Wa Ahintu, makacamiho sookhumelela sa miteko sa muchu mukhateiye, seiho opankeiye khalai naari hiihaano. Yoolakelela ori ophiya o moksha wi akhale ootaphuwa wa othatuwa. Wi eyo yeereye, muchu onaphwanela okhala ootaphuwa mmuupuweloni wa ichu sa elapo yeela.

Amaka anaroromela wi makacamiho olaka ntakhara soocheka nave yaweeha ya nroromelo. Mwawiiwanana ni totore Sayyid Syeed, muhooleli a Sociedade Islâmica da América do Norte, ipahu yawuupuxerya yawi “elukuluku yoothene nnaphwanela omuthamalela Muluku wa nthowa na mareeliho ahu ni wuupuwelela wi nnaphwanela waakhaviheryaka yaale ari oothoiwa.”

Awo aneemererya wi makacamiho yookhumelela ya saweera sa muchu mukhateiye. Ayuta akina anaroromela wi onamukhalavo oviihiwa muukhwani, wi yooniheryiwe ekhaikhai wa yaale ahooxen’ye ahirino nthowa. Kapala, nihusiheryo na othatuwa nnamvaha muchu ikari soohiyanahiyana wi awerye woopowa wa soocheka sawe.

Yoororomela ya Aputista enaloca wi muchu onnahooxeya ni mikhalelo soohiyanahiyana sa othatuwa, seiho sinatitelela ophiyerya muchu ataphunwe wa miteko, soochunachuna ni miyoonelo soonanara. Moorweela wa miruku, miteko saphaama ni olaka muupuwelo, muchu onanwerya ophiya o nirvana, yoowo ori mukhalelo wa otaphuwa wa makacamiho oothene.

Mwawiiwanana ni A Dictionary of Comparative Religion, akonfusista aneemererya wi makacamiho yookhumelela wa “soohesa sa muchu.” Awo annaroromela tho wi makacamiho ananwerya ovukuliwa moorweela wa miteko saphaama, nyenya mu ikwaha sincipale anatannyiwa ni “soopatuxiwa soomunepani, yeerihaka ohikhalavo mukhalelo woothene wa wiikhapelela.”

Malapelo makina a yaawo aneemererya wi muchu onnahooxeya nthowa na echu vyakala oriheliweiye. Yooriheliwa eyo ennawerya oruuha ekari yaphaama naari nikacamiho; nave muchu onanwerya wiitaphula moorweela wa ochariha sa mihapo. Ntoko yootakiherya, vaavaa muchu onahooxeyeiye ni ereca, owo onnaya wa anamuku, eemereryaka wi awo ananwerya omurehererya.

Wa Akristu makacamiho apacenrye ni yoocheka ya Atamu ni Eva, ntoko onaloceiye liivuru a Mpiipiliyani a Maphatxuwelo. Nyenya ikerexa sincipale sohaaceererya miyoonelo saya wa nihusiheryo nenla. Ntoko yootakiherya, a Katolika akina analoca wi makacamiho ananwerya ‘ovahereryiwa Muluku’. Nave wi Muluku onanwerya opharihela makacamiho yaala wi areeliheno ekerexa naari wi awoopole achu akina.