1, 2. Mu 2018, yaweereya taani enahaala onithukumanya vamoha mmukhalelo wootikhiniha, nave ntakhara heeni? (Moone eruku yoopacerya.)

MU 31 A Marsu a 2018, amilyawu a achu orukurerya elapo anahala oya va yaweereya yeeyo eneereya pahiru omoha eyaakha ti eyaakha. Nsuwa nimanle oneela, Anamoona a Yehova ni akina anahaala othukumana vamoha wi yuupuwelele mukucho yoowo Yesu opankeiye ntakhara hiyo. Eyaakha ti eyaakha, wuupuwelela okhwa wa Yesu onnawaataaniha achu mmukhalelo wootikhiniha, opwaha yaweereya eri yoothene ya veelaponi.

² Yehova ni Yesu annakhala ohakalala chiryene vaavaa anawoonaaya mamilyawu a achu eyaaka va yaweereya yavameekhaaya yeela ewora ti ewora, orukurerya elapo yoothene. Piipiliya onnaloca “muloko mutokwene wohalikhanyeya wa atxhu wa ilapo, mahimo, maloko ni ilotxelo sothene,” okhuwelaka: “Nivuluso ti na Muluku ahu okiranthe vehitxeni ni ti na Eputxeputxhe.” (Wupulula 7:9, 10) Ti yoohakalaliha woona wi eyaakha ti eyaakha va mukonelo, achu ancipale annamvuwiha Yehova ni Yesu ntakhara ichu itokotoko awo apankaaya!

3. Makoho taani mwaha ola onahaalaaya waakhula?

 ³ Mmwaha yoola, munahaala ophwanya maakhulo a makoho ala masese: (1) Kini kiirehererye hai ntakhara mukonelo wi kikumihevo mphurelo? (2) Mmikhalelo taani mukonelo onaakhaviheryaaya achu a Muluku okhala awaataana? (3) Tiheeni kinaphwanelaaka opaka wi kaaceererye waataana variyari va achu a Muluku? (4) Apwanne onarwa okhalavo mukonelo wookuchula? Waakhanle wi aai, onaya okhala liini?

4. Ntakhara heeni ti yookhweleya wa hiyaano ophwanyeya va Mukonelo?

⁴ Ntakhara heeni ti yookhweleya wa hiyo ophwanyeya va Mukonelo? Nthowa nimoha ti nawi ophwanyeya va mithukumano mukhalelo mmoha wa omulapela Yehova. Ninnaroromela wi Yehova ni Yesu annoona wiilipixerya wa muchu ti muchu onapakeiye wi aphwanyeye va muthukumano yoola wookhweleya wa eyaakha. Nnachuna wi Yehova ni Yesu yoone wi nnahaala ophwanyeya va Mukonelo yaahikhalavo eni enooceelihe okhala vaava. Vaavaa saweera sahu inooniheryaaya wi mithukumano sahu ti soochuneya wa hiyaano, ninnamvaha Yehova nthowa nikina na okhapelela nsina nahu mu “nliivuru nawuupuxerya” nawe. Nlivuru nenlatho nnichaniwa ‘nlivru na ekumi.’ Nliivuru nlo nookhalano masina a achu oothene yaale Yehova onachuneiye waavaha ekumi yoohimala.​—Malakiya 3:16, Tradução do Novo Mundo; Wupulula 20:15.

