1, 2. Mu elapo yeela, ntakhara heeni wiiliwiili achu annakhala oohaawa?

OLELO, mukhalelo wa ophwanya ikhorowa ti woonanara ni woohiroromeleya. Ntoko yootakiherya, ti woovila amiravo ancipale ophwanya muteko. Achu akina annahela ikumi saya mmurupa woothaala wi eye mu ilapo sa muhakhu. Nave naamwi mu ilapo sa muhakhu, aakhalamotho achu oohaawa. Mu elapo yoothene, achu akina ekhalaka ooreela akinaku anakhala oohaawaxa. Mwawiiwanana ni soolokoha sahiihano, achu avakhaani ookanyaari aakhalano muhakhu wawaaca wapwaha achu oothene. Chiryene, vaavaa achu akina anakhalaayano ikhorowa sawaakhwanela wi epharihele mu elukuluku yincipale, macikhwi macikhweene annakhala oohaawaxa. Yesu aasuwela yeela vaavaa aalonceiye: “Epariparyene alipa òhawa munamukhalano mahiku othene.” (Marko 14:7) Ntakhara heeni oryaayavo ohiyana wuuwu?

² Makupa a elapo ya Satana anaweiwa pahiru ni waavya ikhorowa sincipale ni waaceenyerya achu othuma ichu sincipale seiyo sihinaathowa chiryene. Piipiliya oniichana makupa yaala a elapo ya Satana ntoko “alipa a marotxa.” (Wupulula 18:3) Yesu aanasuwela wi Omwene wa Muluku pahiru toni otoroke  mukhalelo yoola. Achu a Muluku annawerya wiivalaanya moomalela mu olamulelo wa elapo yeela ni malapelo atheru.

3. Makoho taani nneeraahu nthokororye?

³ Ntoko Akristu, nnaphwanela waalikhela moonelo ahu vooloca sa muhakhu. Wi neereno yeeyo, nnaphwanela wiikoha: ‘Kini kipharihele hai ichu saka soomwiilini wi kooniherye wi kiri oororomeleya wa Muluku? Kini kiwerye hai ohikhala ooweiwa ni muhakhu? Saweereya taani sinooniherya wi olelo achu a Muluku annamuroromela yoowo mwawaakhwanela?’

4, 5. (1) Tiheeni yeeren’ye ni mulapeli mmwaha wa Yesu? (2) Tiheeni Yesu aalenleiye oomuchara awe opaka?

⁴ Mmwaalakhanye Luka 16:1-9. Mwaha wa Yesu vooloca sa mulapeli oohiroromeleya enaphwanela oneeriha oothene ahu omaala ni wuupuwela. Mulapeli aahilokohiwa nthowa na oyeeha muhakhu, nave pwiya awe aahilakelela omwiikara. * (Moone masu avathi.) Nyenya mulapele aahipharihela “miruku.” Ahaakumve ohiya muteko, owo aahipaka onthamwene ni achu yaawo ohoolo waya yaahaala owerya omukhaviherya. Yesu haalonce mwaha yoola nthowa nawi aachuna wi oohuserya awe ekhaleno meerelo oowoka wi evuluwe. Nyenya ti yeeyo achu a elapo yeela anapakaaya. Moohiyana, Yesu aahipharihela mwaha yoola wi ahusihe mahusiheryo ookhweleya.

⁵ Yesu aahisuwela wi moolikana ni mulapeli yoowo aari mu sookacamiha mootutusa, ancipale a oomuchara awe yaahaala otepa okacamiheya mu elapo yeela yoohookololowa. Mwawiihiiha aahaaleela: “N’wasyeke asinthamwene ni muhakhu wonanara.” Ntakhara heeni? Vaavaa muhakhu yoowo onamalaaya, Yehova ni Yesu, ‘ananwakhelani mwa ipa sohimala.’ Tiheeni nnahuseryaahu orweela wa ekano ya Yesu?

