1, 2. Yaweereya ya Tony enooniherya hai wi ti wooweryeya opaka matorokelo mookumini?

TOONY unnunwe ahirino atiithi awe. Owo aari nasikola a esikola ya vasulu, nyenya haapwacha ohuserya. Mweeparipari owo aahuupuwela ohiya ohuserya naamwi aahaavinrye ekalasi. Woomalani wa esumana, Tony aanaya woona ixilema naari omaliha elukuluku ni asinthamwene awe. Owo haari oowali naari haalya mirece, nyenya haarino yoolakelela ya okumi. Owo haasuwenle waakhanle wi Muluku ookhala. Nihiku nimoha, Tony aahikumana ni Anamoona a Yehova nave aahaaleela minikwa sawe vooloca sa Muluku. Awo yaahimvaha iproxura piili wi aalakhanye—A Vida—Teve um Criador? ni A Origem da Vida—Cinco Perguntas Que Merecem Resposta.

² Mu ekwaha yoocharela awo yaamusekunryaaya Tony, muupuwelo awe waahitorokeya moomalela. Owo aahaalakhanya iproxura mwawaakhwanela ophiyerya wi saahikhuneya nave saahinyotopana. Tony aahaaleela Anamoona awo: “Ookhalavo Muluku.” Aahipacerya omuhuserya Piipiliya, nave vakhaani vakhaani moonelo awe waahitorokeya. Ahaakumve opacerya omuhuserya Piipiliya, Tony haakhumelela phaama osikola, nyenya amanle opacerya  omuhuserya aanakhumelela phaama osikola wawe! Ophiyerya wi muhooleli oosikola aahitikhiniheya. Owo aahiloca wa Tony: “Wootepa opaka matorokelo matokweene mmoonelo ni ohuserya waa. Apwanne nthowa na waataana waa ni Anamoona a Yehova?” Tony aahiloca wi yaari yeeyo nave aahipacerya omuleela muhooleli oosikola yeeyo aahusenryeiye. Owo aahivira ekalaasi nave olelo onarumeela ntoko piyoneero ni murummwa oorumeela. Tony ootepa ohakalala woona wi owo vano ookhalano Tiithi oosivela, Yehova!—Salumu 68:5

3. Ekano taani Yehova onaavaheiye amiravo ni asimwali?

³ Yaweereya ya Tony ennanuupuserya wi Yehova onnaathokororya amiravo ni asimwali. Owo onachuna wi ekhumelele phaama mookumini, mwawiihiiha owo onnaalopola wi emuupuwele ‘yoowo aapatunshe elukuluku ela aryaaya amiravo.’ (Eklesiyaste 12:1) Wiiliwiili ela tahi yookhweya, nyenya ti yooweryeya. Nnikhaviheryo na Muluku, munanwerya okhalano okumi wamphurelo vaavaa muryaanyu mmiravo naari mwali ni vaavaa muneeraanyu munnuwe. Wi nikhaviheryeye wiiwexexa phaama ela, nnahaala othokororya yeeyo yaakhavihenrye Aisarayeli ovootha Elapo ya Nlakano ni yeeyo yaamvanhe Tavite ikuru wi amvoothe Koliyati.

4, 5. Nihusiheryo taani nookhweleya nnahuseryaahu orweela wa mukhalelo Aisarayeli yaavonthaaya Akanani ni mukhalelo Tavite amvontheiye Koliyati? (Moone iruku soopacerya.)

⁴ Elukuluku Aisarayeli yaahaalaaya vakhaani ovolowa mu Elapo ya Nlakano, mahusiheryo taani Yehova aavanheiye? Apwanne aalenle wi ekhale akhoco oophwanelela naari wi yiivyakihe ntakhara ekhoco? Hooye! (Malamulo 28:1, 2) Owo aalenle wi emwiiwelele nave emuroromele. (Yosuwa 1:7-9) Wa achu ekano ela akhweya hiyaaphara muteko, nyenya eyo yaari ekano yoophwanelela wa Aisarayeli. Vakhaani vakhaani, Yehova aahaakhaviherya achu awe waavootha Akanani. (Yosuwa 24:11-13) Ninnachuneya nroromelo wi muchu amwiiwelele Muluku, nyenya nroromelo nlo wiiliwiili ninnakumiherya mphurelo. Ela yaari yeeparipari khalai, nave ti yeeparipari mmahiku ahu.