5. Mu isumana inahalela ohaakumve mukonelo, muni “mwivarerye mukhatinyu mwarino nivano wemererya” mmukhalelo taani?

⁵ Mu isumana inahalela ohaakumve mukonelo, nnaphwanela omaliha elukuluku yawaaca nivekelaka nave nuupuwelelaka vooloca sa ophiyerya mukhalelo taani onthamwene ahu ni Yehova oryaaya woolipa. (Mwaalakhanye 2 Korinto 13:5.) Murummwa Paulo aahaaleela Akristu: “Mwivarerye mukhatinyu mwarino nivano wemererya [nroromelo].” Nni neereno hai yeela? Nnaphwanela wiikoha mukhatiihu: ‘Apwanne kinnaroromela chiryene wi ala marehereryo yaawo pahiru Yehova othanlileiye wi epake yookhwela awe? Mano kinnapaka owetha waka wi kihusihe ni kilaleerye michaka saphaama? Apwanne saweera saka sinnooniherya wi kinnaroromela wi chiryene nnakhala mmahiku oomaliherya nave wi omala wa olamulelo wa Satana ori vakhiviru? Apwanne nroromelo naka mwa Yehova ni Yesu nri noolipa ntoko vaavale kaapacenryaaka omulapela Yehova?’ (Mateu 24:14; 2 Timóteo 3:1; Ahebri 3:14) Wuupuwelela vooloca sa maakhulo a makoho yaala enahaala onikhaviherya otitelela ‘ovarerya’ mukhalelo taani nryaahu.

6. (1) Tuuvi ori mukhalelo mmoharu wa hiyaano wi naakhele ekumi yoohimala? (2) Ti mwawiihai mutokweene mmoha oniirehereryeiye ntakhara mukonelo eyaakha ti eyaakha, nave muni mpake hai echu yoolikana?

⁶ Mukhalelo mmoha munaphwanelaanyu opaka wi mwiirehererye ntakhara Mukonelo ori waalakhanya ni wuupuwelela miyaha seiho inathariha ntakhara heeni yaweereya ela eryaaya yookhweleyaxa. (Mwaalakhanye Yohani 3:16; 17:3.) Pahiru, mukhalelo mmoha  wi hiyaano naakhele ekumi yoohimala onarweela mu omusuwela Yehova ni okhalano nroromelo mwa mwanawe, Yesu. Wi niirehererye ntakhara Mukonelo, nnaphwanela othanla soohuserya seiho inahaala onikhaviherya okhala vakhiviru va yaawo. Ela ti yeeyo munna mmoha yoowo ori mutokweene mu iyaakha sincipale onapakeiye. Mu iyaakha sincipale, owo onnathukumanya miru sa miyaha sa Mulipeleli seiyo sinaloca sa Mukonelo ni osivela yoowo Yehova ni Yesu anoonihenryaaya. Mu isumana vakhaani ohaakumve mukonelo, owo onnaalakhanya miyaha seiho wanaawiili ni wuupuwelela mwawiiseela vooloca sa ntakhara heeni yaweereya ela eryaaya yookhweleyaxa. Ilukuluku ikina owo onnaaceererya mwaha mmoha naari miili va seiho onathukumanyeiye. Owotho onnaalakhanya ni wuupuwelela mwawiiseela vooloca sa waalakhanyiwa wa Piipiliya ntakhara Mukonelo. Mutokweene yoola olonce wi mwa weerano soothene seiha, owo onnahuserya ichu ivyaani eyaakha ti eyaakha. Yookhweleyaxa, ti yawi yoohuserya awe ennamweeriha omusivela vancipale Yehova ni Yesu. Wakhala wi munnahuserya mmukhalelo yoola, nyuwotho munahaala omusivelaka Yehova ni Yesu moopwahaxa. Munahaalatho othamalela vancipale yeeyo awo apankaaya, nave munahaala okumihavo mphurelo wawaaca moorweela wa Mukonelo.

7. (1) Tiheeni Yesu aavekenleiye va ohiyu woopacerya wa Mukonelo wa Apwiya? (2) Tiheeni enooniherya wi Yehova ohaakhula nivekelo na Yesu?

⁷ Mu ohiyu woopacerya wa Mukonelo wa Apwiya, Yesu aahipaka nivekelo na vameekhaaya. Owo aahivekela vooloca sa waataana wookhweleya orivovo variyari va yene ni Atiithi awe. Yesu aahivekelatho wi amuhuserya awe ekhale awaataana mmukhalelo woolikana. (Mwaalakhanye Yohani 17:20, 21.) Yehova aahaakhula moomalela nivekelo na mwanawe ookhweleya. Opwaha muthukumano ori woothene, mwawooneya Mukonelo onnooniherya wi Anamoona a Yehova tawaataana. Va nihiku nenla, amilyawu a achu a ilapo soohiyana, maloko, ni mahimo annathukumana vamoha orukurerya elapo nave awo annooniherya wi Yehova oomurumiha mwanawe. Mu ilapo ikina, ti yoothanyeya achu oohiyana mwiili othukumana vamoha, naari wakhala wi aheerano yeela, akina anoona wi ti yoohiphwanelela. Nyenya Yehova ni Yesu hanoona mmukhalelo yoowo. Wa yaawo, waataana wahu va Mukonelo ti wooreeraxa.

