1, 2. Mmukhalelo taani Yehova oreiye oovaha wa hiyaano?

YEHOVA, Muluku oovaha. Ichu soothene nryaahuno inarweela wa yoowo. Owo mwaneene a ichu soothene saphaama sa mweelaponi, nave owo onnapharihela seiho wi akhaviheryeno ekumi. (Salumu 104:13-15; Ageu 2:8) Orweela Mpiipiliyani, ninnahuserya wi khalai Yehova aahipharihela ichu sookhweleya seiho mmukhalelo wootikhiniha wi aavahe achu awe.

² Ntoko yootakiherya, Yehova aahivahererya nloko na Isarayeli manaa ni maahi vaavaa nlo naakhalaaya mutakhwani mu iyaakha 40. (Mukwaha 16:35) Ntoko yookhumelela, awo yaahikhalano echu eri yoothene yaachunaaya. (Nehemiya 9:20, 21) Ohoolo waya, Yehova aahimvaha owerya mulipa a miririmu Eliya wi aaceererye makhurwa avakhaani a muthiyana yoowo aari naamukhwele oororomeleya. Yoovaha ya Muluku yeela yaahimukhaviherya owo olivano ivaale sawe nave nlelo ahalano ikhorowa sawaakhwanela wa yene ni mwanawe wi etitelele okhala.  (2 Mamwene 4:1-7) Nave nnikhaviheryo na Yehova, Yesu mootikhiniha aahivaha yoolya nave tho ikhorowa vaavaa saachuneyaaya.​—Mateu 15:35-38; 17:27.

3. Tiheeni nnahaalaahu othokororya mmwaha yoola?

³ Yehova onanwerya opharihela echu vyakala othanlileiye wi akhaviheryeno soopatuxiwa sawe. Nyenya, owo onnaaveka alapeli awe wi evaheke yeeyo awo anaweryaaya wi ekhaviherye muteko wa marehereryo awe. (Mukwaha 36:3-7; mwaalakhanye Masiposipo 3:9.) Ntakhara heeni Yehova onaweheryeiye wi nipharihele ichu sahu sasisapo wi nimukookiherye? Ti mwawiihai akapuro a Yehova akhalai yaakhavihenryaaya muteko awe? Marehereryo anapharihela hai ikhorowa inaveleeliwa mmahiku ahu? Mwaha yoola onahaala waakhula makoho yaala.

4. Tiheeni nnamooniheryaahu Yehova vaavaa nnakhaviheryaahu muteko awe?

⁴ Ninnamva Yehova nthowa nawi ninnamusivela nave tho ninnamuthamalela. Vaavaa nnuupuwelaahu vooloca sa ichu soothene Yehova oneerenleiye, mirima sahu sinnatannyeya. Mwene Tavite aahoona mmukhalelo yoola vaavaa owo aatharinheiye yeeyo yaachuneya wi etekiwe empa ya Muluku. Tavite aalonce wi, nave echu yoothene nnaakhelaahu enarweela wa Yehova nave echu yoothene nnamvahaahu Yehova erweenle wa yeeyo owo aanivanheiye.​—Mwaalakhanye 1 Matharihelo 29:11-14.

