1, 2. Tiheeni Ahebri 13:4 onanceenyeryeiye opaka?

OOTHENE ahu ninnachuna omucicimihaka Yehova. Owo onnaphwanela waakhela ncicimiho nahu, nave owo onnaniroromeliha onicicimiha tho. (1 Samuwele 2:30; Masiposipo 3:9; Wupulula 4:11) Owo onachunatho wi naacicimiheke achu akina, hiiha ntoko alamuleli. (Aroma 12:10; 13:7) Nyenya aakhalavo makupa avameekhaaya nnaphwanelaahu wooniherya ncicimiho. Makupa awo ti othela.

² Murummwa Paulo oorepa: “Othela ocicimihiweke ti achu oothene, okumanela wa atheli okhaleke woohichekeliwa.” (Ahebri 13:4) Tahi wi Paulo aavaha sooleeliherya soothene vooloca sa othela. Owo aahaaleela Akristu ocicimihaka othela, eyo ti wi, woonaka ntoko echu yasisapo. Mmukhalelo taani munoonaanyu othela, xaxaxa othela wanyu waakhanle wi nyuwo mwa mutheli?

3. Ekano taani yoochuneya vooloca sa othela Yesu ovanheiye?

³ Wakhala wi munnoona othela ntoko echu yasisapo, nyuwo munnachariha yootakiherya yaphaamasa. Yesu aahicicimiha othela. Vaavaa Afarisi yaamukonhaaya vooloca sa omwalana,  owo aahithariha yeeyo Muluku aalonceiye vooloca sa othela woopacerya: “Mwa nthowa nenla, mulopwana aahiyeke atiithinya ni amannya, aphitaane ni mwaariye, nave ala enii ekhale mwiili mmoha, vano hari eeli, nto mwiili mmoharu.” Yesu ahaaceererya: “Yeeyo Muluku ophitaannyeiye, muchu ahimwalanye.”—Mwaalakhanye Marko 10:2-12; Maphatxuwelo 2:24.

4. Teevi yaari yoolakelela ya Yehova ntakhara othela?

⁴ Yesu aahisuwela wi Muluku ti yooworu aapatunse othela nave wi othela waaphwanela okhala wawiikhalelaru. Vaavaa Muluku aapankeiye othela woopacerya, owo haamulenle Atamu ni Eva wi awo yaanwerya omwalana. Ohiya yeeyo, yoolakelelaawe yaari yawi “eeli” awo yiikhaleleru awiiwanana mu othela waya okhala wookhala.

5. Mmukhalelo taani okhwa onavolowelaaya othela?

⁵ Nyuwo moosuwela wi, vaavaa Atamu aachenkeiye, ichu sincipale saahitorokeya. Emoha ya matorokelo yaawo ti yawi achu yaahipacerya okhwa, nave matorokelo awo yaahivolowela othela. Murummwa Paulo aahaatharihela Akristu wi okhwa waahala omalihaka othela nave wi ole ahaala okhala mukumi aari ootaphuwa othela naari otheliwa wanaawiili.—Aroma 7:1-3.

6. Tiheeni Nlamulo na Mose nnanihusihaaya vooloca sa moonelo wa Muluku vooloca sa othela?

⁶ Nlamulo Muluku aavanheiye Aisarayeli naanavaha sooleeliherya vooloca sa othela. Ntoko yootakiherya, mulopwana Muisarayeli aakhala aweemereryiwa okhalano muthiyana opwaha mmoha. Yookhovelela ela yaahikhalavo ovinyerya Muluku ahaakumve ovahererya Nlamulo. Mwawooneya, Nlamulo naanamukhapelela muthiyana ni anamwane ohikhalihiwa moonanara. Ntoko yootakiherya, wakhala wi mulopwana Muisarayeli omuthenle kapuro nave moovira wa elukuluku aamuthela muthiyana mukina, owo aaphwanela okhapelela soothowa sa mwaariye opacerya ntoko eereleiye khalai. Yoochuna ya Muluku yaari wi atitelele omwaakiha ni omukhapelela. (Mukwaha 21:9, 10) Hiyo hannachariha  Nlamulo na Mose olelo. Nyenya ninnanihusiha wi Muluku onoona othela ntoko echu yasisapo. Mweeparipari ela ennanikhaviherya ocicimiha othela.

7, 8. (1) Tiheeni Nlamulo naalocaaya sa omwalana mwawiiwanana ni Malamulo 24:1? (2) Tuuvi ori moonelo wa Yehova vooloca sa omwalana?

