Murummwa Paulo aahisuwela wi soolokoha soohuweliha sa Satana ti sawoopiha. Nyenya tahi wi Akristu oothene annasuwela yawoopiha ene. Ntoko yootakiherya, onakhala wi akina o Korinto yuupuwela wi yaari oolipaxa mu eparipari ophiyerya wi hiyi evoloweliwe ni Satana. (1 Korinto 10:12) Ti nthowa nene Paulo ayaaka ovaha olopola ola: “Vano kinnova wi ntoko Eva ahuwelihiweiye ti osyaka wa enowa, hihatho miruku sanyu ihipahuwe ni ihihuwelihiwe wa ohiwoka ni wèla wanyu murima ni Kristu.”​—2 Korinto 11:3.

Masu a Paulo annooniherya okhweleya waya ohikhala awiiroromelaxa. Wi mvoothe ekhoco vooloca sa soolokoha soohuweliha sa Satana, munaphwanela osuwela woopiha waya ni wiikhapelela orweela wa seiyo.

Mmukhalelo yoola, soolokoha soohuweliha miselo soohichuneya naari soohuweliha seiyo sinaphariheliwa wi ewokiwe achu naari ovareryela mukhalelo anuupuwelaaya ni anapakaaya ichu. Mwawiiwanana ni liivuru a Soolokoha soohuweliha ni Olekecha, soolokoha soohuweliha ti “makhalelo ahiri aphaama, ohooxa ni ohikhala eekhaikhai.” Achu anathariha epharihelaka masu ntoko “wootha, ohucukula, owoka, olekecha [ni] ovareryela muupuwelo.”

Yoolokoha yoohuweliha ti yawoopiha nthowa nawi vakhaani vakhaani enanwerya ovolowela muupuwelo ahu nihonne. Nnanwerya olikanyiha eyo ni mwiisi wawiipha yoowo nihinaweryaahu woona naari wunkha. Vance Packard, mulipa  oohuserya muupuwelo wa achu, olonce wi yoolokoha yoohuweliha ennavolowela mukhalelo nnapakaahu ichu “opwaha naanyiheryaahu.” Mulipa oohuserya mukina olonce wi yoolokoha yoohuweliha ennaweeriha achu wuupuwela mmukhalelo wawoopihaxa ni woohiphimelela nave enneeriha wi achu eniiphana (weiwo nloko naachu nniiphiwaaya), ekhoco, ni wiikariwa nthowa na nloko naari ekerexa.—Mu liivuru Mwaha wa Soolokoha Soohuweliha (Easily Led​—A History of Propaganda.)

Wakhala wi achu ananwerya oniwoka ni yoolokoha yoohuweliha, hanka vooloca sa Satana? Owo oohuserya muupuwelo wa achu ovinyerya vaavaa mulopwana aapatusiweiye. Navetho, vano owo tonavareryela “elapo yothene,” mwawiihiiha owo onanwerya opharihela makupa vyakala a elapo wi amwaramwaxe sawootha sawe. (1 Yohani 5:19; Yohani 8:44) Satana “otxiyela miruku” sa achu ancipale ni soolokoha sawe soohuweliha, yoowo vano ori “munyenka a elapo yothene emakiwe.” (2 Korinto 4:4; Wupulula 12:9) Muni nwerye hai okhoma ni soolokoha sawe soohuweliha?

Yesu oonihusiha mukhalelo mmoha wookhweya wa owaniha ni soolokoha soohuweliha: “Nave munarwa musuwela eparipari, ni eparipari enan’wopolani.” (Yohani 8:31, 32) Mu ekhoco, munakhoco onaphwanela osuwela ti vaavi onayeiye ophwanyawo sooleeliherya seeparipari nthowa nawi mwiicani onahaala omwaramwaxa sawootha wi amuhuwelihe. Vanonto muni mwaaphwanye woowi sooleeliherya seeparipari? Yehova onnavahererya iho mu Masu awe, Piipiliya. Mwemmo nyuwaano munanwerya ophwanya soothene munachunaanyu wi nwanihe ni soolokoha soohuweliha sa Satana.—2 Timóteo 3:16, 17.

