Opharihela Phaama Ikhorowa
Achu ancipale aavukula othoiwa ikhorowa moorweela wa opharihela malakiheryo a Mpiipiliyani.
OKHALANO MAREHERERYO APHAAMA
NLAKIHERYO NA MPIIPILIYANI: “Oopharasha muteko, uupuwelelaka sa muhoolo, onamureela chiri, nto ookhumela murima, onamuhaawa.” —Masiposipo 21:5.
ELA ENATAPHULELA EHEENI: Ochariha vakhiviru-khiviru marehereryo mpankaanyu yoohulela ya okhumelela phaama. Mwawiihiiha, mpake marehereryo anyu mwa miruku. Muupuwele, nyuwaano himuwerya okula ichu soothene munachunaanyu. Nthowa na yeeyo, mpharihele ikhorowa sanyu mwa miruku.
TIHEENI MUNAPHWANELAANYU WEERA:
-
Orepela ichu munachunaanyu. Murepele ichu sinoothowaani mwawiiwanana ni ochuneya waya. Nave murepele ikhorowa sinahaala ochuneya wa echu ti echu. Wakhala wi yoohala ekhorowa, mpharihele mu echu ekina yoochuneya. Ntoko yootakiherya, wakhala wi moomaliha ikhorowa sincipale opwaha seiho mwaarepenlaanyu mmukulaka kasolina, mpharihele ekhorowa mwaahaalaanyu opharihela mu echu ehiri yoochuneyaxa—ntoko yootakiherya, othuma yoolya yoopakiweene.
-
Musepe opaka ivaale mwaapuremwaapure. Wakhala wooweryeya, musepe opaka ivaale. Moohiyana, mwinyoonyerye ikhorowa sanyu muthumaka ichu seiho munachunaanyu. Wakhala wi munathuma ichu mumpharihelaka cartão de crédito, muliveke soothene mweeri ti mweeri wi muhikhaleno evaale etokweene. Wakhala wi mookhalano evaale, mpake marehereryo wi mulive soothene.
Yoolokoha emoha ennaloca wi vaavaa achu anampharihelaaya cartão de crédito wi ethumeno ichu, awo annamaliha ikhorowa sincipale. Mwawiihiiha, wakhala wi mookhalano cartão de crédito, mumphariheleke mwa miruku.
MUSEPE MEERELO OOHIPHWANELELA
NLAKIHERYO NA MPIIPILIYANI: “Porora, elukuluku ya waala hanlima; elukuluku yoohepa, onnayawo ahiphwanyawo echu.”—Masiposipo 20:4.
ELA ENATAPHULELA EHEENI: Oporora onnaruhela ohaawa. Mwawiihiiha, mukhale oowetha vaavaa munapharaanyu muteko, nave mwiilipixerye opharihela phaama ikhorowa sanyu wi sookhaviheryeeni muhoolo.
TIHEENI MUNAPHWANELAANYU WEERA:
-
Mulapeke mwakuru. Wakhala wi munnalapa mwakuru ni ocicimiherya muteko anyu, apatarau anyu anahaala osiveliwaka ni nyuwaano nave anahaala ochuna wi mutitelele olapa.
-
Mukhale oororomeleya. Muhiwiiyeryeke apatarau anyu. Ohiroromeleya onneeriha wi musuweliwe ntoko mpava nave achu ehinachuna wi mphareke muteko aya.
-
Musepe okhala muchu ohaakhwaneliwa. Wakhala wi murima anyu onnaweerihaani ochunaka ikhorowa sincipale nave muhinaakhwaneliwa, munahaala ohela va yawoopiha ekumi anyu ni onanariha onthamwene anyu ni akina. Muupuwele wi, ekumi ti yoochuneyaxa opwaha ikhorowa.
MALAKIHERYO MAKINA A MPIIPILIYANI
Mmwaalakhanye Piipiliya mu interneti, yoowo onaphwanyeya opwaha ilocelo 260 mu jw.org
MUHIMALIHEKE ELUKULUKU NI OPHARIHELA IKHOROWA MU SOOKHOVELELA SOONANARA.
“Anamawurya ni anamalya annahaawa; ikhove inarwa saawariha macapwaca.”—MASIPOSIPO 23:21.
MUHIIPIWEKE MURIMA NI IKHOROWA.
“Muhiipele murima okumi anyu, sa olya ni owurya, nari mwiili anyu, sa owara.”—MATEU 6:25.
MUSEPE NRIMA.
“Muchu awuurela ochimakela muhakhu, nto hansuwela wi ohaawa onnamurweela.”—MASIPOSIPO 28:22.
