela Anamoona a Yehova ancipale yaawo yaakerihiwe o Siperiya khalai. Naamwi yaakhalihiwa moonanara mukariposo nave yaavalaanyiwe ni imusi saya, awo hiyintonko okhala oowali. Awo yaahititelela okhala oohakalala ni amvai mmuteko woolaleerya. Ela yaahinikhaviherya woona wi naanwerya ovilela ni okhala oohakalala mmikhalelo soovila.

Vaavaa iyaakha saaviraaya nave nikhalakano mahiku a vakhaani a okhuma iferiya, Lesli aahipacerya okhala ookoma vancipale. Hinaasuwenle mwawaakuveya wi ela yeereya nthowa nawi owo aahikhalano ereca yawiichaniwa fibromialgia, yeeyo yaamweeriha okoma. Naahithokororya mwawiiseela vooloca sa okookela o Kanata. Vaavaa naawompwalaahu wi n’ye mu exikola ntakhara anna a nikhuuru na ifiliyale ni asaaraya o Paterson, Nova York, E.U.A., miyaano kaanakhwa minikwa waakhanle wi naahaala oyawo. Nyenya, nimanle opaka mavekelo mancipale oorweela vathi va murima, hiyaano naaheemererya. Yehova aahireeliha yoolakelela ahu. Waari variyari va exikola yeeyo, Lesli aakhenleiye oloola yoowo aachuneiye. Ntoko yookhumelela, naahiwerya okookela miteko sahu ntoko neerelaahu.

Mu ohiyu omoha mu 2008, nikookenle o Estoniya, kaahaakhela examata yo nipuro ntokweene ekikohaka waakhanle wi naahaala weemererya orumeela o Konku. Kaahikhala ootikhiniheya, xaxaxa nthowa nawi kaaphwanela ovaha naakhulo mu nihiku noocharela. Woopaceryani, nkaachuna omuleela Lesli nthowa nawi kaanasuwela wi owo haahaala owerya okona ohiyu yoole. Ohiya yeeyo, ti miyaano kaapacenrye ohiwerya okona kivekelaka vooloca sa yeeyo yaakithananiha oya o Afrika.

Vaavaa kaamulenlaaka Lesli mu nihiku noocharela, hiyaano naahisuwela wi “Yehova taaniwopa wi n’ye o Afrika. Nnasuwela hai wi hiniwerya ni opuha, niheerenrye?”  Mwawiihiiha, nimalinhe iyaakha 16 o Estoniya, naaya o Kinxasa, Konku. Efiliyale yaahikhalano mapuro ooreeraxa nave naari nipuro noomaaleleya. Echu yoopacerya Lesli aathomen’yeiye okwartu wahu yaari ekartawu yeeyo aakhapelenleiye ovinyerya vaavaa naamuhin’yaahu Kanata. Mu ekartawu yeeyo yaarepiwemo masu ala: “Okhale oohakalala weiwo oryaawewo.” Nimanle waasuwela anna ni weeciha soohuserya sa Piipiliya ni olawiha mukhalelo waaryaaya waphaama muteko ntoko yoola wa omisiyonaariyo, ohakalala wahu mmuteko wa Yehova waanunnuwa. Moovira wa elukuluku naahikhalano ekari ya oxekurya ifiliyale mu ilapo sawaakhwana 13 so Afrika. Eyo yaahineeriha woona ohiyana ni oreera wa achu. Woova waka woopacerya waahimala nave naahimuthamalela Yehova nthowa na onirumihela o Afrika.

O Konku naahivahiwa soolya soohiyanahiyana, ntoko asiichu, yaawo kuupuwelaaka wi hannaphwanela waakhuuraka. Vaavaa naawoonaahu anna ekhuuraka seiyo, hiyaano naaheererya nave naahisiveliwa.

Naahiwerya ovahererya nikhaviheryo noomunepani ni noomwiilini, mmakupa makina a elapo yaawo anakhoco yaahiphenlaaya nave enaahooxa athiyana ni anamwane. Ancipale a annihu yaari oohaawa. Naamwiihiiha, nroromelo naya noolipa mu ovinya mookhwani, osivela waya ntakhara Yehova ni ororomeleya waya wa marehereryo awe, yaahitannya murima ahu. Yootakiherya aya yaahineeriha wuupuwela vooloca sa ntakhara heeni nnamurumeelaahu Yehova ni olipiha nroromelo nahu mwa yoowo. Anna akina yaahiyeleela ipa saya ni soolya sammacani. Ela yaahikuupuxerya wi nnanwerya oyeleela sookhalano sahu soomwiilini mwawaakuveya nave wi echu yoochuneyaxa ti onthamwene ahu ni Yehova. Naamwi ehoolelaka makacamiho matokweene, anna hiyiikhupanyerya. Yootakiherya aya yaahinceenyerya ohoolela makacamiho ahu a okumi ni makacamiho makina moolipa murima.

