1. Ntakhara heeni elukuluku nnakhalaahu ti yoohiyana ni ekina?

NNAKHALA mu elukuluku yeeyo eri yoohiyana ni elukuluku ekina mmiyaha sa achu. Yehova onnathukumanya muloko mutokotoko “wa ilapo, mahimo, maloko ni ilotxelo sothene” hiiha ntoko Piipiliya aalohenryeiye. Awo ti “nloko nawatxa” opwaha amilyawu athanu nararu, yaawo ari oohakalala “emulapaka [Muluku] othana ni ohiyu.” (Wupulula 7:9, 15; Isaiya 60:22) Hatonko okhalavo achu ancipale anamusivela Muluku ni akhwaaya.

2. Tuuvi ori mukhalelo wa osivela woohiphwanelela nnoonaahu mwa achu yaawo ahiri asinthamwene a Yehova? (Moone eruku yoopacerya.)

² Nyenya, Piipiliya aaloherya wi mmahiku ahu, achu yaawo ahiri asinthamwene a Muluku yaahaala okhalano mukhalelo wa osivela woohiphwanelela yoowo ori wa nrima. Murummwa Paulo aahirepa wi mmahiku ookuchula, achu yaahala okhala “awisivela mkhataya, ósivela icharama,” nave “ósivela hiho sinatheiha mutchu, óhikhala ómusivela Muluku.” (2 Timóteo 3:1-4, NN) Mukhalelo yoola wa wiisivela muchu mukhateiye onnavuhana ni osivela wa Muluku. Okhalano mukhalelo yoola wa wiisivela honamweeriha muchu okhala oohakalala, naamwi owo akhweya  uupuwelaka wi onamukhala oohakalala. Opwaha yeeyo, owo onnaaceererya nrima mulaponi nave onneeriha okumi okhala wookacamiha wa muchu ti muchu.

3. Tiheeni nnahaalaahu othokororya mmwaha yoola? Ntakhara heeni?

³ Murummwa Paulo aahisuwela wi osivela wa nrima waahaala okhala wawunlaanaxa navetho wi yaahaala okhala yawoopiha wa Akristu. Mwawiihiiha owo aahaalopola wi ‘yithanle’ wa yaawo, naari yaasepe achu anooniherya osivela wa nrima. (2 Timóteo 3:5, NN) Nave Hinni niwerye osepa olocihana ni achu yaawo. Vanonto, tiheeni nnaphwanelaahu opaka wi niikhapelele mukhatiihu wi nihivoloweliwe ni mukhalelo wa achu yaawo anirukurenrye nave wi nimuhakalalihe Yehova, Muluku a osivela? Hankooni noone ohiyana orivovo variyari va osivela yoowo Muluku onachuneiye wi nikhaleno ni osivela onalociwa mu 2 Timóteo 3:2-4. Voocharela nnanwerya wiisaalikhela mukhatiihu ni woona mukhalelo nneeraahu nooniherye osivela yoowo oni oneerihe okhalano weeliwa murima weeparipari ni ohakalala.

4. Ntakhara heeni tahi yoonanara okhalano mukhalelo mukina wa wiisivela?

⁴ Paulo aahirepa: “Atchu enarwa-ekhala awisivela mkhataya.” Apwanne ela enataphulela wi wiisivela mukhatiihu ti yoonanara? Hooye, wiisivela mukhatiihu ti woophwanelela nave wookhweleya. Yehova onipanke mmukhalelo yoola. Yesu oolaca: “Omukhweleke mukhwà ntoko onikhwelawe weyano.” (Marko 12:31) Mweeparipari, hinirwa naasivela akina wakhala wi hinniisivela mukhatiihu. Piipiliya tho onnanleela: “Hihatho alopwana annaphwanela wakhwela [naari waasivela] asaraya ntoko mwili aya. Mutxhu onakhwela amwariye onnikhwela yowo mukhateiye. Nave havo otonko onyemula mwili awe, nto mutxhu ti mutxhu onnapwatxha mwili awe, onnalyiha ni onnakhapelela.” (Éfeso 5:28, 29) Mwawiihiiha ti yawooneya wi nnaphwanela okhalano mukhalelo mukina wa wiisivela mukhatiihu.

