1-3. (1) Salumu 147 akhweya orepiwe elukuluku taani? (2) Tiheeni nneeraahu nihuserye orweela wa omuhuserya Salumu 147?

WIILIWIILI ninnamucicimiha muchu vaavaa nnamutikhinaahu mwa yeeyo olonceiye naari opankeiye. Chiri ninnaceenyeryeya omucicimiha Yehova Muluku! Ninnamucicimiha nthowa na owerya wawe otokotoko, yoowo nnoonaahu mu soopatusiwa sawe sootikhiniha, nave ninnamucicimiha nthowa na onisivela wawe, yoowo nnoonaahu mmukucho wa Mwanawe.

² Vaavaa nnamwaalakhanyaahu Salumu 147, enakhala yawooneya wa hiyo wi namarepa aahikhalano nchuno ntokweene na omucicimiha Yehova. Owotho aahaaceenyerya akina omucicimiha Muluku vamoha.​—Mwaalakhanye Salumu 147:1, 7, 12.

³ Hiyaano hinnamusuwela taani omurempe Salumu 147. Nyenya akhweya namarepa owo aakhanle variyari va elukuluku vaava Aisarayeli yaakookenlaaya o Yerusalemu Yehova amanle owoopola o Papulu. (Salumu 147:2) Namarepa a Salumu aahimucicimiha Yehova nthowa nawi achu Awe yanwerya omulapela wanaawiili mu elapo aya. Voocharela, namarepa a Salumu aahivaha mathowa makina a omucicimiha Yehova. Yaari  mathowa taani? Nave mathowa taani muryaanyuno a oloca “Muluku acicimihiwe”?​—Salumu 147:1.

4. Vaavaa Mwene Siru aawooponleiye Aisarayeli, awo yoonne hai, nave ntakhara heeni?

⁴ Mwaanyiherye mukhalelo Aisarayeli yoonaaya vaavaa yaaryaaya wookapuroni o Papulu. Yaale yaakerinhewo yaanaaroha nave yaanaloca: “Munipele matxipo o Siyoni.” Nyenya Ayuta hiyaarino nchuno na wiipa. Yerusalemu, nthowa naya na ohakalala, aahimwariwa. (Salumu 137:1-3, 6) Mirima saya saahiphoreya, nave yaanachuna nihakalaliho. Nyenya hiiha ntoko masu a Muluku yaalohenryaaya, Yehova aahaakhaviherya achu awe. Mwawiihai? Mwene Siru o Persiya aahimvootha Papulu nave aahiloca sa Apwiya Yehova ariki: “Àkiruma wàtekela empa o Yerusalemu.” Siru aahilocatho wa Aisarayeli: “Wa nthowa na yeyo, atxhu othene a nloko naya etximule nave Apwiya, Muluku aya yàhole.” (2 Matharihelo 36:23) Chiryene, masu ala yaahaahakalaliha Aisarayeli o Papulu!

5. Tiheeni namarepa a Salumu olonceiye sa owerya wa Yehova onipenusa?

⁵ Yehova haavanhe nihakalaliho pahiru wa Aisarayeli ntoko nikhuuru, nyenyatho mmoha ti mmoha. Yehova onneerano emohamoha ni hiyo olelo. Namarepa a Salumu oorepa wi Muluku ‘onnavoliha murima wophoreya, nave onnamaka makhwatxa aya.’ (Salumu 147:3) Vaavaa nniiceliwaahu, nnaphwanela ororomela wi Yehova onnanikhapelela. Yehova ori ooreheryeya wi anihakalalihe, ni ovoliha makhwaca ahu a mmuupuweloni. (Salumu 34:19; Isaiya 57:15) Owo onnanivaha miruku ni ikuru wi niwerye ovilela makacamiho vyakala nneeraahu nikumaneno.​—Tiyako 1:5.

