Akristu annachariha malakiheryo a Mpiipiliya vaavaa anathanlaaya mukhalelo wa wiisaakiha ni wiikhapelela. Malakiheryo awo annooniherya wi yaahaala okhala yoonanara Mukristu waapharihela akapuchi yaawo, ntoko khanyankulu, munra, naari ikaruma ikina sa wiisaakihano wa achu akina. Muupuwele vooloca sa miyaha sinacharela:

Okumi wa achu ti waweela wa Yehova. Mulipa awiipa Tavite aahirepa vooloca sa Yehova: “Mwa nyuwano òkhalamo nàtxutxu a ekumi.” (Salumu 36:10) Mwawiihiiha, wakhala wi Mukristu onnathanla wiisaakiha naari vaate vawe, owo onaphwanela opaka soothene waweryeya wi asepe okhalano nthowa na nikhami, eyo ti wi omwiipha muchu.​—Malamulo 22:8; Salumu 51:16.

Eparipari wi ekaruma vyakala muchu onaphariheleiye wi iisaakiheno enahaala omweeriha okhalano nthowa na nikhami. Nyenya, ti wookhweya omunyoka muchu ni kapuchi, moohipwacha waari moohilakelela naari moolakelela. * (Moone masu avathi.) Navetho, muchu owo oohuhula onahaala okhala eesara, nave wakhala wi ohoona ekapuchi, mukhalelo ene onamutepa woopiha nave muchu mmoha onanwerya wiiphiwa.

Vaavaa Yesu aaleenleiye oomuchara awe wi ekuse nsipaca mu ohiyu ahaakumve okhwa, eyo hiyaari wi awo yaaphwanela wiisaakihakano. (Luka 22:36, 38) Moohiyana, Yesu aachuna waahusiha echu: Oohuserya awe hiyaaphwanela opharihela nlala, naamwi yeeraaya ekumaneno muloko wa akhoco erino akapuchi. (Luka 22:52) Vaavaa Petro aapharihenleiye nsipaca nawe wi amwiiphe kapuro a namukucho, Yesu aahimulamulela Petro: “Kuhà nsipatxa nà.” Voocharela Yesu aahitikitherya nlakiheryo nenlo nnaahoolela Akristu olelo: “Atxhu othene anaphoreiha ni nsipatxa, enahawela ekhwetho ni nsipatxa.”​—Mateu 26:51, 52.

Ntoko eloheryiwaaya mu Mikeya 4:3, achu a Muluku “anamutatusa masipàtxa aya ekhale ihipa, nave mavaka aya ekhale itxikwakwa.” Akristu eeparipari asuweliwe ntoko achu a murecele. Awo annachara malamulo Muluku aavanheiye moorweela wa murummwa Paulo wi “muhilive yonanara ni yonanara” nave wi ‘ekhale ni muretxele n’atxhu othene.’ (Aroma 12:17, 18) Naamwi Paulo aakumanneno mikhalelo soovila, ophitaanyerya “sawopiha. . . . ni ampava,” owo hantonko ochekela malakiheryo a Piipiliya wi iisaakihe. (2 Korinto 11:26) Moohiyana, owo aanamuroromela Muluku nave aahisuwela wi ekano ya miruku ya Mpiipiliya ‘ti yaphama opwaha ekhotxo.’​—Eklesiyaste 9:18.

Wa Akristu okumi ti wasisapo opwaha ichu soomwiilini. Noosuwela wi “ekumi ya mutxhu henalipa wa nthowa na muhakhu oreiyeno.” (Luka 12:15) Mwawiihiiha wakhala wi nnaloca mmukhalelo wawiiyeviha ni mpava orino ekapuchi hinnamuhiiha, nave nnachara ekano ya Yesu: “Muhikhomeke ni mutxhu ònanara murima.” Eyo enataphulela wi nimweemererye okhalano soothene onachuneiye. (Mateu 5:39, 40; Luka 6:29) * (Moone masu avathi.) Chiryene, ti yaphaama osepa otannya nlala. Awo akhweya heni echune oniphara wakhala wi noochariha ekano ya Piipiliya ni osepa “wikusererya mokhalani.” (1 Yohani  2:16) Eyotho enahaala onaakiha wakhala wi nsuweliwe ni amwaacamani ahu ntoko Anamoona a Yehova a murecele.​—Masiposipo 18:10.

Akristu annacicimiha oleela wa murima wa akina. (Aroma 14:21) Anna ni arokora akina anahaala ohaleeliheya ophiyerya okwaculeya, wakhala wi aasuwela wi Mukristu mukhwaaya ookhalano ekapuchi wi iisaakihekeno wa achu akina. Akhweya nnamweemereryiwa ni alamuleli okhalano ekapuchi, nyenya wa nthowa na waasivela annihu, hinnahaala opaka echu yeeyo nsuwenlaahu wi enahaala waakwacula.​—1 Korinto 10:32, 33; 13:4, 5.

Akristu anachuna okhala yootakiherya yaphaama wa akina. (2 Korinto 4:2; 1 Pedro 5:2, 3) Wakhala wi Mukristu ookhalano ekapuchi wi iisaakihekeno wa achu akina, atokweene anahaala omvaha ekano orweela Mpiipiliya. Wakhala wi onnalakelela okhapelela ekapuchi, owo hani akhale yootakiherya yaphaama. Ntoko yookhumelela, owo hawerya okhalano mirici naari opaka makupa mmulokoni. Emohamoha ennaphariheliwa ni Akristu yaawo anatitelela okapacha ekapuchi ntoko makupa a muteko aya. Yaahaala okhala yaphaama waakhanle wi owo oheererya ophwanya muteko mukina. *—Moone masu avathi.

Mukristu onaphwanela opaka soolakelela sawe vooloca sa mukhalelo onahaaleiye wiisaakiha, waakiha emusi awe, ni sookhalano sawe hiiha ntoko weiwo onahaaleiye olapawo. Nyenya vaavaa owo onapakeiye soothanla seiyo, iho inaphwanela othipeleya mu malakiheryo a Piipiliya. Muluku ahu a miruku oovaha malakiheryo yaala nthowa nawi owo onnanisivela. Ti nthowa nene Akristu yaawo arino onthamwene woolipa ni Yehova anathanlaaya ohikhapelela ekapuchi wi yiisaakihekeno wa achu akina. Awo aasuwela wi waakhala wi annamuroromela Yehova ni ochara malakiheryo a Piipiliya mookumini mwaya, awo anahaala okhapeleleya okhala wookhala.​—Salumu 97:10; Masiposipo 1:33; 2:6, 7.