5. Piipiliya onanihusiha hai wi ovaha ni murima woothene ti wookhweleya mmalapelo ahu eeparipari?

⁵ Ninnamvaha Yehova nthowa nawi olatho ori mukhalelo mmoha wa omulapela yoowo. Mu oloha, murummwa Yohani aahiwiiwa alapeli a Yehova wirimu elocaka: “Òphwanela ti weyo Pwiya Muluku ahu wakhela ovuwa, ntxitximiho ni owerya wona wi opatunse itxhu sothene nave sopatusiwa sinnakhala wa nthowa na okhwela wà.” (Wupulula 4:11) Mweeparipari, Yehova onnaphwanela ncicimiho noothene ni ovuwa, mwawiihiiha nnachuna omvaha owetha wahu woothene. Orweela wa Mose, Yehova aahilamulela nloko na Isarayeli wi nipakeke ifesta raru eyaakha ti eyaakha. Makupa a malapelo aya va ifesta seiyo yaaphitaanyerya omvaha Yehova. Achu yaahileeliwa wi hiyaaphwanela “wivelèla mpa mw’Apwiya, Muluku. . . ahirino yovaha mmatani.” (Malamulo 16:16) Olelotho, makupa ookhweleya a malapelo ahu ari ovaha ni murima woothene. Mmukhalelo yoola, ninnooniherya wi ninnavaha esisapo ni okhaviherya muteko wa marehereryo a Yehova.

6. Ntakhara heeni oryaaya waphaama wa hiyo okhala oovaha? (Moone eruku yoopacerya.)

⁶ Ti yaphaama wa hiyo ovaha ni murima woothene nave nihiweheryaka waakhela echu. (Mwaalakhanye Masiposipo 29:21.) Nkaanyiheryani sa mwaana mukhaani yoowo ovahiwe ikhorowa ni asitiithi awe nave akusa makupa a seiyo akulano yoovaha ntakhara asitiithi awe. Asitiithi anoona hai vooloca sa yoovaha eyo? Naari nkaanyiheryani sa piyoneero yoowo ori mmiravo onakhala ni asitiithi awe nave onaavaha ikhorowa wi akhaviherye olivela empa naari okula yoolya wa aveechokoni. Akhweya asitiithi awe hanaweherya wi apake yeeyo, nave  awo anneemererya yoovaha. Ntakhara heeni? Nthowa nawi owo mukhalelo wa wooniherya othamalela wa ichu soothene seiyo asitiithi awe amweerenlaaya. Mmukhalelo woolikana, Yehova onnasuwela wi ti yaphaama wa hiyo omvaha ichu sahu sasisapo.

7, 8. Achu a Yehova akhalai evanhe hai yootakiherya vaava awo yaavahaaya sooveleela (1) ntakhara muteko wavameekhaaya? (2) wi ekhaviherye muteko awe?

⁷ Mpiipiliyani, ninnahuserya wi achu a Yehova yaapaka sooveleela wi ekhaviherye muteko awe. Mu ilukuluku ikina awo yaavanhe ntakhara miteko savameekhaaya. Ntoko yootakiherya, Mose aahaaceenyerya Aisarayeli ovaha sooveleela ntakhara otekiwa wa tapernaakulu. Ohoolo waya, Mwene Tavite aaheera emohamoha ntakhara empa ya Muluku. (Mukwaha 35:5; 1 Matharihelo 29:5-9) Variyari va olamulelo wa Mwene Yohasi, anamukucho yaarehererya empa ya Muluku epharihelaka ikhorowa seiyo achu yaavanhaaya. (2 Mamwene 12:4, 5) Mu nsana noopacerya, Akristu yaahisuwela wi o Yuteya yaahikhalawo etala nave anna yaanachuna nikhaviheryo. Mwawiihiiha Mukristu ti Mukristu aanalakelela yeeyo aaweryeiye waarumihela anna o Yuteya.​—Saweriwa T’arummwa 11:27-30.

⁸ Achu a Muluku tho yaanavaha sooveleela wi yaakhaviherye yaale yaahoolela mmuteko awe. Ntoko yootakiherya, Mu Nlamulo na Mose, Alevi hiyaarino nchuwelo nri noothene ntoko mahimo makina yaaryaayano. Mwawiihiiha Aisarayeli yaanaavaha Alevi yaneekhumi ya soohepha saya. Ela yaanaweeriha Alevi oweiwa mmuteko aya mu tapernaakulu. (Namarepela 18:21) Mmukhalelo woolikana, athiyana oovaha yaanapharihela seiho awo yaaryaayano wi emukhaviherye Yesu ni arummwa awe.—Luka 8:1-3.