6. Nni niphure hai orweela wa masu a namarepa a Salumu 147:4? (Moone eruku yoopacerya.)

⁶ Voocharela namarepa a Salumu aahiweha osulu nave aloca wi “Annàlikhanya watxa wa itheneri nave sothene annitxhana ni nsina naya.” (Salumu 147:4) Namarepa a Salumu aanawerya woona itheneeri, nyenya haawerya waanyiherya waaca waya. Olelo, masiyentista annasuwela wi mu ekalasiya ahu sookhalamo itheneeri macikhwi macikhweene. Nave akhweya sookhala ikalasiya sincipale! Achu hanawerya waalakhanya itheneeri, nyenya Mpatusa onnawerya. Mweeparipari, owo onnasuwela phaama etheneeri ti etheneeri ophiyerya ovaha nsina. (1 Korinto 15:41) Muluku yoowo osuwenle eryaayavo etheneeri ti etheneeri owotho onnoosuwelaani. Mahiku oothene oosuwela phaama nipuro muryaanyuvo, mukhalelo munoonaanyu nave tiheeni munachunaanyu!

7, 8. (1) Yehova oniiwexexa eheeni wa hiyo? (2) Mvahe yootakiherya enooniherya wi Yehova taniphwanya.

⁷ Yehova onniiwexexa osooseya wanyu, nave owo ookhalano owerya wa wookhaviheryaani ni makacamiho anyu. (Mwaalakhanye Salumu 147:5.) Nyuwaano akhweya munanwerya woona wi mukhalelo anyu  wootepa ovila nave wi himuwerya ovilelano. Apwiya Muluku anniiwexexa okotakota wahu, “annupuwela wi nri ntxhupi.” (Salumu 103:14) Naachu oohiphaameya, mwawiihiiha ninnapaka yoocheka emohamoha ikwaha sincipale, nave akhweya nnamuceecheya. Ninnuupuwela ichu nloncaahu, nchuno noonanara ni nrima naaryaahuno! Yehova haano yawuukhula vyakala, nyenya owo onniiwexexa phaama mukhalelo nnoonaahu.​—Isaiya 40:28.

⁸ Apwanne montoko woona mukhatiinyu ntata noowerya na Yehova nookhaviheryakaani ovilela yaweeha? (Isaiya 41:10, 13) Ela yaaheereya ni piyoneera oniichaniwa Kyoko. Amanle othaamela mu nipuro nivyaani, owo aari ooceecheya. Nyenya Kyoko aasuwenle hai wi Yehova aaniiwexexa nikacamiho nawe? Mmuloko awe muvyaani, yaahikhalamo achu ancipale yaawerya wiiwexexa miyoonelo sawe. Owo oonne wi Yehova aanaloca ariki: “Kinnoosivela, ohiya nthowa nawi wa piyoneera, nyenya nthowa nawi wamwanaka mwaamuthiyana wiiveleenle wa miyo. Kinachuna wi opuhe okumi aa ntoko mmoha a Anamoona aka!” Yehova onawooniheryani hai wi ‘miruku sawe hisano munlano’?

9, 10. Mukhalelo taani wookhweleya Yehova onahaaleiye onikhaviherya? Mvahe yootakiherya.

⁹ Oothene ahu ninnachuna ichu ntoko yoolya, yoowara, ni mpuro wookhalavo. Akhweya munamukhala awoova wi himuwerya okhalano yoolya yawaakhwanela. Nyenya Yehova onneeriha elapo wiimiha yoolya yawaakhwanela wa oothene, ophiyeryatho “asana a khwáre awunla.” (Mwaalakhanye Salmo 147:8, 9, Nlakano Nahihano.) Wakhala wi Yehova onnaalyiha akhwaari, nnanwerya ororomela wi owo onahaala onivaha soothowa sahu soomwiilini.​—Salumu 37:25.

