1, 2. Ntakhara heeni okumi wa achu a Muluku onamukhala woovila olelo? (Moone eruku yoopacerya.)

MATOTORE ni alipa murece ancipale annalapa wi yaakhaviherye achu yaawo arino ireca sooramvwa. Awo annaakhapelela arecaaya moopisa murima nthowa nawi annachuna waakhaviherya. Nyenya awo anaphwanela wiikasopa wi ehivoloweliwe ni ireca seiyo aneereryaaya oloola. Ntoko alapeli a Yehova, nri mmukhalelo woolikana. Ancipale a hiyo nnakhala nave nnalapa ni achu yaawo avoloweliwe ni mikhalelo ni muupuwelo onahiyana ni mikhalelo sa Muluku. Ela enamukhala yoovila wa hiyo.

² Mmahiku yaala ookuchula a elapo yeela, achu yaawo ahinamusivela Muluku annaakaaha malakiheryo awe vooloca sa yawookololowa ni yoonanara. Murummwa Paulo aahithariha wi mikhalelo seiya soonanara saahaala okhala sawunlaana vaavaa yeeraaya yaacameleke makuchuwelo a elapo yeela. (Mwaalakhanye 2 Timóteo 3:1-5, 13, Nlakano Nahihano.) Naamwi mikhalelo seiya inuukhulaka, nlelo nnanwerya ovoloweliwa moorweela wa mmukhalelo achu anirukurenrye anuupuwelaaya, analocaaya, ni aneeraaya. (Masiposipo  13:20) Mmwaha yoola, nnahaala woona  ohiyana orivovo variyari va mikhalelo seiha ni mikhalelo sa achu a Muluku. Nnahaala woona tho tiheeni nnaphwanelaahu opaka wi niikhapelele mukhatiihu wi nihivoloweliwe ni mikhalelo soonanara vaavaa nnaakhaviheryaahu achu omusuwela Yehova.

3. Achu a mukhalelo taani atharihiwe mu 2 Timóteo 3:2-5?

³ Paulo aahirepa wi mmahiku ookuchula sinahaala okhalamo “ilukuluku sohósha.” Voocharela aahiloca elista ya mikhalelo khumi nathanu nasese soonanara seiho saahaala okhala sawunlaana mmahiku ahu. Mikhalelo seiha sinalikana ni seiho Paulo aalonceiye mu Aroma 1:29-31, nyenya elista mu ekaarata awe aamurumihenleiye Timoteo ennapharihela masu yaawo nihinaphwanyaahu naari vakhaani mu Soorepa sa Ekiriki Seekristu. Paulo aapacenrye ni masu ala “atchu enarwa-ekhala,” mwawiihiiha alopwana ni athiyana ananwerya okhalano mikhalelo soonanara. Nyenya tahi wi achu oothene aakhalano mikhalelo soonanara seiho Paulo aalonceiye. Akristu aakhalano mikhalelo soohiyana.​—Mwaalakhanye Malakiya 3:18.

4. Nyuwaano munuupuwela wi wiirumiha onataphulela eheeni?

⁴ Paulo amanle oloca wi achu yaahaala okhala awiisivela mukhataaya navetho oosivela icarama, owo aahaaceererya wi achu yaahaala okhala awithamala, awirumiha, ni ópwalu. Achu yaawo arino mikhalelo seiya anuupuwela wi toophwanelela waapwaha akina nthowa na mukhalelo anawaraaya, ichu anaweryaaya opaka, aryaayano, naari mukhalelo oryaaya okumi aya. Achu ntoko yaala annachuna sincipale opwaha echu eeri yoothene wi etikhiniweke. Namahuserya mmoha aahirepa vooloca sa achu ntoko yaawo: “Mmurimani mwawe enakhala ntoko wi ookhalamo eyuupu oniikokhoreleiyevo mukhateiye.” Akina alonce wi wiirumiha ti woonanara ophiyerya wi naari yaale aniirumiha hanasiveliwa yaawoonaka akina yiirumihaka.

