1, 2. Ntakhara heeni eryaaya yamiruku omwiiwelela Mpatusa anyu, elukuluku munathanlaanyu yeeyo munachunaanyu opaka ni ekumi anyu? (Moone eruku yoopacerya.)

WAAKHANLE wi nyuwo mwa mmiravo naari mwali, akhweya moophwanya ikano sincipale vooloca sa omwaahiyu anyu. Ahusiha, anamiruku, naari akina akhweya aahooleelaani wi munaphwanela ovolowa mu esikola yavasulu naari ophwanya muteko yoowo onahaala woolivakaani ikhorowa sincipale. Nyenya Yehova onnoovahaani ekano yoohiyana. Mweeparipari, owo onachuna wi nwethe ohuserya ni yoolakelela yawi nwerye wiikhaviheryaka mukhatiinyu. (Kolosi 3:23) Nyenya owo oosuwela wi vaavaa muryaanyu mmiravo naari mwali, munaphwanela opaka soolakelela soochuneya seiyo sinahaala ovolowela omwaahiyu anyu. Mwawiihiiha owo onnavahererya malakiheryo wi yoohooleleeni nave yookhaviheryeeni opharihela okumi anyu mwawiiwanana ni mukhalelo yoowo onahaala omuhakalaliha mmahiku yaala ookuchula.—Mateu 24:14.

² Muupuwele wi Yehova onnasuwela echu eri yoothene. Owo oosuwela yeeyo eni yeereye muhoolo, nave oosuwela chiryene  waacamela wa makuchuwelo a elapo yeela. (Isaiya 46:10; Mateu 24:3, 36) Yehova ohoosuwelaani tho nyuwo. Owo oosuwela yeeyo eni eweeriheeni okhala oohakalala ni yeeyo eni eweeriheeni okhala oohihakalala. Ikano saachu sinanwerya okhala ntoko saphaama, nyenya wakhala wi hasinathipeleya mu Masu a Muluku, mweeparipari iho ti soololo.—Masiposipo 19:21.

3, 4. Wiiwelela ekano yoonanara waavolowenle hai Atamu ni Eva ni anaaya?

³ Ekano yoonanara yookhala ovinyerya elukuluku yincipale. Satana taari muchu oopacerya waavaha achu ekano yoonanara. Owo aahimuleela Eva wi owo vamoha ni Atamu yaahaala okhala oohakalala waakhanle wi yaahilakelela mukhataaya mukhalelo wa okhala. (Maphatxuwelo 3:1-6) Nyenya Satana aari anrima! Owo aachuna wi Atamu ni Eva vamoha ni anaaya amuhoolo, emwiiwelele ni omulapela yoowo, omuhiya Yehova. Nyenya Satana haapanke echu vyakala ntakhara achu. Aari Yehova yoowo aavanhe echu eri yoothene awo yaaryaayano. Owo aahaavaha echu eri yoothene, emaca yooreera wi ekhalekemo, ni mwiili aya woophaameya yoowo wi okhale, okhala wookhala.

⁴ Moothananiha, Atamu ni Eva hiyaamwiiwelenle Muluku. Moorweela mwa weerano hiiha, awo yaahiikwasa mukhataaya wa yoowo aavanhe ekumi. Sookhumelela saari soowaawa. Moolikana ni ithutu ikwasiwe va mwirini, Atamu ni Eva vakhaani vakhaani yaahuuluvala nave ekhwa. Anaaya yaahihooseyatho, nave eyo ennanivolowela oothene ahu. (Aroma 5:12) Achu ancipale mmahiku yaala haniiwelela yeeyo Muluku onaloceiye nave pahiru anapaka yeeyo awo anachunaaya. (Éfeso 2:1-3) Ti sivi siri sookhumelela sene? Piipiliya ooloca wi “hayiivo miruku” vaavaa achu anammwareelaaya Yehova.—Masiposipo 21:30.

