1, 2. Miyoonelo taani soohiyana hiyana achu aryaayano vooloca sa Parataiso?

ANNA ni arokora ancipale yaawo yaakhumme mu ilapo soohiyanahiyana yaaya o Seul, Koreya, ntakhara muthukumano wa muceche. Vaavaa yaakhumaaya va nipuro na muthukumano, Anamoona a vanipuroni yaahaarukurerya yaawo. Yaari echu yoohakalaliha vaavaa ancipale a yaawo yuuvelanaaya mata nave elocaka wa mukina ni mukhwaawe eriki: “Nnamoonana Mparataiso!” Nyuwo munuupuwela wi Parataiso taani awo yaamulocaaya?

² Achu olelo aakhalano miyoonelo soohiyana hiyana vooloca sa parataiso. Akina analoca wi parataiso pahiru eri etherutheru. Ophiyeryatho akina analoca wi parataiso nri nipuro nenlo awo anahakalalaayavo. Mulopwana yoowo orino etala okiraanthe va meesa matokweene erivo yoolya yincipale owo oniisoona wi ori mu parataiso. Mu iyaakha ivirale, muthiyana yoowo oonne ntakhwa na ithutu sincipale aahitikhiniheya ophiyerya oloca: “Wulu, ola parataiso!” Mpuro yoowo nivano onichaniwa parataiso, naamwi ntakhwa nlo nsareyaka neeve a meeturu opwaha khumi nathanu muyakha ti muyakha. Nyuwo munuupuwela wi Parataiso tiheeni? Apwanne mookhalano ewehereryo wi Parataiso onamurwa?

3. Makupa taani oopacerya a Mpiipiliyani onaromoliwamo Parataiso?

 ³ Piipiliya onnamuloca parataiso yoowo aakhanle mu elukuluku yakhalai, ni parataiso yoowo onahaala okhala muhoolo. Hiyo ninnaalakhanya vooloca sa parataiso mu ekwaha yoopacerya mu liivuru oopacerya a Piipiliya. Mu Piipiliya a Akatolika Douay Version, yoowo otaphuleliwe orweela wa elocelo ya Elatini, Maphatxuwelo 2:8 ani: “Apwiya Muluku yaahimpaka tho parataiso oohakalaliha ovinyerya omapacereryo: nave yaamukuhamo mulopwana yoowo yaampatunsaaya.” Mu yoorepa ya Ehepiri eni ‘emaca ya Eteni.’ Nsu nawi “Eteni” nnataphulela “Ohakalala” nave emaca eyo, mweeparipari waari mpuro woohakalaliha. Eyo yaari yooreera moomalela, yaasareyamo yoolya ni murecele variyari va achu ni asinama.—Maphatxuwelo 1:29-31.

4. Ntakhara heeni nnalocaahu emaca ya Eteni ntoko parataiso?

⁴ Nsu na Ehepiri nawi “emaca” ntaphuleliwe pa·raʹdei·sos mu Ekiriki. Cyclopaedia ya M’Clintock ni Strong elonce wi vaavaa Mukiriki iiweiye nsu pa·raʹdei·sos, owo aanawerya waanyiherya oreera, nipuro ntokotoko nookhapeleleya wa echu vyakala yaahaala onanariha, ni miri sooreera ivahaka sawiima soohiyana hiyana nave ni mihice ni miri saphaama mwemmo nikhuuru na anaahe naari ipaala inalyaayamo.—Mulikanyihe ni Maphatxuwelo 2:15, 16.

5, 6. Ntakhara heeni Atamu ni Eva yaahiyeleela ekari ya okhala mu Parataiso, nave tiheeni akina anakohaaya?

⁵ Yehova aamukuha Atamu ni Eva mu emaca ya Eteni, mu parataiso. Nyenya nthowa na ohimwiiwelela Yehova, awo yaahiyeleela ekari ya okhala mu Parataiso, wa yaawo vamoha ni anamwane aya. (Maphatxuwelo 3:23, 24) Naamwi yaahikhanlemo achu mu Parataiso yoole, enakhala yawooneya wi aahititelela okhala ophiyerya elukuluku ya Maahi Mancipale mmahiku a Nowa.

