1-2. Ntakhara heeni Yesu aareiye awuukhuwaxa?

MU NIHIKU nawe nookuchula ntoko muchu, Yesu aahuukhuwa. Moohilekela owo aahaala ohooseya ni okhwa woonanara orweela wa achu yaahaachariha malamulo. Nyenya tahi wi owo aari awuukhuwa pahiru nthowa na okhwa wawe. Owo aanamusivela Tiithi awe nave aachuna omuhakalaliha yoowo. Yesu aahisuwela wi wakhala wi ootitelela okhala oororomeleya variyari va nikacamiho nawoopiha aahaaleiye ohoolela, owo aahaala okhaviherya weeliha nsina na Yehova. Yesu aanaasivela tho achu, nave owo aanasuwela wi ewehereryo ahu ya muhoolo ya ekumi yoohimala pahiru yaahaala okhwaanela moorweela mwa ororomeleya wawe wa Yehova ophiyerya okhwa.

² Naamwi Yesu aari awuukhuwaxa, owo aahikhalano murecele. Yesu aahaaleela amuhuserya awe ariki: “Kinnoovahaani murecele aka.” (Yoh. 14:27) Owo aahikhalano “murecele wa Muluku,” omaaleleya yoowo onarweela mu onthamwene waphaama ni Yehova. Murecele yoowo waahimukhaviherya Yesu ohikhala awuukhuwa.—Fil. 4:6, 7.

3. Tiheeni nnahaalaahu othokororya mmwaha yoola?

³ Haavo mmoha a hiyo onahaala ohoolela mukhalelo wa wuukhuwa ntoko yoowo Yesu aavilenleiye, nyenya oomuchara oothene a Yesu anahaala ohoolela makacamiho. (Mat. 16:24, 25; Yoh. 15:20) Nave moolikana ni Yesu, nnamukhala awuukhuwa mu ilukuluku ikina. Tiheeni nnaphwanelaahu opaka wi nihikhale awuukhuwaxa nave n’yeleele murecele ahu wa mmuupuweloni? Hankooni nthokororye ichu raru seiyo Yesu aapankeiye variyari va muteko awe veelaponi yavathi, nave noone mukhalelo nneeraahu nimutakiherye elukuluku nnahoolelaahu makacamiho.

4. Ni yoorepa ya 1 Tesalónika 5:17 mmuupuweloni, mvahe sootakiherya ikina sinooniherya wi Yesu aahivekela mwawuuluulela variyari va nihiku nookuchula na okumi awe veelaponi yavathi?

⁴ Mwaalakhanye 1 Tesalónika 5:17. Yesu aahivekela mwawuuluulela  mu nihiku nookuchula na ekumi awe veelaponi. Vaava owo aatikithenryeiye yawuupuserya ya okhwa wawe, Yesu aahivekela ntakhara ephaawu ni eviinyu. (1 Kor. 11:23-25) Ehaakumve ocimula mu nipuro nenlo yaampankaayamo Paskha, owo aahivekela vamoha ni amuhuserya. (Yoh. 17:1-26) Elukuluku yaaphin’yaaya o Mwaako Oliveti mu ohiyu yoole, Yesu aahivekela mwawuuluulela. (Mat. 26:36-39, 42, 44) Nave masu ookuchula yaawo aalonceiye ahaakumve okhwa, yaari nivekelo. (Luka 23:46) Yesu aahivekela wa Yehova ntakhara echu eri yoothene yeeren’ye mu nihiku nookuchula na ekumi awe.

5. Ntakhara heeni nroromelo na arummwa naahiceecheya?

⁵ Nthowa nimoha naamweerinhe Yesu ovilela nnikacamiho waari wi owo aahimuroromela Tiithi awe mu ovekela. Mmakupa makina, arummwa hiyaavilenle mu nivekelo ohiyu yoole. Ntoko yookhumelela, olipa waya murima waahiceecheya vaavaa yaaphin’yaaya elukuluku ya weereryiwa. (Mat. 26:40, 41, 43, 45, 56) Vaavaa nnahoolelaahu makacamiho, nnahaala otitelela okhala oororomeleya pahiru wakhala wi ninnachariha yootakiherya ya Yesu ni ‘ovekelaka’ moohihiyererya. Nnaphwanela ovekela ntakhara echu taani?

