1. Tiheeni amiravo anaphwanelaaya olakelela sa omwaahiyu aya? Tiheeni eni yaakhaviherya ohikhala oothanana? (Moone eruku yoopacerya.)

NYUWAANO amiravo akhweya munahaala weemererya wi muhaakumve opaka mukwaha, ti yamiruku opaka marehereryo ti woowi munachunaanyu ophiyawo. Okumi ori ntoko mukwaha, nave elukuluku ya wiirehererya ti woowi munachunaanyu ophiyawo ti yeela muryaanyu amiravo. Chiryene, honi okhale wookhweya opaka marehereryo yaawo. Nahano oniichaniwa Heta ooloca: “Ti yoovila. Weyaano wookhalano murici wa olakelela echu ya opaka mu okumi aa woothene.” Wakhala wi munoona mmukhalelo yoola, muupuwele wi Yehova ooloca: “Ohithananeke, miyano ka Muluku à. Kinnolipiha, kinnokhaviherya.”​—Isaiya 41:10.

2. Munasuwela hai wi Yehova onchuna wi murehererye omwaahiyu anyu woohakalala?

² Yehova onnooceenyeryaani orehererya omwaahiyu anyu mwamiruku. (Eklesiyaste 12:1; Mateu 6:20) Owo onachuna wi mukhale oohakalala. Enakhala yookwakwaleya vaavaa munoonaanyu, wiiwa ni olawiha ichu owo opatunseiye. Yehova onnanikhapelelatho mmikhalelo mikina. Onnanivaha ikano nave onnanihusiha mukhalelo waphaama wa okhala. Mwawiihiiha vaavaa achu  anakhoocaaya ekano awe yamiruku, owo hanahakalala. Owo onnaaleela yaale ahinachariha ohoolela wawe: “Muthanlile yele mwa miyano eri yohikisivela. . . . Munamukhuwela wa nthowa na ohiroromeleya, munamwikhupanyeryaka mmurimani mwanyu eniha òroromeleya aka ekhuwelaka nuhakalala ni yitxhànle mmurimani mwaya.” (Isaiya 65:12-14) Vaavaa nnapakaahu soothanla saphaama mookumini, ninnamucicimiha Yehova.​—Masiposipo 27:11.

3. Tiheeni Yehova onachuneiye wi mpake?

³ Marehereryo taani Yehova onachuneiye wi mpake? Wi mukhale oohakalala, munaphwanela omusuwela Yehova ni omurumeela. Ola mukhalelo Yehova aapatunxeiyeno achu. (Salumu 128:1; Mateu 5:3) Asinama pahiru anamulya, owurya ni okhalano asaana. Nyenya Yehova onachuna wi murehererye okumi anyu mmukhalelo yoowo onahaala okhala woohakalaliha ni orino yootaphulela. Mpatusa anyu ti “Muluku a osivela,” “Muluku òtxitximiheya [naari oohakalala],” yoowo aapanke achu “òphwana ni yowo.” (2 Akorintiyu 13:11, Nlakano Nahihano; 1 Timóteo 1:11; Maphatxuwelo 1:27) Munahaala ohakalala wakhala wi moomutakiherya Muluku ahu oosivela. Piipiliya ooloca: “Yole onavaha ori òrèriwa [naari oohakalala] ompwahayole onakhela.” (Saweriwa T’arummwa 20:35) Apwanne hamutonko woona yeela mukhatiinyu? Ela teri mathipelo a eparipari vooloca sa okumi. Mwawiihiiha Yehova onachuna wi mpake marehereryo anyu ntakhara omwaahiyu anathipeleya mu waasivela akina ni yene.​—Mwaalakhanye Mateu 22:36-39.

4, 5. Tiheeni yaamweerinhe Yesu okhala oohakalala?