5. Naamwi yaari alapeli oororomeleya a Yehova yaakhanle hai awiirumiha?

⁵ Yehova onniica wiirumiha yoowo Piipiliya onaloceiye ntoko “oweha wawisona.” (Masiposipo  6:16, 17) Mweeparipari wiirumiha onnamweeriha muchu okhala ocai ni Muluku. (Salumu 10:4) Wiirumiha ori mukhalelo wa Musaserya. (1 Timóteo 3:6) Yoothananihaxa ti yawi ophiyerya alapeli akina a Yehova yaavoloweliwa ni wiirumiha wuuwu. Ntoko yootakiherya, Mwene Usiya o Yuteya aari oororomeleya mu iyaakha sincipale. Nyenya Piipiliya oni: “Wa nthowa na owerya wawe àhikusererya ni àhipahula. Ahiya wàtxitximiha Apwiya, Muluku awe.” Usiya aaya mu empa ya Muluku apaha manlela a munyawa, yaawo ahaaphwaneleiye opaha. Ohoolo waya, Mwene oororomeleya Esekiya aahikhala tho awiirumiha, naamwi eenreno mu elukuluku vakhaani.​—2 Matharihelo 26:16; 32:25, 26.

6. Tiheeni yaahaala omweeriha Tavite okhala awiirumiha? Nyenya ntakhara heeni owo aahititelela okhala awiiyeviha?

⁶ Achu akina annakhala awiirumiha nthowa nawi aatepa ophwaneliwa, toovuwa, tawiipa phaama macipo, takuru, naari tawooviwa ni akina. Tavite aahikhalano soothene seiha, nyenya owo aahititelela okhala awiiyeviha mu okumi awe woothene. Ntoko yootakiherya, Tavite amanle omwiipha Koliyati, Mwene Sawuli aahiloca wi Tavite aahaala omuthela mwanawe. Nyenya Tavite aahiloca wi: “Kàni miyano? Makholo a atithi aka tani, wi kiwerye okhala mukamwene a mwene?” (1 Samuwele 18:18) Tiheeni yaamukhavihenrye Tavite otitelela okhala awiiyeviha? Owo aahisuwela wi  mikhalelo soothene, mavyakelo, ni ekari owo aareiyeno, nthowa nawi Muluku tawiiyeviha nave wi aanamuthokororya yoowo. (Salumu 113:5-8) Tavite aahisuwela wi ichu soothene aareiyeno sarweela wa Yehova.​—Mulikanyihe ni 1 Korinto 4:7.

7. Tiheeni eni enikhaviherye wooniherya wi naachu awiiyeviha?

⁷ Ntoko Tavite, achu a Yehova olelo anneererya okhala awiiyeviha. Ennatannya murima ahu osuwela wi Yehova yoowo ori Oopwahaxa, tawiichacala naari tawiiyevihala. (Salumu 18:35, NN) Ninnachuna opharihela masu ala: “Warani murima wa ikharari, waphama, wawiyeviha, womala ni wovilela.” (Kolosi 3:12) Noosuwela tho wi osivela “honìthamala, nari honìkusererya.” (1 Korinto 13:4) Vaavaa akina ananoonaaya wi naachu awiiyeviha, awotho akhweya anamuchuna omusuwela Yehova. Hiiha ntoko mulopwana ooheemererya oneereiye iiveleele wa Yehova orweela wa meecelo aphaama a mwaariye ori Mukristu, achu ananwerya wiiveleela wa Muluku moorweela wa wiiyeviha wa alapeli awe.​—1 Pedro 3:1.

8. (1) Olelo achu akina anoona hai ohiwiiwelela asitiithi? (2) Tiheeni Piipiliya onaaleeleiye anamwane opaka?