6. Nroromelo nni nnikhaviherye hai wiikhalelaru mmureceleni?

⁶ Nnaphwanela omveka Yehova wi, “munaaceererye hiyo nroromelo.” (Luka 17:5; Yoh. 14:1) Nnaphwanela okhala oororomeleya nthowa nawi Satana onahaala oweeha oothene yaale anamuchara Yesu. (Luka 22:31) Nroromelo nni nnikhaviherye hai wiikhalelaru mmureceleni elukuluku nnahoolelaahu makacamiho oocharelana? Vaavaa nnapakaahu owetha wahu ophiyerya nnaweryelaahuvo wi nivoothe nikacamiho, nroromelo nnamuneeriha omukuherya Yehova mwaha yoowo onanuukhula. Woona  wi ninnaroromela wi owo oosuwela echu yaweera mmukhalelo woophwanelela opwaha nnuupuwelaahu, ninnakhalano murecele wa mmuupuweloni ni mmurimani.—1 Ped. 5:6, 7.

7. Tiheeni munahuseryaanyu orweela wa masu a Ropertu?

⁷ Nivekelo ninnanikhaviherya okhapelela murecele ahu wampuwa, moohipwacha makacamiho taani nnahoolelaahu. Muthokororye yootakiherya ya Ropertu, mutokweene a muloko oororomeleya yoowo orino iyaakha makhumi mathanu namararu. Owo ooloca: “Ekano enaphwanyeya mu Filipi 4:6, 7 ennakikhaviherya ovilela ni makacamiho mookumini mwaka. Kaahihoolela makacamiho a ophwanya ikhorowa. Nave mu elukuluku vakhaani kaahiyeleela ekari aka ya orumeela ntoko mutokweene.” Tiheeni yaamukhavihenrye Ropertu okhapelela murecele wampuwa? Owo ooloca: “Kinnavekela mwawaakuveya vaavaa kinapaceryaaka okhala awuukhuwa. Kinnaroromela wi vaavaa kinavekelaaka moohihiyererya ni murima woothene, kinahaala okhalano murecele wawaaca.”

8. Ntoko elociwaaya mu Yohani 8:29, nthowa taani nikina naamweerinhe Yesu okhalano murecele wampuwa?

⁸ Mwaalakhanye Yohani 8:29. Naamwi elukuluku iikariweiye, Yesu aahikhalano murecele wampuwa nthowa nawi owo aahisuwela wi aanamuhakalaliha Tiithi awe. Owo aahititelela okhala awiiwelela, vaavaa eyo yaaryaaya yoovila wa yoowo. Owo aanamusivela Tiithi awe nave aaheeriha omurumeela Yehova okhala echu yoochuneyaxa mookumini mwawe. Yesu ahaakumve orwa veelaponi, owo aari “mulipa òteka.” (Masi. 8:30, BNM). Nave elukuluku aareiye veelaponi yavathi, mwamvai aahaahusiha akina vooloca sa Tiithi awe. (Mat. 6:9; Yoh. 5:17) Muteko yoowo waahimuruhela Yesu ohakalala wawaaca.—Yoh. 4:34-36.

9. Okhala ooweiwa mmuteko woolaleerya enanikhaviherya hai okhapelela murecele ahu wampuwa?

 ⁹ Ninnamutakiherya Yesu moorweela mwa omwiiwelela Yehova ni okhala “oopharasha muteko wa Apwiya [Yehova].” (1 Kor. 15:58) Vaavaa nnakhalaahu ‘ooweiwa’ mmuteko woolaleerya, nnamukhalano moonelo woophwanelela vooloca sa makacamiho ahu. (Saw. 18:5) Ntoko yootakiherya, yaale nnaaphwanyaahu mmuteko woolaleerya, wiiliwiili annahoolela makacamiho onipwaha hiyaano. Nyenya, vaavaa anahuseryaaya omusivela Yehova ni opharihela ekano awe, ikumi saya sinnatorokeya nave annakhala oohakalala. Elukuluku eri yoothene nnoonaahu eyo yeereyaka, ninnaroromela wi Yehova onahaala onikhapelela. Nave olekecheya yoowo onnanikhaviherya okhapelela murecele ahu wampuwa. Murokora yoowo aawaaniha mu okumi awe woothene ni moonelo woovirelela wa ohiphwanelela ohoona wi ela eparipari. Owo ooloca: “Vaavaa kinakhalaaka ooweiwa mmuteko woolaleerya, kinnawerya ovareryela moonelo aka ni okhala oohakalala. Kinoona wi ela eneereya nthowa nawi vaavaa kinakhalaaka mmuteko woolaleerya, kinniisoona okhala vakhiviru ni Yehova.”

