VAAVAA akina ananikhalihaaya mwa wiilakelela naari mooreera murima, ennaneeriha woona phaama chiryene. Eyo ennanihakalaliha osuwela wi awo annanipwacha. Ovinyerya vaavaa nnaathamalelaahu akina elukuluku anakhalaaya ooreera murima wa hiyo, nni nihuserye hai okhala ooreera murima?

Muchu awiilakelela onnaapwacha akina chiryene nave onnooniherya eyo moorweela mwa yeeyo onapakeiye ni onaloceiye. Owo hanakhala oopwacha pahiru. Opwaha yeeyo, onnaakhaliha akina mooreera murima nthowa nawi onnaasivela yaawo nave onniiwexexa mukhalelo awo anoonaaya. Echu yoochuneyaxa, oreera murima makupa a yoovaha ya munepa waweela. (Galasya 5:22, 23) Yehova onachuna wi nikhale ooreera murima, mwawiihiiha hankooni noone ti mwawiihai owo ni Mwanawe anooniheryaaya ooreera murima ni mukhalelo nneeraahu ncharihe yootakiherya aya.

Yehova tooreera murima wa oothene, ophitaanyerya wa yaale ari “oohithamala ni wa oonanara murima.” (Luka 6:35) Ntoko yootakiherya, Apwiya Yehova, “anakumiha nsuwa naya wa oonanara murima ni aphaama anarupiha epula wa achu awookololowa murima ni ohookololowa.” (Mateu 5:45) Ophiyerya achu yaawo ahinaroromela wi Yehova ti Mpatusa ananwerya okumihavo mphurelo orweela mwa oreera wawe murima nave ekhaleno ohakalala muukumini.

Yootakiherya etokotoko ya oreera murima wa Yehova ti yeeyo aapankeiye wa Atamu ni Eva. Mu elukuluku vakhaani emanle ocheka, awo “yaacocha makukhu a mukuukhu wi ewerye wiikhuneelano.” Mwawiihiiha, Yehova aahisuwela wi okhwipi wa emaca ya Eteni, awo yaahala ochuna soowara seiyo saahaala waakhapelelaka, woona wi echaya yaahuulumeliwa nave wi ‘ekaamoonasha ekoyi.’ Mwawiihiiha Apwiya Yehova mooreera murima “yaahaapakela ikuwo sa ishapala sa asinama.”—Maphatxuwelo 3:7, 17, 18, 21.

Naamwi Yehova ari ooreera murima wa “oonanara murima ni aphaama,” owo onnooniherya oreera murima wavameekhaaya wa alapeli awe oororomeleya. Ntoko yootakiherya, variyari va elukuluku Sakariya aareiye mulipa miririmu, munkeelo mmoha aahithanana nthowa nawi Aisarayeli yaahihiya oteka empa ya Yehova o Yerusalemu. Yehova aawiriyana yeeyo munkeelo aalonceiye nave aahimwaakhula yoowo “ni masu ooreera ni ookhoomaliha.” (Sakariya 1:12, 13) Yehova aahimukhaliha mulipa miririmu Eliya mmukhalelo woolikana. Yaahikhalavo elukuluku mulipa miririmu iisonneiye okhala awuukhuwa ni oomeekha ophiyerya wi aahimveka Yehova okhwa. Yehova aahooniherya wi aanapwacha moonelo wa Eliya nave aahimuruma munkeelo wi amulipihe. Yehova aahimuroromelihatho mulipa miririmu wi owo haari meekheiye. Oreera murima waahimulipiha Eliya otitelela mu orummwa awe. (1 Mamwene 19:1-18) Nyenya wa alapeli oothene a Yehova, taani mwaahaalaanyu oloca wi aahitakiherya oreera wawe murima wooreeraxa mmukhalelo woophwanelela?

Elukuluku Yesu aareiye veelaponi yavathi, achu yaanawerya woona mukhalelo aareiye ooreera murima. Owo haari awuuma murima nave haakhinyererya achu opakaka yeeyo aachuneiye. Owo aanapwacha akina nave aahiloca: “Rwaani wa miyo oothene nyuwo mvenle munyokoliwa, miyo kinamuwiichuuwihaani . . . ntakhara nipisi naka hannalimela.” (Mateu 11:28-30) Woona wi owo aari ooreera murima,  achu yaanamuchara woothewene aayeiyewo. Mooreera murima, Yesu aahaavaha yaawo yoolya, aahaapenusa, nave aahaahusiha yaawo “sincipale” vooloca sa Tiithi awe.—Marko 6:34; Mateu 14:14; 15:32-38.

