Kiyariwe mu 22 a Tesempuru a 1929, mu epooma ekhaani eniichaniwa Noville, yeeyo yaarino imaca ikhaani thanu naxexe, nave tho yeeyo yaakhala waacamela Bastogne, mmukuma wo Artena o Pelxika. Kinnuupuwela elukuluku ya omiravo aka mu imaca seiye ni asitiithi aka. Miyaano ni munnaka amukhaani Raymond, naanawuryiha maahi imope sahu ni mata mahiku oothene nave naanakhaviherya ohaca mmiso mmacani. Mmuceche ahu oothene naanalapa vamoha, wi nikhaviheryane mukina ni mukhwaawe.

Asitiithi aka, Emile ni Alice, yaari Akatolika. Anamurunku oothene yaanaya Miisa. Nyenya mu 1939, mapiyoneeru makina o Inkalatera yaahiphiya mmuceche ahu ni yaahaavaha apapa erevista emoha ya Consolação (olelo eniichaniwa Vinyani!). Apapaaka yaahiiwexexa mu elukuluku ene yeeyo, wi soolaleeryiwa seiye saalocaaya yaari eparipari, nave eyo yaahaaceenyerya opacerya omwaalakhanya Piipiliya. Vaavaa awo yaamaanlaaya oya omiisani, amwaacamai ahu yaawo woopaceryani yaari asinthamwene, yaahipacerya owaakaaha apapa. Awo yaahipaka soothene yaaweryaaya wi apapa ekookele okhala mukatolika nave waahikhalavo ovaanyihana otokweene vooloca sa mwaha yoowo.

Kaahikhala oothananaxa va woona mukhalelo apapaaka yahooxeyaaya moorweela wa mukhalelo amwaacamani ahu yaakhalihaaya. Mwa yeeyo, kaahipaka nivekelo ovinyerya vathi vamurima, nenle kiloncaaka woopaceryani. Nyenya voovira wa elukuluku, waakaaha wa amwiicani waahivukuwa. Kaahitepa ohakalala nave kaahilekecheya wi Yehova chiryene ‘Namiiwa mavekelo.’

Nikhuuru na Alemanya naahiphela o Pelxika mu 10 a Maiyu a 1940, ntoko yookhumelela, achu ancipale yaahikhumamo mu elapo. Emusi ahu yaahichawela ohico o Fransa. Ikwaha ikina, mphironi hiyaano naanavira  mmapuro yaawo yaari awoopiha, mummo anakhoco o Alemanya yaawanaayawo ni anakhoco o Fransa.

Vaavaa naakookenlaahu mu imaca sahu, naahoona wi ichu soothene saahiiyiwa. Pahiru aahanle aari mwanapwa ahu Popi, aahanle wi anaakhele. Soothene seiya seeren’ye saahikeeriha wiikoha: ‘Ntakhara heeni sookhalavo ikhoco nave ntakhara heeni aakhalavo makacamiho mancipale?’

Variyari va elukuluku yeeyo, hiyaano naahilipihiwa vancipale ni oxekurya wa munna Emile Schrantz, a mutokweene yoowo aari piyoneeru. Ampharihelaka Piipiliya, owo aahithariha mmukhalelo wookwakwaleya ntakhara heeni eryaayavo makacamiho nave tho aahaakhula makoho aka oothene vooloca sa okumi. Kaahipacerya okhalano onthamwene woolipa ni Yehova nave kaahilekecheya wi owo Muluku oosivela.

Naamwi ekhoco ehaakumve omala, emusi ahu yaahititelela olocaka ni anna. Mu Akostu a 1943, munna José-Nicolas Minet aahinxekurya owaahu wi aperekhe mwaha awe. Owo aahikoha: “Taani onachuna opatisiwa?” Apapaaka, ni miyaano naahiviiha matata ahu. Naahipatisiwa mmuhice yoowo waacamenle mmacani mwahu.