9. Khalai ti woowi saarweelaayawo sooveleela?

⁹ Sooveleela seiho saarweela mmikhalelo soohiyanahiyana. Aisarayeli yaawo yaavanhe sooveleela ntakhara otekiwa wa Tapernaakulu, akhweya yaavaha ichu sasisapo yaaruuhalaaya o Yikuputu. (Mukwaha 3:21, 22; 35:22-24) Mu nsana noopacerya, Akristu akina yaakuliha ichu saya, ntoko mpuro naari empa, nave yaanaruuha ikhorowa iho wa arummwa. Voocharela arummwa yaanapharihela ikhorowa ihe wi yaakhaviherye anna ni arokora yaachuna nikhaviheryo. (Saweriwa T’arummwa 4:34, 35) Akristu akina wiiliwiili yaanakuha ikhorowa wi evahe yooveleela wi ekhaviherye muteko. (1 Korinto 16:2) Mwawiihiiha moorweela wa achu a muhakhu ni oohaawa, muchu ti muchu aanawerya ovaha echu.​—Luka 21:1-4.

10, 11. (1) Nni naatakiherye hai alapeli oovaha a Yehova akhalai? (2) Nyuwaano munoona hai vooloca sa okhaviherya muteko Woomwene?

¹⁰ Olelotho, nnanwerya ovekiwa ovaha sooveleela ni yoolakelela yavameekhaaya. Akhweya muloko anyu onapaka marehereryo a orehererya Empa nyu ya Omwene naari oteka evyaani. Akhweya Efiliyale anyu  enachuna orehereryiwa wanawiili. Akhweya nnanwerya okhaviherya ni ikhorowa sahu sa muthukumano ahu wa muceche. Naari akhweya annihu a elapo ekina annahooxeya ni ipahu sa maphacuwelo nave annachuna nikhaviheryo nahu. Sooveleela sahu tho sinnaakhaviherya mamisiyonaariyo, mapiyoneero avameekhaaya, ooweherya a ikulucu, ni yaale analapa o nipuro nahu ntokotoko, ni mu ifiliyale orukurerya elapo. Muloko anyu tho onanwerya ovahaka sooveleela mu ilukuluku soothene wi ikhaviherye otekiwa wa Ipa sa muthukumano wa ekulucu ni ipa sa Omwene wa annihu mu makupa makina a elapo.

¹¹ Oothene hiyo nnawerya ovaha echu wi nikhaviherye muteko yoowo marehereryo a Yehova anapakaaya mu mahiku yaala ookuchula. Sooveleela sincipale hanasuweliwa muchu ovanhe. Vaavaa nnahelaahu ikhorowa mu ikaaxa mu Empa ya Omwene, naari opaka sooveleela orweela mu jw.org, niheemererye wi akina esuwele waaca wa yeeyo nnaperekhaahu. Nyenya hanka wakhala wi munnoona wi yooveleela anyu yootepa oyevasa? Eparipari ti yawi sooveleela sincipale sinarweela mu soovaha vakhaani ohiya sawaaca. Ophiyerya anna yaawo arino ikhorowa vakhaanixa annaatakiherya Akristu oopacerya o Maketoniya. Awo ‘yàtepa ohawa’ nyenya awo yaahiveka wi yeemereryiwe opaka soovaha nave awo yaavaha ni murima woothene.​—2 Korinto 8:1-4.

