TIYANA orino iyaakha opwaha makhumi mathanu namararu nave aahihooseya vancipale mu iyaakha vakhaani ivirale. Iyawe, yoowo aarino Ereca ya ohilapa phaama wa ocoopare navetho aari mu empa ya alipa murece, aahikhwa. Anaawe tho eeli yaahikhwa, nave owo aanahooseya ni kanser a vanipeleni. Nyenya vaavaa anna ni arokora anamoonaaya Tiyana mmithukumano naari mmuteko woolaleerya, wiiliwiili owo onakhala oohakalala.

Yohani aari ooweherya ekulucu opwaha iyaakha makhumi masese namararu. Owo aanasivela vancipale orummwa awe nave haawerya waanyiherya opaka echu vyakala. Nyenya, aahimaala orumeela ntoko ooweherya ekulucu wi amukhaviherye mmusi awe iiceliwa. Anna ni arokora yaawo amusuwenle Yohani vaavaa anakumanaayano mmithukumano sa ekulucu, naari sa muceche, awo annaloca wi owo hatoroken’yeru. Nlelo owo toohakalala.

Tiyana ni Yohani anawerya hai okhalano ohakalala? Muchu yoowo onahooseya ani awerye hai okhala oohakalala? Muchu ani awerye hai okhala oohakalala wakhala wi oohiya murici yoowo onasiveleiye? Piipiliya onnanivaha naakhulo. Owo oni: “Awokololowa annahakalala mw‘Apwiya.” (Salumu 64:10) Nnanwerya wiiwexexa phaama eparipari yeela wakhala wi noosuwela yeeyo eni enivahe ohakalala woohikota ni yeeyo eni ehinivahe.

Ichu ikina wiiliwiili sinnaruuha ohakalala. Ntoko yootakiherya, nkuupuwela sa mutheli yoowo onapaka othela nthowa na osivela. Naari nkuupuwelani sa mutheli yoowo onakhala tiithi naari muchu yoowo aakhenle murici muvyaani mmuteko wa Yehova. Ichu seiya sinnaruuha ohakalala woona wi siri soovaha sinarweela wa Yehova. Owo oonivaha othela, owerya wa okhalano anamwane, nave muteko wi nipake mmarehereryo awe.—Maphatxuwelo 2:18, 22; Salumu 127:3; 1 Timóteo 3:1.

Nyenya, ichu ikina seiyo inaruuha ohakalala inanwerya okhala sa elukuluku vakhaani. Moothananiha, oothelana onanwerya okhala oohiroromela naari okhwa. (Ezekiyeli 24:18; Oseya 3:1) Anamwane ananwerya ohiwiiwelela asitiithi ni Muluku, nave akhweya ophiyerya wiikariwa mmulokoni. Ntoko yootakiherya, anamwane a Samuwele hiyaamurumeela Yehova mwaweemereryeya, nave Tavite aahikhalano makacamiho mancipale mu emusi awe  nthowa nawi owo aahicheka ni Patesepa (1 Samuwele 8:1-3; 2 Samuwele 12:11) Elukuluku ichu ntoko seiha sineereyaaya, iho hasinaruuha ohakalala nyenya othanana ni wiicela otokotoko.

Moolikana, ilukuluku ikina hinni ntitelele okhalano murici mmuteko wa Yehova nthowa na wiiceliwa naari omukhapelela mmusi ahu yoowo oniiceliwa, naari nthowa nawi aakhalavo matorokelo mmarehereryo. Ancipale yaawo ahin’ye murici aya alonce wi aayeleela ohakalala yoowo murici owo waavahaaya.

Nnanwerya woona mookhweya wi mathowa ntoko yaala a ohakalala wiiliwiili haniikhalelaru. Apwanne wookhalavo mukhalelo mmoha wa ohakalala yoowo oniikhalelaru naamwi elukuluku okumi onakhalaaya wookacamiha? Enooneya wi wookhalavo, nthowa nawi Samuwele, Tavite, ni akina hiyaayelenle ohakalala waya vaavaa yaahoolelaaya saweeha.

Yesu aahisuwela yeeyo eri ohakalala weeparipari. Ahaakumve orwa veelaponi yavathi, Piipiliya onnanleela wi ‘aanachapa tho vamiithoni [va Yehova] elukuluku yoothene.’ (Masiposipo 8:30) Nyenya vaavaa aaruuleiye veelaponi yavathi, ikwaha ikina aanaahoolela makacamiho matokweene. Naamwi hiiha, Yesu aahikhalano ohakalala mu weerano yookhwela ya Tiithi awe. (Yohani 4:34) Hanka vooloca sa iwora sawe sookuchula? Ninnaalakhanya: “Wa nthowa na otheya othonyeriweiye, vaiye aavilelano [mwiri].” (Ahebri 12:2) Mwawiihiiha nnanwerya ohuserya ichu piili wa yeeyo Yesu aalonceiye sa ohakalala weeparipari.

Oohuserya makhumi mathanu napiili yaahikooka emanle olaleerya. Awo yaatepa ohakalala nthowa na ichu soothene yaapankaaya, ophitaanyerya okumiha masololo. Nyenya Yesu aahiloca wa yaawo: “Muhihakalale vawi minepa sinnawiiwelelaani; muhakalale masina anyu orempwa wirimu.” (Luka 10:1-9, 17, 20) Chiryene, okhalano weemereryiwa wa Yehova echu yookhweleyasa nave ennaruuha ohakalala otokotoko opwaha murici vyakala wa vameekhaaya.

