1. Tuuvi ori mukhalelo wa okhwela ori wasisapo, nave muni mutharihe hai? (Moone eruku yoopacerya.)

YEHOVA ehime ya okhwela. (1 Yohani 4:7) Mukhalelo wa okhwela ori wasisapo onathipeleya mu malakiheryo eekhaikhai. Mpiipiliyani, mukhalelo yoowo wa okhwela onatharihiwa mu masu a Ekiriki a·gaʹpe. Okhwela yoowo onanwerya ophitaanyerya waataana ni miyoonelo vooloca sa muchu mukina, nyenya owo onnapwaha miyoonelo vyakala. Owo onooniheryiwa moorweela wa saweera seeparipari ntakhara akina. Okhwela yoowo onnanceenyerya oweerela akina ichu saphaama. Okhwela owo onnanruuhela ohakalala ni mphurelo mookumini.

2, 3. Yehova oonihenryeiye hai waakhwela achu?

² Yehova aahooniherya waakhwela achu ovinyerya khalai ahaakumve ompatuxa Atamu ni Eva. Owo aahipaka elapo yavathi wi ewerye okhalano ichu soothene naahaalaahu ochuna wi nikhaleno okumi. Opwaha yeeyo, aahipaka eyo ntoko echoko mwemmo neeraahu chiryene nipuhekemo okumi. Tahi wi Yehova iipakenle mukhateiye. Owo onipakenle hiyaano. Vaavaa aareherenryeiye echoko ahu, owo aahaapaka achu nave aahaavaha ewehereryo ya  okhala wookhala mu parataiso veelaponi yavathi.

³ Ohoolo waya, Yehova aahooniherya okhwela wawe otokotoko ntakhara achu mmukhalelo woophwanelela. Naamwi Atamu ni Eva yaammwarenle, Yehova aahisuwela wi anamwane akina a Atamu yaahaala omusivelaka yoowo ophiyerya orehererya mukucho wa woopola wa mwanawe wi awoopole. (Maphatxuwelo 3:15; 1 Yohani 4:10) Ovinyerya elukuluku Yehova aaroromelinheiye woopola, yaari ntoko wi mukucho owo waahipakiwa. Voocharela, iyaakha 4.000 ohoolo waya, Yehova aahimveleela mwanawe mmoharu ntakhara achu. (Yohani 3:16) Ninnathamalela vancipale okhwela wa Yehova!

4. Nnasuwela hai wi achu oohiphaameya ananwerya wooniherya okhwela weeparipari?

⁴ Apwanne nnawerya wooniherya okhwela weeparipari naamwi nri oohiphaameya? Aai, nnawerya. Yehova onipanke moophwanaphwana ni yoowo, eyo ti wi, ni mavyakelo a omutakiherya. Nyenya tahi wookhweya wa hiyaano wooniherya okhwela weeparipari, nyenya ti wooweryeya. Apele aahimooniherya Muluku okhwela weeparipari vaavaa aavanheiye echu yasisapo aareiyeno. (Maphatxuwelo 4:3, 4) Nowa aahooniherya okhwela weeparipari vaavaa aatitelenleiye olaleerya muchaka wa Muluku mu iyaakha sincipale naamwi achu yahaachuna owiriyana. (2 Pedro 2:5) Nave Aparahamu aahooniherya wi omukhwela wawe Muluku waari woolipa opwaha echu eri yoothene orweela wa weemererya omveleela mwanawe ookhweleya Isaki ntoko mukucho. (Tiyako 2:21) Moolikana ni alopwana yaala oororomeleya, hiyaanotho ninnachuna wooniherya okhwela naamwi weerano eyo okhalaka woovila.

5. Mmikhalelo taani nneeraahu nooniherye okhwela weeparipari?

⁵ Piipiliya onnanleela wi nnooniherya okhwela weeparipari ohiya pahi “ni masu a nlumiru, nto ni miteko ni eparipari.” (1 Yohani 3:18) Apwanne ela enataphulela wi hannaphwanela wooniherya okhwela mmasu? Hooye. (1 Tesalónika 4:18) Ela enataphulela wi ilukuluku soothene tahi wawaakhwanela olocaru wi “kinnoosivela.” Nnachuna wooniherya mu saweera. Ntoko yootakiherya, wakhala wi anna naari arokora haanono yoolya yawaakhwanela naari yoowara, awo annachuna sincipale opwaha olocaru masu oohakararya. (Tiyako 2:15, 16) Mmukhalelo woolikana, nthowa na omukhwela wahu Yehova ni mwaacamani ahu, hannaphwanela ovekelaka pahi wi achu ancipale elaleeryeke ni hiyaano, nyenya nnaphwanelatho olapa moowetha mmuteko woolaleerya.​—Mateu 9:38.