12. Ti mwawiihai marehereryo aneereryaaya opharihela sooveleela mmukhalelo woophwanelela?

¹² Nikhuuru noolamulela, ti noororomeleya nave ti nawiisuwela mmukhalelo sooveleela inaphariheliwaaya. (Mateu 24:45) Anna a nikhuuru nenla annavekela wi epake soolakelela saphaama, nave annalakelela mukhalelo wa opharihela ikhorowa. (Luka 14:28) Mu elukuluku ya khalai, alopwana oororomeleya yaawo yaakhapelela sooveleela yaanavareryela moopwacha wi iphariheliwe pahiru mmalapelo a Yehova. Ntoko yootakiherya, Estra aahikookela o Yerusalemu arino sooveleela sasisapo orweela wa mwene o Persiya ophitaanyerya eparata ni eporonse, ni muhakhu yoowo waahala opwaha itoolare amilyawu nsana a ikhorowa so Estatu Unitu olelo. Estra oona sooveleela seiha ntoko soovaha wa Yehova. Mwawiihiiha owo aahivaha malakiheryo avameekhaaya a okhapelela muhakhu owo vaavaa waavirihiwaaya mu ilapo sawoopiha. (Esdra 8:24-34) Ivinre iyaakha sincipale ohoolo waya, murummwa Paulo aahithukumanya ikhorowa wi aakhaviherya anna o Yuteya. Owo aaheeriha wi yaale yaahaala oveleela muhakhu ole yaaphwanela “ophara phama muteko ola vamithoni va Apwiya [Yehova] ni vamithoni va atxhu.” (Mwaalakhanye 2 Korinto 8:18-21.) Olelotho, marehereryo ahu annamutakiherya Estra ni Paulo nave annapharihela sooveleela moopwacha.

13. Ntakhara heeni hiihaanoru marehereryo apankaaya matorokelo?

¹³ Akhweya emusi enampaka matorokelo mmukhalelo awo anapharihelaaya ikhorowa wi ehiphariheleke sawaaca opwaha seiyo anaphwanyaaya. Naari akhweya waavya mikhalelo sa okhweiha okumi wi ewerye opaka sincipale mmuteko wa Yehova. Emohamoha yoheereya mmarehereryo a Yehova. Mwa hiihaanoru, saahikhalavo miteko mikina mivyaani soohakalaliha, nave mu ilukuluku, saahiphariheliwa ikhorowa sawaaca opwaha seiho saakheliwa. Mwawiihiiha marehereryo ntoko emusi, yaahaavya mikhalelo sa okhapelela ikhorowa ni opaka muteko wookhweya, wi okhale wooweryeya apaka ichu sincipale saphaama wakhala wooweryeya ni sooveleela sanyu soochuna.

14-16. (1) Sooveleela sanyu sinaphariheliwa ntakhara eheeni? (2) Miteko seiha sookhavihenryeni hai?

¹⁴ Yaale amalinhe iyaakha sincipale mu eparipari alonce wi hiihaano annaakhela soovaha sincipale inarweela mmarehereryo a Yehova opwaha khalai. Hiihaano nookhalano jw.org ni JW Broadcasting. Nookhalano tho Tradução do Novo Mundo da Bíblia Sagrada mu ilocelo sawaaca. Mu 2014/2015, naakhalano muthukumano wa mahiku mararu “Mpatxerye wasya omwene wa Muluku!” Mithukumano sa ilapo soothene sahipakiwa mmapuro makina matokweene mu ipooma 14 orukurerya elapo. Muchu ti muchu aaphin’ye va mithukumano seiya aari oohakalala!

¹⁵ Ancipale ahooniherya othamalela aryaayano ntakhara soovaha seiha inarweela mmarehereryo a Yehova. Ntoko yootakiherya, mutheli mmoha yoowo onarumeela o Asiya oorepa: “Hiyaano naahirumihiwa mu epooma ekhaani. Ntoko yookhumelela, mu ilukuluku ikina naaniisoona omeekha, nave mookhweya naahicuwala wunnuwa wa marehereryo a Yehova. Nyenya hiihaanoru, vaavaa noonaahu miyaha soohiyanahiyana mu JW Broadcasting, nohuupuwela wi nri mmakupa a onna ahu wa elapo yoothene. Anna ni arokora ahu oosiveliwa ari oohakalala ni JW Broadcasting. Ilukuluku soothene ninnawiiwa elocaka wi yamala woona miyaha sa mweeri ti mweeri, awo anniisoona okhala vakhiviru va anna a Nikhuuru Noolamulela. Vano awo anniirumiha opaka makupa a marehereryo a Muluku.”