⁴ Yesu Kristu ootikitherya yootakiherya yaphaama wa nyuwaano amiravo. Vaavaa aareiye mwaana, owo aanathata nave aanahakalala. Hiiha ntoko Masu a Muluku analocaaya, yookhala “elukuluku yotheya” ni “elukuluku ya [wiina].” (Eklesiyaste 3:4) Yesu aanamukhuveela Yehova moorweela wa ohuserya Soorempwa. Vaavaa aareiyeno iyaakha 12 sa oyariwa, ahusiha a mu empa ya Muluku yaari ootikhiniheya ni “osuwela ni wakhula wawe.”​—Luka 2:42, 46, 47.

⁵ Vaavaa Yesu unnunweiye, opaka yeeyo Muluku amvekeiye wi apake yaanamuhakalaliha. Ntoko yootakiherya, Muluku aachuna wi ‘alaleye Mutxhaka waphama wa alipa òhawa’ ni “wavaha wona alipa èvasi.” (Luka 4:18, 19) Yoorepa ya Salumu 40:8, ennathariha moonelo wa Yesu: “Koneni, miyo kinnarwa wi kere otxhuna wanyu.” Yesu aanasiveliwa waahusiha achu vooloca sa Tiithi awe. (Mwaalakhanye Luka 10:21.) Ekwaha emoha amanle oloca ni muthiyana vooloca sa malapelo eeparipari, Yesu aahiloca wa oohuserya awe ariki: “Yolya aka ti wera okhwela wa yowo okirumin’he, wi kakhwanihe muteko awe.” (Yohani 4:31-34) Yesu aari oohakalala nthowa nawi aanooniherya omusivela Muluku ni akina. Mweerano emohamoha, munahaalatho ohakalala.

6. Ntakhara heeni ti waphaama waaleela akina vooloca sa marehereryo anyu oomwaahiyu?

⁶ Akristu ancipale apacenrye opiyoneero eri amiravo, nave eyo yooweeriha okhala oohakalala. Apwanne mwanwerya oloca ni akina a  yaawo vooloca sa marehereryo anyu? “Wahiveka miruku onamòtxèla miteko sà; Wàveka atxhu miruku miteko sà inamulapeya.” (Masiposipo 15:22) Anna ni arokora yaala akhweya anahaala wooleelaani wi muteko woopiyoneero onamoovahaani mahusiheryo anahaala wookhaviheryaani mookumini mwanyu. Yesu aahihuserya ichu sincipale ni Tiithi awe vaavaa aareiye wirimu. Voocharela, variyari va muteko awe woolaleerya veelaponi yavathi, owo aahititelela ohuserya. Owo aahitepa ohakalala oloca michaka saphaama ni akina ni otitelela okhala oororomeleya mmakacamihoni. (Mwaalakhanye Isaiya 50:4; Ahebri 5:8; 12:2) Hankooni noone ntakhara heeni muteko wa elukuluku yoothene onahaalaaya oweerihaani okhala oohakalala.

7. Ntakhara heeni amiravo ancipale annasiveliwa waapaka oohuserya?

⁷ Yesu oonileela oya ‘wahusiha achu othene’ ni waapaka oohuserya. (Mateu 28:19, 20) Wakhala wi mohiirehererya wi okhale muteko anyu, munahaala okhalano okumi woohakalaliha yoowo onamucicimiha Muluku. Hiiha ntoko mmuteko vyakala, munamuchuna elukuluku wi mukhaleno mavyakelo. Munna oniichaniwa Timoteo yoowo aapacenrye opiyoneero ari mmiravo ooloca: “Ennakisivela omurumeela Yehova mu elukuluku yoothene nthowa nawi ola mukhalelo kinooniheryaaka wi kinnamusivela. Woopaceryani, nkaawenrye opaceryiha naari mano yoohuserya emoha ya Piipiliya, nyenya ohoolo waya kaahithaamela ekulucu ekina, nave mpuwa mwa mweeri mmoha kaahipaceryiha soohuserya sincipale. Oohuserya mmoha aahipacerya ophiya mmithukumano. Kimanle okwaaxa Exikola ya Piipiliya ya Anna Oohithela mu miyeeri miili, kaahaakhela muteko mukina weiwo kaapaceryinhaakawo soohuserya sese. Kinnasiveliwa waahusiha achu, ni owerya woona munepa waweela otorokaka mirima saya.” * (Moone masu avathi.)​—1 Tesalónika 2:19.