Ohoolo waya, yaahikhumelela echu ekina yoohiwehereryeya. Naahivekiwa wi nthaamele o efiliyale yo Hong Kong. Hinintonko waanyiherya okhala o Asiya. Nyenya, nimanle woona ntata noosivela na Yehova mu itisikinasawu sahu soothene naaryaahuno, naaheemererya nwopelo. Mu 2013, ni miithori mmiithoni, naahaahiya asinthamwene ahu oosiveliwa ni  elapo yooreera ya Afrika, nihisuwelaka yeeyo yaahaala oneera.

Yaari matorokelo matokweene okhala o Hong Kong nthowa nawi epooma etempe waaciwawo ni achu a ilapo soothene. Elocelo Kantone yaari yoovila. Mwawiihiiha, anna yaanaakhela moosivela, nave hiyaano naasiveliwa ni yoolya ya vanipuroni. Muteko waanaya vahoolo mwawaakuveya nyenya ipereesu sa ichu saatepa owela. Mwawiihiiha, Nikhuuru Noolamulela naahipaka yoolakelela yamiruku ya otumiha ipa sincipale sa efiliyale. Elukuluku vakhaani, naahithaamela o Koreya Oohico weiwo naatitelenlaahu orumeela. Naaphwanela ohuserya elocelo ekina yoovila, nyenya naamwi nahaawerya oloca phaama elocelo aya, anna yaananlipiha elocaka wi naanaya vahoolo mu oloca Ekoreya.

Waapaka asinthamwene tahi wookhweya mu ikwaha ikina, nave nnanwerya weerano yeeyo moorweela wa waawopa akina wi erwe enixekurye, hiihaa ninnaasuwela yaawo mwawaakuveya. Nohoona wi anna toohiyana mmikhalelo savakhaani nave toolikana mmikhalelo mincipale, nave wi Yehova oonipatuxa mmukhalelo wootikhiniha wi niweryeke ohula murima ahu ni waasivela asinthamwene ancipale.—2 Ako. 6:11.

Nohoona wi ti woochuneya owoonaka achu ntoko Yehova ni waavya sawooniherya sa osivela ni ohoolela wawe mu okumi ahu. Ikwaha soothene vaavaa naakhalaahu ooceecheya naari niikohaahu waakhanle wi akina yaananeemererya, naanaalakhanya wanaawiili ikartawu naari ikaarata soolipiha sa asinthamwene ahu. Mweeparipari naahoona mukhalelo Yehova aakhunleiye mavekelo ahu anivahaka ikuru ni onikhapelela.

Moovira wa iyaakha, miyaano ni Lesli naahoona ochuneya waya omaliha elukuluku vamoha moohipwacha mukhalelo naaryaahu ooweiwa. Hiyaano tho naahiiwexexa wi nnaphwanela wiitheyaka vaavaa nnapakaahu yoohesa, xaxaxa vaavaa nneereryaahu ohuserya elocelo evyaani. Ohiyu ori woothene naaneererya wuupuwela echu vyakala naapunhaahu wi nimuthamalele Yehova.

Oloca eparipari, koona wi nki kikhale misiyonaariyo naari okhala mu elapo ekina. Nyenya, koolawiha ohakalala onarweela mu osuwela mukhalelo ichu soothene iryaaya sooweryeya nnikhaviheryo na Yehova. Kinnuupuwela masu a mulipa a miririmu Yeremiya, yoowo olonce wa Yehova ariki: “Apwiya! Mookilekecha.” (Yer. 20:7, PMM) Chiryeene, owo oonivaha ichu sincipale saphaama soohiwehereryeya ni mareeliho kahaanyiheryaaka, ophiyerya wi aahaakhwaniherya yoochuna aka ya onwela aviyawu. Naahipaka mikwaha ni nceeke n’yaaka mmapuro yaawo kaahintonkwaaka waanyiherya vaavaa kaaryaaka mmiravo, nixekuryaka ifiliyale mu ikontinenti soothene thanu. Mu itisikinasawu sahu soothene, kinnathamalela vancipale nikhaviheryo na Lesli ni munepa awe wawiiveleela.

Hiyaano ilukuluku soothene ninneererya wuupuwela wi ninnapaka soothene nthowa na omusivela Yehova. Mareeliho nnapuhaahu olelo sinnooniherya mukhalelo onahaalaaya okhala waphaama opuha okumi okhala wookhala vaavaa Yehova onahaaleiye ‘otaphula ntata nawe ni ohakalaliha soopatuxiwa soothene.’—Sal. 145:16, PMM.