Achu acipale annamukhooca Muluku nthowa nawi anuupuwela wi tonatannya makacamiho aya.

Mmukhalelo wawooneya naari hooye, ahooleli ancipale a malapelo anahusiha wi Muluku tonatannya makacamiho ahu. Ntoko yootakiherya akina analoca wi:

• Ipahu sa maphacuwelo olaka wa Muluku.

• Anamwane anakhwa nthowa nawi Muluku onaachuna ankeelo wirimu.

• Muluku onnakhaviherya ikhoco, seiho inakumiherya makacamiho mancipale.

Apwanne eparipari yeeyo ahooleli yaala anahusihaaya vooloca sa Muluku? Apwanne ninnaphwanela weemererya yeeyo analocaaya?

Muluku tahi tonatannya makacamiho ahu.

Waakhanle wi onnneerano yeeyo, eyo yaahaala okhala moovuhana ni mikhalelo sawe sinaphwanyeya Mpiipiliyani. Ntoko yootakiherya, Piipiliya onaloca wi Muluku:

“Iphiro sawe ti sawookololowa.  . . . Ori Muluku oororomeleya ni eekhaikhai.”—MALAMULO 32:4.

“Honeemerereya wa Muluku weerano soonanara, wa Ooweryasha weerano sootakhala!”—YOBI 34:10.

“Ooweryasha hanakhoromanyiha othoriha wawe.”—YOBI 34:12.

Muluku haneemererya malapelo yaawo anahusiha sawootha vooloca sa yoowo.

Eyo enaphitaanyerya malapelo yaawo anahusiha wi Muluku tonatannya makacamiho ahu ni yaawo anavolowela mu ikhoco ni owanawana.

“Anamootha, alipa a miririmu yaawo analaleerya mu nsina naka! Miyo nkaarumme, nari waalamulela yaawo, nari olocano mano. Ichu seiyo iri sawaanyiherya sa murima aya.”—YEREMIYA 14:14.

Yesu aathoriha malapelo a wiisootherya.

“Tahi wi oothene yaale anii: ‘Pwiya, Pwiya,’ anamvolowa mu omwene wa wirimu, nto yaaleru anachariha yookhwela ya atiithi aka a wirimu. Nihiku nenlo, ancipale anamulocaka wa miyo: ‘Pwiya, Pwiya, tahi yeehu naalaleerya sa miririmu mu nsina nanyu? Mu nsina nanyu tho naaniikara minepa soonanara, nave naaneera sootikhiniha sincipale!’ Nto kinarwa kaathoriherya, kiriki: ‘nkintonko woosuwelaani! Mukivinyeryevo yeenyu muneera sootakhala!’”—MATEU 7:21-23.