6. Nnasuwela hai wi muhakhu wa elapo yeela hiyaapaka makupa a yookhwela ya Muluku?

⁶ Naamwi Yesu ahitharinhe ntakhara heeni ayaaka wiichana ichu soomwiilini ntoko muhakhu “wonanara,” Piipiliya onnooniherya wi wiithukumanyerya ikhorowa sincipale hiyaapaka makupa a yookhwela ya Muluku. Ntoko yootakiherya, Yehova aahimvaha ichu sincipale Atamu ni Eva opwaha yaachunelaayavo mu emaca ya Eteni. (Maphatxuwelo 2:15, 16) Ohoolo waya, vaavaa Muluku aavanheiye munepa awe waweela wa oothanliwa awe, “hàrivo mutxhu ì: etxhu ela ti yaka; itxhu sothesene yànuka.” (Saweriwa T’arummwa 4:32) Mulipa miririmu Yesaya aahiloca wi enamukhalavo elukuluku vaavaa achu oothene anahaalaaya opuha mootaphuwa soothene iniima veelaponi yavathi. (Isaiya 25:6-9; 65:21, 22) Nyenya ophiyerya elukuluku yeeyo, oomuchara a Yesu yaahaala ochuna “miruku.” Awo yaahaala ochuna opharihela muhakhu woonanara wa elapo yeela, nave mu elukuluku emohamoha, yeereryakatho omuhakalaliha Muluku.

7. Ekano taani Yesu ovanheiye mu Luka 16:10-13?

⁷ Mwaalakhanye Luka 16:10-13. Mulapeli mmwaha wa Yesu aahaapaka asinthamwene wi aphure mukhateiye. Nyenya, Yesu aachuna wi oomuchara awe yaapake  asinthamwene wirimu ni soolakelela saphaama. Owo aachuna wi niiwexexe wi mukhalelo nnapharihelaahu muhakhu ahu woonanara onnooniherya waakhanle wi nri oororomeleya wa Muluku. Nni neerano hai yeeyo?

8, 9. Mvahe sootakiherya mmukhalelo akina anooniheryaaya ororomeleya mu opharihela waya muhakhu woonanara.

⁸ Mukhalelo mmoha nnooniheryaahu ororomeleya ni muhakhu ahu ori opaka sooveleela ntakhara muteko woolaleerya oneeriwa veelaponi yoothene, yoowo Yesu aalohenryeiye wi waahaala weereya. (Mateu 24:14) Nahano mmoha o Intiya aahikhapelela ekaaxa ekhaani ya ikhorowa nave aanaacereryamo ikhorowa. Ophiyerya wi aahihiya waathuma apuneka awe. Vaavaa ekaaxa yaasaren’yaaya, owo aahiveleela ikhorowa soothene aakhapelenleiye wi iphariheliwe mmuteko woolaleerya. Munna mmoha o Intiya ookhalano emaca ya ikokho. Owo aahivaha ikokho sawaaca o ekupweete yootaphulela yo Malayalam. Woona wi ekupweete eyo yaanachuna othuma ikokho, owo aahoona wi yooveleela awe yaahikhalano esisapo opwaha ovaha ikhorowa. Eyo “miruku.” Moolikana, anna o Kresiya wiiliwiili annaveleela makhurwa, ni soolya ikina o emusi yo Peteli.

⁹ Munna mukina aaheeriha wi empa awe o Sri Lanka ipakiwekemo mithukumano sa muloko ni sa muceche ni waahayiha arummwa a elukuluku yoothene. Mu weerano hiiha, munna onnayeleela ikhorowa, nave nikhaviheryo ntokweene wa alaleeryi a weiwo, yaawo ahirino ikhorowa sawaaca. Mu elapo owaateelihiwemo muteko ahu, anna annapharihela ipa saya ntoko Ipa sa Omwene. Eyo ennaweeriha mapiyoneero ni akina yaawo ahirino ikhorowa sawaaca okhalano nipuro na mithukumano ehilivenle.