Mweeparipari Satana oosuwela sa yeela. Mwawiihiiha owo onnapharihela elapo onavareryeleiye wi anaakanyerye ni oniceecheiha wi nihimwaalakhanye nave nihimuhuserye Piipiliya. Muheemererye ohuwelihiwa moorweela wa “masyakelo a Satana.” (Éfeso 6:11) Honaakhwana pahiru okhalano masuwelelo ari mathipelo a eparipari. Nnaphwanela olapa moowetha wi naaceererye masuwelelo ahu a eparipari. (Éfeso 3:18) Ntoko Noam Chomsky olonceiye, “haavo muchu oni ayeeherye eparipari mu ocoopare anyu. Eyo echu munaphwanelaanyu osuwela mukhatiinyu.” Mwawiihiiha “musuwele mukhatiinyu” moorweela wa ‘nihiku nnihiku ovarerya sorempwa.’​—Saweriwa T’arummwa 17:11.

Satana hanachuna wi muupuweleke phaama ni wiiwexexa eparipari vooloca sa yeeyo munawiriyanaanyu. Ntakhara heeni? Nthowa nawi soolokoha soohuweliha “inakhala ntoko wi ti samphurelo”  wakhala wi achu “aaceecheihiwa moorweela wa wuupulela moonanara.” Soolokoha Soohuweliha ni Achu a Nsana 20 (Media and Society in the Twentieth Century) Muhooneke pahiru weemererye soothene munawiriyanaanyu muhilinke toko wuupuwelela vooloca sa yeeyo. (Masiposipo 14:15) Muluku ohoovahaani, “osuwela” ni “owerya wanyu wa wuupuwela,” mwawiihiiha mpharihele wi mulipihe nroromelo nanyu.​—Masiposipo 2:10-15; Aroma 12:1, 2, Tradução do Novo Mundo.

Anakhoco yaawo anavoloweliwa ni soolokoha soohuweliha annakhala awoova ni ooceecheya wi ewanihe. Soolokoha soohuweliha sinanweeriha owana yaawoyaawo naari wiivalaanya mu nikhuuru na atoropa. Mwawiiwanana ni mutokweene o Alemanya, soolokoha soohuweliha nthowa nimoha naaweerinhe anakhoco o Alemanya oyeleela ovootha mu Ekhoco Etokweene Yoopacerya. Owo ooloca wi achu yaahivoloweliwa ni soolokoha soohuweliha, nave enakhala ntoko wi yaamurupa. Satana onnapharihela mikhalelo imohamoha wi ananarihe waataana wa Akristu olelo. Ntoko yootakiherya, owo onneererya omuruuha namvutuka variyari va anna. Naari onneererya oweeriha ohiya marehereryo a Yehova moorweela wa wuupuwela wi toohiroromeleya naari aapaka echu yoonanara.

Muhiwokiwe! Mucharihe ekano ya Masu a Muluku nave mutitelele waataana ni anninyu. Ntoko yootakiherya, Piipiliya onnanceenyerya otitelela ‘olevelelana’ moomalela ni waakuvela orehererya mwaha vyakala onamuruuha namvutuka. (Kolosi 3:13, 14; Mateu 5:23, 24) Nave onnanceenyerya ohiivalaanya ni muloko. (Masiposipo 18:1) Mukhale ooreheryeya okhoma ni soolokoha soohuweliha sa Satana. Mwiikohe: ‘Ekwaha yookuchula munnaka okiphunceiye, apwanne saweera saka saamuhakalalinhe Yehova naari Satana?’​—Galasya 5:16-26; Éfeso 2:2, 3.

Munakhoco yoowo ohinaroromeleya wa muhooleli awe hani awanihe mwaphaama. Mwawiihiiha amwiicani anapharihela soolokoha soohuweliha wi eweerihe anakhoco ohaaroromela ahooleli aya. Wakhala wi ahooleli aahesa, amwiicani anahaala weererya opharihela ohesa weiwo nave eloce: “Muhaaroromele!” nave “Muhiweemererye wookerihaani vamooroni!” Satana onneerano emohamoha. Owo onneererya onanariha ororomeleya wanyu mwa yaale Yehova onaaphariheleiye wi yaahoolele achu awe.

