1. Makacamiho taani nnahoolelaahu, nave ntakhara heeni Yehova onnahakalala ni akapuro awe oororomeleya? (Moone eruku yoopacerya.)

OKUMI mu elapo yeela tahi wookhweya. Ntoko yootakiherya, anna ni arokora ancipale annahooseya ni ireca sa miloko miloko. Akina yaawo ari awuuluvala annaakhapelela amusi aya aniiceliwa. Nlelo akina anniilipiserya wi evakulele soothowa sa aveechokoni vaya. Nave noosuwela wi ancipale a nyuwo munnahooseya, ohiya pahiru ni nikacamiho nimoha na yaala, nyenya ni oothene mu elukuluku emohamoha! Wi mvoothe soothene iha munnamaliha elukuluku, ikuru ni ikhorowa sincipale. Nyenya munnaroromela wi Yehova onahaala wookhaviheryaani. Moosuwela wi ichu inahaala okhala phaama woona wi ti yeeyo onaroromeliheiye. Mweeparipari, nroromelo nanyu ninnamuhakalaliha!

2. Isaiya 40:29, onanilipiha hai, nyenya yawoopiha taani etokotoko akhweya nnahaalaahu opaka?

² Apwanne, montoko wuupuwela wi makacamiho muryaanyuno aatepa wunnuwa ophiyerya wi himuwerya ovilela? Waakhanle wi mohuupuwela hiiha, hamuri meekhinyu. Akapuro akina a Yehova mu ilukuluku sakhalai yoona mmukhalelo woolikina. (1 Mamwene 19:4; Yupu 7:7) Tiheeni yaakhavihenrye otitelela ovilela? Awo  yaamuroromela Yehova wi aalipihe. Piipiliya onnaloca wi, “Apwiya annanvaha ikuru yole ovelavenle.” (Isaiya 40:29) Moothananiha, achu akina a Muluku olelo anuupuwela wi mukhalelo waphaama wa ovilela makacamiho awo anakumanaayano ori ohiya omurumeela Yehova mu elukuluku yammoori. Awo anoona wi omurumeela Yehova echu yoohokola ohiya woona ntoko mareeliho. Mwawiihiiha awo annahiya omwaalakhanya Piipiliya, oya mmithukumano, ni olaleerya. Ela ti yeeyo Satana onaweheryeiye wi awo epake.

3. (1) Nni nimukhooce hai Satana wi ahinceecheihe? (2) Tiheeni nneeraahu nthokororye mmwaha yoola?

³ Musaserya hanachuna wi nikhale oolipa. Nave owo oosuwela wi ninnakhala oolipa vaavaa nnakhalaahu oweiwa mu omurumeela Yehova. Mwawiihiiha, vaavaa munakhalaanyu awuukhuwa ni awooceya, muhimuhiye Yehova. Mmwaacamele yoowo. Piipiliya onii: “Onamotikitheryani ni onamolipihani.” (1 Petro 5:10; Tiyako 4:8) Mmwaha yoola, nnahaala ohuserya yoorepa ya Isaiya 40:26-31 vooloca sa owerya wa Yehova onilipiha. Voocharela nnahaala ohuserya mikhalelo miili seiho inahaala oneeriha ovolola mu omurumeela wahu Yehova, nave nnahaalatho ohuserya mukhalelo wa opharihela malakiheryo a Piipiliya yaawo eni enikhaviherye ovilela.

4. Tiheeni nnahuseryaahu orweela mu Isaiya 40:26?

⁴ Mwaalakhanye Isaiya 40:26. Haavo muchu atonko waalakhanya itheneeri soothene. Masiyentista aneemererya wi pahiru mu ekalaasiya ahu akhweya sookhalamo ipilyawu masana masese sa itheneeri. Naamwi hiiha, Yehova onnavaha nsina etheneeri ti etheneeri. Ela enanihusiha eheeni vooloca sa Yehova? Waakhanle wi onnapwacha itheneeri sihirino ekumi, nkuupuwelani mukhalelo onooneiye vooloca sa nyuwo! Nyuwaano munnamurumeela, ohiya nthowa na okhinyereryiwa, nyenya nthowa na omusivela wanyu. (Salumu 19:2, 4, 15) Tiithiihu oosivela osuwela echu eri yoothene vooloca sa nyuwaano. Piipiliya onaloca wi naamwi “mìhi a mmuruni mwanyu àhalikhanyiwa” ni yoowo. (Mateu 10:30) Yehova onachuna wi nsuwele wi owo ‘òsuwela mahiku a atxhu aphama.’ (Salumu 37:18) Mwawooneya, Yehova oosuwela makacamiho oothene muryaanyuno, nave owo onahaala woovahaani ikuru munachunaanyu wi nvilele ni yaawo.