5. Echu taani Muluku aasuwenleiye ntakhara achu, nave apwanne yoheereya chiryene?

⁵ Yehova aahisuwela wi yaahaala okhalavo achu, ophitaanyerya amiravo ni asimwali, yaawo yaahaala ochuna omusuwela ni omurumeela. (Salumu 103:17, 18; 110:3) Amiravo ni asimwali yaawo tasisapo yookhweya wa Yehova! Apwanne mwa mmoha a yaawo? Mweeparipari munnapuha ichu sincipale “saphama” sinarweela wa Muluku, nave ela ennaaceererya ohakalala wanyu mookumini. (Mwaalakhanye Salumu 103:5; Masiposipo 10:22) Nnahaala othokororya ichu sese sa seiya. Ichu iho ti yoolya yoomunepani, asinthamwene aphaama, soolakelela samphurelo, ni otaphuwa weeparipari.

6. Ntakhara heeni munnaphwanela othokororya soothowa sanyu soomunepani, nave tiheeni Yehova onavahereryeiye wi ookhaviheryeeni?

⁶ Asinama hanono soothowa soomunepani, eyo tiwi, awo hanoona ochuneya waya omusuwela Mpatusa aya. Nyenya hiyo ninnoona. (Mateu 4:4) Elukuluku nnamwiiwelelaahu Muluku, ninnaphwanya osuwela, miruku, ni ohakalala. Yesu ooloca: “Oohakalala taale anasuwela soothowa saya soomunepani.” (Mateu 5:3, TNM) Muluku oonivaha Piipiliya nave onnampharihela “mulapeli òroromeleya ni awisuwela” wi avahererye soolaleeryiwa seiyo inanikhaviherya olipiha nroromelo nahu. (Mateu 24:45, BNM) Soolaleeryiwa seiya nniichana yoolya yoomunepani woona wi sinnalyiha nroromelo nahu nave onthamwene ahu ni Yehova onnakhala woolipa. Ninnapuha yoolya yoomunepani yoohiyanahiyana!—Isaiya 65:13, 14.

7. Yoolya yoomunepani yeeyo enarweela wa Muluku eni yookhaviheryeeni hai?

⁷ Yoolya yoomunepani enamoovaahani miruku ni mavyakelo a wuupuwela mwaphaama, mikhalelo  seiyo inii sookhapeleleeni mmikhalelo mincipale. (Mwaalakhanye Masiposipo 2:10-14.) Ntoko yootakiherya, mikhalelo seiyo inamookhaviheryaani osuwela sawootha, ntoko yawootha yawi Mpatusa haavo naari yawootha yawi ikhorowa ni ichu soomwiilini inanweerihaani okhala oohakalala. Mikhalelo seiya inahaala wookhaviheryaani tho osepa soochuna naari sookhovelela seiyo sini soopahuleeni. Mwawiihiiha mpake soothene munaweryaanyu wi mukhale amiruku ni wuupuwela mwaphaama. Voocharela munahaala woona mukhatiinyu wi Yehova onnoosivelaani nave wi onachuna yeeyo eri yoophwanelela wa nyuwo.—Salumu 34:8; Isaiya 48:17, 18.

8. Ntakhara heeni munnaphwanela omwaacamela Muluku hiihaano, nave muni mphure hai orweela wa yeela muhoolo?

⁸ Moohilekela, makupa ari oothene a elapo ya Satana anahaala otolosiwa. Pahiru Yehova onahaala onikhapelela ni ovahererya ichu nnachunaahu, seiyo inaphitaanyerya yoolya ahu yoocharela. (Habakukhi 3:2, 12-19) Mwawiihiiha ela elukuluku ya omwaacamela Muluku ni olipiha nroromelo nanyu mwa yoowo. (2 Pedro 2:9) Wakhala wi moheerano yeela, voocharela moohipwacha yeeyo eni yeererye ni nyuwo, munahaala woona hiiha ntoko Tavite, yoowo aalonce: “Mahiku othene Apwiya anakhala vamithoni vaka, ari omononi waka wolopwana, nkirwa kòtxeya.”—Salumu 16:8.

9. (1) Hiiha ntoko nnaalakhanyaahu mu Yohani 6:44, tiheeni Yehova onapakeiye? (2) Echu taani yavameekhaaya erivovo vooloca sa omusuwela Namoona mukina?