¹⁰ Echu yookhweleyaxa ti yawi Yehova onnavahererya yeeyo nnachunaahu wi ntitelele olipiha nroromelo nahu, nave onnanivaha “muretxele wa Muluku, onapwaha miruku sothene.” (Filipi 4:6, 7) Munna oniichaniwa Mutsuo ni mwaariye yaahoona mukhalelo Yehova aakhavihenryeiye. Vaavaa tsunami aavolonweiye o Xapau eyaakha ya 2011, awo yaahala vakhaani okhwa yahiwenle vapathoni va empa aya. Mu nihiku nenle awo yaahiyeleela soothene yaaryaayano. Awo yaamalinhe ohiyu woothene veepiiphini, mu ekwartu yooriirya ya empaya. Woosiiselo, awo yaahaavyaavya echu yaahaala waalipiha. Echu emoha yaaphwannyaaya pahiru aari liivuru Anuário das Testemunhas de Jeová. Vaavaa Mutsuo aamuhuleiye, aahoona mwaha waaloca “Os maiores tsunamis já registrados.” Mwaha owo waaloca sa mwaacikinye eeren’ye o Sumatra mu 2004 yoowo aatempe otolosa opwaha tsunami vyakala. Mutsuo ni mwaariye yaahinla vaavaa yaalakhanyaaya yaweereya ya anna ni arokora aya. Awo yaahoona wi Yehova taavahererya nlipiho neeparipari yaachunaaya. Yehova tho aahaakhapelela mmikhalelo mikina. Annaya mmakupa makina o Xapau yaahaavaha yoolya ni soowara. Nyenya echu yaalipinhexa waari oxekuryiwa wa muloko ni anna yaawo yaarumihiwe ni marehereryo a Muluku. Mutsuo ooloca: “Koona wi Yehova aari chiri vakhiviru va muchu ti muchu a hiyo nave anikhapelelaka. Nceenyeryo ntokweene!” Voopaceryani Yehova onnavahererya yeeyo nnachunaahu wi  ntitelele olipiha nroromelo nahu, nave voocharela ichu soomwiilini.

11. Tiheeni nnaphwanelaahu opaka wi niphure nikhaviheryo na Muluku?

¹¹ Apwiya Yehova “annàkhapelela awiyeviha.” Owo onnanisivela nave mahiku oothene ori ooreheryeya wi anikhaviherye. (Salumu 147:6a) Nni niphure hai nikhaviheryo nawe? Ti woochuneya okhalano onthamwene woolipa ni yene. Wi nikhaleno, nnaphwanela okhala awiiyeviha. (Sofoniya 2:3) Achu awiiyeviha annamuroromela Yehova wi ookolole ohikhala ekhaikhai vyakala ni omaliha soohooxa. Yehova onnaweemererya yaawo.

12, 13. (1) Wi niphure nikhaviherye na Muluku, tiheeni nnaphwanelaahu osepa? (2) Yehova onahakalala naani?

¹² Mmukhalelo mukina, Apwiya Muluku “annàyeviha awikusererya mmurimani.” (Salumu 147:6b) Hiyaano hinnachuna wi ela yeereye ni hiyo! Nnachuna wi Muluku anooniherye  osivela wawe weeparipari. Mwawiihiiha nnaphwanela wiica yeeyo oniiceiye. (Salumu 97:10) Ntoko yootakiherya, nnaphwanela wiica mararuwo. Eyo enataphulela wi nnaphwanela osepa echu vyakala yaahaala oneeriha opaka yeeyo, ophitaanyerya woona epwitikiri. (Salumu 119:37; Mateu 5:28) Eyo akhweya ekhoco etokweene, nyenya wiilipiherya ti woochuneya nthowa nawi nnahaala waakhela mareeliho a Yehova.

¹³ Hiyaano haniwerya owaniha ekhoco ela mukhatiihu. Nnaphwanela omuroromela Yehova. Apwanne onahaala ohakalala wakhala wi nnaroromela ichu seiyo achu anaroromelaaya? Hooye, Yehova “hanapwatxha ikuru sa inari”, Apwanne nnaphwanela wiiroromela mukhatiihu naari muchu mukina? Yehova hanaphwacha “nari mano wupa wa muchu.” (Salumu 147:10) Moohiyana nnaphwanela otitelela ovekela wa Yehova wi anikhaviherye ni ompachaanyerya mmavekeloni wi anaakihe orweela wa nanceeche. Yehova harwa avelavela owiriyana mavekelo yaawo. Apwiya Yehova “annàsivela yale anatxitximiha ni anaroromela okhwela waya.” (Salumu 147:11) Woona wi owo toororomeleya nave onnanisivela, ninnasuwela wi onahaala otitelela onikhaviherya ovootha soochuna sahu soonanara.