8. Muchaka taani Yehova aamulenleiye Esekiyeli?

⁸ Ntoko achu a Yehova, hannatikhiniheya okhala awaataana mmukhalelo yoola. Yehova aahiloherya waataanna yoola m’muchaka awe orweela mwa Esekiyeli wi ela yaahaala weereya. Owo aahimuleela Esekiyeli okuxa mapawa meeli, nipawa nimoha “nnamuthònya Yuda” nave nimoha “nnamuthònya Yosefe” ni waaruuha yaawo vamoha wi ekhale mmoharu. (Mwaalakhanye Ezekiyeli 37:15-17.) “Makoho a Alipa Waalakhanya” yaalaleeryiwe mu Mulipeleli a Yulyu a 2016 yaahithariha: “Elukuluku Esekiyeli aareiye mulipa a miririmu, Yehova aaloherya wi achu awe yaahaala okookela mu Elapo ya Nlakano, nave wi yaahaala okookela okhala awiiwanana ntoko nloko nimoha. Yooloherya yeeyo yaalocatho wi alapeli a Muluku a mahiku ookuchula yaahala okhala awiiwanana ntoko muchu mmoha.”

9. Eyaakha ti eyaakha va Mukonelo, nnoona hai waataana waalociwe mu yooloherya ya Esekiyeli?

⁹ Opacerya mu 1919, vakhaani vakhaani Yehova aahaarehererya oothanliwa wanawiili ni waathukumanya. Awo yaari ntoko  nipawa “nnamuthònya Yuda.” Voocharela, achu awaacaxa yaale anaweherya okhala ni ekumi yoohimala veelaponi yaahipacerya waachara oothanliwa. Yaawo anawehererya okhala ni ekumi veelaponi ari ntoko nipawa “nnamuthònya Yosefe.” Yehova aahilaiherya ophitaanya mapawa oomeeli wi nikhale “nipawa nimoharu” mmatani mwawe. (Ezekiyeli 37:19) Owo aahiweeriha oothanliwa ni “iputxeputxhe ikina” okhala “muhuwo mmoha.” (Yohani 10:16; Zakariya 8:23) Olelo, makhuuru oomeeli ala ari awaataana nave annamulapela Yehova vamoha. Nave awo arino Mwene mmoharu, Yesu Kristu, yoowo mu yooloherya ya Ezekiyeli oniichaniwa “Davide, mulapeli” a Muluku. (Ezekiyeli 37:24, 25) Eyaakha ti eyaakha va Mukonelo, vaavaa nnathukumanaahu vamoha wi nuupuwelele okhwa wa Yesu, ninnoona waataana wa makhuuru yaala meeli ntoko yaaloheryiwaaya orweela wa Ezekiyeli. Nyenya tiheeni mmoha ti mmoha a hiyo onaphwaneleiye otitelela opaka wi aaceererye waataana wa achu a Muluku?

10. Nni naaceererye hai waataana variyari va achu a Muluku?

¹⁰ Tuuvi ori mukhalelo woopacerya nneeraahu naaceererye waataana variyari va achu a Muluku? Moorweela mwa wiilipiserya wi nikhale awiiyeviha. Vaavaa Yesu aareiye veelaponi, owo aahaaleela amuhuserya awe wi ekhale awiiyeviha. (Mateu 23:12) Achu a veelaponi aniisoona mukhataaya okhala ookhweleyaxa  waapwaha akina. Nyenya wakhala wi naachu awiiyeviha, nnahaala waacicimihaka anna yaawo anahoolela mmulokoni nave nnahaala ocharihaka ohooleela waya. Pahiru, va weerano yeela, muloko onamukhala wawaataana. Yookhweleyaxa, natitelela okhala awiiyeviha, nnahaala omucicimiha Muluku. Woona wi owo “onnàkhotxa atxhu awikusererya, nto annàvaha mahala atxhu awiyeviha.”​—1 Pedro 5:5.