⁹ Elukuluku munamusuwelaanyu woopaceryani muchu yoowo ohiri mu eparipari, ophiyerya mweeryo taani mmusuwenlaanyu? Nyuwo munanwerya osuwela nsina nawe ni mukhalelo oreiye, nyenya akhweya hamuni musuwele sincipale. Ela ti yoohiyanasa ni vaavaa munamusuwelaanyu woopaceryani muchu yoowo ori mu eparipari. Nyuwo munnasuwela wi owo onnamusivela Yehova. Munnasuwela wi Yehova ohoona echu yaphaama mwa yoowo nave aanwopa wi apake makupa mu emusi ya alapeli awe. (Mwaalakhanye Yohani 6:44.) Moohipwacha elapo muchu owo onakhumeiyewo naari mukhalelo ophuwiweiye, nyuwo munnasuwela sincipale vooloca sa yoowo, nave yene onnasuwela sincipale vooloca sa nyuwo!

10, 11. Tiheeni achu a Yehova anuukaaya, nave ela enoovolowelani hai?

 ¹⁰ Vaavaa munamusuwelaanyu Namoona mukina, munnasuwela wi sookhalavo ichu sincipale saphaama munuukaanyu. Munnasuwela wi naamwi muhilocaka elocelo emohamoha, munnaloca “elocelo yaweela” ya eparipari. (Sofoniya 3:9) Eyo enataphulela wi oopiili anyu munnamweemererya Muluku, munnakhala mwawiiwanana ni malakiheryo mamohamoha, nave mookhalano ewehereryo emohamoha ya muhoolo. Ichu seiya sinnookhaviheryaani ororomelana mukina ni mukhwaawe ni oteka onthamwene woolipa yoowo oni ohimale.

¹¹ Mwawiihiiha vaavaa munamulapelaanyu Yehova, mweeparipari munamuloca wi mookhalano asinthamwene oophwanelela. Mookhalano asinthamwene orukurerya elapo, naamwi muhaasuwelaka yaawo! Apwanne munnawerya omuupuwela muchu mukina opwaha achu a Yehova yaawo anapuha yoovaha yeela yasisapo?

12. Soolakelela taani samphurelo munaphwanelaanyu otikitherya?

¹² Mwaalakhanye Eklesiyaste 11:9–12:1. Apwanne mookhalano soolakelela seiyo muneereryaanyu ophwanya? Akhweya mootikitherya yoolakelela ya omwaalakhanya Piipiliya nihiku ti nihiku naari operekha maakhulo naari makupa mmukhalelo woophwanelela mmithukumano. Naari akhweya munneererya ompharihela Piipiliya moophwanelela mmuteko woolaleerya. Munoona hai vaavaa munasuwelaanyu wi munnaya vahoolo naari vaavaa akina anooleelaayaani yeela? Akhweya munnatepa ohakalala, nave munnaphwanela! Ntakhara heeni? Nthowa nawi munnapaka yeeyo Yehova onachuneiye wi mpake, hiiha ntoko Yesu enreiye.—Salumu 40:8; Masiposipo 27:11.

13. Mmukhalelo taani omurumeela Muluku oryaaya woophwanelela opwaha wiitikitherya mu soolakelela sa elapo yeela?

¹³ Elukuluku munakhalaanyu ootikitheryeya mmuteko anyu wa Yehova, munapaka muteko yoowo onahaala oweerihaani okhala ohakalala ni woovahaani yoolakelela mookumini. Paulo ooloca: “Khalani awiitikitherya ni oohisuseya, oopharasha muteko wa Apwiya mahiku oothene, musuwelaka wi mwa Apwiya hamuneeteteya siiyo ene.” (1 Korinto 15:58) Nyenya vaavaa achu anatikitheryaaya soolakelela mu elapo yeela, ntoko okhalano ikhorowa sincipale ni okhala oovuwaxa, awo hanakhala oohakalala chiryene. Naamwi awo ekhumelelaka phaama, wiiliwiili aaniisoona ohikhala echweenevo. (Luka 9:25) Ninnahuserya yeela orweela wa yootakiherya ya Mwene Solomoni.—Aroma 15:4.