⁵ Koliyati aari mukhoco oowerya. Owo aarino echu ya meeturu mararu orekama wawe, nave aanateesa nivaka nawoopiha. (1 Samuwele 17:4-7) Mmukhalelo mukina, Tavite, aarino pahiru esapala ni nroromelo nawe mwa Muluku. Muchu ohirino nroromelo aahaala wuupuwela wi Tavite aari mulolo weererya owana ni Koliyati! Nyenya mweeparipari, Koliyati taari mulolo.—1 Samuwele 17:48-51.

6. Tiheeni nnahaalaahu othokororya mmwaha yoola?

⁶ Mmwaha ovirale, noothokororya ichu sese sini sinikhaviherye okhala oohakalala ni okhumelela phaama mookumini. Noohuserya wi ninnachuna okhapelela soothowa sahu soomunepani, waapaka asinthamwene aphaama yaawo anamusivela Muluku, otikitherya soolakelela irino yootaphulela, ni ovaha esisapo otaphuwa weiwo Muluku onivanheiye. Mmwaha ola, nnahaala othokororya mikhalelo mincipale moorweela wa weerano ichu seiya saphaama. Wi neereno yeeyo, hankooni nthokororye malakiheryo makina anaphwanyeya mu Salumu 16.

7. (1) Mwaahaala omuthariha hai muchu orino muupuwelo woomunepani? (2) Tiivi yaari “yohiyeryiwa” ya Tavite nave eyo yamvolowenle hai?

⁷ Muchu orino muupuwelo woomunepani ookhalano nroromelo mwa Muluku nave onneererya woona ichu hiiha ntoko Muluku. Owo onnamuhiya Yehova ohoolele okumi awe nave ori oolakelela omwiiwelela. (1 Korinto 2:12, 13) Tavite yootakiherya yaphaama ya muchu orino  muupuwelo woomunepani. Owo aahiipa: “Nyuwo, Pwiya, muri yohiyeryiwa aka.” (Salumu 16:5, BNM) Tavite aahithamalela “yohiyeryiwa” awe, onthamwene awe wawaacameleya ni Muluku, nave aahimuroromela yoowo. (Salumu 16:1) Ntoko yookhumelela, owo anwerya oloca: “Munepa aka onnahakalala.” Hiyaavovo echu ekina yaamuhakalalinhe Tavite opwaha onthamwene awe wawaacameleya ni Yehova!—Mwaalakhanye Salumu 16:9, 11.

8. Ichu taani sini siweeriheeni okhala aweeliwa murima mookumini chiryene?

⁸ Achu yaawo anatikitherya muupuwelo aya mu ikhorowa naari soopuha hanawerya okhalano ohakalala wawaaca ntoko Tavite aareiyeno. (1 Timóteo 6:9, 10) Munna o Kanata ooloca: “Ohakalala weeparipari onarwa, ohiya wa yeeyo nnaweryaahu okhalano mookumini, nyenya moorweela wa yeeyo nnamvahaahu Namavaha a yoovaha yoothene yaphaama, Yehova Muluku.” (Tiyako 1:17) Wakhala wi mohunnuwiha nroromelo mwa Yehova ni omurumeela yoowo, munahaala okhalano okumi woohakalaliha nave orino yootaphulela yeeparipari. Mwawiihiiha tiheeni munaphwanelaanyu opaka wi nroromelo nanyu nikhale noolipa? Munaphwanela omaliha elukuluku yincipale ni Yehova moorweela wa waalakhanya Masu awe, ovarerya ichu saphaama opatunseiye, ni wuupuwelela vooloca sa mikhalelo sawe, ophitaanyerya osivela wawe ntakhara nyuwo.—Aroma 1:20; 5:8.

9. Muni mweemererye hai Masu a Muluku wi ewuupeeni?

⁹ Ikwaha ikina Muluku onnooniherya osivela wawe ntakhara hiyo moorweela wa onlaka vaavaa onachuneyaaya, hiiha ntoko tiithi oosivela onapakeiye. Tavite aanavaha esisapo olaka wuuwu nave aahiloca: “Kinarwa kaathamala Apwiya, ntakhara annakivaha miruku. Nari ohiyu, mmurimani mwaka annakihusiha.” (Salumu 16:7) Tavite aahuupuwelela muupuwelo wa Muluku nave aaheeriha opaka makupa a muupuwelo awe. Owo aaheemererya muupuwelo wa Muluku wi omuupe, eyo ti wi, owo aaheemererya muupuwelo wa Muluku omutoroka wi akhale muchu oophwanelela. Vaavaa munapakaanyu emohamoha, nsivelo nanyu wa Muluku ni nchuno nanyu na omuhakalaliha nnahaala wunnuwa, nave munamukhala Mukristu awiichwelavo. Murokora oniichaniwa Kristina olonce wi elukuluku onatholatholeiye ni wuupuwelela seiyo onaalakhanyeiye, owo onoona wi Yehova aarempe ichu seiyo pahiru ntakhara yene!