11. Wuupuwelela vooloca sa ephaawu ni eviinyu enaphariheliwa va Mukonelo eni enikhaviherye hai waaceererya waataana?

¹¹ Tuuvi ori mukhalelo wanawiili wa waaceererya waataana? Moorweela wa wuupuwelela moopwacha vooloca sa yeeyo ephaawu ni eviinyu enataphulelaaya chiryene. Nnaphwanela opaka yeeyo ohaakumve Mukonelo nave xaxaxa mu ohiyu yoowo. (1 Korinto 11:23-25) Ephaawu yoohiruruvalihiwa eneemelela mwiili woophaameya yoowo Yesu ovanheiye ntoko mukucho. Eviinyu yooxeerya eneemelela nikhami nawe. Nyenya nnaphwanela opaka sincipale opwaha pahiru wiiwexexa ichu seiya sookhweleya. Nnaphwanela wuupuwela wi mukucho wa woopola wa Yesu onavolowela meerelo meeli matokotoko a osivela. Yehova omvaha mwanawe wa hiyaano, nave Yesu oovaha okumi awe wa hiyaano. Vaavaa nnuupuwelaahu vooloca sa osivela waya, eyo enahaala onceenyerya waasivela. Nave osivela oothene ahu nryaahuno ntakhara Yehova onahaala olipiha waataana wahu.

12. Mmwaha vooloca sa mwene ni akapuro awe, Yesu ohin’ye hai vanlakani wi Yehova onachuna wi naaleveleleke akina?

¹² Tuuvi ori mukhalelo waneeraru nneeraahu naaceererye waataana? Orweela wa waalevelela akina ni murima woothene. Vaavaa nnapakaahu yeela, ninnooniherya wi ninnathamalela wi Yehova onahaala olevelela soocheka sahu moorweela mwa mukucho wa Yesu. Wi ooniherye ntakhara heeni olevelela oryaaya woochuneyaxa, Yesu aahiloca mwaha wa mwene ni akapuro awe. Khwoo muhineera, mmwaalakhanye Mateu 18:23-34 nave mwiikohe mukhatiinyu: ‘Apwanne kiri ooceenyeryeya opaka yeeyo Yesu ohusinheiye? Apwanne kinnavilela ni anna ni arokora nave kinnawiiwexexa? Apwanne kiri ooreheryeya waalevelela yaale akinyeenyeihale?’ Eparipari wi soocheka ikina inakhala itokotoko opwaha ikina. Nave soocheka ikina inanwerya okhala soovila wa hiyaano olevelela ntoko achu oohiphaameya. Nyenya mwaha wa Yesu onnanihusiha yeeyo Yehova onachuneiye wi nipakeke. (Mwaalakhanye Mateu 18:35.) Yesu oohiya vanlakani yeela wi Yehova hani anilevelele wakhala wi hinnaalevelela annihu mweeparipari vaavaa anacharuwaaya. Ela echu yookhweleya nnaphwanelaahu wuupuwelela mwawiiseela. Wi nikhapelele waataana wahu wasisapo, nnaphwanela waalevelela akina ntoko Yesu onihusinheiye.

13. Mukhalelo taani nnaaceereryaahu waataana vaavaa nnakhapelelaahu murecele ni akina?

¹³ Vaavaa nnaalevelelaahu akina, ninnakhapelela murecele ni annihu vamoha ni arokora ahu. Murummwa Paulo ooloca wi nnaphwanela olapa moowetha wi niikhaleleru mu waataana mukina ni mukhwaawe ni okhalano murecele. (Éfeso 4:3) Mwawiihiiha mu elukuluku ya Mukonelo, ni xaxaxa ohiyu yoole, muupuwelele mwawiiseela vooloca sa mukhalelo munaakhalihaanyu akina. Mwiikohe: ‘Apwanne ti yawooneya wa yaale anakisuwela, wi nkinatitelela okhala eesara ni yaale akinyeenyeihale? Apwanne achu annoona wi kinneererya moowetha wi kitikitherye murecele ni waataana?’ Ala makoho ookhweleya wuupuwelela mwawiiseela.