Elukuluku ekina, Yesu alocaka ni muloko, muthiyana yoowo aari Muyuta aahitikhiniheya moorweela wa mahusiheryo awe ophiyerya oloca wi amai a Yesu yaaphwanela ohakalala vancipale nthowa na  okhalano mwaana sintoko yoowo. Nyenya Yesu aahaakhula: “Opwaha yeeyo, ooreeriwasha ti yaawo aniiwa masu a Muluku enachariha”! (Luka 11:27, 28) Okhalano anamwane ennanihakalaliha vatokovene. Nyenya echu enanivaha ohakalala woohimala ori omwiiwelela Yehova ni okhalano onthamwene waphaama ni yoowo.

Ninnakhalano ohakalala otokweene vaavaa nnasuwelaahu wi Yehova onnasiveliwa ni hiyo. Nave naamwi saweeha ihihakalalihaka, iho hasinaphwanela oviihavo moonelo yoola wa hiyo. Mweeparipari, vaavaa nnatitelelaahu okhala oororomeleya variyari va saweeha, ohakalala wahu onnapwahererya. (Aroma 5:3-5) Navetho Yehova onnaavaha munepa awe yaale anamuroromela yoowo, nave ohakalala makupa a sawiima sa munepa. (Galasya 5:22) Ela ennanikhaviherya wiiwexexa ntakhara heeni Salumu 64:10 olonceiye: “Awookololowa murima ehakalale mwa Apwiya.”

Ela ennathariha ntakhara heeni Tiyana ni Yohani yaahaalaaya owerya otitelela ohakalala naamwi ehoolelaka makacamiho. Tiyana ooloca: “Kinnachawela mwa Yehova, ntoko mwaana onapakeiye ni tiithi naari mai awe.” Owo ohaaceererya: “Kinnoona wi Yehova ookireeliha ni owerya wa otitelela olaleerya kooniheryaka otheya wiithoni waka.” Tiheeni yaamukhavihenrye Yohani otitelela ohakalala ni oweiwa mmuteko woolaleerya amanle ohiya murici awe? Owo ooloca: “Ovinyerya mu 1998 vaavaa kaathanliwaaka okhala muhusiha a Exikola ya Arummwa, kaahipaka vancipale yoohuserya ya muchu mukhateiye opwaha khalai.” Owo oothariha wi matorokelo opankeiye ni mwaariye yaari ookhweya nthowa nawi ilukuluku soothene yaari ooreheryeya opaka yeeyo Yehova aavekeiye weera. Owo ohaaceererya: “Naanapaka yeeyo nihirino ekeerelani.”

Achu ancipale ahoona wi yeeyo Salumu 64:10 onaloceiye ti yeeparipari. Muthokororye yootakiherya ya mutheli yoowo aarumeela o Peteli mu iyaakha makhumi mararu o Estatu Unitu. Awo yaahithanliwa okhala mapiyoneero avameekhaaya. Awo anneemererya: “Othanana mukhalelo wooyariwano vaavaa muchu onayeleeleiye echu yeeyo onasiveleiye,” nyenya awo annaaceererya: “Honi othanane okhala wookhala.” Moohilekela vaavaa yaakelaaya mu orummwa aya ovyaani, awo yaahipacerya olaleerya vamoha ni muloko. Awotho aaloca: “Naahivekela vooloca sa ichu ikina sincipale. Voocharela woona waakhuliwa wa mavekelo ahu eyo yaahinilipiha ni yaaniruuhela ohakalala. Moohilekela nimanle ophiya, akina mmulokoni yaahipacerya opiyoneero, nave naahireelihiwa ni soohuserya sa Piipiliya piili seiyo saakele vahoolo.”

Mweeparipari, wiiliwiili tahi wookhweya okhala oohakalala. Inamukhalavo ilukuluku nneeraahu nikhale oothanana. Nyenya Yehova onnanilipiha ni masu anaphwanya mu Salumu 64:10. Naamwi elukuluku nnakhalaahu awuukhuwa, nnaphwanela ororomela wi wakhala wi nootitelela okhala oororomeleya moohipwacha nikacamiho nnahoolelaahu, ‘nnahaala ohakalala mwa Apwiya.’ Nnaphwanelatho oweherya elukuluku yeeyo yoororomeliha ya Yehova ya “erimu yahihano ni elapo yahihano” eneeraaya yaakhwanele. Voocharela muchu ti muchu onahaala okhala oophaameya nave onahaala ‘otheya mahiku oothene’ nthowa na soothene seiyo Yehova onahaaleiye opaka.—Isaiya 65:17, 18.

Mwaanyiherye yeeyo ela enahaalaaya otaphulela. Nnahaala okhalano okumi woophaameya nave nnahaala ovinyaka nihiku ti nihiku nrino ikuru sawaaca. Moohipwacha ichu taani seeren’ye khalai seiyo saaneerinhe okhala oothanana, iho hisirwa sineeriha woona wiicela. Yehova onnaniroromeliha wi “ichu sa khalayi hisuupuweleliwa tho, naari waanyiherya mano.” Nnahaala owaakhela oosiveliwa ahu yaawo akhwile nave nnahaala woona ntoko asitiithi a nahano a iyaakha khumi napiili yoowo Yesu aamviihaleiye: Awo “yaatepa otikhina.” (Marko 5:42) Mwawiihiiha, muchu ti muchu veelaponi onahaala okhala awookololowa chiryene nave onahaala ‘ohakalala mwa Apwiya’ okhala wookhala.