5. Nni nroromele hai wi Yehova toophwanelela onivaha ikuru?

⁵ Mwaalakhanye Isaiya 40:28. Yehova ehime ya enerxiya yoothene. Ntoko yootakiherya, muthokororye waaca wa enerxiya ovanheiye nsuwa nahu. Mulipa oorepa David Bodanis ooloca wi esekuntu ti esekuntu nsuwa ninnapaka enerxiya enalikana ni ophuwa wa ipilyawu sa apompa atoomika. Mulipa ootholathola mukina ohaalakhanyerya wi waaca wa enerxiya nsuwa nnapakaaya pahiru mu esekuntu emoha naahaala waavahererya achu enerxiya yawaakhwanela mu iyaakha macikhwi masana meeli! Moohikhwa minikwa, Yehova yoowo onavaha enerxiya nsuwa, onahaalatho onivaha ikuru nnachunaahu wi nivileleno makacamiho.

6. Mmukhalelo taani murici wa Yesu oryaaya wooveya, nave owo onanivolowela hai?

 ⁶ Mwaalakhanye Isaiya 40:29. Omurumeela Yehova ennanivaha ohakalala wawaaca. Yesu aahaaleela amuhuserya awe: “Ireyani muritxi aka.” Nave aahaaceererya: “Munamphwanya witxhuwa wa minepa sanyu, wona wi muritxi aka honalimelasa ni ori woveya.” (Mateu 11:28-30) Ela tho ti yeeparipari! Mu ilukuluku ikina, akhweya ninnakhala awuukhuleya vaavaa nnakhumaahu vaate niyaaka omuthukumano naari mmuteko woolaleerya. Nyenya nnoona hai naakookaka? Ninnoona okhala oolipiheya navetho ooreheryeya owaniha ni makacamiho nnakumanaahuno. Mweeparipari, murici wa Yesu ti wooveya.

7. Muloce yaweereya enooniherya wi Mateu 11:28-30 teeparipari.

⁷ Muthokororye yaweereya ya murokora ahu mmoha. Owo onahooseya ni ereca ya oceecheya woovirelela, wuukhuwa mmuupuweloni, ni wiicela wa muru. Nthowa na yeela, ikwaha ikina onakhala woovila wa yene ophwanyeya mmithukumano. Nyenya, nihiku nimoha, owo amanle opaka wiilipixerya wi aphwanyeye va muthukumano, owo oorepa: “Mwaha waaloca sa wuukhuwa. Mwaha waalociwe mmukhalelo wooceenyerya ni woopwacha yoowo waakerinhe omoriha miithori. Kaahuupuwela wi mmithukumanoni ti mwemmo kinaphwanelaaka ophwanyeyamo.” Owo aahitepa ohakalala ophiyerya wiilipiserya wi aphwanyeyeke!

8, 9. Tiheeni murummwa Paulo aachuneiye oloca vaavaa aarempeiye: “Kakhalaka awotxeya, vàva kinalipaka”?

⁸ Mwaalakhanye Isaiya 40:30. Akhweya nnamukhalano mavyakelo mancipale, nyenya nihiwerye opaka echu ni ikuru sahu. Nna nihusiheryo oothene ahu nnaphwanela ohuserya. Murummwa Paulo aahikhalano owerya wa opaka ichu sincipale, nyenya owo haawerya opaka echu eri yoothene aachuneiye. Vaavaa aamulenleiye Yehova mukhalelo owo ooneiye, Yehova aahimuleela: “Owerya [waka] onnàkhwaniheya motxetxheyani.” Paulo aahiiwexexa yeeyo Yehova aamulenleiye. Ti yeeyo yaamweerinhe oloca: “Kakhalaka awotxeya, vàva kinalipaka.” (2 Korinto 12:7-10) Tiheeni aachuneiye oloca?