Yesu aaniiwexexa miyoonelo sa achu nave aanaakhaliha mooreera murima ni moomaaleleya. Mweeparipari, naamwi eyo yaahaari yoophwanelela wa yene, mooreera murima aanamukhaviherya muchu ti muchu yoowo aarwa wa yene. (Luka 9:10, 11) Nkuupuwelani vooloca sa muthiyana yoowo aarino ereca ya ovuuva nikhami. Owo aachuna openusiwa, mwawiihiiha aahitannya yoowara ya Yesu. Nyenya mwawiiwanana ni Nlamulo na Mose, owo haaphwanela opaka yeele nthowa nawi aari mmwiikhoni. (Onamukutxho 15:25-28) Yesu aakhulenle hai? Owo haalonce wa muthiyana ole moowali. Yesu aahoona wi aanahooseya, nave aahimmorela ikharari muthiyana woona wi aahihooseya mu iyaakha khumi napiili. Yesu aahimuleela muthiyana: “Mwanaka, nroromelo naa nihoovulusa, hawe mmureceleni penuwa wa masooso aa.” (Marko 5:25-34) Yesu aari ooreera murima chiryene!

Mu sootakiherya nimanlaahu othokororya, noohuserya wi wakhala wi naachu ooreera murima, nnahaala opaka ichu wi naakhaviherye akina. Yesu aahiceenyerya ochuneya waya yeela elukuluku aalonceiye niphwanaphwaniho na Musamariya aphaama. Muyuta aahiiyeryiwa, aahimaniwa ni ampava, nave aahiihiwa okhwipi wa mphiro ahanle vakhaani okhwa. Musamariya yoowo aavira mumphiro yoowo aahimmorela ikharari mulopwana ole, naamwi Asamariya ni Ayuta yaaniicana mukina ni mukhwaawe. Ikharari saahimweeriha omukhaviherya mulopwana aaphoreihiwe. Owo aahirapiha makhwaca awe nave aahimukeriha mu empa. Musamariya aahimuliva mwaneene a empa wi amukhapelele Muyuta ophiyerya wi aahiivaha omuliva ntakhara ichu ikina eereiye amweerele.—Luka 10:29-37.

Oreera murima onamuneeriha okhala oomaaleleya ni oolipiha ohiya pahiru mwa yeeyo nnapakaahu nyenyatho mwa yeeyo nnalocaahu. Piipiliya oni: “Muchu awiiniwa murima, tawuukhuwa, nto masu aphaama annamuhakalaliha.” (Masiposipo 12:25) Elukuluku oreera murima ni epewe inaneerihaaya oloca ichu soolipiha wa akina, nnahaala oweeriha yaawo okhala oohakalala. * (Moone masu avathi.) Masu ahu anooniherya oreera murima anahaala wooniherya wi ninnaapwacha yaawo nave nnahaala weeriha okhala wookhweya wa yaawo ovilela ni makacamiho mookumini.—Masiposipo 16:24.

Oothene ahu nookhalano mavyakelo a wooniherya oreera murima woona wi Muluku aapanke achu oothene moophwanaphwana ni yoowo. (Maphatxuwelo 1:27) Ntoko yootakiherya, Xuliyu, mutokweene a akhoco o Roma yoowo aarino murici wa omukeriha murummwa Paulo o Roma, “mu oreera wawe murima, aamuhiya Paawulu wi awoone asithamwene awe wi emukhaviherye ni saamuthowa.” (Saweriwa T’arummwa 27:3) Elukuluku Paulo ni akina yooponwaaya vaavaa mwaaceya aanyaanyen’yeiye variyari va mukwaha, achu o Malta yaahiwooniherya “oreera waya muri wootikhiniha” ophiyerya wi yaahiiseela mooro ntakhara yaawo wi yooreke. (Saweriwa T’arummwa 28:1, 2) Achu yaala yaahipaka echu yaphaama. Mwawiihiiha, wi muchu amuhakalalihe Yehova, onaphwanela okhala ooreera murima ilukuluku soothene, ohiya pahiru mu ilukuluku ikina.

Yehova onachuna wi oreera murima opake makupa a omuchu ni mukhalelo wa okhala. Ti nthowa nene onanleeleiye wi ‘niware’ oreera murima. (Kolosi 3:12) Nave tahi yookhweya okhala ooreera murima ilukuluku soothene. Ntakhara heeni? Akhweya hinnooniherya oreera murima nthowa nawi naachu awuuliwa muru, oohikhapeleleya, naari anrima vakhaani. Naari akhweya onamukhala woovila wa hiyo okhala ooreera murima wa yaale ananikhaliha moonanara. Nyenya wakhala wi ninnavekela ntakhara munepa waweela ni weererya omutakiherya Yehova, owo onamunikhaviherya okhala ooreera murima chiryene.—1 Korinto 2:12.