10. Hiiha ntoko nihusenryaahu mu Isaiya 26:3, okhalano muupuwelo woomunepani oni wookhaviheryeeni hai?

¹⁰ Vaavaa munakhalaanyuno muupuwelo woomunepani, munahaala woona elapo ni omwaahiyu aya hiiha ntoko Muluku onooneleiye. Yehova ohoovahaani masuwelelo yaala avasulu ni miruku. Ntakhara heeni? Owo onachuna wi musuwele yeeyo eri yoochuneya muukumini, wi mpake soolakelela mwa miruku, nave mvareryeke omwaahiyu muhoovaka! (Mwaalakhanye Isaiya 26:3.) Munna mmoha oniichaniwa Yosuwa, yoowo onakhala o Estatu Unitu, olonce wi wakhala wi mootitelela omwaacamela Yehova, munahaala woona mookwakwaleya yeeyo eri yoochuneya nave yeeyo ehiri yoochuneyaxa.

11. Tavite aathanlile hai asinthamwene awe?

¹¹ Mwaalakhanye Salumu 16:3, NN. Tavite aahisuwela mukhalelo wa waaphwanya asinthamwene aphaama. Owo aathanla yaale yaamusivela Yehova wi ekhale asinthamwene awe nave eyo yaanamvaha ‘ohakalala wothene.’ Owo aahaaloca asinthamwene awe ntoko “awéla murima” nthowa nawi awo yaaneererya ochariha makhalelo aweela a Yehova. Mulipa a masaalimu mukina aahoona mmukhalelo woolikana vooloca sa waathanla asinthamwene nave aahirepa: “Miyo ka awaataanano oothene anawoovaani nyuwo, ni yaawo anathokororya ikano  sanyu.” (Salumu 119:63) Ntoko nimanlaahu othokororya mmwaha ovirale, nyuwotho munanwerya waaphwanya asinthamwene aphaama variyari va yaale anamusivela ni omwiiwelela Yehova. Nave mweeparipari, tahi woochuneya asinthamwene anyu okhala yaale munalikanaanyuno iyaakha.

12. Ntakhara heeni Tavite ni Yonata yaahikhala asinthamwene aphaama?

¹² Tahi wi Tavite aathanlile yaaleru aalikaneiyeno iyaakha wi ekhale asinthamwene awe. Apwanne mwanwerya omuromola mmoha a asinthamwene a Tavite? Akhweya munammuupuwela Yonata. Onthamwene variyari va Tavite ni Yonata onthamwene omoha wooreeraxa nnaalakhanyaahu Mpiipiliyani. Nyenya apwanne moosuwela wi Yonata aarino iyaakha makhumi mararu ompwaha Tavite? Ntakhara heeni yaaryaaya asinthamwene aphaama? Onthamwene aya waathipelen’ye mu nroromelo naya mwa Muluku. Awotho yaanacicimihana mukina ni mukhwaawe nave yaanavaha esisapo mikhalelo saphaama sa mukina, hiiha ntoko olipa murima muchu ti muchu oonihenryeiye vaavaa yaawanaaya ni amwiicani a Muluku.—1 Samuwele 13:3; 14:13; 17:48-50; 18:1.

13. Muni nwerye hai waapaka asinthamwene ancipale? Mvahe yootakiherya.

¹³ Ntoko Tavite ni Yonata, nnanwerya okhalano ‘ohakalala wothene’ wakhala wi noopaka onthamwene ni yaale anamusivela Yehova nave arino nroromelo mwa yoowo. Kiyera, yoowo onamurumeela Muluku mu iyaakha sincipale, ooloca wi, “kohaapaka asinthamwene ni achu orukurerya elapo, achu a muyareriwo ni sookhovelela soohiyana hiyana.” Elukuluku muneeranyuno emohamoha, munahaala woona mukhatiinyu mukhalelo Piipiliya ni munepa waweela inaneerihaaya okhala emusi emoha ya alapeli a elapo yoothene.