10. Tiheeni munahuseryaanyu orweela wa masu a murokora Prenta?

¹⁰ Muthokororye tho yootakiherya ya murokora oniichaniwa Prenta. Oopiili, owo ni mwanawe annahoolela ereca etokotoko. Prenta hanawerya weeca, owo anapharihela ekarinya nave orino ikuru sookotakota. Owo onnalaleerya empa ni empa elukuluku onaweryeiye weerano yeeyo, nyenya owo onnalaleerya vancipale moorweela wa orepa ikaarata. Owo ooloca: “Vaavaa kaasuwenlaaka wi ereca aka heni epenuseye mu elapo yeela, kaahitikitherya muupuwelo aka woothene mmuteko woolaleerya. Mweeparipari, vaavaa kinalaleeryaka, nkinuupuwela vooloca sa wuukhuwa waka. Ohiya yeeyo, kinatikitheryeya mu waakhaviherya yaale kinalocaakano mu ekulucu ya muloko aka. Nave ilukuluku soothene ennakuupuxerya ewehereryo kiryaakano ya muhoolo.”

11-13. (1) Arummwa ni akina yoonihenrye hai okhala asinthamwene eeparipari a Yesu? (2) Ovolowela taani asinthamwene a Yesu yaaryaayano mwa yoowo?

¹¹ Variyari va elukuluku yoothene Yesu aalaleeryeiye, arummwa oororomeleya yaahikhala asinthamwene eeparipari a Yesu. Awo yaari ntoko asinthamwene yaawo Piipiliya onaaloceiye wi: “Ookhala nthamwene muchu onaataaneiyeno ompwaha munnawe.” (Masi. 18:24) Yesu aahaavaha esisapo asinthamwene yaawo. Variyari va orummwa awe, haavovo mmoha a asinnawe oomwiilini oonihenrye nroromelo mwa yoowo. (Yoh. 7:3-5) Mu elukuluku, ahima awe yaaphiyerya oloca wi owo aarimusavuwa. (Mar. 3:21) Moohiyana, Yesu aawerya oloca wa arummwa oororomeleya mu ohiyu ahaakumve okhwa: “Nyuwo muri yale yatitenle okhala ni miyo elukuluku yothene n’wehiwani mwaka.”—Luka 22:28, BNM.

¹² Mu elukuluku ekina arummwa hiyaamusivelinhe Yesu, nyenya owo haatikitheryen’ye mu soohesa saya nave aahoona wi awo yaahikhalano nroromelo mwa yoowo. (Mat. 26:40; Mar. 10:13, 14; Yoh. 6:66-69) Mu ohiyu wookuchula vaavaa aareiye vamoha ni yaawo ahaakumve wiiphiwa, Yesu aahiloca ni alopwana yaala oororomeleya: “Nto nyuwo kinnaweeraani asinthamwene, vawi soothene kiiwalaaka wa Atiithi kihoosuwelihaani.” (Yoh. 15:15) Moohikhwa minikwa, asinthamwene a Yesu yaari ehime etokweene ya nlipiho wa yoowo. Nikhaviheryo nenlo awo yamvanhaaya mu orummwa awe naahimweeriha Yesu okhala oohakalala.—Luka 10:17, 21.

¹³ Ohiya pahiru arummwa, Yesu aahikhalano asinthamwene akina, alopwana ni athiyana, yaawo yaamukhaviherya mmuteko awe woolaleerya ni mmikhalelo mikina sawooneya. Akina yaahinwopa mmavaate mwaya wi alye vamoha ni yaawo. (Luka 10:38-42; Yoh. 12:1, 2) Akina yaaneeca ni yoowo nave yaanuuka sookhalano saya ni yoowo. (Luka 8:3) Yesu aahikhalano asinthamwene aphaama nthowa nawi owo aari  nthamwene aphaama wa yaawo. Owo aanapaka ichu saphaama wa yaawo nave Yesu haaweherya wi awo epake sincipale opwaha yaaweryelaayavo. Yesu aari oophaameya, nyenya aanathamalela nikhaviheryo nenlo asinthamwene awe oohiphaameya yaamvahaaya. Nave awo, moohikhwa minikwa, yaanamukhaviherya okhapelela murecele wampuwa.

14-15. Nni naapake hai asinthamwene aphaama, nave awo eni enikhaviherye hai?

