Alipa ooyara yaawo anavaha ntakiheryo naphaama annakhala mwawiiwanana ni yeeyo anahusihaaya. Ntoko yootakiherya, muhiweherye wi mwaninyu onahaala okhala oororomeleya wakhala wi onnawiiwaani mulocaka sawootha.

“Ta wunlaana masu awi ‘weereke kinooleelaaka, ohiya kineeraaka.’ Nto ela henaphariheleya wa anamwane. Awo ari ntoko nchoce nenlo nnanuula ichu soothene nnalocaahu ni nneeraahu. Nave wakhala wi meerelo ahu haniiwanana ni yeeyo nnaahusihaahu, vaya anahaala osuwela.”—David.

PIIPILIYA ONI: “Weyano onalaleya ohìya, onniyerya nitho?”—Aroma 2:21.

Anamwane annaatakiherya asitiithi aya ompwaha muchu mukina ophitaanyerya asinthamwene aya. Ela enataphulela wi nyuwaano mwa muchu oopacerya omuhusiha mwaninyu ephiro yaphaama mooniheryaka tho wi munneerano yeeyo munahusihaanyu.

“Hiyaano nnanwerya wuuluula oloca echu ikwaha sincipale nnaachunelaahuvo, nto wakhala wi hinneerano yeeyo nnalocaahu, mwaana onahaala woona. Anamwane annavarerya echu yoothene nneeraahu naamwi nihisuwelaka.”—Nicole.

PIIPILIYA ONI: “Miruku inarwa wirimu” ti soohikhalano “wisotherya.”—Tiyako 3:17.

Mwiisaalikhele mukhatiinyu: Mathatelo taani nyuwaano munoonaanyu? Munamukhaliha hai oothelana anyu naari anamwane? Asinthamwene anyu ta mukhalelo taani? Apwanne munnaapwacha akina? Mano, omuchu anyu ti woophwanelela wi anamwane anyu etakiherye?

“Mi ni aiyaka, hannaakhinyererya anamwane ochara meecelo hiyaano nihinaweryaahu ochariha.”—Christine.

Mveke nikhurumuwelo wa soohesa sanyu. Mwaninyu oosuwela wi nyuwaano mwa muchu oohiphaameya. Wakhala wi moomuchekela mwaarinyu naari mwaninyu munaloca wi “okilevelele,” munahaala waahusiha okhala oororomeleya ni awiiyeviha.

“Anamwane ahu annasiveliwa oniiwa neemereryaka yoohesa ahu ni oveka nikhurumuwelo. Wakhala wi hinneerano, awo anahaala ohuserya wiipithiha soohesa saya.”—Robin.