⁶ Akhweya akina anamukoha, ‘Apwanne Parataiso onamukhala wanawiili veelaponi yavathi?’ Tiheeni iparipari inooniheryaaya? Waakhanle wi munnaweherya okhala ni oosiveliwaanyu mu Parataiso, apwanne mookhalano mathowa aphaama a ewehereryo anyu? Mwanwerya othariha ntakhara heeni nnaphwanelaahu ororomela wi Parataiso onamukhala wanawiili muhoolo?

7, 8. (1) Yoororomeliha taani Muluku aapankeiye wa Aparahamu? (2) Yoororomeliha ya Muluku yaamweerinhe Aparahamu wuupuwela eheeni?

⁷ Nipuro noophwanelela ophwanyawo maakhulo a makoho vooloca sa Parataiso ti Mpiipiliyani, ntakhara wi ori liivuru oruule wa Yehova, yoowo aampatunse Parataiso oopacerya. Muthokororye yeeyo Muluku aamulenleiye nthamwene awe Aparahamu. Muluku aahiloca wi owo ahaala waaceererya nloko nawe nikhale “ntoko ehaava ya ophareya.” Voocharela Yehova aahipaka yoororomeliha yookhweleyaxa wa Aparahamu: “Mwa achu aa, oothene eelapo ya vathi anarwa ereelihiwa, ntakhara weyo wookiiwelela.” (Maphatxuwelo 22:17, 18) Ohoolo waya, Muluku aahuuluulela yoororomeliha emohamoha wa mwaana a Aparahamu ni wa musulwawe.—Mwaalakhanye Maphatxuwelo 26:4; 28:14.

⁸ Mpiipiliyani haamo makupa analoca wi Aparahamu uupuwela wi achu yaahaala ophwanya nchuwelo mu parataiso wirimu. Mwawiihiiha vaavaa Muluku aalohenryeiye wi “oothene eelapo ya vathi” yaahaala oreelihiwa, Aparahamu aahiwerya wuupuwela wi mareeliho yaawo yahaala okhala veelaponi ya vathi. Nyenya apwanne ti yeelaru pahi enooniheryiwa Mpiipiliyani wi Parataiso aahaala okhala veelaponi yavathi?

9, 10. Soolaiherya taani inanivaha mathowa a owehererya wi muhoolo onamukhalawo parataiso?

 ⁹ Muluku aahimveerela mmoha a muyareriwo wa Aparahamu, Tavite, wi atharihe vooloca sa elukuluku ya muhoolo vaavaa ‘aweera soonanara eneeraaya ehooniwe.’ (Salumu 37:1, 2, 10) Moohiyana, “awiichacala anarwa yaakhela elapo ya vathi nave anarwa ehakalala, yiichaala mmuureceleni.” Tavite tho aahiloherya: ‘Onarwa aavaha awookololowa murima elapo ya vathi, yiikhaleleru mummo okhala wookhala.’ (Salumu 37:11, 29; 2 Samuwele 23:2) Nyuwo munuupuwela wi yoororomeliha yeela yaavolowenle hai yaale yaachuna opaka yookhwela ya Muluku? Awo yaahikhalano mathowa a ooweherya wi, pahiru achu awookololowa anamukhala veelaponi nave ekhale wanaawiili mu parataiso ntoko emaca ya Eteni.

¹⁰ Moovira wa elukuluku, Aisarayeli ancipale yaawo yaamurumeela Yehova yaahimukhooca yene ni malapelo eparipari. Mwawiihiiha Muluku aheemererya wi Apapulu yaavoothe achu awe, etolose elapo aya, nave yaakuse ancipale a yaawo ntoko akapuro. (2 Matharihelo 36:15-21; Yeremiya 4:22-27) Nyenya alipa miririmu a Muluku yaahiloherya wi achu awe yaahaala okookela mu elapo aya sivinre iyaakha makhumi mathanu nameeli. Nave sooloherya iho saahikhwaanela chiryene. Nyenya sooloherya iho sookhalano yootaphulela mmahiku ahu. Vaavaa nnathokororyaahu ikina sa seiyo, moone mukhalelo inanivahaaya mathowa a onwehererya parataiso amuhoolo veelaponi yavathi.