5. Mwaahaala waaloca hai achu yaawo aniisivela vancipale?

⁵ Osivela yoowo nnaalakhanyaahu mu 2 Timóteo 3:2 tahi osivela waphaama. owo ti wa nrima. Wakhala wi muchu onniisivelaxa mukhateiye, owo oniisuupuwelela mukhateiye opwaha onachuneleiyevo. (Mwaalakhanye Aroma 12:3.) Owo oniipwacha mukhateiye ohiya muchu mukina. Wakhala wi ichu hasinamweecela phaama, owo onnaakhupanya akina ohiya wiikhupanya mukhateiye. Mweeparipari achu a mukhalelo yoola hanahakalala.

6. Sookhumelela taani saphaama inarwa vaavaa nnamusivelaahu Muluku?

⁶ Akina anamuhuserya Piipiliya aneemererya wi Paulo aapacenrye oromola wiisivela muchu mukhateiye nthowa nawi onnaruuha mikhalelo soonanara otharinheiye mmasu anacharela. Moohiyana, mukhalelo wa osivela yoowo Muluku onachuneiye wi nikhaleno onnaruuha mikhalelo saphaama. Mikhalelo iho ti ohakalala, murecele, ovilela, wiilakelela, oreera murima, ororomeleya, opisa  murima, ni wiisumaaliha. (Galasya 5:22, 23) Mulipa masalumu oorepa: “Óréla atchu yawo Muluku aya ori Yehova.” (Salumu 144:15) Yehova Muluku, toohakalala, navetho achu awe toohakalala. Mwawiihiiha, moohiyana ni yaale aniisivelaaxa mukhataaya nave anuupuwelela pahiru yeeyo anahaalaaya waakhela, achu a Yehova ari oohakalala nthowa nawi awo annaavaha akina echu.​—Saweriwa T’arummwa 20:35.

7. Makoho taani eni enikhaviherye othokororya omusivela wahu Muluku?

⁷ Nni nsuwele hai waakhanle wi wiisivela mukhatiihu onnakhala woolipa opwaha omusivela wahu Muluku? Muupuwelele vooloca sa ekano ela ya miruku: “Muhere etxhu wa nthowa na owanawana, nari na wisona, nto ni wiyeviha ni n’wonaka akhwinyu ntoko atokwene anopwahani nyuwo. Muhithokorerye sanyuru, nto sa akhwinyutho.” (Filipi 2:3, 4) Nnaphwanela wiikoha: ‘Apwanne kinniiwelela ekano yeela? Mano kinneererya opaka yeeyo Muluku onachuneiye wi keereno? Apwanne Kinnaavya mikhalelo sa waakhaviherya akina mmulokoni ni mmuteko woolaleerya?’ Tahi wookhweya wiiliwiili ovaha elukuluku ni ikuru sahu. Eyo akhweya enamutaphulela olapa moowetha ni oyeleela ichu ikina inanihakalaliha. Nyenya hiyaavo echu ekina yaahaala onruuhela ohakalala otokweene opwaha osuwela wi Mpatusa a soothene onnahakalala ni hiyo!

8. Nthowa na omusivela Muluku tiheeni Akristu akina anapakaaya?

⁸ Nthowa na omusivela Muluku ni ochuna omurumeela mwawaakhwanela, Akristu akina annahiya miteko mikina seiho saahaala oweeriha okhala achu ooreela. Ericka yoowo ori totore, oothanla okhala piyoneera opwaha otikitheryeya mmuteko awe. Owo ni iyawe annawerya orumeela mu ilapo soohiyanahiyana. Owo ooloca: “Saweereya  sincipale nryaahuno mu okhaviherya ekulucu ya elocelo yookhopela, navetho ni asinthamwene naapankaahu, muhakhu mutokweene naakhenlaahu.” Ericka nlelo onalapa ntoko totore, nyenya owo onapharihela elukuluku awe yincipale ni ikuru sawe wi aahusihe achu vooloca sa Yehova ni waakhaviherya anna ni arokora awe. Owo olonce wi ela ennamuruuhela “ohakalala weeparipari ni weeliwa murima woohaanyiheryeya.”