Mu Tesempuru a 1944 anakhoco o Alemanya yaahipaka ohiphela waya wookuchula mu Ekhoco Yanaawiili ya Elapo Yoothene, makupa a Europa—esuweliwe ntoko ekhoco ya Polsawu. Hiyaano naakhala waacamela va anakhoco yaala nave naahikhala mweeri mmoha niipinthe mu empa ahu. Nihiku nimoha vaavaa kaavinnyaka wi kalyihe muhuwo ahu, yaahimora epompa nave enyaanya nikhupi. Nakhoco mmoha Awamerika yoowo aari vakhiviru vaka vaavaa naalyihaahuvo muhuwo ahu, aahikhuwela ariki: “Okone vacheyani!” Kaahichimaka nave kikona vachayani vakhiviru va nakhoco, voocharela aahimukuxa kapaseti awe akiwariha wi akikhapelele.

Emanle ekhoco, hiyaano naanawerya olocihana moohihiyererya ni anna a muloko wa epooma yo Liexe, yoowo waakhala echu ya akilometru 90 ni owaahu. Evinrevo elukuluku, naahipacerya otikitherya ekurupu ekhaani ya oohuserya a Piipiliya o Pastokne. Voocharela kaahipacerya olapa mu ekupweethe yaavarerya sa anakoso ni okhapeleliwa wa ikhorowa nave eyo yaakivaha ekari ya ohuserya vooloca sa malamulo. Voocharela kaahipacerya olapa mu ekupweethe  ya alamuleli a vanipuroni. Mu 1951 naahirehererya muthukumano wa ekulucu o Pastokne. Nave waaca wa achu yaari 100, ophitaanyerya piyoneera mmoha a mvai, Elly Reuter. Owo aaheeca ni ecika echu ya akilometru 50 wi oonele muthukumano yoowo. Hiwaalekelen’yevo, nipacerya ochunana nave nlakelela othelana. Elly iiha amanle owompwa wi avolowe Exikola ya Kiliyati, o Estatu Unitu. Owo aahirepela ekaarata o nipuro ntokweene atharihaka ntakhara heeni aaheemerenryeiye nwopelo. Munna Knorr, yoowo aakhapelela muteko mu elukuluku yeele, aahimwaakhula mmukhalelo waphaama wi akhweya nihiku nikina aanwerya ovolowa o Kiliyati vamoha ni aiyawe. Hiyaano naahithelana mu Fevereru a 1953.

Mu eyaakha ene yeeyo, Elly ni miyaano naahoonela muthukumano wa ekulucu yoowo waarino muru Sociedade do Novo Mundo, weeren’ye o Yankee Stadium o Nova York. Nri weiwo, kaahimusuwela munna yoowo aakivanhe muteko waphaama nave aahikiwopa wi n’ye o Estatu Unitu. Nyenya nimanle ovekela vooloca sa mwaha yoowo, Elly ni miyaano naahilakelela oheemererya yoovaha yeeyo, nave nikookela o Pelxika wi nakhaviherye nikhuuru nikhaani na alaleeryi khumi yaawo naaryaahuno o Pastokne. Mu eyaakha yoocharela, naahireelihiwa moorweela wa ovahiwa mwaana aphaama Serge. Moothananiha, ivinrevo miyeeri mithanu napiili, Serge aahiiceliwa nave akhwa. Hiyaano naahikhala oothananaxa nave naahimuleela Yehova wuukhuwa wahu mu nivekelo, nave owo aahinilipiha ni ewehereryo yootikhiniha ya ovinya mookhwani.

Mu Otupuru a 1961, kaahiwerya ophwanya muteko wa elukuluku ya vakhaani yoowo waahaala okeemererya orumeela ntoko piyoneero. Mu nihiku nene nenle, kaahilikaariwa ni ooweherya a efiliyali yo Pelxika. Owo aakikoha waakhanle wi kiri ooreheryeya orumeela ntoko murummwa a ekulucu, yoowo (olelo oniichaniwa ntoko ooweherya a ekulucu). Kaahaakhula: “Apwanne honaweryeya wi nrumeele mu elukuluku ya vakhaani ntoko mapiyoneru nihaakumve toko weemererya murici yoowo?” Munna aaheemererya. Nimanle orumeela ntoko mapiyoneru mu miyeeri thanu nararu, naahipacerya orumeela ntoko ooweherya a ekulucu mu Setempuru a 1962.