8. Amiravo akina tiheeni apankaaya wi yaalaleerye achu ancipale?

⁸ Amiravo akina annahuserya elocelo ekina. Ntoko yootakiherya, Yakopo o Amerika Oomoko, oorepa: “Kirino iyaakha thanu napiili, asinthamwene aka ancipale oxikola yaari o Viyetinami. Kaanachuna waaleela awo vooloca sa Yehova, mwawiihiiha evinrevo elukuluku kaahipaka marehereryo a ohuserya elocelo aya. Ikwaha sincipale, kaahuserya moorweela wa omulikanyiha Mulipeleli a Enklesi ni a Eviyetinami. Navetho kaahaapaka asinthamwene mmuloko wa elocelo ya Eviyetinami yoowo waari vakhiviru. Kirino iyaakha 18, kaahipacerya opiyoneero. Ohoolo waya, kaavolowa mu Exikola ya Piipiliya ya Anna Oohithela. Eyo yaahikikhaviherya ni muteko aka woopiyoneero, vano kiri meekhaaka kinarumeela ntoko mutokweene a nikhuuru na elocelo ya Eviyetinami. Achu ancipale o Viyetinami annatikhiniheya nthowa na ohuserya elocelo aya. Awo annakiwopa oya mmavaate mwaya, nave wiiliwiili kinnawerya waahusiha Piipiliya. Akina annaya vahoolo ophiyerya opatisiwa.”​—Mulikanyihe ni Saweriwa T’arummwa 2:7, 8.

9. Muteko wa waapaka oohuserya onanihusiha eheeni?

⁹ Muteko wa waapaka oohuserya onnahusiha sookhovelela saphaama sa muteko, mukhalelo wa ovaanela phaama, okhala oororomeleya ni oomaaleleya. (Masiposipo 21:5; 2 Timóteo 2:24) Nyenya muteko ola ti wavameekhaaya nthowa nawi muchu onahuserya mukhalelo wa wooniherya yeeyo  onaroromeleiye orweela mu Soorempwa. Muchu onnahuseryatho olapa vakhiviru khiviru ni Yehova.​—1 Korinto 3:9.

10. Muni nwerye hai ophwanya ohakalala mmuteko wa waapaka oohuserya naamwi ekulucu anyu eri yookacamiha?

¹⁰ Munanwerya ophwanya ohakalala mmuteko wa waapaka oohuserya naamwi achu ancipale ehichunaka omuhuserya Piipiliya. Wi naapake oohuserya muloko woothene onalapa vamoha ntoko nikhuuru. Naamwi pahiru munna naari murokora mmoha awenrye omphwanya oohuserya mmoha, oothene ahu ninnahakalala nthowa nawi oothene nooya owaavya. Ntoko yootakiherya, Praton, yoowo aari mmuteko woopiyoneero mu iyaakha 9, weiwe achu vakhaani yaamuhuseryaaya Piipiliya, ooloca: “Kinnasiveliwa olaleerya michaka yaphaama nthowa nawi ti yeeyo Yehova onanivekeiye wi nipake. Kaapacenrye opiyoneero kimalinhe exikola. Kaanasiveliwa waaceenyerya anna akina yaari amiravo mmulokoni mwahu ni woona oya waya vahoolo omunepani. Kimalinhe Exikola ya Piipiliya ya Anna Oohithela, kaahaakhela muteko muvyaani woopiyoneero. Eparipari wi nkintonko omphwanya muchu mu ekulucu aakele vahoolo ophiyerya opatisiwa, nyenya akina yaanakhalano. Kaanahakalala wiirehererya wi kiphare muteko wa waapaka oohuserya mwawaakhwanela.”​—Eklesiyaste 11:6.