14. Tiheeni munahuseryaanyu orweela wa yaweereya ya Solomoni?

¹⁴ Solomoni, yoowo aari mulipa a muhakhu ni ooweryaxa aakhanle, aahiloca: “Vano kinatxhuna olawiha opuha wa miloko-miloko.” (Eklesiyaste 2:1-10, BNM) Solomoni aahiteka empa yavasulu, nave aahipaka imaca sooreera ipaarkhi sooreeraxa nave aahipaka soothene aachuneiye. Apwanne aahikhala oohakalala ni aweeliwa murima? Vaavaa Solomoni aavarenreiye muculi wa yeeyo aapankeiye, owo aahiloca: “Kosuwela vano wi sothene hinnaroromeleya.” nave owo aahaaceererya: “Mw’elaponi mu sothene inoneya okhala sohiphur’etxhu.” (Eklesiyaste 2:11, BNM) Apwanne munnahuserya echu orweela wa yaweereya ya Solomoni?

15. Ntakhara heeni munnachuna nroromelo, nave nni nookhaviheryeni hai hiiha ntoko nihusenryaahu mu Salumu 32:8?

¹⁵ Achu akina anahuserya echu mookumini pahiru moorweela wa opaka soocheka ni ohooseya ni sookhumelela soonanara. Yehova hanachuna wi eyo yeereye ni nyuwo. Owo onachuna wi munwiriyane nave mmwiiwelele.  Weerano eyo ninnachuneya nroromelo, nyenya hamurwa mukhalano ekeerelani moorweela wa soothanla mpankaanyu mookumini nthowa na nroromelo nanyu. Nave Yehova harwa acuwala “muteko anyu mweenraanyu woosivela nsina nawe.” (Ahebri 6:10) Mwawiihiiha mulape mwakuru wi muteke nroromelo noolipa. Voocharela munahaala opaka soothanla saphaama mookumini nave munamoona mukhatiinyu wi Tiithi anyu awirimu onachuna yeeyo eri yaphaama wa nyuwo.—Mwaalakhanye Salumu 32:8.

16. Ntakhara heeni ninnaphwanela ovaha esisapo otaphuwa ni opharihela mwamiruku?

¹⁶ Paulo aahirepa: “Weiwo onakhalawo Munepa wa Apwiya, wookhalawo otaphuwa.” (2 Korinto 3:17) Yehova onnasivela otaphuwa, nave oopatunseeni wi musiveleke otaphuwa. Nyenya owo onachuna wi mpharihele otaphuwa wanyu mwa miruku wi wookhapeleleeni. Akhweya asinthamwene anyu annoona epwitikiri, annacapaheya, annahela va yawoopiha ikumi saya epakaka mapokha, naari annalya mirece naari owuryasa eviinyu. Woopaceryani ichu seiya inakhala wi ti saphaama naari soohakalaliha, nyenya wiiliwiili sinnahoolela sookhumelela soonanara, hiiha ntoko ireca, yookhovelela ya owurya eviinyu naari olya mirece, naari ophiyerya okhwa. (Galasya 6:7, 8) Amiravo ni asimwali yaawo avoloweliwe ni ichu seiya akhweya anuupuwela wi ari ootaphuwa, nyenya hooye.—Tito 3:3.

17, 18. (1) Mmukhalelo taani omwiiwelela Muluku onnaneeriha okhala ootaphuwa chiryene? (2) Mmukhalelo taani Atamu ni Eva yaaryaayano otaphuwa waapwaha achu olelo?

¹⁷ Mmukhalelo mukina, omwiiwelela Yehova ti yaphaama wa hiyo. Eyo ti yaphaama ntakhara okumi ahu nave ennaneeriha okhala ootaphuwa chiryene. (Salumu 19:7-11) Nave vaavaa munapharihelaanyu otaphuwa wanyu mwa miruku, eyo ti wi, vaavaa munathanlaanyu wiiwelela malamulo ni malakiheryo awookololowa a Muluku, munnamooniherya Muluku ni asitiithinyu wi mohunnuwa. Asitiithinyu akhweya anamoororomelaani vancipale nave anamoovahaani otaphuwa wawaaca. Nave Yehova onnaroromeliha wi moohilekela onahaala waavaha akapuro awe oothene oororomeleya otaphuwa wawaakhwanela, yoowo Piipiliya oniichaneiye “onethi [otaphuwa] mwa ovuwa wa ana a Muluku.”—Aroma 8:21.

