MU MUCECHE mukhaani o Kuxarat, Intiya, tiithi a Yohani opatisiwe ntoko mmoha a Anamoona a Yehova omakuchuwelo wa eyaakha ya 1950. Nyenya Yohani, asinnawe athanu ni arokorawe vamoha ni amamaaya yaari Akatolika nave yaari anakerexa chiryene. Wanthowa na yeela, awo yaanaakaaha nroromelo na tiithi aya.

Nihiku nimoha, apaapawe Yohani yaahimveka wi aveleele emvelope wa munna a mmulokoni. Nyenya wooxixelo yoole, Yohani aahiphoreiha ekatha awe vaavaa aahuleiye nlantha ntokotoko. Naamwi hiiha, owo aanachuna owiiwelela apaapawe, mwawiihiiha aahimaka ekatha awe ni etarapo nave aahipwaha ayaaka oveleela emvelope.

Vaavaa Yohani aaphin’yeiye aamvaherenrye emvelope mwaara a munna. Owo aari Namoona a Yehova. Owo aahoona wi ekatha ya Yohani yaahiphoreya nave aahiivaha wi amukhaviherye. Owo aahikusa murupa awe wa murece, arapiha nikhwaca nave amakavo ni alikatura. Voocharela murokora ole aahimpakela Yohani chaaya. Mu elukuluku yoothene yaamalinhaaya evaanelaka, murokora aaloca ni Yohani mweepewe vooloca sa Piipiliya.

Wanthowa na epewe awe, moonelo wa Yohani vooloca sa Anamoona waahipacerya otorokeya. Mwawiihiiha owo aahimpakela murokora ole makoho meeli vooloca sa soororomela sa Anamoona a Yehova seiho saari soohiyana ni sa Ekerexa Katolika. Owo aahimukoha waakhanle wi Yesu ti Muluku nave waakhanle wi Akristu annaphwanela omvekela Mariya. Murokora ole aahisuwela oloca Ekuxarati nave aahiwerya omwaakhula mu elocelo awe. Owo aahimooniherya maakhulo orweela Mpiipiliyani nave aahimvaha etrataatu “Estas Boas Novas do Reino.”

Ohoolo waya Yohani amanle waalakhanya etrataatu, aahisuwela wi yeeyo aalakhanyeiye yaari yeeparipari. Owo aaya wa phaatiri awe nave aahimpakela makoho meeli yaale aampakenleiye murokora ole. Phaatiri ole aahitepa onyeenyeya nave aamvonya Piipiliya owanoni wa Yohani, akhuwelaka: “Woothatuwa vano okhala Satana! Koonihe ti vaavi Piipiliya onaloceiye wi Yesu tahi Muluku. Okoonihe ti vaavi onaloceiyevo wi honaphwanela omulapela Mariya. Koonihe hiihaano vaava!” Yohani aahuukhuwa ni meerelo a phaatiri. Owo aahimuleela phaatiri wi haahaala okookela ekerexa Katolika. Nave hantonko onyikalawo.

Yohani aahipacerya ohuserya ni Anamoona a Yehova, eemererya eparipari, nave apacerya omurumeela Yehova. Mweelukuluku aya, achu ancipale a veemusini yaaheerano emohamoha. Ivinre iyaakha 60, niharipa nri va ekatha ya Yohani nlelo ninnamuupuserya meerelo a wooniherya epewe yaawo amuceenyenrye omaliha elukuluku awe yincipale amurumeelaka Yehova.​—2 Korinto 6:4, 6.