10. Miphurelo taani nnaakhelaahu vaavaa nnakhalaahu amahala?

¹⁰ Sootakiherya ntoko seiya sinnooniherya wi achu a Muluku anakhala “òroromeleya mwa itxhu ikhani.” (Luka 16:10) Awo annapharihela muhakhu aya wi yaakhaviherye akina. Mano, asinthamwene yaawo a Yehova anoona hai vooloca sa wiilipiherya ntoko yoowo? Awo annakhala oohakalalaxa voosuwela wi vaavaa anakhalaaya amahala, awo annaphura muhakhu “weparipari” wirimu. (Luka 16:11) Murokora mmoha yoowo aapaka sooveleela moohihiyererya wi akhaviherye muteko wa Omwene ooloca wi yoheereya echu ahaaweheryeiye moovira wa iyaakha. Owo onnathariha: “Kohoona wi vaavaa kinakhalaaka amahala mu ichu soomwiilini, nchuno naka na waakhaviherya akina nnakhala ntokweene. Kinakhala amahalaxa mu olevelela, oopisa murima ni akina vaavaa anakiphucaaya naari okivaha ekano.” Ancipale annahuserya wi okhala  amahala onnakumiherya mphurelo wa yaawo.​—Salumu 112:5; Masiposipo 22:9.

11. (1) Mahala ahu anooniherya hai “miruku”? (2) Tiheeni eneereya variyari va achu a Muluku olelo? (Moone eruku yoopacerya.)

¹¹ Ninnooniheryatho “miruku” vaavaa nnapharihelaahu muhakhu ahu wi naakhaviherye akina mmuteko woolaleerya. Naamwi nihiweryaka orumeela mu elukuluku yoothene naari oya weiwo oriwo othowa otokweene, nlelo nnahaala waakhaviherya akina. (Masiposipo 19:17) Ntoko yootakiherya, sooveleela sahu sinnakhaviherya okaiwa wa soolaleeryiwa ni okhaviherya muteko woolaleerya mu ilapo soohaawa weiwo ancipale anahuseryaaya eparipari. Mu ilapo ntoko o Konko, Matakaskar ni Ruwanta, Apiipiliya annaphiyerya owalamela. Ikwaha ikina Piipiliya mmoha onakhwa ikhorowa muchu onaakheleiye va esumana emoha naari vamweerini. Moovira wa iyaakha, annihu yaanakhalano yoothanla waakhanle wi yaahaala othuma yoolya ya emusi aya naari omuthuma Piipiliya. Vano, moorweela wa sooveleela sa akina ni “olikana” wa ikhorowa, marehereryo a Yehova annaataphulela ni waakawa Apiipiliya mahaleene wa muchu ti muchu a veemusini hiiha ntoko oohuserya a Piipiliya. (Mwaalakhanye 2 Korinto 8:13-15.) Mwawiihiiha, yaale anavaha ni yaale anaakhela ananwerya okhala asinthamwene a Yehova.

12. Aparahamu oonihenrye hai wi aanamuroromela Muluku?

¹² Nnanweryatho okhala asinthamwene a Yehova wakhala wi nnavolowela vakhaani muhakhu wa elapo ni waavya muhakhu “weparipari.” Ti yeeyo mulopwana a nroromelo Aparahamu enreiye. Owo aahimwiiwelela Yehova nave ahiya epooma ya muhakhu o Ur wi akhaleke mmisakalani woona wi owo aachuna okhala nthamwene a Yehova. (Ahebri 11:8-10) Mahiku oothene aanamuroromela Muluku opwaha muhakhu. (Maphatxuwelo 14:22, 23) Yesu aahaaceenyerya akina otakiherya nroromelo na mukhalelo yoowo. Ekwaha emoha aahiloca ni mmiravo ooreela ariki: “Wakhwelaka okhala aphamasa, hawè, watumihe sothene oryaweno ni wavahe alipa òhawa, hiha onamukhalano muhakhu wirimu. Wihiha, orwe ni okitxhareke.” (Mateu 19:21) Mmiravo yoola haarino nroromelo noolikana ni Aparahamu. Nyenya yaakhalavo achu akina yaamuroromela Muluku.