9. Ntakhara heeni muchu onasivela ikhorowa hanakhala oohakalala?

⁹ Paulo aahirepa wi achu yaahaala okhala “ósivela icharama.” Mu iyaakha ivirale, piyoneero mmoha o Irlanta aahiloca ni mulopwana mmoha vooloca sa Muluku. Mulopwana aahihula ecikama awe, akumihamo ikhorowa nave aloca: “Ola tori muluku aka!” Naamwi akina eheemereryaka yeela, achu ancipale anoona mmukhalelo yoola. Awo annasivela ikhorowa ni ichu seiyo ikhorowa inakulaaya. Nyenya Piipiliya onnalopola: “Onakhwelasa ikhorowa harwaru eliwa murima. Onatxhuna muhakhu, haphwanya sothene onatxhuneiye.” (Eklesiyaste 5:9) Muchu yoowo onasivela vancipale ikhorowa hanaakhwaneliwa. Owo ilukuluku soothene onachuna ikhorowa sawaaceererya nave onnaveleela okumi awe achunaka ophwanya seiho. Ela ennamuruuhela “masoso mantxipale.”​—1 Timóteo 6:9, 10.

10. Tiheeni Piipiliya onaloceiye sa oreela ni ohaawa?

¹⁰ Chiryene, oothene hiyo ninnachuna ikhorowa. Mmukhalelo mukina ikhorowa sinnakhapelela. (Eklesiyaste 7:12) Nyenya apwanne nnanwerya okhala oohakalala wakhala wi nookhalano ichu soochuneya mu okumi? Aai! (Mwaalakhanye Eklesiyaste 5:11.) Akur mwaana a Xakeh aahirepa: “Muhikivahe orèla nari ohawa; mukivahe pahi itxhu seihe inalyiha ekumi aka.” Ela ti yookhweya wiiwexexa ntakhara heeni mulopwana ola haachuna okhala oohaawaxa. Owo ooloca wi haachuna weereryiwa ni ompava, nthowa nawi wiiya waahaala olamwiha nsina na Muluku. Nyenya ntakhara heni owo haachuna okhala ooreela? Owo oorepa: “Karèla kinamokhotxani kupuwelaka wi himunakipharela muteko.” (Masiposipo 30:8, 9) Akhweya nyuwaano munnaasuwela achu yaawo anaroromela ikhorowa opwaha omuroromela Muluku.

11. Tiheeni Yesu olonceiye vooloca sa muhakhu?

¹¹ Muchu yoowo onasivela ikhorowa hanamuhakalaliha Muluku. Yesu aahiloca: “Havo onawerya walapa asitokwene eli: ntakhara oni anammwitxa mmoha nave anammukhwela mukina, nari oni anammutxhuna mmoha ni anammunyemula mukina. Nyuwo himunawerya omulapa Muluku ni olapa musurukhu.” Owotho aaloca: “Muhithukumanyeke muhakhu vathiva, owese ni murawa onnanarihayavo, ni ampava aniyayavo, nto nyuwo muthukumanyeke muhakhu wirimu, weiwo nari owese nari murawa ohinnanarihayawo ni ampava ahiniyayawo.”​—Mateu 6:19, 20, 24.