⁹ Paulo aahisuwela wi waahikhalavo munlaano wa yeeyo aahaaleiye opaka mu ikuru sawe. Owo aanachuna nikhaviheryo noorweela wa yoowo orino owerya otokotoko. Munepa waweela wa Muluku waahaala omvaha ikuru vaavaa eereiye aceecheye. Nave munepa waahala opaka sincipale. Munepa waweela wa Muluku waahaala omvaha Paulo owerya wa waakhwaniha opaka ichu seiho owo eereiye ahaakhwanihe ni ikuru sawe. Echu emohamoha enamweereyatho ni hiyo. Vaavaa Yehova oneereiye anivahe munepa waweela, mweeparipari nnahaala okhala oolipa!

10. Yehova aamukhavihenrye hai Tavite ovilela makacamiho awe?

¹⁰ Mulipa masalumu Tavite mu ikwaha sincipale aahilawiha mukhalelo munepa waweela wa Muluku waamulipinhaaya. Owo ohiipa: “Ntakhara mwa Nyuwo kinapwahaka muloko wa atchu; Nave mwa Muluku aka kinashuphaka eshiri.” (Salumu 18:29, Nlakano Nahihano) Ntoko esiri yoorakama yeeyo nihinaweryaahu ocupha, ikwaha ikina makacamiho ahu annakhala matokotoko ophiyerya nihinawerya omaliha mukhatiihu. Hiyaano ninnachuna nikhaviheryo na Yehova.

11. Munepa waweela onanikhaviherya hai ovilela makacamiho ahu?

¹¹ Mwaalakhanye Isaiya 40:31. Wakhala wi nyuwaano munnachuna opaka echu yeeyo muhinaweryaanyu, muupuwele wi Yehova ori ookhala ene elukuluku yoothene. Vano mumveke Yehova mukhaviheryi, “Munepa wawela.” (Yohani 14:26) Nnikhaviheryo na munepa  waweela, munanwerya ‘ovava osulu ntoko enaka.’ Enaka ennawerya ovavela musuluxa mu elukuluku yawaaca ehivelavenle. Eyo enawerya hai? Enakhaviheryiwa ni echeku yooviha. Vanonto, wakhala wi mookumanano nikacamiho noovila, muupuwele inaka nave mveke nikhaviheryo na Yehova. Ntoko yootakiherya, mwaha onaneeriha okhala oovelavela eneereya vaavaa nnakhalaahuno ohiiwanana ni muchu a mmulokoni. Ntakhara heeni ikwaha ikina eyo enneereya?

12, 13. (1) Ntakhara heeni ikwaha ikina onnakhalavo ohiiwanana variyari va Akristu? (2) Okumi wa Yosefe onanihusiha eheeni vooloca sa Yehova?

¹² Ohiiwanana onneereya nthowa nawi oothene naachu oohiphaameya. Ilukuluku ikina, nnamukhala oonyeenyeya orweela wa yeeyo akina aloncaaya naari apankaaya, naari tho akina anamunyeenyeya ni hiyo. Ela enanwerya okhala yaweeha yoovila. Nave ela ennanivaha ekari ya wooniherya ororomeleya wahu wa Yehova. Mwawiihai? Moorweela mwa ohuserya olapa vamoha mwawiiwanana ni anna ni arokora ahu. Yehova onnaasivela moohipwacha ohiphaameya waya, hiyaanotho nnaphwanela weerano emohamoha.

¹³ Yehova hanawiikicha akapuro awe wi eheehiwe. Ninnahuserya yeela orweela wa okumi wa Yosefe. Vaavaa Yosefe aareiye mmiravo, annawe ootiithi yaahimukhalela nrima. Awo yaamukuliha owo ntoko kapuro, nave aakerihiwa o Yikuputu. (Maphatxuwelo 37:28) Yehova aahoona chiryene yeeyo yeeren’ye nave hisaavo minikwa wi aahisooseya woona soonanara eereliweiye nthamwene awe Yosefe. Naamwi hiiha Yehova haamalinhe yeeyo yeeren’ye. Ohoolo waya, vaavaa Yosefe ootheriweiye wi aaheererya omuhiphela mwaara a Potifare nave awaleliwa mukalaposo, nlelo Yehova haamooponle. Nyenya apwanne Yehova aahimucuwala Yosefe? Hooye. Piipiliya onaloca wi “Apwiya [Yehova] yàri ni Yosefe, nave sòthene sànamurèrela.”​—Maphatxuwelo 39:21-23.