¹⁶ Orukurerya elapo, Ipa sa Omwene waacamela 2.500 sinamutekiwa naari oreheryiwa. Anna akina a muloko mmoha wa Honturas alonce wi yaanaloha erino Empa ya Omwene aya, nyenya olelo, vano tahi oloha yoheereya chiryene. Awo aarepa: “Nri oohakalala vatokotoko opaka makupa a emusi ya Yehova ya elapo yoothene ni opuha onna ahu wootikhiniha wa elapo yoothene.” Akina annooniherya othamalela mmukhalelo mmohamoha vaavaa awo anamwaakhelaaya Piipiliya ni soolaleeryiwa ikina mu elocelo aya, vaavaa anna ni arokora anaakhaviheryaaya emanle okhumelela epahu ya maphacuwelo, naari vaavaa  awo anoonaaya sookhumelela saphaama sa olaleerya wa vanlakani ni ophariheliwa wa ikariinyu mu ekulucu aya.

17. Nnasuwela hai wi Yehova onnakhaviherya muteko awe olelo?

¹⁷ Achu ancipale yaawo ahiri Anamoona a Yehova haniiwexexa mukhalelo nnapakaahu ichu seiya soothene nipharihelaka pahiru sooveleela soochuna. Muhooleli mmoha a ekompaniya etokweene aaheecelela nipuro nahu nimoha nnimprimiri soolaleeryiwa. Owo aatepa otikhina ni muteko waapakiwa ni awiiveleela, ni soovaha soochuna, nave ehirivo marehereryo yaavahererya ikhorowa. Owo aahiloca wi seiho nnapakaahu inakhala soohiweryeya. Hiyo tho ninneemererya! Noosuwela wi enaweryeya pahiru nthowa nawi Yehova onnakhaviherya muteko.​—Yobi 42:2.

18. (1) Mareeliho taani nnaakhelaahu vaavaa nnavahaahu wi nikhaviherye Omwene? (2) Nni naahusihe hai aniihu ni avyaani wi yeereno emohamoha?

¹⁸ Yehova oonivaha mahala ni ekari wi nikhaviherye muteko mutokweene wa Omwene. Owo onnaniroromeliha wi vaavaa nneeraahuno yeela, onahaala onireeliha. (Malakiya 3:10) Yehova onnalaiherya wi wakhala wi ninnavaha ni murima woothene, ichu inahaala oneecela phaama. (Mwaalakhanye Masiposipo 11:24, 25.) Owotho onnanleela wi nnahaala okhala oohakalala vaavaa nnavahaahu, woona wi, “yole onavaha ori òrèriwa [naari ohakalala] ompwaha yole onakhela.” (Saweriwa T’arummwa 20:35) Orweela wa yeeyo nnapakaahu ni nnalocaahu, nnawerya waahusiha aniihu ni anna avyaani mukhalelo awotho eneeraaya epake sooveleela ntakhara muteko yoola ni opuha mareeliho awaaca.

19. Mmukhalelo taani mwaha ola woolipinhaayaani?

¹⁹ Ichu soothene nryaahuno inarweela wa Yehova. Vaavaa nnamukookiheryaahu, ninnooniherya wi ninnamusivela nave ninnacicimiha soothene opankeiye ntakhara hiyo. (1 Matharihelo 29:17) Vaavaa Aisarayeli yaapakaaya sooveleela ntakhara otekiwa wa empa ya Muluku, awo “yahakalala wa nthowa na oleva otokotoko.” (1 Matharihelo 29:9) Hankooni ntitelele ophwanya ohakalala ni weeliwa murima vaavaa nnamukookiheryaahu Yehova ntakhara soothene owo onivanheiye.