6, 7. (1) Okhwela “wohotha” tiheeni? (2) Sootakiherya taani sa okhwela ori watheru?

⁶ Murummwa Yohani aahiloca wi nnaphwanela wooniherya okhwela “ni miteko ni eparipari.” Mwawiihiiha okhwela wahu onaphwanela okhala “wohiwoka,” naari “wohotha.” (Aroma 12:9; 2 Korinto 6:6) Mu ilukuluku ikina akhweya muchu onamuchuna wooniherya okhwela. Nyenya apwanne okhwela wawe ti weeparipari ni wawiiseela? Tiheeni enamuceenyerya? Henachuneya echu ntoko okhwela orino owoka. Okhwela watheru hiwaano mphurelo.

 ⁷ Hankooni nthokororye sootakiherya ikina sa okhwela watheru. Vaavaa Satana aalonceiye ni Eva mu emaca ya Eteni, yeeyo aalonceiye yooneya ntoko wi owo aamuleela Eva ichu saahaala omuruuhela mphurelo. Nyenya saweera sawe saahooniherya wi tahi yeeyo. (Maphatxuwelo 3:4, 5) Vaavaa Tavite aareiye mwene aahikhalano nthamwene awe iichaniwa Aitofeli. Nyenya Aitofeli aanaavya omphariha Tavite achunaka ophura mukhateiye. Saweera sawe saahooniherya wi hari nthamwene eeparipari. (2 Samuwele 15:31) Olelo, alipa oomwaryeya ni yaale anatannya ohiiwanana mmulokoni annapharihela “masu òrèra ni awototha.” (Aroma 16:17, 18) Awo akhweya anneererya waakhapelela akina, nyenya mweeparipari, tanrima.

8. Nikoho taani nnaphwanelaahu wiipakela mukhatiihu?

⁸ Okhwela watheru ti wa wuuliha muru nthowa nawi onaphariheliwa mmukhalelo wa waawoka achu. Akhweya nnanwerya waawoka achu, nyenya hinni niwerye onwoka Yehova. Yesu aahiloca wi yaale anapaka meerelo ntoko a alipa awootha yaahala olakiwa ni “othoriha otokweene.” (Mateu 24:51, Tradução do Novo Mundo) Ntoko amulapeli a Yehova, hinnachuna okhala awootha. Mwawiihiiha nnaphwanela wiikoha, ‘apwanne okhwela waka ti weeparipari, naari kamuchu anrima ni oohiroromeleya?’ Hankooni nthokororye mikhalelo mithanu namisese seiho nnahaalaahu wooniherya okhwela “wohotha.’’

9. Okhwela weeparipari onanceenyerya weera eheeni?

⁹ Mukhale oohakalala mu orumeela naamwi ahikhanlevo onoona yeeyo munapakaanyu. Nnaphwanela okhala ooreheryeya opaka ichu mookhwela ni mooreera murima ntakhara akina, naamwi ahirivo muchu onasuwela sa yeeyo. (Mwaalakhanye Mateu 6:1-4.) Hananiya ni Safira yaakhalano moonelo woohiyana. Vaavaa yaapankaaya yooveleela awo yaachuna wi akina esuwele vooloca sa yeeyo. Awo yaahootha vooloca sa yeeyo yeeraaya evahe, nave yaahithorihiwa ntakhara wootha waya. (Saweriwa T’arummwa 5:1-10) Nyenya wakhala wi chiryene ninnaakhwela annihu, nnahaala okhala oohakalala opaka ichu mooreera murima ntakhara yaawo nihiweheryaka wi akina esuwele yeeyo nipankaahu. Nnanwerya ohuserya echu orweela wa anna yaawo anakhaviherya Nikhuuru Noolamulela orehererya yoolya yoomunepani. Awo haniivuwiha nave hanaaleela achu miteko taani alampaaya.

10. Nni niwerye hai waacicimiha akina?

¹⁰ Mwaacicimihe akina. (Mwaalakhanye Aroma 12:10.) Yesu aahaacicimiha arummwa awe vaavaa aarapinheiye manaani aya. (Yohani 13:3-5, 12-15) Nnaphwanela olapa moowetha wi nikhale awiiyeviha ntoko Yesu ni waarumeela akina. Arummwa hiyiiwexenxe mwawaakhwanela yeeyo Yesu aapankeiye ophiyerya elukuluku yaakhenlaaya munepa waweela. (Yohani 13:7) Ninnooniherya ncicimiho wa akina moorweela wa ohuupuwela wi naachu oophwanelela waapwaha yaawo nthowa nawi nootepa ohuserya,  naachu amuhakhu, naari okhalano mirici savameekhaaya. (Aroma 12:3) Hinnaakhalela nrima akina vaavaa anathamaleliwaaya, nyenya ninnahakalala ni yaawo naamwi noonaka wi naanaphwanela othamaleliwatho.