14. Nnaphura hai vaavaa nnahiyaahu okhala eesara?

¹⁴ Yootakiherya ekina ti ya Tavite. Achu ancipale hatonko okhalihiwa moonanara ntoko Tavite. Naamwi hiiha, nthamwene yoola a Muluku heemerenrye okhala oonyeenyeya. Owo oorepa: ‘Otxharuwe okhala ni esara ni ohiye owali; ohinyenyeye ni yale anera sonanara.’ (Salumu 37:8) Nthowa noochuneyaxa na ‘otxharuwa’ okhala ni esara, naari ohiya okhala ni owali, ti yawi nnachuna omutakiherya Yehova. Owo “hanakusererya ntoko inaphwanelaya sotxheka sahu,” nyenya onnanilevelela.  (Salumu 103:10) Wookhalavo mphurelo mukina wa ohiya okhala eesara. Ntoko yootakiherya, esara enanwerya otannya ochimaka woohiphwanelela wa nikhami ni makacamiho a omumula. Eyo enanwerya omunanariha hapa ni wamwe, nave eyo enanwerya otannya makacamiho a okhala phaama wa yoolya mmwiilini mwahu. Navetho, vaavaa nnakhalaahu ni esara, ilukuluku soothene hannuupuwela phaama. Nnawerya oloca naari opaka ichu seiho sinahaala owuukhula akina, nave eyo enanwerya oneeriha okhala oosokonyeryeya mu elukuluku yawaaca. Ti yaphaama otitelela okhala a murecele. Piipiliya onnaloca: “Muretxele wa murima ekumi ya mwili.” (Masiposipo 14:30) Vano, tiheeni nnaphwanelaahu opaka vaavaa akina anaphoreihaaya muupuwelo ahu, nave nni niwerye hai opaka murecele ni annihu? Nnaphwanela opharihela miruku sa Mpiipiliyani.

15, 16. Tiheeni nnaphwanelaahu opaka vaavaa muchu mukina onannyeenyeiheiye?

¹⁵ Mwaalakhanye Éfeso 4:26. Hannatikhiniheya vaavaa nnakhalihiwaahu moonanara ni achu ahinamulapela Yehova. Nyenya vaavaa munna naari murokora ahu Eekristu naari muhima ahu a veemusini onaloceiye naari oneereiye echu enasooseiha murima ahu, ninnakhala oohapaleya. Tiheeni eni yeereye wakhala wi nookuha mmurimani yeeyo yeeren’ye? Apwanne nnahaala weemererya otitelela okhala oonyeenyeya, akhweya ophiyerya iyaakha sincipale? Naari nnahaala opharihela ekano ya miruku enaphwanyeya Mpiipiliyani wi nimalihe mwaha owo mwawaakuveya? Yavira elukuluku yincipale niweheryaka oloca ni muchu owo, onahaala okhala woovila wa hiyo opaka murecele.

¹⁶ Hanka wakhala wi moonyeenyeya ni munninyu nave nyuwo muhinawerya ohiya wuupuwelela sa yeeyo? Tiheeni munaphwanelaanyu weera wi mpake murecele? Yoopacerya, munaphwanela ovekela wa Yehova. Mumveke yoowo wi ookhaviheryeeni ovaanela mwaphaama ni munninyu. Muupuwele wi munninyu ti mmoha a asinthamwene a Yehova. (Salumu 25:14) Muluku onnamusivela yoowo. Yehova onaakhaliha asinthamwene awe mwa epewe, nave owo onaweherya wi hiyaano neereno emohamoha. (Masiposipo 15:23; Mateu 7:12; Kolosi 4:6) Yanaawiili, muupuwelele moopwacha vooloca sa echu munayaanyu oloca ni munninyu. Muhuupuwele wi owo aarimulakelela woonyeenyeihaani. Akhweya aarimuhesa naari nyuwaano timwiiwexenxe moonyala. Mukhale ooreheryeya weemererya wi akhweya nyuwotho timunanarinhe mwaha owo. Vakina vaya munaphwanela opacerya ovaanela moorweela wa oloca masu ntoko, “Akhweya nkaawiiwexenxeeni phaama, nyenya vaavale mwaaloncaanyu yeele osilo, miyaano konne . . . ” Wakhala wi ovaanela iwo hokhavihenrye opaka murecele ni munninyu, mutitelele weererya. Mumvekeleleke munninyu. Mumveke Yehova wi amureelihe nave ookhaviheryeeni wuupuwelela mikhalelo sawe saphaama. Muroromele wi Yehova onahaala wooreelihaani ntakhara wiilipixerya wanyu opaka murecele ni munninyu, yoowo ori mmoha a asinthamwene a Yehova.