⁸ Paulo aahiloca mukhalelo akina yeeraaya yaakhaliheke akina mmahiku ookuchula. Owo aahirepa wi anamwane yaahaala ohiwiwelela asitithi aya. Olelo, maliivuru mancipale, ixilema, ni miyaha sa televisau sinneeriha okhala ntoko yoophwanelela ni yaweemereryeya ohiwiiwelela asitiithi aya. Nyenya eparipari ti yawi ohiiwelela onnaceecheiha emusi, yeeyo eri echu yookhweleyaxa mweelaponi. Ovinyerya khalai achu aasuwela wi ela ti yeeparipari. Ntoko yootakiherya, Khalai o Kresiya, muchu yoowo aamana asitiithi awe aanayeleela ophwanelela wawe okhala vamucecheni. Vathi va nlamulo no Roma, muchu yoowo aamana asitiithi awe aaphwanela olakiwa mwawiiwanana ni olaka eereliweiye mulipa awiipha. Soorepa soopiili sa Ehepiri ni sa Ekiriki sinnaalamulela anamwane wi yaacicimiheke asitiithi aya.​—Mukwaha 20:12; Éfeso 6:1-3.

9. Tiheeni eni yaakhaviherye anamwane owiiwelela asitiithi aya?

⁹ Tiheeni eni yaakhaviherye anamwane owiiwelela asitiithi aya naamwi erukureryiwe ni yaale ahiniiwelela? Vaavaa anamwane anuupuwelelaaya vooloca sa ichu soothene saphaama asitiithi aya apankaaya ntakhara yaawo, awo anaphwanela othamalela vancipale ni ochuna owiiwelela asitiithi aya. Amiravo tho anaphwanela osuwela wi Muluku yoowo ori Tiithi aachu oothene, onaweherya wi awo ewiiweleleke asitiithi aya. Vaavaa amiravo naari asimwali analocaaya saphaama sa asitiithi aya, annaakhaviherya asinthamwene aya waacicimiha vancipale asitiithi aya tho. Mweeparipari, wakhala wi asitiithi hakhanleno osivela wophachuwano ntakhara anaaya, onahaala okhala woovila anaaya owiiwelela. Nyenya vaavaa mmiravo naari mwali onooneiye wi asitiithi awe annamusivela chiryene, eyo enahaala omukhaviherya owiiwelelaka naamwi okhalaka woovila. Munna yoowo ori mmiravo oniichaniwa Austin ooloca: “Naamwi mu elukuluku ekina keererya ohichariha  malamulo, asitiithi aka yaavahererya malakiheryo oophwanelela, nave ethariha mathowa a malamulo yaawo, nave ntitelela ovaanela mootaphuwa. Ela yaahikikhaviherya okhala awiiwelela. Kaanoona wi awo yaanakikhapelela, nave eyo yaanakeeriha ochuna waahakalaliha.”

10, 11. (1) Mikhalelo taani soonanara sinooniherya wi achu haanono osivelana mukina ni mukhwaawe? (2) Ophiyerya mweeryo taani Akristu eeparipari anaasivelaaya achu?

¹⁰ Paulo tho aahiloca mikhalelo mikina seiho saahaala wooniherya wi achu hanasivelana mukina ni mukhwaawe. Amanle oloca sa “óhiwiwelela yawo yáyanre,” owo aahaaromola tho óhithamala. Ela eparipari nthowa nawi achu oohithamala hanacicimiha ichu saphaama seiho akina aweerenlaaya. Paulo tho aaloca wi achu yaahaala okhala óhéla murima. Awo yaahaala okhala óhátányiheya, yeeyo enataphulela wi awo hiyaahaala ochuna opaka murecele ni akina. Awo yaahala okhala ópwalu ni amakhuche, elocaka ichu soopahula ophiyerya sookooka owaruni ntakhara achu navetho vooloca sa Muluku. Navetho yaahaala okhala ósasa, yaawo analoca sawootha wi enanarihe mukhalelo waphaama wa akina. *​—Moone masu avathi.