13. (1) Ekano taani Paulo amvanheiye Timóteo? (2) Nni niwerye hai opharihela ekano ya Paulo mmahiku ahu?

¹³ Timoteo aari mulopwana a nroromelo. Paulo amanle omwiichana Timoteo ntoko “mukhotxo aphama a Kristu Yesu,” aahimuleela: “Mutxhu yole onaya okhotxoni onnahiya oteteiwa ni miteko mikina wi amwiweleleke owo omurempe” ntoko mukhoco. (2 Timóteo 2:3, 4) Oomuchara a Yesu olelo, ophitaanyerya arummwa a elukuluku yoothene opwaha ekonto, anniilipiserya opharihela ekano ya Paulo. Awo annasepa soolokoha soowoka sa elapo yeela ya nrima. Awo annuupuwela nlakiheryo nla: “Mutxhu osiyanre,  kapuro a yole ompolen’ye.” (Masiposipo 22:7) Satana onachuna wi nimaliheke elukuluku ahu yoothene ni ikuru sahu nlapaka ntakhara muhakhu wa elapo awe. Akina annasiyari ikhorowa sawaaca wi elivele empa, ekaaro, exikola ophiyeryatho othela. Naahikhalano ephoole, nnahaala okhalano ivaale mu iyaakha sincipale. Ninnooniherya miruku vaavaa nnakhweihaahu okumi ahu, nsepaka ivaale ni ohiyeeha ikhorowa sincipale. Mmukhalelo yoola nnahaala okhala ootaphuwa omurumeela Muluku opwaha okhala kapuro a muhakhu wa elapo yeela.​—1 Timóteo 6:10.

14. Nnaphwanela olakelela opaka eheeni? Mvahe yootakiherya.

¹⁴ Wi ntitelele okhweiha okumi ahu, nnaphwanela ohela Omwene wa Muluku vanipuro noopacerya. Mutheli mmoha aanamweeca nakoso yoowo aakhaviherya okhalano ikhorowa sawaaca. Nyenya, yaanachuna okookela mmuteko wa elukuluku yoothene. Mwawiihiiha mutheli aahimutumiha mwaaceya ni ichu ikina yaapharihelaaya wi emweecekeno nakoso. Voocharela, yaahiiveleela okhaviherya otekiwa wa nipuro ntokotoko na Anamoona a Yehova o Warwick, Nova York. Eyo yaari yavameekhaaya wa yaawo woona wi yaataphulela orumeela o Peteli ni mwanaya mwaamuthiyana ni iyawe, nave mu isumana ikina, ni asitiithi a munna yoowo aamuhin’ye nakoso, yaalapatho o Warwick. Murokora ori piyoneera o Koloratu, E.U.A., aahiphwanya muteko wa elukuluku vakhaani opanku. Mwaneene a epanku aahitepa ohakalala ni muteko wa murokora ophiyerya omvaha ekari ya olapa mahiku oothene ni waaceererya ikhorowa aakheleiye. Nyenya, woona wi muteko hiwaamweemererya okhala ooweiwa mmuteko woolaleerya, owo aahikhooca yoovaha yeela yaweeha. Iha sootakiherya savakhaani sa mikucho mincipale akapuro a Yehova anapakaaya. Vaavaa nnalakelelaahu ohela soochuna sa Omwene va nipuro noopacerya, eyo enooniherya wi ninnavaha esisapo onthamwene ahu ni Muluku ni muhakhu weeparipari opwaha ichu soomwiilini.