11. Ti liini Isaiya 11:6-9 okhwaanenleiye voopaceryani, nyenya makoho taani nlelo nneeraahu niikohe?

¹¹ Mwaalakhanye Isaiya 11:6-9. Muluku aahiloherya orweela wa mulipa a miririmu Yesaya wi vaavaa Aisarayeli yaahaalaaya okookela mu elapo aya, elapo yaahaala okhala ya murecele. Haavo naari mano mmoha ahaala woova ohipheliwa ni asinama naari achu. Amiravo ni awuuluvala yahaala okhala okhapeleleya. Apwanne ela ennaweerihaani wuupuwela mukhalelo murecele waaryaaya mu emaca ya Eteni? (Isaiya 51:3) Yesaya aahiloherya tho wi elapo yoothene, ohiya pahiru nloko na Aisarayeli, “enamusareyano waasuwela Apwiya [Yehova], ntoko ephareya esaren’yaayano maahi.” Ti liini ela yaahaalaaya weereya? Mweeparipari, ela enaloca sa omwaahiyu.

12. (1) Mareeliho taani Aisarayeli yaawo yaakoonke o Papulu yaakhenlaaya? (2) Tiheeni enooniherya wi Isaiya 35:5-10 ahaala okhwaanela muhoolo?

¹² Mwaalakhanye Isaiya 11:6-9. Moone wi Yesaya aahiloherya wanawiili wi Aisarayeli yaawo yaakoonke o Papulu hiyaahaala ohipheliwa ni asinama naari achu. Owo aahiloca wi elapo aya yaahaala ovahaka sawiima ni yoolya yaphaama woona wi yahaala okhalawo maahi awaaca, hiiha ntoko emaca ya Eteni yaaryaaya. (Maphatxuwelo 2:10-14; Yeremiya 31:12) Apwanne yooloherya ela yaahaala okhwaanela pahiru mu elukuluku ya Aisarayeli yaawo? Moone wi yooloherya ela yaahiloca wi alipa evaasi, alipa oorakala ni alipa oohiiwa yaahaala openusiwa. Nyenya ela hiyeeren’ye wa Aisarayeli yaawo yaakoonke o Papulu. Ohiya yeeyo, Muluku aathoonyerya wi aahaala waapenusa awiiceliwa oothene muhoolo.

13, 14. Isaiya 65:21-23 aakhwanenle hai vaavaa Aisarayeli yaakonkaaya o Papulu, nave makupa taani a Yooloherya yeela nlelo anahaala okhwaanela muhoolo? (Moone eruku yoopacerya.)

 ¹³ Mwaalakhanye Isaiya 65:21-23. Vaavaa Ayuta yaakookenlaaya mu elapo aya, awo hiyaaphwaannye ipa sookhapeleleya naari imaca soolimmwa ni miri sa mpesa wi suuruliwe. Nyenya nthowa nawi Muluku aahaareeliha, ichu saahitorokeya moovira mwa elukuluku. Nkaanyiheryani ohakalala achu yaaraayano vaavaa awo yaatenkaaya ipa saya nave enakhalamo, navetho vaavaa yaapuhaaya soolya soosiva seiyo yaanlaaya!

¹⁴ Moone wi moolikana ni yooloherya yeela, mahiku ahu eni “ekaamulekela miyaakha mincipale ntoko miri.” Miri mikina sinnakhala mu iyaakha macikhwi. Wi ekhale mu elukuluku yoorakama, achu yaaphwanela okhalano okumi waphaamasa. Nave waakhanle wi annawerya okhala mmureceleni, mmukhalelo waphaama ntoko Yesaya aalohenryeiye, mweeparipari eyo yaahaala okhala, parataiso! Nave yooloherya yeela enahaala okhwaanela!

15. Taavi ari mareeliho makina alociwe mu liivuru a Isaiya?

¹⁵ Muupuwele vooloca sa mukhalelo soororomeliha seiya nimanlaahu othokororya sinooniheryaaya wi onahaala okhalavo parataiso muhoolo. Mu elapo yoothene enahaala osareya ni achu yaawo anahaala oreelihiwa ti Muluku. Haavoru muchu onahaala wuukhuwaka vooloca sa ohipheliwa ni asinama naari ni achu oowali. Alipa ohoona, oohiiwa, naari orakala anahaala openusiwa. Achu anahaala oteka ipa saya ni opuha soolya seiyo anahaalaaya waalaka. Achu anahaala okhala ni ekumi mu elukuluku yincipale opwaha miri. Aai, Piipiliya onnavaha sawooniherya sookwakwaleya wi parataiso onnarwa. Nyenya achu akina yaawo nnalocaahuno, akhweya anamuloca wi sooloherya iha hasinataphulela wi chiryene parataiso onamukhala veelaponi yavathi. Tiheeni munahaalaanyu waaleela yaawo? Nthowa taani noophwanelela muryaanyuno na onweherya parataiso eeparipari veelaponi yavathi? Mulopwana mutokotoko yoowo aakhanle, Yesu, oonivaha nthowa noophwanelela.