14. Nni nooniherye hai wi ‘ninnavilelana mukina ni mukhwawe mokhwelani’?

 ¹⁴ Tuuvi ori mukhalelo waneesese nneeraahu naaceererye waataana? Moorweela mwa omutakiherya Yehova mu wooniherya osivela. (1 Yohani 4:8) Nihirwe nloca wi, “kinaamwaasivela annaka nyenya nkinahakalala ni yaawo.” Wakhala wi ninnuupuwela mmukhalelo yoowo, hinni ncharihe ekano ya Paulo ya ‘ovilelana mukina ni mukhwawe mokhwelani.’ (Éfeso 4:2) Moone wi Paulo haalonce wi nnaphwanela ‘ovilelana mukina ni mukhwawe’ pahiru, nyenya nnaphwanela weerano yeela “mokhwelani.” Wookhalavo ohiyana. Mmulokoni mwahu aakhalamo achu a makhalelo oohiyanahiyana, nave Yehova ohaathanla yaawo. (Yohani 6:44) Mwawiihiiha owo ohoona mathowa mancipale aphaama a waasivela. Waakhanle wi anna ni arokora ahu annaphwanela osivela wa Muluku, nni niloce hai wi awo hanaphwanela osivela wahu? Nnaphwanela okhalano nchuno na waasivela yaawo mmukhalelo Yehova onachuneiye wi neereno.​—1 Yohani 4:20, 21.

15. Nnasuwela hai wi onamukhalavo mukonelo wookuchula?

¹⁵ Nihiku nimoha, nnahaala opaka mukonelo wookuchula. Nnasuwela hai? Paulo aahaaleela Akristu oothanliwa wi vaavaa anuupuwelaaya okhwa wa Yesu eyaakha ti eyaakha, awo ‘analaleya okhwa wa Apwiya ophiyerya orwa waya.’ (1 Korinto 11:26) Mu yooloherya awe vooloca sa elukuluku yookuchula, Yesu tho aaloca sa “orwa wawe”. Alocaka sa ekoi etokotoko yeeyo ehanle vakhaani ochoowa, owo aariye: “Enamoneya wirimu eneneryo ya Mwana a mutxhu, ni mahimo othene a vathi enamwikhupanyerya, ni anammona Mwana a mutxhu arwaka mmekuni ni owerya wawe ni ovuwa otokotoko. Owo onamwarumiha ankelo awe wi, yopaka nipetxa ntokotoko, anamwathukumanya òthanliwa awe ovinya onapatxerya elapo ophiyerya omakutxhuwelo aya.” (Mateu 24:29-31) Yesu onahaala okhala ni “òthanliwa awe” vaavaa onarweiye wi aakuxe Akristu oothanliwa yaawo nlelo ari veelaponi wi aakerihe wirimu. Eyo enahaala weereya epacenrye ekoi etokotoko, nyenya ehaakumve ekhoco ya Armaketo. Mu ekhoco yeeyo, Yesu vamoha ni 144.000, anahaala owana ni mamwene a veelaponi ni waavootha. (Wupulula 17:12-14) Mukonelo yoowo nnahaalaahu opaka Yesu ahaakumve “orwa” wi athukumanye oothanliwa, toni okhale wookuchula.

16. Ntakhara heeni mulakelenlaanyu ophwanyeya va Mukonelo wa eyaakha yeela?

¹⁶ Mukhale oolakelela ophwanyeya va Mukonelo wa 31 a Marsu a 2018. Nave mumveke Yehova wi ookhaviheryeeni opaka makupa anyu wi ntoko achu awe niwerye otitelela waataana. (Mwaalakhanye Salumu 133:1.) Va nihiku naya nnahaala oya o Mukonelo wookuchula. Nihaakumve nihiku nenlo, hankooni nooniherye wi waataana woohakalaliha nnakhalaahuno eyaakha ti eyaakha va Mukonelo ti wasisapo wa hiyaano.