Muni mwiikhapelele hai? Mukhale oolakelela otitelela mmarehereryo a Yehova. Mutitelele okhala oororomeleya ni waakhaviherya alopwana yaawo  anaahoolela achu a Muluku, naamwi eri alopwana oohiphaameya. (1 Tesalónika 5:12, 13) Alipa oovaanya ni achu oowoka akina annahiphela marehereryo. (Tito 1:10) Naamwi yeeyo analocaaya ekhalaka wi eparipari, “muhukhuleye” orweela mmuupuwelo anyu. (2 Tesalónika 2:2) Mucharihe ekano Paulo aamvanheiye Timoteo: “Olipe mwa seiyo ohusenryawe,” nave owuupuwele “yale ohusin’he.” (2 Timóteo 3:14, 15) Muupuwele ichu soothene sinooniherya wi munnamuroromela mulapeli oororomeleya yoowo Yehova onamphariheleiye mu waacamela iyaakha nsana ophiyerya hiihaano wi anihusihe eparipari.​—Mateu 24:45-47; Ahebri 13:7, 17.

Satana onneereryatho woovolowelaani mwawooneya. Ikwaha ikina onnaweerihaani okhala awoova. Woopopiha “mukhalelo mmoha wa soothene sa soolokoha soohuweliha sa khalai.” Ntoko yootakiherya, mu liivuru Mwaha wa Soolokoha Soohuweliha (Easily Led—A History of Propaganda) Filip M. Taylor, muhusiha o Inklatera, aahirepa wi Asiriya, yaahipharihela woopopiha vamoha ni soolokoha soohuweliha ni yoolakelela ya waavootha amwiicani aya. Satana onampharihela woova, ntoko omoova muchu, woova wiikariwa, ni woova okhwa, wi oomaaliheeni omurumeela Yehova.​—Isaiya 8:12; Yeremiya 42:11; Ahebri 2:15.

Muheemererye wi Satana oopakeleeni yeeyo! Yesu ooloca: “Muhiwoveke yale anipha mwili, nave oholo waya hanaweryatho wer’etxhu.” (Luka 12:4) Muroromele moomalela wi Yehova onahaala okhwaaniherya yoororomeliha awe ya wookhapelelaani, woovahaani “owerya wu otokotoko,” ni wookhaviheryaani okhoma ni ohiphela wa Satana.​—2 Korinto 4:7-9; 1 Pedro 3:14.

Mweeparipari, sinamukhalavo ilukuluku muneeraanyu mukhale ooceecheya naari awoova. Nyenya muupuwele masu Yehova aamulipinheiyeno Yosuwa: “Olipe murima! Ohòve! Ntakhara Apwiya, Muluku à, anamukhala ni weyano, weiwo onerawe oyekewo.” (Yosuwa 1:9) Wakhala wi munnakhala ooteteiwa, mwawaakuveya mvekele wa Yehova vooloca sa woova wanyu. Mweemererye wi “muretxele wa Muluku, onapwaha miruku sothene, onamukhapelela mirima sanyu ni mupuwelo anyu.” Voocharela munahaala okhalano ikuru sa okhoma ni soolokoha soothene soohuweliha sa Satana.​—Filipi 4:6, 7, 13.

Apwanne munnuupuwela yoolokoha yoohuweliha yeeyo namichaka o Asiriya, Rapsake, aapharihenleiye wi awoopopihe achu a Muluku? Owo aachuna wi yeemererye wi haavo ii awerye waakhapelela wa Asiriya, ophitaanyerya Yehova. Aahiphiyerya oloca wi Yehova taalamulenle wi Asiriya emutolose Yerusalemu. Tiheeni Yehova aalonceiye? “Ohove itxhu sothene wiwalawe, oruwana wothene akhotxo a Senakeribi akerenlaya.” (2 Mamwene 18:22-25; 19:6) Voocharela Yehova aahimurumiha munkeelo awe yoowo aawiiphale anakhoco 185.000 a Asiriya mu ohiyu omoha!​—2 Mamwene 19:35.

Apwanne montoko woona exilema vaava muchu ohinasuweleiye wi onamuhipheliwa? Akhweya mwaanachuna okhuwela: ‘Khwoo oheemererye eyo! Awo anamoowoka!’ Vano mwaanyiherye ankeelo yooleelakaani: “Muhiwokiwe ni sawootha sa Satana!”

Va nthowa nenla, muhiwiriyane soolokoha soohuweliha sa Satana. (Masiposipo 26:24, 25) Mmuwiriyane Yehova nave mmuroromele mwa soothene munapakaanyu. (Masiposipo 3:5-7) Owo onnoosivelaani nave owo onnoolopolaani: “Mwanaka, okhale ni miruku, kinamwèliwa murima.” (Masiposipo 27:11) Mweerano hiiha, munahaala ovootha ekhoco ya mmuupuweloni mwanyu!