Nni nsuwele hai yeeyo nnaphwanelaahu opaka wi nipwahiherye okhala ooreera murima? Mwiikohe: ‘Kinnaawiriyana moopwacha akina ni weererya  wiiwexexa mukhalelo anoonaaya? Apwanne kinnaathokororya akina vaavaa anachunaaya nikhaviheryo? Teevi yaari ekwaha yookuchula koonihenryaaka ooreera murima wa muchu yoowo ohiri mmusi aka naari nthamwene awaacameleya?’ Voocharela mutikitherye soolakelela, ntoko osuwela sincipale vooloca sa achu yaawo oorukurenryeeni, xaxaxa yaale a mmulokoni. Mmukhalelo yoowo munanwerya osuwela makacamiho awo aryaayano nave tiheeni anachunaaya. Voocharela, mweererye waakhaliha akina mooreera murima, hiiha ntoko nyuwo mwaahaalaanyu osiveliwa okhalihiwa. (Mateu 7:12) Vookuchula, mumveke Yehova nikhaviheryo, nave owo onahaala oreeliha wiilipiserya wanyu okhala muchu ooreera murima.—Luka 11:13.

Elukuluku Paulo aarempeiye ichu seiyo saamweerinhe okhala murummwa aphaama, echu emoha mwa seiyo waari oreera murima. (2 Korinto 6:3-6) Achu yaanamusivela Paulo nthowa nawi aanaloca ni opaka ichu mooreera murima, nave awo yaanoona wi owo aanaapwacha. (Saweriwa T’arummwa 28:30, 31) Mmukhalelo woolikana, wakhala wi naachu ooreera murima, akina anamuchuna ohuserya sincipale vooloca sa eparipari. Elukuluku nnakhalaahu ooreera murima wa achu oothene, ophiyerya yaale anikhalinhe moonanara, eyo enahaala otannya murima aya nave awo anamutoroka muupuwelo aya. (Aroma 12:20) Akhweya moovira wa elukuluku anamuchuna ohuserya vooloca sa Piipiliya.

Mu Parataiso, muchu ti muchu onahaala okhala ooreera murima wa mukina ni mukhwaawe. Alipa ooviihiwa mookhwani anahaala okhalihiwa mooreera murima, akina a yaawo mu ekwaha yoopacerya. Eyo chiryene enahaala waaceenyerya okhala ooreera murima wa akina. Mweeparipari, muchu ori oothene yoowo ohiri ooreera murima nave ohinachuna waakhaviherya akina hani eemereryiwe okhala vathi va Omwene wa Muluku. Pahiru achu yaawo ari oosivela ni ooreera murima teni ekhale okhala wookhala mu Parataiso. (Salumu 37:9-11) Eyo chiryene enahaala okhala elapo yookhapeleleya ni yamurecele! Mwawiihiiha, naamwi ehaakumve ophiya elukuluku eyo, nnanwerya okumiha mphurelo moorweela wa okhala oreera murima. Mwawiihai?

Piipiliya oni: “Muchu [ooreera murima] onniiseerela saphaama mwaneene.” (Masiposipo 11:17) Achu annasiveliwa okhala ni muchu yoowo ori ooreera murima, nave ilukuluku soothene annamukhalihatho mooreera murima. Yesu ooloca: “Mphimo muneeraanyu mphimeno, munamphimeliwano.” (Luka 6:38) Mwawiihiiha wa muchu ooreera murima onakhala wookhweya waaphwanya asinthamwene ni otitelela okhala ni yaawo.

Murummwa Paulo aahaaleela yaale a muloko wo Efeso: “Mukhale ooreera murima, oomorelana ikharari, ookhurumuwelana mukina ni mukhweiye.” (Éfeso 4:32) Vaavaa oothene mmulokoni anakhalaaya ooreera murima ni aikharari, muloko onnakhala woolipa ni wawiiwanana. Hinnachuna waaphwanyerya mathowa annihu, waapa ntakhara yaawo, naari oloca echu yawuukhula naari yoohoma murima ntoko nsipaaca. Ohiya yeeyo, echu nnalocaahu ilukuluku soothene enaphwanela okhala yookhaviherya ni yoolipiha. (Masiposipo 12:18) Ntoko yookhumelela, muloko onahaala omurumeelaka Yehova moohakalala.

Hiiha ntoko nimanlaahu ohuserya, oreera murima mukhalelo yoowo onooniheryiwa mu echu vyakala nnalocaahu ni nnapakaahu. Nave vaavaa nnakhalaahu ooreera murima, ninnamutakiherya Muluku ahu oosivela ni oovaha, Yehova. (Éfeso 5:1) Ela ennalipiha muloko ahu nave ennaaceenyerya akina omurumeela yoowo. Mwawiihiiha hankooni nipake soothene ophiyerya nnaweryelaahu wi akina yoone wi Anamoona a Yehova achu ooreera murima!