⁷ Tiheeni Nlamulo naalocaaya ntakhara omwalana? Naamwi Yehova ahintonko wuupuwela wi mulopwana ni mwaariye emwalane, Nlamulo naanamweemererya mulopwana Muisarayeli omwalana ni mwaariye wakhala wi “oophwanya mwa yoowo echu yoomuuliha muru.” (Mwaalakhanye Malamulo 24:1.) Nlamulo hinaathariha mookwakwaleya tiheeni yaaphwanela okhala “echu yoomuuliha muru.” Mweeparipari, yaaphwanela okhala echu yawuuliha muru naari echu yoonanaraxa nave ohiya ophuca vakhaani. (Malamulo 23:14) Moothananiha, mmahiku a Yesu Ayuta ancipale yaanamwalana ni asaaraya “ni nthowa pure.” (Mateu 19:3) Hiyo hannaphwanela winnuwiha moonelo ntoko yoowo.

⁸ Mmahiku a mulipa a miririmo Malakiya, waari wawunlaana alopwana omwalana ni asaaraya oopacerya, akhweya wi yaathele asimwali yaawo yahaamulapela Yehova. Nyenya Muluku aahooniherya vanlakani mukhalelo owo ooneiye omwalana. Owo aaloca: “Miyano kinnitxanano omwalana.” (Malakiya 2:14-16, BNM) Moonelo wa Muluku vooloca sa othela nivano hotoroken’ye ovinyerya omapacereryo, vaavaa owo aalonceiye wi mulopwana “aphitaane ni mwaariye, nave ala enii ekhaleke mwiili mmoha.” (Maphatxuwelo 2:24) Nave Yesu aahikhaviherya moonelo wa Atiithi vooloca sa othela vaavaa owo aalonceiye: “Yeeyo Muluku ophitaannyeiye, muchu ahimwalanye.”—Mateu 19:6.

9. Masu a Yesu anaphwanyeya mu Marko 10:11, 12 anataphulela eheeni?

⁹ Akina anamukoha, ‘apwanne nookhalavo nthowa wi Mukristu amwalane ni oothelanaawe nave athelane ni mukina? Muthokororye yeeyo Yesu aalonceiye: “Yoole onamwalana ni mwaariye, amuthela mukina, onamuraruwela yoole oopacerya, muthiyana amwalana ni iyawe, atheliwa ti mulopwana mukina, onamuraruwa tho.” (Marko 10:11, 12; Luka 16:18) Mweeparipari, Yesu aahicicimiha othela nave owo onaweherya wi akina yooneke mmukhalelo mmohamoha. Mulopwana yoowo onamwalana ni mwaariye oororomeleya nave amuthela mukina, owo onapaka mararuwo. Emohamoha wakhala wi muthiyana oomwalana ni iyawe oororomeleya. Omwalana pahiru honamaliha othela. Muluku nlelo onawoona atheli ntoko “mwiili mmoha.” Yesu tho aahiloca wi wakhala wi mulopwana oomwalana ni mwaariye ohirino nthowa, muthiyana owo aahaala okhala va yawoopiha ya opaka mararuwo. Eyo yaahaala oweryeya hai? Tiwi, muthiyana ohiiwe aahaala wuupuwela wi aaphwanela otheliwa wanawiili wi aweryeke wiivakulela. Othela sintoko yoowo waahaala okhala ntoko oraruwa.

10. Tinivi nri nthowa nimoharu na Mukristu omwalana ni okhala ootaphuwa othela naari otheliwa wanawiili?

 ¹⁰ Yesu aahihusiha wi nookhalavo nthowa nimoha wi muchu amwalane: “Vano kinnoolelani wi yoole onamwalana ni mwaariye, voohikhala nthowa na mararuwo, amuthela mukina, yoowo onamuraruwa.” (Mateu 19:9) Owo aahithariha emohamoha va Mwaha wa Vamwaakoni. (Mateu 5:31, 32) Mu ikwaha soopiili, Yesu aahiloca wa “nthowa na mararuwo.” Mararuwo naari ocapaheya annaphitaanyerya soocheka ntoko ocapaheya, okonihana wa achu ahipanke othela, okonihana wa achu oolikana mwiikho, ni waakoniha asinama. Wakhala wi mulopwana othenle oopaka mararuwo, mwaariye onanwerya olakelela waakhanle wi anammwalana naari hooye. Owo amwalana ni iyawe, Muluku haawoona awo ntoko atheli.

11. Ntakhara heeni Mukristu onamulakelela ohimwalana ni oothelanaawe naamwi apanke mararuwo?

¹¹ Moone wi Yesu halonce wi muchu yoowo otheliwe naari othenle apaka mararuwo, yoowo ohirino nthowa onaphwanela omwalana. Ntoko yootakiherya, muthiyana onamulakelela okhala ni iyawe naamwi owo apanke mararuwo. Ntakhara heeni? Owo akhweya nlelo onnamusivela nave oolakelela omulevelela ni olapa vamoha wi erehererye othela waya. Moohiyana ni yeeyo, wakhala wi aamwalana nave ahiwerya otheliwa wanaawiili, owo onahaala ohoolela makacamiho. Ntoko yootakiherya, hanka vooloca sa soothowa soomwiilini ni soochuna sawe sa okonihana? Apwanne onanwerya ovootha omeekha? Omwalana oni waavolowele hai anamwane? Apwanne onahaala okhala woowalamela waaphuwa mu eparipari? (1 Korinto 7:14) Mweeparipari, yoowo ohirino nthowa onathanla omwalana onahaala okhalano makacamiho matokotoko.