¹¹ Alapeli a Yehova ari oohiyana vancipale ni achu a mulaponi nthowa nawi awo annooniherya osivela weeparipari ntakhara akina. Chiryene ela enneereya ilukuluku soothene. Mweeparipari, Yesu aahiloca wi pahiru nlamulo ntokotoko mu Nlamulo na Mose nenlo naari noochuneyaxa opwaha nlamulo na omukhwela muchu mukina, naari nlamulo na omukhwela Muluku. (Mateu 22:38, 39) Yesu tho aahiloca wi Akristu eeparipari yaahaala osuweliwa moorweela wa okhwela naari osivela awo yaahaalaaya wooniheryana mukina ni mukhwaawe. (Mwaalakhanye Yohani 13:34, 35.) Ophiyeryatho Akristu eeparipari yaahaala waasivelaka ophiyerya amwiicani aya.​—Mateu 5:43, 44.

12. Yesu oonihenrye hai osivela ntakhara akina?

¹² Yesu aahooniherya wi mweeparipari owo aanasivela achu. Owo eenreno yeela moorweela mwa weeca mikwaha ayaaka mmiceche soohiyanahiyana aaleelaka achu vooloca sa michaka saphaama vooloca sa Omwene wa Muluku. Owo aahaapenusa oohoona, oorakala, amareca, ni oohiiwa. Navetho aahaakookiherya okumi alipa ookhwa. (Luka 7:22) Yesu aahiphiyerya oveleela okumi awe ntakhara achu, naamwi ancipale yaamwiica. Yesu aahitakiherya moophaameya osivela wa Atiithi awe. Anamoona a Yehova oothene orukurerya elapo, annamutakiherya Yesu nave annooniherya osivela ntakhara akina.

13. Osivela nnawooniheryaahu akina onaakhaviherya hai ochuna omusuwela Yehova?

¹³ Vaavaa nnawooniheryaahu achu wi ninnaasivela, eyo enanweeriha ochuna omusuwela Tiithi ahu awirimu. Ntoko yootakiherya, mulopwana mmoha o Tailantiya aaya o muthukumano wa muceche nave aahitikhiniheya vaavaa ooneiye mukhalelo anna ni arokora yooniheryaaya osivelana mukina ni mukhwaawe. Amanle okookela owannyawe, owo aahiveka omuhuserya Piipiliya ni Anamoona a Yehova ikwaha piili esumana ti esumana. Voocharela owo aahaalaleerya amusi awe oothene. Pahiru ivinre miyeeri mithanu nammoha ohoolo waya, mulopwana yoola aahiperekha waalakhanyiwa wa Piipiliya mu Empa ya Omwene mu ekwaha awe yoopacerya. Apwanne ninnooniherya osivela ntakhara akina? Mwiikohe mukhatiinyu: ‘Apwanne kinnapaka soothene ophiyerya kinaweryelaaka wi  kaakhaviherye achu mu emusi aka, mmulokoni mwaka ni mmuteko aka woolaleerya? Mano kinneererya owoona akina ntoko Yehova onawooneleiye?’

14, 15. Mikhalelo taani soonanara ancipale anooniheryaaya? Akina atoronke hai omuchu aya?

¹⁴ Mmahiku yaala okuchula, achu annooniherya tho mikhalelo mikina soonanara seiyo nnaphwanelaahu osepa. Ntoko yootakiherya, ancipale henásivela yaphama. Awo anniica yeeyo eri yaphaama ophiyerya ovaanya yeeyo. Achu ntoko yaawo taachu óhiwerya wíhíha, oowali. Akina tóshimwa. Awo anapaka ichu ehuupuwelenle nave hanapwacha mukhalelo saweera saya ineeraaya saavolowele akina.

¹⁵ Ancipale yaawo yaakhala oowali ntoko inama sawoopiha aatoroka omuchu aya. Matorokelo matokweene yaala yaalociwe mu yooloherya ya Piipiliya. (Mwaalakhanye Isaiya 11:6, 7.) Ninnaalakhanya mwemmo vooloca sa inama sa mutakhwani, ntoko havara ni mwaco, seiyo sinakhala mmureceleni ni inama sa vaate, ntoko asaana a epucepuche ni asaana a emope. Ntakhara heeni siryaaya mmureceleni? Yooloherya ennatitelela: “Ntakhara elapo enamusareya osuwela w’Apwiya [Yehova].” (Isaiya 11:9) Asinama hanawerya ohuserya vooloca sa Yehova, mwawiihiiha mmukhalelo woosiphela, yooloherya enaloca matorokelo yaawo achu anapakaaya mu omuchu aya.