11. Ntakhara heeni othamalela wahu onaphwanela okhala weeparipari?

¹¹ Muthamaleleke mweeparipari. Mwaavye ikari sa waathamalela akina. Oothene hiyo ninnasuwela wi othamalela ti ‘waphama [wi] nunnuwihane’ mukina ni mukhwaawe. (Éfeso 4:29) Nyenya nnachuna ororomela wi yeeyo nnalocaahu ti yeeparipari ohiya waathamalela moophuca. Hannaphwanela oloca echu nihisuwenlaahu naari osepa murici ahu wa ovaha ekano yookhweleya. (Masiposipo 29:5) Nnahaala okhala achu awootha wakhala wi ninnaathamalela akina evinyaka nnawaapa emanle okhumavo. Okhwela wa murummwa Paulo waari weeparipari. Vaavaa owo aarepenleiye Akristu o Korinto, aahaathamalela wa yeeyo yaapakaaya phaama. (1 Korinto 11:2) Nyenya vaavaa yaachunaaya ekano, owo aahaatharihela nthowa nene mweepewe.​—1 Korinto 11:20-22.

12. Nni nooniherye hai okhwela weeparipari vaavaa nnawaakhelaahu aleco?

¹² Muwakheleke aleco. Yehova onnanilamulela okhala amahala wa annihu ni arokora. (Mwaalakhanye 1 Yohani 3:17.) Nyenya nnaphwanela okhalano nthowa noophwanelela na owaakhela aleco. Nnaphwanela wiikoha: ‘Apwanne kinaawopa pahiru asinthamwene aka naari yaale pahiru kinawoonaaka okhala ocicimiheya mmulokoni? Apwanne kinaawopa achu yaale kinuupuwelaaka wi anahaala okeerela emohamoha? Naari wi kiri amahala wa anna ni arokora yaawo kihaasuwenlaaka phaama naari yaale ahinahaala okeerela echu eri yoothene?’ (Luka 14:12-14) Nkaanyiheryani yaweereya ela: Hanka wakhala wi munna onnachuna nikhaviheryo nthowa na yoolakelela yooheseya opankeiye? Naari hanka wakhala wi muchu nanwopenlaahu vaate vahu hantonko onithamalela? Yehova onnanleela: “Mwakhelaneke mmavate mwanyu muhirino wikakhelawo.” (1 Pedro 4:9) Nnahaala okhala oohakalala vaavaa nnavahaahu ni mathowa oophwanelela.​—Saweriwa T’arummwa 20:35.

13. (1) Elukuluku taani nnachunaahuxa opisa murima? (2) Tiheeni nnaphwanelaahu weera wi naakhaviherye ooceecheya?

¹³ Mwaakhaviherye yaale ari oocecheya. Nlamulo na Piipiliya na ‘wakhapelela òtxetxheya nave . . . òvilela n’atxhu othene’ nnanwerya weeha waakhanle wi okhwela wahu ti weeparipari. (1 Tesalónika 5:14) Anna yaawo yaari ooceecheya ohoolo waya yaahikhala oolipa munroromeloni. Nyenya akina annatitelela ochuna opisa wahu murima ni nikhaviheryo noosivela. Nni naakhaviherye hai? Nnanwerya ompharihela Piipiliya wi naalipihe, waawopa wi nalaleerye vamoha, naari  pahiru waawiriyana phaama. Navetho, hannaphwanela wuupuwela pahiru wi anna ni arokorahu ari ‘olipa’ naari “òtxetxheya.” Ohiya yeeyo, nnaphwanela osuwela wi oothene ahu ninnalipa nave ninnaceecheya. Ophiyerya wi murummwa Paulo aaheemererya wi aari ooceecheya. (2 Korinto 12:9, 10) Oothene hiyo ninnachuna nikhaviheryo ni olipihana.