15. Muhakhu taani onaruuha ohakalala otokweene?

¹⁵ Okhala ooreela henataphulela wi nookhalano weemereryiwa ni Muluku. Yehova onaareeliha yaale ari ‘orèla ni miteko saphama.’ (Mwaalakhanye 1 Timóteo 6:17-19.) Ntoko yootakiherya, murokora oniichaniwa Lucia aahisuwela wi yaanachuneya alipa oolaleerya o Alpaniya. * (Moone masu avathi.) Mwawiihiiha aahipaka mukwaha ayaaka o Italiya mu 1993. Owo haarino muteko, nyenya aanaroromela wi Yehova aahaala omvakulela. Owo aahihuserya elocelo ya Alpaniya nave aahaakhaviherya achu opwaha 60 ophiyerya wiiveleela. Hiyaano akhweya hinnakhalano sookhumelela imohamoha naalaleeryaka mu ekulucu ahu. Nyenya soothene nnapakaahu wi naakhaviherye akina ohuserya vooloca sa Yehova ni okhala asinthamwene awe, owo tori muhakhu wa mahiku oothene.​—Mateu 6:20.

16. (1) Tiheeni enahaala weereya ni muhakhu wa elapo yeela? (2) Eyo enaphwanela ovolowela hai moonelo ahu vooloca ichu soomwiilini?

¹⁶ Yesu aahooniherya wi muhakhu wa elapo yeela waahaala wuukunuwa. Owo aahiloca: ‘Nihiku muhakhu owo oneraya owukunuweni’, ohiya ‘wakhala wi wohuukunuwa.’  (Luka 16:9) Mmahiku yaala ookuchula, ipanku ikina sinnapwata nave ilapo ikina onnakhalamo othowa otokotoko. Nyenya voohilekela, ichu sinahaala otepa. Epolitika, ikerexa ni muhakhu wa ilapo, sinapaka makupa a elapo ya Satana sinahaala omala. Mulipa miririmu Ezekiyeli ni Sofoniya yaahiloherya wi eparata ni ewooro, seiyo sinakhala sookhweleya mu elapo, inahaala oyeleela esisapo aya. (Ezekiyeli 7:19; Sofoniya 1:18) Nnahaala woona hai wakhala wi noophiya omakuchuwelo wa okumi ahu mu elapo yeela nave nsuwela wi nooyeleela muhakhu weeparipari nthowa na ichu ihiri seeparipari sa elapo yeela? Akhweya nnahaala woona ntoko mulopwana yoowo aalampe mu okumi awe woothene wi akhaleno ikhorowa sawaaca, woomaliheryani asuwele wi ikhorowa ti soowoka. (Masiposipo 18:11) Muhakhu wa elapo yeela onahaala wuukunuwa. Mwawiihiiha muhiyeleele ekari ya opharihela muhakhu anyu wi mwaapake asinthamwene wirimu. Yeeyo nnapakaahu ntakhara Yehova ni Omwene awe enahaala oneeriha okhalano ohakalala weeparipari.

17, 18. Tiheeni anaweheryaaya asinthamwene a Muluku?

¹⁷ Warwa Omwene wa Muluku, haavo ani achune oliva empa naari opaka evaale. Yoolya enahaala okhala yamahaleene nave yawaaca, nave honi onachuneya omuliva totore naari murece. Asinthamwene a Yehova anahaala opuha ichu saphaama elapo eneeraaya yiimiheke. Eparata, ewooro ni eporonse sinahaala ophariheliwa, nyenya ohiya wi imweerihe muchu okhala ooreela. Ikaruma soolipa, ntoko ithaapwa, maluku ni metal sinahaala okhala sa mahaleene wi itekiwekeno ipa sooreera. Asinthamwene ahu anahaala onikhaviherya mahaleene. Nnahaala wuukaka ichu soothene elapo eneeraaya yiimiheke.

¹⁸ Ala mareeliho asisapo yaale anaapaka asinthamwene wirimu eneeraaya ekhaleno. Alapeli a Yehova veelaponi anahaala ohakalala vaavaa eneeraaya yiiwe masu a Yesu: “Rwani nyuwo òrèlihiwa a Atithi aka, akhelani omwene woreheriwa wa nyuwano wopatxeryani wa elapo.”​—Mateu 25:34.