Ivinre iyaakha piili nrumeelaka mu ekulucu, naahiwompwa wi narumeele Opeteli yo Pruxela. Naapacenrye orumeela weiwo mu Otupru mu 1964. Mu etesikinasawu ahu yeela evyaani, hiyaano naahaakhela mareeliho mancipale. Ovinre oxekurya wa munna Knorr Opeteli mu 1965, kaahitikhina vancipale vaavaa kaathanliwaaka ntoko mmoha a nikhuuru na efiliyali. Voocharela, Elly ni miyaano naahiwompwa ovolowa mu eturma 41 ya Exikola ya Kiliyati. Nave yeeyo munna Knorr aalonceiye mu iyaakha 13 muculi saahikhala seeparipari! Nimanle okuchula Exikola yeela, naahikookela Opeteli yo Pelxika.

Kaahikhalano ekari ya opharihela malamulo kahusenryaaka wi kaakihe otaphuwa wa achu a Yehova wi emulapeleke mootaphuwa o Europa, hiihaa tho ntoko mu ilapo ikina. (Afi. 1:7) Wa nthowa na yeeyo, kaahiwerya oloca ni alamuleli akina a ilapo 55 mummo  muteko ahu waakhwatiihiwaayamo. Ohiya oloca ni alamuleli vooloca sa masuwelelo aka a malamulo, miyaano kiisooneiha wa awo ntoko “mulapeli a Muluku.” Nave kaanavekela wa Yehova nthowa nawi kaanasuwela wi “murima wa mwene ori mmatatani wa Apwiya; annahoolela ntoko mukoti wa maahi aperushiwe.”—Mas. 21:1, PMM.

Mu ekwaha ekina, yaaheereya echu yeeyo kinahaalaaka wuupuwelaka elukuluku yincipale, kaahiloca ni mulopwana mmoha a munikhuuru na Parlamentu o Europa. Ikwaha sincipale kaahiveka wi nikumane wi nivaanele, nave wookuchulani naahikumana. Owo aahikileela wi: “Kinoovaha aminutu athanu, nave ehivirelele naari munutu mmoharu mano.” Mu elukuluku ene yeeyo kaahuramela vathi nave kipacerya ovekela. Mulopwana yoole aahihaleeliheya nave aakikoha yeeyo keeraaka. Kinwehaka yoowo, kaahimwaakhula: “Kaamuthamalela Muluku nthowa nawi nyuwaano mwa mmoha a anamuteko awe.” Owo aahikikoha: “Onachuna oloca eheeni ni masu yaawo?” Kaahimooniha yoorepa ya Aroma 13:4. Woona wi aari a ekerexa ya Aprostante nave aahimusuwela Piipiliya, yoorepa yeela yaahimuruuhela nchuno. Tiivi yaari yookhumelela? Kaahiwerya ovaanela ni yoowo waacamela ewora emoha, nave ovaanela yoowo waakumiherya mphurelo. Ophiyerya tho wi owo aaloca wi aanacicimiha muteko ahu.

Moovira wa iyaakha, achu a Yehova ahaakiha otaphuwa waya o Europa vooloca sa ohipaka makupa a elapo, waakhapelela anamwane, misokho ni ichu ikina. Kaahikhalano ekari ya opaka makupa mmiyaha seiya nave kaahoona mukhalelo ntata na Yehova naahoolelaaya ichu wi nikhumelele phaama mmiyaha seiya. Anamoona a Yehova aakhumelela phaama mmilacu opwaha 140 o Tripunali ya Europa enavareryela Otaphuwa wa Achu!

Variyari va iyaakha 1990, kaahilapa vamoha ni munna Philip Brumley o onipuro ntokweene ni munna Valter Farneti, wi niwerye okhalano otaphuwa wa malapelo a annihu o Kupa vaavaa muteko ahu waakhwatiihiwaaya. Kaahirumiha ekaarata wa muhooleli yoowo eemelela o Kupa nyenya akhalaka o Pelxika, nave voocharela aahikhalano muthukumano yoowo waareherenrye yoovekaahu. Variyari va muthukumano ahu woopacerya, waari woohiweryeya othariha phaama ohiiwexexeya yoowo weerinhe wi alamuleli o Kupa ekhwatiihe muteko ahu.

Nimanle ovekela wa Yehova nivekaka ohoolela, hiyaano naahiveka weemereryiwa wi naarumihele Apiipiliya o Kupa awaakhwana 500. Apiipiliya yaala yaahiphiya phaama, yaahikaweliwa anna ni arokora, nave naahiphiyerya makuchuwelo awi Yehova onnareeliha wiilipixerya wahu. Voocharela naahipaka yooveka ekina, yawaarumiha Apiipiliya akina awaakhwana 27,500. Wanaawiili alamuleli yaaheemererya yoovekaahu. Kaahihakalala vancipale vaavaa kaasuwenlaaka  wi koowerya waakhaviherya anna ni arokora oosiveliwa o Kupa okhalano Piipiliya awayaaya.