16. Piipiliya onaakhaviherya hai achu otoroka omuchu aya?

¹⁶ Anna ni arokora ahu ancipale khalai yaari oowali ntoko ahavara hiihaano achu a murecele. Munanwerya waalakhanya saweereya saya mmiyaha “A Bíblia Muda a Vida Das Pessoas,”  seiyo inaphwanyeya mu jw.org. Yaale amusuwenle nave anamulapela Yehova hari ntoko yaale óhikhalano woneya wa mathamalelo, nyenya ikuru saya tiyákhonchaya. Achu ntoko yaawo anakhala wi anamulapa Muluku, nyenya mikhalelo saya sinnooniherya wi tahi yeeyo. Nyenya, variyari va achu a Yehova aakhalavo yaawo yaari oowali nyenya hiihaano ‘anwara mutxhu musyani opatusiwe ntoko mwa Muluku n’wokololani ni morèrani murima onarwa wa eparipari.’ (Éfeso 4:23, 24) Vaavaa achu anahuseryaaya vooloca sa Muluku, awo annasuwela wi anaphwanela ochariha malamulo awe. Eyo ennaakhaviherya otoroka seiho yaaroromelaaya, yuupuwelaaya, ni yaapakaaya. Tahi yookhweya opaka matorokelo yaala, nyenya munepa wa Muluku onahaala waakhaviherya yaale anachuna omuhakalaliha.

17. Nni nsepe hai ovoloweliwa ni achu yaawo arino mikhalelo soonanara?

¹⁷ Enakhala yookhweya woona ohiyana orivovo variyari va yaawo anamulapela Muluku ni yaawo ahinamulapela. Nnaphwanela wiikosoopa wi nihivoloweliwe ni mikhalelo soonanara sa yaawo ahinamulapela Muluku. Nnachuna ochariha ohoolela wa Yehova wa wi wa yawotho withanle, achu yaawo analociwa mu 2 Timóteo 3:2-5. Mweeparipari, hinni niwerye omusepa moomalela muchu ti muchu yoowo orinono mikhalelo soonanara. Akhweya nnamulapa ni yaawo, ochaana ni yaawo osikola, naari okhala ni yaawo. Nyenya hannuupuwela naari opaka ichu ntoko awo aneeraaya. Tiheeni eni enikhaviherye? Nnanwerya olipiha onthamwene ahu ni Yehova moorweela wa omuhuserya Piipiliya ni waathanla ntoko asinthamwene awaacameleya yaawo anamusivela Yehova.

18. Seiho nnalocaahu ni nnapakaahu sinaakhaviherya hai akina omusuwela Yehova?

¹⁸ Ninnachunatho waakhaviherya akina wi emusuwele Yehova. Mwaavye ikari sa olaleerya, nave mumveke Yehova wi ookhaviheryeeni oloca ichu soophwanelela mu elukuluku yoophwanelela. Nnaphwanela waasuweliha akina wi na Anamoona a Yehova. Voocharela, meecelo ahu aphaama anahaala oruha ncicimiho wa Muluku, woohikhala wa hiyo mukhatiihu. Yehova onnanihusiha “ohiya ohemererya ni minkhela sa elapo yavathi, wi vathiva nikhale awisuwela, awokolola ni òmulapa Muluku.” (Tito 2:11-14) Wakhala wi ninnamutakiherya Yehova ni opaka yeeyo owo onachuneiye wi neereno, akina anahaala woona yeeyo. Akhweya akina anamuloca: “Nnatxhuna oya weiwo ni nyuwano, ntakhara nosuwela wi Muluku ori ni nyuwano.”​—Zakariya 8:23.