Muupuwelo Waphaama
Piipiliya onnalopola vooloca sa ichu sinahaala onanariha muupuwelo ahu nave onnanceenyerya waavya ichu sinahaala onikhaviherya.
ESARA
NLAKIHERYO NA MPIIPILIYANI: “Ti waphaama wiisuumaaliha, opwaha okhala mukhoco oowerya.”—Masiposipo 16:32.
ELA ENATAPHULELA EHEENI: Ninnaphura vancipale wakhala wi ninnawerya ovareryela omuchu ahu. Naamwi vakina vaya ekhalakavo mathowa oophwanelela a okhala oonyeenyeya, wakhala wi hinnavareryela, nnahaala okhalano makacamiho mancipale. Otholathola wahiihaanoru, wohooniherya wi muchu akhala oonyeenyeya, hanawerya wuupuwela mwawookololowa, onnaloca naari weera ichu seiho ohoolo waya onakhaleiyeno ekeerelani.
TIHEENI MUNAPHWANELAANYU WEERA: Muhuserye ovareryela esara anyu muhaakumve weera echu yammoori. Naamwi achu akina elocaka wi ohivareryela esara onooniherya ikuru, hiyaano ninnooniherya miruku vaavaa nnasuwelaahu wi iwo olosowa. Piipiliya oni: “Epooma ehilipihiwe, epweshiwa mukuso aya, ti muchu ohinawerya wiihiiha.” (Masiposipo 25:28) Mukhalelo waphaama wa ovareryela esara anyu, ori waavyaavya osuwela phaama mwaheene muchu ahaakumve oloca naari weera echu vyakala. “Miruku sa muchu sinnakuphiha esara awe.” (Masiposipo 19:11) Wakhala wi nohiiwexexa phaama mwaheene, nnahaala okhalano miruku ni ovareryela muupuwelo ahu.
OTHAMALELA
NLAKIHERYO NA MPIIPILIYANI: “Muthamaleke.”—Kolosi 3:15.
ELA ENATAPHULELA EHEENI: Ennalociwa wi pahiru muchu yoowo onathamalela tonawerya okhala oohakalala. Ophitaanyerya tho yaale ayeleenle ichu sincipale, anneemererya yeela. Awo annaloca wi echu yaakhaviherye okhapelela muupuwelo aya waari othamalela ichu yaahanlaayano—ohiya wuupuwelela ichu ayeleenlaaya.
TIHEENI MUNAPHWANELAANYU WEERA: Mahiku oothene, muupuweleke nave murepele ichu munathamalelaanyu. Tahi woochuneya okhala ichu itokotoko. Muupuweleke tho ophiyerya mu ichu ikhaani, ntoko oreera wa okhuma wa nsuwa, ovaanela munakhalaanyu ni oosiveliwaanyu, naari nihiku naphaama mwaaraanyuno. Ichu saphaama ntoko seiha inanwerya wookhaviheryaani okhalano muupuwelo waphaama—wakhala wi munniivaha elukuluku ya woona ni othamalela ichu seiha.
Enamukhala tho yamphurelo wuupuwelela vooloca sa mathowa anaweerihaani waathamalela achu a veechokoni vanyu. Wakhala wi mohoona echu, akina aneeraaya yeeyo enoosivelaani, mwaathamalele, moorweela wa olocano, waarepela ekaarata, e-mail, naari waarepela michaka mu telefoni. Ela enanwerya olipiha onthamwene anyu ni woovahaani ekari ya okhalano ohakalala onarweela mu ovaha.—Saweriwa T’arummwa 20:35.
MALAKIHERYO MAKINA A MPIIPILIYANI
Nyuwaano munanwerya ompaxaara Piipiliya ookaravaariwa mu elocelo yeeyo musuwenlaanyu. Sooruma iho sinnaphwanyeya mu ilocelo opwaha 40 mu jw.org
MURAPELE WAAKHULANA.
“Opacerya waakhulana ori ntoko ocuuwa wa maahi, omalihe mwaha ohaakunve otepa.”—MASIPOSIPO 17:14.
MUSEPE WUUKHUWA VOOLOCA SA OMWAAHIYU.
“Muhiipele murima nnihiku noomeelo, vawi nihiku noomeelo nookhalano sawuukhula saya. Nihiku nnihiku waacano sookacamiha saya.”—MATEU 6:34.
MPACERYEKE WUUPUWELA PHAAMA MUHAAKUMVE WEERA ECHU.
“Wiisuumaaliha waa, okaamoothokororya, nave osuwelasha waa okaamoowehererya.”—MASIPOSIPO 2:11.