14. (1) Muni mutikitherye hai soolakelela samphurelo mookumini? (2) Tiheeni amiravo akina aloncaaya ntakhara soolakelela saya?

¹⁴ Mwaalakhanye Salumu 16:8. Wa Tavite, omurumeela Muluku yaari echu yookhweleyasa. Wakhala wi moomutakiherya Tavite vaavaa munatikitheryaanyu soolakelela ni wiiliwiili wuupuwela vooloca sa yeeyo Yehova onachuneiye wa nyuwo, voocharela okumi anyu onamukhala woohakalaliha. Munna oniichaniwa Steven ooloca: “Olapa ntakhara yoolakelela, okhwaaniherya eyo, ni oweha muculi ni woona  matorokelo kipankaaka ennakiruuhela ohakalala.” Munna mmiravo o Alemanya yoowo onarumeela mu elapo ekina ooloca: “Kuuluvala, nkinachuna oweha muculi vooloca sa okumi aka nave kisuwele wi yoothene kipankaaka yaari pahiru ntakhara miyo.” Apwanne munuupuwela mmukhalelo woolikana? Voocharela mpharihele mavyakelo ni osuwela wi mmuruuhele ncicimiho Muluku ni mwaakhaviherye achu akina. (Galasya 6:10) Mutikitherye soolakelela mmuteko wa Yehova nave mumveke wi ookhaviheryeeni okhwaaniherya soolakelela seiyo. Muroromele wi onahaala waakhula mavekelo anyu!—1 Yohani 3:22; 5:14, 15.

15. Soolakelela taani akhweya munaphwanelaanyu otikitherya? (Moone ekaaxa “ Soolakelela Ikina Sawuupuwelela.”)

¹⁵ Tisivi siri soolakelela mwaahaalaanyu otikitherya? Hanka vooloca sa weererya ovaha maakhulo mmasu anyu mmithukumano? Naari ntakhara heeni hamunapaka yoolakelela ya orumeela ntoko piyoneero naari orumeela o Peteli? Nyuwo munanwerya weererya ohuserya elocelo evyaani wi nwerye opharihela wuuka michaka saphaama ni achu ancipale. Paraki yoowo ori mmiravo onarumeela mmuteko wa elukuluku yoothene ooloca: “Ovinya nihiku ti nihiku kisuwelaka wi kinamvaha Yehova ikuru saka soothene owo mukhalelo yoowo muteko mukina ohinaweryaaya okumiherya.”

16. Tavite oona hai vooloca sa malamulo ni malakiheryo a Yehova nave ntakhara heeni?

¹⁶ Mwaalakhanye Salumu 16:2, 4, NN. Hiiha ntoko nihusenryaahu mmwaha ovinre, vaavaa nnakhalaahu mwawiiwanana ni malamulo ni malakiheryo a Muluku, ninnakhala ootaphuwa chiryene. Ninnahuserya osivela yeeyo eri yaphaama ni wiica yeeyo eri yoonanara. (Amosi 5:15) Tavite aahiloca wa Yehova “Nkinono yaphama ekina yawopwahani Nyuwo.” Sooreera soothene meecelo oophwanelela. Yehova taphaama mu echu eri yoothene onapakeiye, ni yoothene yaphaama nryaahuno enarweela wa yoowo. Tavite aahiilipiserya olapa mwakuru wi amutakiherye Muluku nave wi asivele ichu seiyo Yehova onasiveleiye. Nyenya Tavite aahihuseryatho wiica yeeyo Muluku onaloceiye wi ti yoonanara. Emoha ya ichu seiyo ti soophwaniherya, yeeyo eri omulapela muchu naari echu ompwaha Yehova. Soophwaniherya sinnaayeviha achu nave sinnamwaakha Yehova malapelo onaphwaneleiye.—Isaiya 2:8, 9; Wupulula 4:11.

17, 18. (1) Tiheeni Tavite olonceiye sa sookhumelela soonanara sa malapelo atheru? (2) Tiheeni enaweeriha achu olelo waaceererya “othanana waya”?

¹⁷ Mu ilukuluku sakhalai, ocapaheya wiiliwiili waanapaka makupa mmalapelo atheru. (Oseya 4:13, 14) Achu ancipale yaanasiveliwa ni malapelo atheru nthowa nawi yaanapuha ocapaheya, nyenya apwanne malapelo yaawo yaanaweeriha okhala oohakalala? Mweeparipari hooye! Tavite aahiloca wi yaawo anaalapela amuluku atheru annaaceererya “Othanana waya.” Achu yaawo yaanaphiyerya waavaha mikucho anaaya wa amuluku atheru! (Isaiya 57:5) Yehova aaniica wuuma waya murima. (Yeremiya 7:31) Waakhanle wi mookhala mu mahiku yaawo, mwaahaala ohakalala vancipale waakhanle wi asitiithi anyu yaanamulapela Yehova!