12. Okhweiha okumi onanikhaviherya hai omurumeela Muluku? Mvahe yootakiherya.

¹² Alapeli ancipale a Yehova anneererya okhweiha okumi. Awo ahoona wi weerano yeela ennaavaha elukuluku yincipale wi emurumeele Yehova navetho ennaweeriha okhala oohakalala. Jack, yoowo onakhala o Estatu Unitu, ootumiha empa awe etokotoko ni nakoso awe wi akhale piyoneero vamoha ni mwaariye. Owo onnathariha: “Waari woovila ohiya empa ahu yooreeraxa mu elapo.” Nyenya mu iyaakha sincipale owo aaphiya vaate ari oophweeleyeeni nthowa na makacamiho oomutekoni. Owo ooloca: “Mwaaraka  yoowo ori piyoneera ookilaatheya, ilukuluku soothene aakhala oohakalala. Owo aanaloca, ‘Kookhalano pwiya mutokotokoxa!’ Vano miyaanotho kiryaaka piyoneero, oothene nnamulapa muchu Mmoharu, Yehova.”

13. Tiheeni eni enikhaviherye ovareryela moonelo ahu vooloca sa ikhorowa?

¹³ Vaavaa nnavareryaahu moonelo ahu vooloca sa ikhorowa, nnaphwanela okhala oororomela nave niikohe: ‘Apwanne okumi aka onnooniherya wi kinnaroromela chiryene yeeyo Piipiliya onaloceiye vooloca sa ikhorowa? Kinnoona ikhorowa okhala echu yookhweleyaxa wa miyaano? Apwanne kinnavaha esisapo ichu soomwiilini opwaha onthamwene aka ni Yehova ni achu? Apwanne kinnaroromela wi Yehova onahaala okivaha ichu kinachunaaka?’ Nnaphwanela ororomela wi harwa aasimwiha yaale anamuroromela!​—Mateu 6:33.

14. Tuuvi ori moonelo woophimelela wa opuha?

¹⁴ Piipiliya tho aahiloherya wi mmahiku okuchula, achu yaahaala okhala “ósivela hiho sinatheiha mutchu [naari soopuha].” Hiiha ntoko nsuwenlaahu wi hiyaavovo yooheseya ya okhalano moonelo woophimelela wa wiisivela navetho ni ikhorowa, ninnasuwela tho wi tahi yooheseya wakhala wi ninnapuha okumi mmukhalelo woophimelela. Achu akina aneemererya wi hanaphwanela opuha, nyenya tahi yeeyo Yehova onakhweleiye wa hiyo. Piipiliya onnaaceenyerya alapeli oothene a Muluku: “Hawe, walye ni muretxele solya sà, nave wawurye evinyu à, ntakhara Muluku ohèliwa murima ni weyano.”​—Eklesiyaste 9:7.

15. Okhala “ósivela hiho sinatheiha mutchu [naari soopuha]” enataphulela eheeni?

¹⁵ Timóteo anawiili 3:4 onaloca sa yaale anasiveliwa ni soopuha emuhiyaka Muluku okhwipi mu okumi aya. Moone wi eciciri ela henaloca wi achu yaahaala osivelaka soopuha ompwaha Muluku. Eyo yaahaala otaphulela omusivela Muluku vakhaani. Nyenya eciciri enaloca wi “óhikhala ómusivela Muluku.” Namahuserya mmoha aahirepa wi eciciri ela “henataphulela wi awo anamusivela Muluku ophiyerya mweeryo taani. Eyo enataphulela wi awo hanamusivela Muluku moomalela.” Ola olopola otokotoko ntakhara achu yaale anasiveliwa ni ichu sootheiha muchu naari soopuha. Piipiliya onaaloca achu anasiveliwa ni ichu sinatheiha muchu ntoko yaale “oteteiwa” opuha sa elapo ela.​—Luka 8:14.

16, 17. Yootakiherya taani Yesu ovanheiye mmoonelo awe vooloca sa soopuha?

¹⁶ Yesu oonooniherya mukhalelo wa okhala oophimelela vooloca sa soopuha. Owo aaya va efesta ya “othela” ni “efesta etokwene.” (Yohani 2:1-10; Luka 5:29) Va othela, hiyaarivo eviinyu yawaakhwanela, nave Yesu aahipaka yootikhiniha nave aatatuxa maahi ekhala eviinyu. Mu elukuluku ekina, vaavaa achu yaamuthorihaaya Yesu vooloca sa olya ni owurya, owo aahooniherya vanlakani wi achu ale hiyaari oophimelela mmoonelo aya.​—Luka 7:33-36.