¹⁸ Ola waari mukhalelo wa otaphuwa yoowo Atamu ni Eva yaapuhaaya. Mu emaca ya Eteni, yaarimo pahiru echu emoha yeeyo Muluku aaleenleiye wi ehipake. Awo hiyaaphwanela olya yawiima ya mwiri mmoha. (Maphatxuwelo 2:9, 17) Apwanne munuupuwela wi Muluku aari oohiroromeleya naari anrima moorweela mwa waavaha nlamulo nenla? Mweeparipari hooye! Nkuupuwelani vooloca sa waaca wa malamulo aachu apankaaya ni waakhinyererya akina wiiwelela. Nyenya Yehova amvanhe Atamu ni Eva nlamulo nimoharu pahi.

19. Tiheeni Yehova ni Yesu ananihusihaaya yeeyo eni eneerihe okhala ootaphuwa?

¹⁹ Yehova tamiruku mmukhalelo onanikhaliheiye. Ohiya onivaha malamulo mancipale, moopisa murima onnanihusiha wiiwelela nlamulo na osivela. Owo onnanihusiha okhala mwawiiwanana ni malakiheryo awe ni wiica yeeyo eri yoonanara. (Aroma 12:9) Va Mwaha wa Vamwaakoni, Yesu, oonikhaviherya wiiwexexa  ntakhara heeni achu anapakaaya ichu soonanara. (Mateu 5:27, 28) Nave mu elapo evyaani, ntoko Mwene a Omwene wa Muluku, Yesu onahaala otitela onihusiha osuwela yaphaama ni yoonanara hiiha ntoko yoowo. (Ahebri 1:9) Yesu onahaala oneeriha okhala oophaameya mmuupuweloni ni mmwiilini. Nkaanyiheryani mukhalelo eyo enahaalaaya okhala vaavaa muchu ohinahaaleiye weehiwa opaka ichu soonanara ni ohooseya nthowa na ohiphaameya. Voocharela nnahaala opuha “onethi [otaphuwa] mwa ovuwa” yoowo Yehova ororomelinheiye.

20. (1) Yehova onapharihela hai otaphuwa wawe? (2) Muni mmutakiherye hai?

²⁰ Mu elapo yahiihaano, otaphuwa wahu onahaala okhalano mphimo. Mmukhalelo taani? Elukuluku yoothene nnahaala oceenyeryeyaka moorweela wa omusivela Muluku ni akina. Vaavaa nneeraahu nnahooleliwa ni osivela, nni nnamutakiherya Yehova. Naamwi Yehova arino otaphuwa wawaakhwanela, owo onnathanla wi osivela ohoolele echu eri yoothene onapakeiye, ophitaanyerya mukhalelo onanikhaliheiye. (1 Yohani 4:7, 8) Mwawiihiiha ela ti yoophwanelela osuwela wi nnanwerya okhala ootaphuwa pahiru vaavaa nnamutakiheryaahu Muluku.

21. (1) Tavite oona hai vooloca sa Yehova? (2)  Tiheeni nnahaalaahu othokororya mmwaha woocharela?

²¹ Apwanne munnathamalela ichu soothene saphaama Yehova onoovaheiyeeni? Owo onnoovahaani yoolya yoomunepani, asinthamwene aphaama, soolakelela irino yootaphulela, ewehereryo ya okhalano otaphuwa wawaakhwanela muhoolo, ni soovaha ikina saphaama. (Salumu 103:5) Nyuwo akhweya munnoona ntoko Tavite vaavaa aavekenleiye mmasu anaphwanyeya mu Salumu 16:11: “Munarwa mukithoonyerya ephiro yookumi, mukivonihe ni ohakalala vamiithoni vanyu, nave murecele woohimala ontatani wanyu.” Mmwaha onacharela, nnahaala othokororya iparipari ikina sasisapo inarweela mu Salumu 16. Iho inahaala wookhaviheryaani woona mukhalelo muneeraanyu mukhaleno ekumi yaphaama okhala wookhala!