14. Tiheeni nnaphwanelaahu olakelela opaka wi nikhapelele murecele ni annihu?

¹⁴ Mpake murecele. Murecele ni annihu ti wookhweleya vancipale. Naamwi nsuwelaka wi haniiwexexiwe naari hanikhalihiwe phaama, nnaphwanela weera soothene ophiyerya nnaweryelaahuvo wi nipake murecele. (Mwaalakhanye Aroma 12:17, 18.) Wakhala wi noophoreiha moonelo wa mukina, pahiru nnaphwanela oveka nikhurumuwelo. Nyenya nnaphwanela okhala eeparipari. Ntoko yootakiherya, ohiya pahiru oloca wi “kinnathanana mwa yeela, nkaasuwela wi mwaahaala woona hiiha” yaahaala okhala yaphaama weemererya yoohesa ahu moorweela wa oloca “mukilevelele ophoreiha murima anyu mwa yeela kiloncaaka.” Murecele ti wookhweleya xaxaxa mu othela. Yaahaala okhala yoonanara wa mulopwana ni mwaariye opaka ichu ntoko wi annasivelana variyari va achu eniiha wiiphiini ehilocihanaka, elocelanaka masu oopwaalu, naari ewanaka.

15. Nni nooniherye hai wi olevelela wahu ti weeparipari?

¹⁵ Mulevelele moomalela. Wakhala wi muchu ooninyeenyeiha, ninnamulevelela ni ocuwala yeeyo neereliwaahu. Nnaphwanela weerano yeela naamwi owo ahisuwelaka wi ooninyeenyeiha. Ninnalevelela moomalela moorweela wa “òthokorerya okhapelela wiwanana onarwa wa munepa nulutxelelana wa muretxele.” (Éfeso 4:2, 3) Wi nlevelele mweeparipari, nnaphwanela omaala wuupuwela vooloca sa yeeyo muchu owo opankeiye. Okhwela “honupuwela mathowa.” (1 Korinto 13:4, 5) Mweeparipari, waakhanle wi ninnuupuwelela mathowa, naahaala onanariha  onthamwene ahu ni anna ni arokora navetho ni Yehova. (Mateu 6:14, 15) Ninnooniherya wi olevelela wahu ti weeparipari vaavaa nnamvekelelaahu muchu yoowo ooninyeenyeihale.​—Luka 6:27, 28.

16. Nnaphwanela woonaka hai mirici savameekhaaya mmuteko wa Yehova?

¹⁶ Mweemererye oyeleela. Vaavaa nnaakhelaahu murici wavameekhaaya mmuteko wa Yehova, nnanwerya wooniherya wi okhwela wahu ti weeparipari moorweela wa ‘ohasya ophama wahuru nto wa akhwihu.’ (1 Korinto 10:24) Ntoko yootakiherya, mmithukumano sahu sa ekulucu ni sa muceche, athoonyeryi annaphiya akina ehaakumve nave yaahaala weererya okhapelela mapuro aphaama wa yaawo mukhataaya ni imusi saya. Ohiya yeeyo, ancipale a yaawo anathanla mapuro oohicicimiheyaxa weiwo analapaayawo. Mu weerano yeeyo, awo annooniherya okhwela woohikhala ni nrima. Muni mucharihe hai yootakiherya aya yaphaama?

17. Wakhala wi Mukristu oopaka yoocheka etokotoko, okhwela weeparipari onahaalaaya omuceenyerya weera eheeni?

¹⁷ Mulokohe nave mucharuwe opaka soocheka. Akristu akina yaawo yaapanke soocheka itokotoko yaaheererya okhuwa. Akhweya yuuliwa muru olokoha naari wi hiyaachuna waathananiha akina. (Masiposipo 28:13) Nyenya okhuwa yoocheka tahi okhwela nthowa nawi eyo enanwerya ompahula mulipa oocheka ni akina. Mwawiihai? Yehova onamuhiya oreeliha muloko ni munepa awe waweela nave muloko hokhalano murecele. (Éfeso 4:30) Mwawiihiiha wakhala wi Mukristu oopaka yoocheka etokotoko, okhwela weeparipari onahaala omuceenyerya waaleela atokweene nave onamwaakhela nikhaviheryo owo onachuneiye.​—Tiyako 5:14, 15.

18. Ophiyerya mweeryo taani okhwela weeparipari oryaaya wookhweleya?

¹⁸ Okhwela mukhalelo mutokotoko mwa soothene. (1 Korinto 13:13) Owo onnaakhaviherya achu waasuwela taani ari oomuchara a Yesu, ni owoona taani chiryene anamutakiherya Yehova, yoowo ori ehime ya okhwela. (Éfeso 5:1, 2) Paulo aahiloca wi waakhanle wi haarino okhwela owo hii akhale echweenevo. (1 Korinto 13:2) Muchu ti muchu a hiyo onaphwanela wooniherya okhwela weeparipari ohiya pahiru “ni masu a nlumiru,” nyenyatho “ni miteko ni eparipari.”