Miyaano kooxekurya o Kupa ikwaha sincipale wi kaakhaviherye anna orehererya miyaha saya vooloca sa malamulo ntakhara muteko ahu mu elapo yeeyo. Va weerano yeeyo, koowerya okhalano onthamwene waphaama ni alamuleli ancipale.

Mu 1994 achu opwaha 1.000.000, yaahitepa ohooxiwa mmukhalelo woothananiha ni wiiphiwa o Ruwanta. Moothananiha anna ni arokora ahu akina yaahikhwa. Mu elukuluku vakhaani naahirehereryiwa nikhuuru nikhaani na anna wi nivahererye nikhaviheryo mu elapo yeeyo.

Vaavaa nikhuuru nahu naaphinn’yaaya okapitaali yo Kigali, naaphwanya ekupweete ya otaphulela ni soolaleeryiwa isaren’ye ipaala sa akapuchi. Naahiiwa miyaha soothananiha vooloca sa anna ni arokora yaawo yiiphiwe ni miyaalo. Nyenya tho naahiiwa saweereya sa osivela weekristu mmeerelo. Naahiiwa yaweereya ya munna mmoha a nihimo tutsi yoowo iipinthe okhukuni vathi va echaya mu mahiku 28, akhapeleliwaka ni emusi ya Anamoona a Yehova a nihimo Hutu. Variyari va muthukumano o Kigali, naahivahererya nihakararyo noomunepani wa anna ni arokora opwaha masana mathanu namaxexe.

Voocharela naalapuwa efronteira oya o Saire, (vano Republica Demokratiko o Konko.) wi nawaavye Anamoona ancipale o Ruwanta yaawo yaachawenle mapuro aalipa oochawa o epooma yo Koma. Hinaawenrye waaphwanya, mwawiihiiha naahivekela wa Yehova wi anikhaviherye waaphwanya. Naahimoona muchu eecaka arwaaka mukumaahu nave naahimukoha waakhanle wi aahaasuwela Anamoona a Yehova. Owo aahaakhula: “Aai, ka mmoha a Anamoona a Yehova. Kaamusiveliwa wookerihaani va nikhuuru nnavaha nikhaviheryo.” Nimanle othukumana ni nikhuuru nnavaha nikhaviheryo, nahaathukumanya alipa oochawa 1600 wi naavahe nihakararyo ni nlipiho noomunepani. Nave tho naahuuka ni yaawo masu a ekarta ya Nikhuuru Noolamulela. Anna ni arokora yaatannyeya murima vaava yiiwalaaya masu awi: “Elukuluku yoothene nyuwaano muri mmavekeloni mwahu. Noosuwela wi Yehova harwa oohiyaani.” Masu yaala a Nikhuuru Noolamulela yaari eeparipari chiryene. Mmahiku yaala, opwaha Anamoona a Yehova 30.000 annaphwanyeya o Ruwanta!

Kimalinhe waacamela iyaakha 58 kithenle, koomuyeleela mwaraka oosiveliwa Elly mu 2011. Yehova ookihakararya vaavaa kaalocaka moonelo aka mu nivekelo wa yoowo. Navetho koohakararyeya vaavaa kaalocaka michaka saphaama ni amwaacamani.

Moohipwacha kaari mu empa ya awuuluva arino iyaakha 90, nlelo kinnapaka makupa mmuteko wa Akristu esumana ti esumana. Ori ohakalala otokotoko okhaviherya Etapartamentu Enaakiha milacu ofiliyale yo Pelxika, ni wuuka ni akina masuwelelo aka ni waakukhula amiravo a emusi yo Peteli.

Mu iyaakha 84 muculi kaahipaka nivekelo naka noopacerya wa Yehova. Yaari mapacereryo a muteko woohakalaliha yoowo okaacamelinhe vancipale wa yoowo. Kinnathamalela woona wi variyari va okumi aka Yehova oowiriyana phaama mavekelo aka.—Sal. 66:19. b