14. Namarepa a Salumu aaroromela eheeni?

¹⁴ Yehova onnanroromeliha wi onahaala onikhaviherya nakhalano makacamiho. Vaavaa Aisarayeli yaakookenlaaya o Yerusalemu, namarepa a Salumu aahuupuwela mukhalelo Yehova aakhavihenryeiye. Namarepa a Salumu aahiipa: “Owo òlipiha milulo sa masele-à nave oharèliha ana-à. Owo òrùha muretxele mminlanoni mwà.” (Salumu 147:13, 14) Pahiru nthowa nawi Yehova aahaala olipiha milulo sa masele yaanamweeriha namarepa a Salumu okhala ookhapeleleya. Eyo yaanamuroromeliha wi Yehova aahaala waakhapelela achu awe.

15-17. (1) Veelukuluku aya nnoona hai saweeha sahu, nyenya Yehova onapharihela hai Masu awe wi anikhaviherye? (2) Mvahe yootakiherya enooniherya mukhalelo Masu a Muluku ‘anatxhimakaya velaponi’ wi enikhaviherye.

¹⁵ Akhweya munamukhala awiiniwa murima nthowa na makacamiho anyu, nyenya Yehova onanwerya woovahaani miruku wi mvilele. Namarepa a Salumu aalonce  wi Muluku “òrumiha nsu nawe vathi va, nave mutxhaka awe onnatxhimaka velaponi.” Voocharela namarepa a Salumu aahiromola mucharapo, nchoce ni maralala ntoko maluku nave aahikoha: “Tani onavilela orirya waya?” Voocharela aahiloca wi Yehova “onnarumiha nsu nawe nave mutxarapo onnamwaryeya.” (Salumu 147:15-18) Muluku ahu yoowo osuwenle soothene nave onawerya opaka soothene, yoowo onavareryela maralala ni mucharapo, chiryene onanwerya wookhaviheryaani ovilela nikacamiho vyakala.

¹⁶ Olelo, Yehova onanihoolela ni Masu awe, Piipiliya. Namarepa a Salumu ooloca wi masu a Yehova ‘annatxhimaka velaponi’ wi anikhaviherye. Muluku onanihoolela mmukhalelo woophwanelela nave mu elukuluku yoophwanelela. Muupuwele sa mukhalelo munaphuraanyu orweela Mpiipiliya, soolaleeryiwa sa “mulapeli òroromeleya ni awisuwela,” JW Broadcasting, jw.org, atokweene, anna ni arokora. (Mateu 24:45) Apwanne montoko waanyiherya mu okumi anyu wi Yehova onnachimaka wi oohooleleni?

¹⁷ Murokora oniichaniwa Simone aahoona mukhalelo Masu a Muluku yaamukhavihenryaaya. Owo aahiisoona ohikhala echweenevo, nave aahuupuwela wi Yehova haahakalala ni yene. Nyenya, vaavaa murokora ola aakhaleiye ooceecheya, aanatitelela ovekela wa Yehova, ompachaanyerya wi amukhaviherye. Owotho aahititelela omuhuserya Piipiliya. Simone ooloca: “Nkintonko okhalano nikacamiho naahaala okeeriha ohoona ikuru sa Yehova ni ohoolela wawe.” Ela yaahimukhaviherya okhalano moonelo waphaama.

18. Ntakhara heeni munoonaanyu wi Yehova ori vakhiviru vanyu, nave mathowa taani muryaanyuno a ‘omucicimiha Muluku’?

¹⁸ Namarepa a Salumu aahisuwela wi Yehova aahithanla nloko nakhalai na Isarayeli wi ekhale achu awe variyari va maloko oothene a veelaponi yavathi. Awo yaari pahiru nloko nimoha nenlo naakhenle “nsu” na Muluku ni “ikano sawe.” (Mwaalakhanye Salumu 147:19, 20.) Olelo, nookhalano ekari etokweene wiichaniwa ni nsina na Muluku. Ninnathamalela omusuwela, okhalano Masu awe wi enihooleleke ni okhalano onthamwene ni yoowo. Moolikana ni namarepa a Salumu 147, mookhalano mathowa mancipale a ‘Omucicimiha Muluku’ ni waaceenyerya akina weerano emohamoha.