12, 13. (1) Tiheeni yeeren’ye mu othela wa Oseya? (2) Ntakhara heeni Oseya aahimukookela Komeri, nave tiheeni nnahuseryaahu vooloca sa othela wawe?

¹² Yaweereya ya mulipa a miririmo Oseya ennanihusiha sincipale vooloca sa mukhalelo Muluku onooneiye othela. Muluku aahimuleela Oseya wi amuthele muthiyana iichaniwa Komeri, yoowo ahaala okhala “muthiyana a anamararuwe” nave aahaala okhalano “anamwane a mararuwo.” Komeri ni Oseya yaakhalano mwaana. (Oseya 1:2, 3) Moovira wa elukuluku, Komeri aahikhalano mwaana amwaamuthiyana ni mwaana amwaamulopwana, mwawooneya ni mulopwana mukina. Naamwi Komeri aapanke mararuwo ikwaha piili, Oseya aahikhala ni yoowo ntoko mwaariye. Ohoolo waya, owo aahimuhiya Oseya nave akhala kapuro. Nlelo, Oseya aahimukula owo wi akooke. (Oseya 3:1, 2) Yehova aahimpharihela Oseya wi ooniherye mukhalelo Owo mwawuuluulela aalevelenleiye Aisarayeli emanle okhala oohiroromeleya wa Yoowo ni waalapela amuluku atheru. Ti heeni nnahuseryaahu orweela wa othela wa Oseya?

¹³ Wakhala wi Mukristu oopaka mararuwo, yoowo ohirino nthowa onaphwanela apaka yoolakelela. Yesu ooloca wi yoole ohirino nthowa ori ootaphuwa omwalana wi atheliwe naari athele. Mweeparipari, hiyaavo yoonanara wa yoole ohirino nthowa othanla omulevelela oothelanaawe. Oseya aahimukusa wanawiili Komeri. Amanle okookela wa Oseya, owo aahimuleela wi haaphwanela opaka mararuwo ni mulopwana mukina. Oseya haamukoninhe Komeri mu elukuluku vakhaani. (Oseya 3:3, masu avathi mu TNM) Nyenya ohoolo waya Oseya aahimukoniha  mwaariye wanawiili. Eyo yeemelela mukhalelo Muluku aareiye ooreheryeya oweemererya Aisarayeli wanawiili ni otitelela waataana wawe ni yaawo. (Oseya 1:11; 3:3-5) Tiheeni ela enanihusihaaya olelo vooloca sa othela? Wakhala wi oothelana ole ochekeliwe oopacerya okonihana wanawiili ni oothelanaawe omuchekenle, eyo yaahaala wooniherya wi ole ochekeliwe oomulevelela nammaawe. (1 Korinto 7:3, 5) Voocharela honaphwanela okhalavo nthowa na omwalana. Ovinyerya vaavaa, mulipa oothela ni ootheliwa anaphwanela olapa vamoha ni okhaviheryana woona othela hiiha ntoko Muluku onooneleiye.

14. Mwawiiwanana ni 1 Korinto 7:10, 11, tiheeni akhweya eni yeereye mu othela?

¹⁴ Akristu oothene nnaphwanela ocicimiha othela hiiha ntoko Yehova ni Yesu. Nyenya, mu ikwaha ikina akina haneerano yeela, nthowa nawi naachu oohiphaameya. (Aroma 7:18-23) Mwawiihiiha ela henaphwanela onuukhula osuwela wi Akristu akina oopacerya yaahikhalano makacamiho matokotoko mu othela waya. Paulo aahirepa wi “muthiana ahimuhiye mulopwana.” Nyenya ikwaha ikina ela yaaneereya.—Mwaalakhanye 1 Korinto 7:10, 11, NN.

15, 16. (1) Teevi enaphwanela okhala yoolakelela ya mutheli elukuluku anakhumelelaaya makacamiho mu othela waya, nave ntakhara heeni? (2) Eyo enaphariheleya hai wakhala wi oothelana hanamurumeela Yehova?