11. Mikhalelo taani sa omurumeela Yehova amiravo ancipale anapuhaaya?

¹¹ Sookhalavo ikari sincipale sa omurumeela Yehova. Ntoko yootakiherya, amiravo ancipale anakhaviherya mmuteko wa oteka. Sinnachuneya Ipa sa Omwene macikhwi. Mapuro yaala annamucicimiha Yehova, mwawiihiiha okhaviherya otekiwa waya enanwerya woohakalalihaani. Nyuwaanotho munanwerya ohakalala olapa ni anna ni arokora anyu. Nave munanwerya ohuserya ichu sincipale, ntoko opaka muteko waphaama mmukhalelo wookhapeleleya ni mukhalelo wa wiiwanana ni ooweheryaanyu a nikhuuru na oteka.

12. Ikari taani ikina muteko woopiyoneero onavahaaya?

¹² Munna mmoha oniichaniwa Kevin ooloca: “Ovinyerya kiri ponkwe, kaanachuna nihiku nimoha omurumeela Yehova mmuteko wa elukuluku yoothene. Wookuchulani, kaahipacerya opiyoneero kirino iyaakha 19. Kaaniikhaviherya moorweela wa olapa elukuluku vakhaani ni munna yoowo aari namateka. Kaahihuserya othomeya ipatho, ixanela ni misuwo. Ohoolo waya, kaahimaliha iyaakha piili kilapaka nnikhuuru nnakhaviherya vaava echeku etokweene enakhumelelaaya, nrehereryaka Ipa sa Omwene ni ipa sa anna. Vaavaa kiiwalaaka sa oteka waachuneya o Afrika Oohico, kaahiirepiha nave kiwopiwa wi kiyewo. O Afrika wenno, isumana soothene kinnathaama nikhuuru na oteka Ipa sa Omwene kiyaaka nikina. Nikhuuru naka na oteka nri ntoko emusi. Nnakhala vamoha, nnamuhuserya Piipiliya vamoha nave nnalapa vamoha. Nave kinnapuha olaleerya ni anna a vanipuroni isumana soothene. Marehereryo kaapankaaka kiri ponkwe, annakeeriha okhala oohakalala mmikhalelo kahaanyiheryaaka.”

13. Ntakhara heeni amiravo ancipale annasiveliwa omurumeela Yehova o Peteli?

 ¹³ Akina yaawo yaarumeenle ntoko mapiyoneero vano anarumeela o Peteli. Muteko wa Peteli mukhalelo woohakalaliha wa okumi nthowa nawi soothene muchu onapakeiye weiwo ti sa Yehova. Emusi yo Peteli ennakhaviherya wapaka Apiipiliya ni soolaleeryiwa wi achu ewerye ohuserya eparipari. Petelita mmoha oniichaniwa Tustino ooloca: “Kaapanke muteko wa elukuluku yoothene okhala yoolakelela aka vaavaa kaaryaakano iyaakha 9 sa oyariwa, nave kaapacenrye opiyoneero vaavaa kaamalinhaaka ohuserya. Emanle eyaakha emoha ni emeya, kaahiwopiwa o Peteli, weiwo kaahusenryaakawo olapa ni maakina a okumiha soolaleeryiwa nave ohoolo waya, waapaka a prokrama a komputatore. O Peteli, kinnasiveliwa wiiwa mu ekwaha yoopacerya oya vahoolo wa muteko wa waapaka oohuserya orukurerya elapo yoothene. Kinnasiveliwa olapa wenno nthowa nawi yeeyo nnapakaahu ennaakhaviherya achu okhala asinthamwene a Yehova.”