 ¹⁷ Naamwi hiiha, Yesu hoona soopuha ntoko echu yookhweleyaxa muukumini mwawe. Owo aamukuha Yehova mu nipuro noopacerya nave aanapaka soothene aaweryeiye wi aakhaviherye akina. Owo aaheemererya okhwa woohoosa va mwirini wi awoopole achu. Yesu aahaaleela yaale yaachuna omuchara: “Oohakalala ti nyuwo mwaruwaniwa, mwiikariwa ni mootheriwa soonanara soothene wa nthowa naka. Hakalalani ni chapani, woona wi nchuwelo nanyu nnamukhala ntokotoko wirimu, ntakhara yaapacenrye owiikara alipa a miririmo muhaakumve.”​—Mateu 5:11, 12, Tradução do Novo Mundo.

18. Makoho taani anahaala onikhaviherya wiivareryela ophiyerya mweeryo taani nnasivelaahu soopuha?

¹⁸ Tiheeni enahaala onikhaviherya waalikhela ophiyerya mweeryo taani nnasivelaahu soopuha? Nnaphwanela wiikoha: ‘Apwanne mathatelo ari ookhweleya wa miyaano opwaha mithukumano naari muteko woolaleerya? Apwanne kiri oolakelela ohiya ichu vyakala kinapuhaaka nthowa nawi kinachuna omurumeela Yehova? Mano vaavaa kinathanlaaka mathatelo, kinnuupuwela vooloca sa mukhalelo Yehova onooneiye soothanla saka?’ Woona wi ninnamusivela Muluku nave ninnachuna omuhakalaliha, ninniikasoopa osepa ohiya pahiru ichu nnasuwelaahu wi ti soonanara nyenya ophiyeryatho ichu nnuupuwelaahu wi hasinamuhakalaliha.​—Mwaalakhanye Mateu 22:37, 38.

19. Taani ohinakhalano ohakalala weeparipari?

¹⁹ Elapo ya Satana yohaahoosa achu mu iyaakha macikhwi mathanu nammoha. Vano, mmahiku yaala ookuchula a mukhalelo ola wa ichu, elapo yoosareya ni achu yaawo aniisivela mukhataaya, ikhorowa, ni soopuha. Awo anuupulela ichu aneeraaya ekhaleno ni opaka soochuna saya okhala ichu sookhweleya mookumini mwaya. Nyenya achu a mukhalelo yoola mweeparipari hanakhalano ohakalala! Moohiyana, Piipiliya onnaloca: “Orèriwa ti wa yole onakhaviheryiwa ti Muluku a Yakobe, yole onàwehererya Apwiya [Yehova], Muluku awe.”​—Salumu 146:5.

20. Ti mwawiihai omusivela wanyu Muluku oweerinhaayani okhala oohakalala?

²⁰ Alapeli a Yehova mweeparipari annamusivela yoowo nave eyaakha ti eyaakha ancipale annamusuwela Yehova ni omusivelatho. Ela ennooniherya wi Omwene wa Muluku onnalamulela, nave wi moohilekela onahaala oruuha mareeliho nihintonkwaahu waanyiherya! Vaavaa nnapakaahu yeeyo Yehova onachuneiye wi neereke, ninnamuhakalaliha, nave eyo ennanruuhela ohakalala weeparipari. Yaale anamusivela Yehova anahaala ohakalala okhala wookhala! Mmwaha onacharela, nnahaala otholathola mikhalelo mikina soonanara seiho inakhumelela moorweela wa osivela wa nrima. Voocharela nnahaala woona ti mwawiihai mikhalelo seiya inavuhanaaya ni mikhalelo sa alapeli a Yehova.