¹⁵ Paulo hatharinhe makacamiho yaawo yaaweeriha atheli ohiyana. Nyenya hiyaano noosuwela wi makacamiho hiyaari wi, mulopwana aapanke mararuwo. Yaari hiiha, muthiyana aahaala okhalano nthowa na omwalana nave atheliwe wanawiili. Mu yoorepa yeela Paulo olonce wi muthiyana aamuhin’ye iyawe aaphwanela “íkhaleleru óhitheliwa, akhweya átánihiwetho ni mulopwana.” Mwawiihiiha Muluku nlelo aawoona ntoko mutheli. Paulo aalonce wi nikacamiho vyakala mutheli eereiye akhaleno, woohikhala wi mmoha a yaawo opanke mararuwo, yoolakelelaaya yaaphwanela waataana, eyo ti wi, omaliha nikacamiho naya nave ekhale vamoha. Awo yaaphwanela oveka nikhaviheryo wa atokweene. Atokweene hiyaaphwanela opaka makupa, nyenya yaahaala ovahererya ekano orweela Mpiipiliya.

¹⁶ Nyenya, hanka wakhala wi Mukristu otheliwe ni muchu yoowo ohinamurumeela Yehova? Vaavaa anakhalaayano makacamiho mu othela waya, apwanne ohiyana onneemereryeya? Hiiha ntoko elociwaaya, Piipiliya olonce wi ocapaheya nthowa noophwanelela na omwalana. Nyenya Piipiliya hanaloca mathowa anahaala omweeriha mutheli ohiyana. Paulo aahirepa: “Muthiana yowo orinono mulopwana óhiroromela, emyeryerya  m’murima yowo okhalano vamoha, ahimwalaneno mulopwana owo.” (1 Korinto 7:12, 13, NN) Ela ennaphariheleyatho olelo.

17, 18. Ntakhara heeni Akristu akina annakhala ni oothelanaaya naamwi ehoolelaka makacamiho matokotoko?

¹⁷ Nyenya inamukhalavo mikhalelo seiyo “mulopwana óhiroromela” ohinooniheryeiye wi ‘onnemyeryerya m’murimani okhalano’ vamoha ni mwaariye. Ntoko yootakiherya, owo onamukhala oophuca opwaha mphimo, ophiyerya muthiyana woona wi okumi naari ekumi awe eri va yawoopiha. Akhweya mulopwana onamukhooca omvakulela mwaariye ni emusi, naari omuhiiha omurumeela Muluku. Mmikhalelo seiya, muthiyana ootheliwa ori Mukristu akhweya onamulakelela wi, moohiphwacha yeeyo iyawe oneereiye aloce, owo ‘hanemyeryerya m’murima okhalano vamoha’ ni mwaariye nave wi ti woophwanelela ohiyana. Nyenya Akristu akina ari mmikhalelo soolikana annalakelela okhala ni oothelanaaya. Awo annavilela nave anneererya wiilipiserya wi erehererye othela waya. Ntakhara heeni annalakelela opaka yeela?

¹⁸ Mmikhalelo seiya, wakhala wi atheli aahiyana, awo nlelo anahaala okhala mutheli nave anamukhalano makacamiho nloncaahu woopaceryani. Murummwa Paulo oovahatho nthowa nikina ntakhara heeni mutheli onnaphwanela okhala vamoha. Owo oorepa: “Mulopwana ohiroromenle onneelihiwa wanthowa na mwaariye; nave muthiyana ohiroromenle onneelihiwa wanthowa na iyawe ori munna. Wahaari hiihaa anamwane anyu yaaya okhala oothanyeya, nto vano taweelihiwa.” (1 Korinto 7:14) Akristu ancipale annalakelela okhala ni oothelanaaya yoowo ohinamurumeela Yehova naamwi nikacamiho nri ntokotoko. Awo annakhala oohakalala wi aheerano yeeyo vaavaa ohoolo waya oothelanaaya onakhaleiye Namoona a Yehova.—Mwaalakhanye 1 Korinto 7:16; 1 Pedro 3:1, 2.

19. Ntakhara heeni mmuloko Weekristu aakhalamo atheli ancipale anakhumelela phaama?

¹⁹ Yesu oovaha ekano vooloca sa omwalana, nave murummwa Paulo oovaha ekano vooloca sa ohiyana. Oopiili yaachuna wi akapuro a Muluku ecicimiheke othela. Orukurerya elapo, aakhalavo atheli Eekristu yaawo anakhumelela phaama. Akhweya nyuwo munamwaaphwanya atheli oohakalala mmuloko anyu, mwemmo alopwana oororomeleya anaasivelaaya asaaraya nave athiyana oosivela aanaacicimihaaya asiiyaya. Oothene yaawo annooniherya wi othela onanwerya okhala woocicimiheya. Nave nnanwerya okhala oohakalala woona wi mamilyawu a alopwana ni athiyana annooniherya wi masu a Muluku teeparipari: “Mwa nthowa nenla, mulopwana aahiyeke atiithinya ni amannya, aphitaane ni mwaariye, nave ala enii ekhaleke mwiili mmoha.”—Éfeso 5:31, 33.