Wunnuwa Makupa Oomunepani
Ntoko yooniheryiwaaya mmwaha woopacerya, achu ancipale annamucicimiha Piipiliya nthowa nawi masu a Muluku. Awo alonce wi vaavaa anamwaalakhanyaaya ni opharihela malakiheryo awe, annoona okhala awaacameleya wa Muluku nave wi anniiwexexa yoochuna awe.
Piipiliya onnapharihela masu awi wunnuwa ‘omunepani’ achunaka oloca sa meecelo a muchu naari mukhalelo onaphariheleiye okumi. (Yuda 18, 19) Moohiyana ni achu arino muupuwelo woomwiilini ni awiiroromela mukhataaya, yaale arino muupuwelo woomunepani annachuna ohooleliwa ni Muluku nave annacicimiha malamulo awe.—Éfeso 5:1.
EWEHERERYO
NLAKIHERYO NA MPIIPILIYANI: “Wavelavela nihiku na wuukhuwa, ikuru saa sinnavukuwa.” —Masiposipo 24:10.
ELA ENATAPHULELA EHEENI: Ovelavela onanwerya oniceecheiha ophiyerya oniyeleeliha ikuru seiho nnachunaahu wi nivoothe makacamiho a okumi. Moohiyana, ewehereryo enanwerya onivaha ikuru seiho nnachunaahu wi ntitelele oya vahoolo. Okhalano ewehereryo ennanikhaviherya osuwela wi makacamiho nnakumanaahuno ta elukuluku tonto; nave wi, moohilekela ichu inahaala okhala phaama.
TIHEENI MUNAPHWANELAANYU WEERA: Muupuweleke ichu saphaama inahaala weereya omwaahiyu. Ohiya okhala awoova ni yeeyo eni yeereye naari owehererya wi ichu sikhale sawookololowa, mwiilipixeryeke weera ichu mwawiiwanana ni soolakelela sanyu. Eparipari wi “saweereya soohiwehereryeya” inanwerya ophacuwa. (Eklesiyaste 9:11) Chiryene, wiiliwiili ichu sinnatorokeya ikhala saphaama opwaha vaavaa nnuupuwelelaahu. Mwawiihiiha, Piipiliya apharihelaka masu oolikanyiha, onnaloca: “Waale wooshishelo, waale tho oshekuwa; ntakhara honasuwela mpeu taani onii wiinnuwe phaama, waari wa wooshishelo nari oshekuwa nari woothene.”—Eklesiyaste 11:6.
MAAKHULO A MAKOHO MATOKWEENE A OKUMI
NLAKIHERYO NA MPIIPILIYANI: “Mukivahe miruku . . . Masu anyu ti eeparipari.”—Salumu 119:144, 160.
ELA ENATAPHULELA EHEENI: Piipiliya onnaakhula makoho yaawo achu ancipale anapakaaya. Ntoko yootakiherya, owo onnaakhula makoho ntoko ala:
-
Nrwenle woowi?
-
Ntakhara heeni nikhanlaahu?
-
Tiheeni eneereya vaavaa muchu onakhweiye?
-
Ekumi ekhanlevo ti yeelaru pahi?
Achu ancipale orukurerya elapo, aakhavihereya mu okumi aya moorweela wa waalikhela maakhulo a Piipiliya wa makoho yaala ni makina.
TIHEENI MUNAPHWANELAANYU WEERA: Mwaalikhele yeeyo Piipiliya onahusiheiye. Muloce ni mmoha a Anamoona a Yehova wi ookhaviheryeeni omwiiwexexa Piipiliya. Mvolowe mu saiti ahu jw.org, naari mphiye mmithukumano sahu, seiho inarehereryiwa wa achu oothene nave hasinaliveliwa.
MALAKIHERYO MAKINA A MPIIPILIYANI
Moone exilema Ntakhara Heeni Omuhuserya Piipiliya? mu jw.org. Eyo ennaphwanyeya opwaha ilocelo 880
MUSUWELE SOOTHOWA SANYU SOOMUNEPANI.
“Ooreeriwa ti yaawo ari oohaawa mmurimani [naari omunepani].”—MATEU 5:3.
MUHUSERYE SINCIPALE VOOLOCA SA MULUKU ONALOCIWA MPIIPILIYANI.
“Emwaavyeke [Muluku] . . . emphwanyeke . . . ahikhalaka ociiwene wa mmoha ni mmoha a hiyo.”—SAWERIWA T’ARUMMWA 17:27.
MWAALAKHANYEKE NI WUUPUWELELA MICHAKA SA MPIIPILIYANI.
“M’malamulo a Yehova * torimo otheya wawe; Nave m’malamulo awe annupuwelela othana ni ohiyu. . . . Sothesene oneriye onniphwanyeryano.”—SALUMU 1:2, 3, Nlakano Nahihano.
^ par. 23 Yehova nsina na Muluku ntoko nnalociwaaya Mpiipiliyani.