14. Tiheeni munaphwanelaanyu opaka hiihaano wi mwiirehererye ntakhara muteko wa elukuluku yoothene?

¹⁴ Muni nwerye hai wiirehererya ntakhara muteko wa elukuluku yoothene? Wi mmurumeele Yehova mmukhalelo waphaama munaweryelaanyuvo, munaphwanela wunnuwiha mikhalelo Seekristu. Ohuserya Masu a Muluku moohihiyererya, wuupuwelela mwawiiseela  ni weererya wooniherya nroromelo nanyu mmithukumano sa muloko. Variyari va iyaakha sanyu sa ohuserya oxikola, munanwerya wunnuwiha mavyakelo anyu a oloca ni akina vooloca sa michaka yaphaama. Muhuserye wooniherya nchuno mwa achu moorweela wa waakoha moonelo aya moomaaleleya ni owiriyana maakhulo aya. Navetho, munaphwanela wiivaha opaka echu mmulokoni, ntoko okhaviherya orapiha ni orehererya Empa ya Omwene. Yehova onnahakalala waapharihela yaale ari awiiyeviha ni ooreheryeya wi elape muteko. (Mwaalakhanye Salumu 110:3, NN; Saweriwa T’arummwa 6:1-3) Murummwa Paulo aahinwopa Timoteo wi arumeele ntoko misiyonaariyo nthowa nawi anna “yànamwerela yowo onamona waphama.”​—Saweriwa T’arummwa 16:1-5.

15. Tiheeni munaphwanelaanyu opaka wi mukhaleno muteko onahaala wookhaviheryaani mmuteko woopiyoneeryo?

¹⁵ Arummwa ancipale a elukuluku yoothene, annachuna okhalano muteko. (Saweriwa T’arummwa 18:2, 3) Akhweya munanwerya ovolowa mu ekursu ekhaani yeeyo eni yookhaviheryeeni okhalano munamuteko okhanle mu nipuro munakhalaanyuwo. Muloce ni ooweheryaanyu a ekulucu ni mapiyoneero makina vooloca sa marehereryo anyu, nave mwaaveke sooleeliherya. Voocharela, ntoko Piipiliya onaloceiye, “kuha mmatani mw’Apwiya miteko sà nave yeyo onupuwelawe enamwereya.”​—Masiposipo 16:3; 20:18.

16. Muteko wa elukuluku yoothene oni wookhaviheryeeni hai ntakhara mirici mikina sa omwaahiyu?

¹⁶ Munaphwanela ororomela wi Yehova onachuna wi ‘mphwanye ekumi yeparipari’ omwaahiyu woohakalaliha. (Mwaalakhanye 1 Timóteo 6:18, 19.) Muteko wa elukuluku yoothene onamookhaviheryaani okhala Mukristu awiichwelavo vaavaa munalapaanyu ni arummwa akina a elukuluku yoothene. Navetho, ancipale ahoona wi okhala mmuteko wa elukuluku yoothene vaavaa yaaryaaya amiravo ohoolo waya yaahikhaviheryeya mu othela waya. Wiiliwiili, yaale yaalampe ntoko mapiyoneero ehaakumve othela annatitelela mmuteko woopiyoneero vamoha ntoko mutheli.​—Aroma 16:3, 4.

17, 18. Opaka marehereryo enavolowela hai murima anyu?

¹⁷ Salumu 20:5 ooloca sa Yehova ariki: “Awo yovahe yele murima-à onatxhunaya, nave yakhwanihe sothene onakhwelawe.” Vaavaa muniirehereryaanyu ntakhara omwaahiyu anyu, muupuwelele vooloca sa yeeyo chiryene munachunaanyu opaka ni okumi anyu. Muupuwele yeeyo Yehova onapakeiye mmahiku ahu ni yeeyo munaphwanelaanyu opaka mmuteko awe. Voocharela mwiirehererye opaka yeeyo enamuhakalaliha.

¹⁸ Vaaavaa munapharihelaanyu okumi anyu wi mmurumeele Yehova mwawaakhwanela, ni omucicimiha, munahaala otepa ohakalala. Nave “weliwa wà murima ohele mw’Apwiya [Yehova]; yawo anamovaha enatxhuna murima-à.”​—Salumu 37:4.