17. Ti mwawiihai Yehova onanikhaviheryeiye orehererya onthamwene ahu ni yoowo vaavaa nnachekaahu, nave ntakhara heeni ninnaphwanela waakhela nikhaviheryo nenlo?

¹⁷ Akina anniisoona okhala oohiphwanelela omurumeela Yehova nthowa nawi yaahipaka yoocheka etokotoko khalai. Wiisoona okhalano nthowa onanwerya oniyeleeliha  murecele, ohakalala, ni ikuru sahu. Mwene Tavite aahiwaniha ni moonelo wa wiisoona okhalano nthowa nave aaloca: “Miyano kimànle, makhuva aka yanatxètxheya, kiniha kinlaka nihiku nothene. Ntakhara ohiyu ni othana mata anyu yanakilimela.” Moohakalaliha, Tavite aalipa murima wi apake yeeyo Yehova onachuneiye wi akapuro awe epake. “Kòlokoha yotxheka aka, nkivinthe yonanara aka” owo aahirepa, “nave nyuwo molevelela yotxheka ya mulatxu aka.” (Salumu 32:3-5) Waakhanle wi moopaka yoocheka etokotoko, Yehova ori ooreheryeya woolevelelaani. Owo onachuna wookhaviheryaani orehererya onthamwene anyu ni yoowo. Nyenya munaphwanela weemererya nikhaviheryo onavaheiye orweela wa atokweene. (Masiposipo 24:16; Tiyako 5:13-15) Mwawiihiiha muhilekele! Ekumi anyu yoohimala enarweela mu nikhaviheryo nlo. Nyenya mwaanyiherye wi nlelo munniisoona okhalano nthowa ntakhara yoocheka yeeyo mwaaleveleliwaanyu khalai. Tiheeni munaphwanelaanyu weera?

18. Yootakiherya ya Paulo eni yaakhaviherye hai yaale aniisoona okhala oohiphwanelela omulapela Yehova.

¹⁸ Yaahikhalavo elukuluku vaavaa murummwa Paulo aareiye awuukhuwa nthowa na soocheka owo aapankeiye khalai. Owo aahiloca: “Miyo kiri mukhani wa arummwa, nave nkinaphwanela witxhaniwa murummwa, ntakhara kihikara [muloko wa] Muluku.” Naamwi hiiha owo aahaaceererya: “Nto mwa mahala a Muluku kiri yeyo kikhalenlaka.” (1 Korinto 15:9, 10) Yehova aahisuwela wi Paulo aari oohiphaameya. Nyenya owo aahimweemererya Paulo okhala murummwa, nave Yehova aachuna wi Paulo aroromele yeela. Wakhala wi moocharuwa yeeyo mpankaanyu, nave muloca ni Yehova sa yeeyo, nave ni atokweene wakhala woochuneya, Yehova onahaala woolevelelaani moomalela. Muroromele wi Yehova ohoolevelelaani, nave mwaakhulele nlevelelo nawe!​—Isaiya 55:6, 7.

19. Tiivi eri Yoorepa ahu ya eyaakha ya 2018, nave ntakhara heeni eryaaya yoochuneya?

¹⁹ Vaavaa nnaacamelaahu makuchuwelo a elapo yeela, niweherye wi makacamiho anahaala onikoowela. Nyenya hinnaphwanela ocuwala wi Yehova, yoowo ‘onanvaha ikuru yole ovelavenle ni onanvaha ikuru yole ori òtxètxheya,’ onahaala woovahaani echu eri yoothene munachunaanyu wi mutitele omurumeela moororomeleya. (Isaiya 40:29; Salumu 55:23; 68:19) Eyaakha yoothene ya 2018, nnahaala wuupuseryiwaka eparipari yeela yookhweleya ilukuluku soothene vaavaa nnaphwanyeyaahu mmithukumano mu Empa ya Omwene ni woona masu a yoorepa ahu ya eyaakha: Yaale anahela ewehereryo mwa Yehova annaakhela ikuru.​—Isaiya 40:31.