16, 17. Ti liini Yesu aalonceiye sa Parataiso?

¹⁶ Naamwi Yesu ahaarino nthowa, owo aahithoriheliwa okhwa va mwiri woohoosa. Owo aahikhala variyari va Ayuta awiipha eeli yaawo yaakhomeliwe mmakupa awe. Mmoha a yaawo aahisuwela wi Yesu aari Mwene nave aaloca: “Yeesu mukuupuwele miyo, murwaaka mu omwene anyu.” (Luka 23:39-42) Yoororomeliha yeeyo Yesu aapankeiye wa mulipa awiipha ole ennavolowela muhoolo mwanyu. Masu a Yesu aarempwa mu Luka 23:43. Anamahuserya akina annamuhela viirkula ehakumve ophwanya nsu nawi “olelo” nave annataphulela mmasu ala: “Eparipareene kinnooleela, olelo onarwa okhala ni miyo Mparataiso.” Sookhalavo miyoonelo soohiyana hiyana vooloca sa makupa taani aahaaleiye oophariheliwa viirkula mu yoorepa yeela. Nyenya tiheeni Yesu aachuneiye oloca vaavaa aapharihenleiye nsu nawi “olelo”?

¹⁷ Mu ilocelo sincipale sa mutano, aviirkula anaphariheliwa wi ekhaviherye wiiwexexa yootaphulela ya masu mookwakwaleya. Nyenya mu masu oopacerya orempwa mu soorempwa sa Ekiriki, hiyaaphariheliwa aponto ni avirkula. Akhweya nnamwiikoha: Apwanne Yesu aalonce wi, “Miyo kinnooleela, olelo onarwa okhala ni miyo Mparataiso?” Naari aalonce, “Miyo kinnooleela olelo, onarwa okhala ni miyo Mparataiso?” Alipa ootaphulela annamuhela viirkula ehaakumve ophwanya nsu nawi “olelo” naari ohoolo wa nsu nenla mwawiiwanana ni mukhalelo anuupuwelaaya vooloca sa yeeyo Yesu aalonceiye,  nave nyuwo munanwerya ophwanya mikhalelo seiya mu Apiipiliya amutano.

18, 19. Tiheeni enahaala onikhaviherya wiiwexexa yeeyo Yesu aalonceiye?

¹⁸ Mwawiihiiha, muupuwele yeeyo Yesu aaleenleiye oomuchara awe vooloca sa okhwa wawe. Owo aaloca: “Mwaana a muchu onamveleeliwa wa achu, yaawo anammwiipha, nto nihiku na neeraru naya onamvinya wookhwani.” (Mateu 12:40; 16:21; 17:22, 23; Marko 10:34) Murummwa Petro oothariha wi ela yoheereya. (Saweriwa T’arummwa 10:39, 40) Mwawiihiiha, Yesu haakele mu Parataiso mu nihiku owo ni mulipa awiipha ole yaakhwilaaya. Piipiliya onnathariha wi Yesu aari “onihiyeni” mu mahiku mararu, ophiyerya vaavaa Muluku aamviihaleiye mookhwani.—Saweriwa T’arummwa 2:31, 32. * (Moone masu avathi.)

¹⁹ Mwawiihiiha Yesu aapharihenle nsu nawi: “Eparipareene kinnooleela olelo” wi apacerihe yoororomeliha wa mulipa awiipha. Ola waari mukhalelo wawunlaana wa oloca ovinyerya mu elukuluku ya Mose. Mu ekwaha emoha Mose aaloca: “Othokororyeke mmurimani mwaa masu yaala olelo miyo kinooleelaaka.”—Malamulo 6:6; 7:11; 8:1, 19; 30:15.