¹⁸ Mmahiku yaala, malapelo mancipale atheru anneemererya ocapaheya, ophitaanyerya okonihana wa achu oolikana mwiikho. Mukhalelo woocapaheya akhweya onanweeriha achu wuupuwela wi ari ootaphuwa, nyenya mweeparipari awo anaaceererya “othanana waya.” (1 Korinto 6:18, 19) Apwanne montoko woona yeela? Mwawiihiiha, amiravo ni asimwali, munwiriyane Tiithinyu awirimu. Mooniherye wi ti yaphaama wa nyuwo omwiiwelela Muluku. Muupuwele mwawiiseela vooloca sa sookhumelela sa ocapaheya. Munahaala woona wi ohakalala ocapaheya onaruuhaaya ti weelukuluku  tonto nalikanyiha ni soowaawa onakumiheryaaya. (Galasya 6:8) Yosuwa, yoowo nimuloncaahu woopaceryani, ooloca: “Nnanwerya opharihela otaphuwa mmukhalelo vyakala nnachunaahu, nyenya opharihela moonanara honakumiherya ohakalala.”

19, 20. Mareeliho taani anahaalaaya waakhela amiravo ni asimwali yaawo arino nroromelo mwa Yehova nave anamwiiwelela yoowo?

¹⁹ Yesu aahiloca: “Moomwi mukhalaru mmasu aka, muri chiri oohuserya aka; munarwa musuwela eparipari nave eparipari eyo enamootaphulaani.” (Yohani 8:31, 32) Wa nthowa na Yehova, nri ootaphuwa orweela wa malapelo atheru, ohisuwela, ni mihapo. Muhoolo, ninnaweherya okhalano “onethi wa nchichimiho na anamwane a Muluku.” (Aroma 8:21, NN) Nyuwo munanwerya opuha otaphuwa okina hiihaano vaavaa munacharihaanyu mahusiheryo a Kristu. Mmukhalelo yoola, munahaala ‘osuwela eparipari’ ohiya pahiru moorweela wa ohuserya vooloca sa yeeyo nyenyatho moorweela wa okhala mwawiiwanana ni yeeyo!

²⁰ Amiravo ni asimwali, mucicimiherye otaphuwa yoowo Muluku oovanheiyeni. Mpharihele mwa miruku. Otaphuwa yoowo onahaala wookhaviheryaani opaka soolakelela hiihaano seiyo inahaala woohoolelaani omwaahiyu waphaama. Mmiravo mmoha ooloca: “Opharihela otaphuwa mwa miruku ntoko mmiravo mweeparipari onamukhaviherya elukuluku yeeyo muchu onahaaleiye ohoolela soolakelela itokotoko, hiiha ntoko ophwanya muteko waphaama naari othanla waakhanle wi muchu onnaphwanela othela naari otitelela muchu ari muciye ophiyerya elukuluku yammoori.”

21. Muni mphwanye hai “okumi weeparipari”?

²¹ Mu elapo yeela ehanle vakhaani omala, naamwi yeeyo achu anoonaaya okhala okumi waphaama ti wookotakota. Haavo muchu onasuwela echu eni ephacuwe omeelo. (Tiyako 4:13, 14) Mwawiihiiha echu yaphaama munaphwanelaanyu opaka ori othanla yeeyo enahaala wookhaviheryaani ophwanya “okumi weeparipari”—ekumi yoohimala mu elapo yooreera yahiihaano ya Muluku. (1 Timóteo 6:19) Yehova hanamukhinyererya muchu omurumeela. Eyo eri wa muchu ti muchu a hiyo olakelela yeeyo onahaleiye opaka. Mwawiihiiha mumpake Yehova “yohiyeryiwa” anyu moorweela wa olapa nihiku ti nihiku wi mmwaacamele yoowo, nave mucicimiherye “saphaama” soothene owo onoovaheiyeeni. (Salumu 103:5) Muroromele wi Yehova onamoovahaani ohakalala ni weeliwa murima wawaaca okhala wookhala!—Salumu 16:11.