¹⁴ Asinthamwene aphaama anamunikhaviherya wiikhalelaru oororomeleya wa Yehova. Nave mukhalelo woophwanelela wa waapaka asinthamwene ori okhala nthamwene aphaama. (Mat. 7:12) Ntoko yootakiherya, Piipiliya onnanceenyerya omaliha elukuluku ni ikuru sahu wi naakhaviheryeke akina, xaxaxa yaale ari “oothowiwa.” (Éfe. 4:28) Apwanne mwanwerya omuupuwela muchu yoowo mwaahaalaanyu omukhaviherya mmulokoni mwanyu? Apwanne mwanwerya omuthumela ichu muchu yoowo ohinawerya weeca nthowa na wiiceliwa naari wuuluvala? Mano mwanwerya ovaha yoolya wa emusi yeeyo eri yoohaawa? Waakhanle wi munnasuwela mukhalelo wa opharihela esaiti jw.org^® ni JW Library^® app, apwanne mwanwerya waakhaviherya akina mmuloko anyu wi esuwele mukhalelo wa opharihela? Wakhala wi ninnateteiwa mu waakhaviherya akina, nnamukhala oohakalala chiryene.—Saw. 20:35.

¹⁵ Asinthamwene nnaapakaahu anamunikhaviherya elukuluku nnahoolelaahu makacamiho, enikhaviheryaka okhapelela murecele ahu wampuwa. Hiiha ntoko Elihu anwiriyanne Yupu vaavaa aaloceiye makacamiho awe, asinthamwene ahu annanikhaviherya moorweela wa oniwiriyana moopisa murima vaavaa nnatharihaahu yeeyo enanuukhula. (Yobi 32:4) Hannaphwanela oweherya wi asinthamwene ahu epake soolakelela ntakhara hiyo, nyenya nnakhala amiruku  vaavaa nnawiriyanaahu ekano aya enathipeleya Mpiipiliyani. (Masi. 15:22) Nave ntoko Mwene Tavite yoowo mwawiiyeviha eemerenrye nikhaviheryo na asinthamwene awe, hannaphwanela okhala awiirumiha mu waakhela nikhaviheryo nenlo asinthamwene ahu ananivahaaya elukuluku nnachunaahu. (2 Sam. 17:27-29) Mweeparipari, asinthamwene aphaama ntoko yaawo ari yoovaha yeeyo enarweela wa Yehova.—Tiy. 1:17.

16. Mwawiiwanana ni Filipi 4:6, 7, tuuvi ori mukhalelo mmoha mummo nneeraahu niphwanye murecele wampuwa? Mutharihe.

¹⁶ Mwaalakhanye Filipi 4:6, 7. Ntakhara heeni Yehova onanleeleiye wi nnaphwanela waakhela murecele yoowo onavaheiye moorweela “mwa Yeesu ori Kristu”? Ti nthowa nawi nnahaala okhalano nave okhapelela murecele wa mmuupuweloni pahiru wakhala wi ninniiwexexa nave nookhalano nroromelo mmurici yoowo Yesu oreiyeno mu yookhwela ya Yehova. Ntoko yootakiherya, moorweela mwa mukucho wa yawoopola wa Yesu, soocheka sahu soothene inamuleveleliwa. (1 Yoh. 2:12) Vaavaa nnuupuwelaahu yeela, ninnakhala oohakararyeya! Ntoko Mwene a Omwene wa Muluku, Yesu onahaala omaliha otakhala woothene Satana ni elapo awe anantannyeryaaya. (Isa. 65:17; 1 Yoh. 3:8; Wup. 21:3, 4) Ela ennanivaha ewehereryo yooreeraxa! Nave naamwi Yesu anivanhe muteko woovilaxa, owo ori ni hiyo, anikhaviheryaka mmahiku yaala ookuchula a elapo yeela. (Mat. 28:19, 20) Ela ennanivaha olipa murima! Ohakararya, ewehereryo, ni olipa murima—ala maluku oolipa yaawo ari mathipelo anateka murecele ahu wampuwa.

17. (1) Mukristu oni akhapelele hai murecele wampuwa? (2) Ntoko elaiheryiwaaya mu Yohani 16:33, tiheeni nnahaalaahu owerya opaka?

¹⁷ Muni mukhapelele hai murecele anyu wampuwa elukuluku munahokoliwaanyu ni makacamiho mancipale? Munahaala weerano eyo moorweela wa otakiherya ichu seiyo Yesu aapankeiye. Yoopacerya, mvekele, nave mvekele moohihiyererya. Yanaawiili, munwiriyane Yehova, nave mulaleerye mwamvai naamwi okhalaka woovila weerano. Nave yaneeraru, mwaaroromele asinthamwene anyu wi yookhaviheryeeni elukuluku munahoolelaanyu makacamiho. Voocharela murecele wa Muluku onahaala okhapelela muupuwelo ni murima anyu. Nave moolikana ni Yesu, munanwerya ovootha nikacamiho nri noothene.—Mwaalakhanye Yohani 16:33.