20. Tiheeni enakhaviherya wiiwexexa wahu yeeyo Yesu aalonceiye?

 ²⁰ Mulipa oomutaphulela Piipiliya o Oriente Médio ooloca: Nsu nnacicimiheryiwa mu yoorepa yeela ti ‘olelo’ nave nnaphwanela waalakhanyiwa, ‘Eparipareene kinnooleela olelo, onarwa okhala ni miyo Mparataiso.’ Yoororomeliha yaapakiwe mu nihiku nenle nave yaahaala okhwaanela muhoolo.” Mulipa ootaphulela owo olonce wi owo waari mukhalelo achu yaalocaaya mmukuma yoole nave ennooniherya wi “yoororomeliha yaapakiwe mu nihiku nammoori nave yaahaala okhapeleliwa.” Piipiliya a elocelo ya siriyaka a nsana naneethanu etaphuleliwe mmukhalelo ola: “Amen, Miyo kinnooleela olelo wi ni miyaano onamukhala mu Emaca ya Eteni.” Oothene ahu nnaphwanela okhala oolipiheya orweela wa yoororomeliha yeela.

21. Tiheeni yaaheeren’ye ni mulipa awiipha, nave ntakhara heeni?

²¹ Vaavaa Yesu aalonceiye ni mulipa awiipha vooloca sa Parataiso, owo haamuloca parataiso aahaala okhala wirimu. Hiyo nnasuwela hai yeela? Nthowa nimoha ti nawi mulipa awiipha haasuwela wi Yesu aahipaka nlakano ni arummwa awe oororomeleya wi yalamulele ni yoowo wirimu. (Luka 22:29) Navetho, mulipa awiipha haapatisiwe. (Yohani 3:3-6, 12) Mwawiihiiha vaavaa Yesu aapankeiye yoororomeliha yeela wa mulipa awiipa, owo aamuloca parataiso a veelaponi yavathi. Mu iyaakha vakhaani ohoolo waya, murummwa Paulo aahithariha vooloca sa yawoona awe ya mulopwana mmoha ‘àwelihiwe mpaka o Paraíso.’ (2 Korinto 12:1-4, BNM) Naamwi Paulo ni arummwa akina yaathanliwe oya wirimu wi yalamulele ni Yesu, Paulo aamuloca parataiso amuhoolo. * (Moone masu avathi.) Apwanne parataiso owo onahaala okhala veelaponi yavathi? Apwanne nyuwo munanwerya okhala mummo?

22, 23. Tiheeni munaphwanelaanyu owehererya?

²² Muupuwele wi Tavite aahiloca sa elukuluku yeeyo ‘awookololowa murima eneeraaya evahiwe elapo ya vathi.’ (Salumu 37:29; 2 Pedro 3:13) Tavite aaloca sa elukuluku yeeyo achu oothene veelaponi ya vathi eneeraaya yiiweleleke malakiheryo awookololowa a Muluku. Yooloherya enaphwanyeya mu Isaiya 65:22 eni: “Achu a muloko aka ekaamulekela miyaakha mincipale ntoko miri.” Ela enooniherya wi achu yaawo anahaala omulapelaka Yehova mu elapo evyaani anahaala okhala mu iyaakha macikhwi awaaca. Apwanne munnaweherya yeela? Aai, nthowa nawi mwawiiwanana ni yoorepa ya Wupulula 21:1-4, Muluku onahaala waareeliha achu, nave nimoha na mareeliho yaawo ti nawi “horwa tho okhalawo okhwa.”

²³ Yeeyo Piipiliya onahusiheiye vooloca sa Parataiso ti yookwakwaleya. Atamu ni Eva yaahiyeleela ekari ya okhala mu Parataiso okhala wookhala, nyenya elapo ya vathi enamukhala parataiso wanaawiili. Hiiha ntoko Muluku ororomelinheiye, owo onahaala waareeliha achu veelaponi ya vathi. Tavite ooloca wi awookololowa ni awiichacala anahaala waakhela elapo ya vathi nave ekhaleke mwemmo okhala wookhala. Nave sooloherya sinaphwanyeya mu liivuru a Isaiya sinnanikhaviherya owehererya elukuluku ya muhoolo vaavaa nnahaalaahu opuha ekumi yoohakalaliha mu parataiso ooreera veelaponi ya vathi. Ela enahaala weereya liini? Vaavaa yoororomeliha ya Yesu wa mulipa awiipha eneeraaya yaakhwanele. Nyuwo munanwerya okhala mu Parataiso yoowo. Mu elukuluku yeeyo, masu yaale yaalociwe ni anna ni arokora o Koreya va muthukumano wa muceche anahaala waakhwanela: “Nnamoonana Mparataiso!”