1-2. (1) Mmikhalelo taani Satana aawonkeiye achu? (2) Tiheeni nnahaalaahu othokororya mmwaha yoola?

SATANA yoowo ori “tiithi a wootha,” onnaawoka achu ovinyerya elukuluku ya Atamu ni Eva. (Yoh. 8:44) Sawootha ikina sa seiho sinaphitaanyerya mahusiheryo atheru vooloca sa okhwa ni okhala ni ekumi muchu amanle okhwa. Sookhovelela ni saweera sa achu awunlaana sinathipeleya mu woova minepa sa alipa ookhwa. Ntoko yookhumelela, anna ni arokora ahu ancipale ‘annawaniha ntakhara nroromelo’ vaavaa muchu a veemusini naari va mucecheni onakhweiye.—Yuda 3.

² Wakhala wi munnahoolela yaweeha sintoko yeela, tiheeni eni yookhaviheryeeni wiikhalelaru aweemeleleya wa yeeyo Piipiliya onahusiheiye vooloca sa alipa ookhwa? (Éfe. 6:11) Muni mmuhakararye hai ni omulipiha munna naari murokora yoowo onakhinyereryiwa ovolowela sookhovelela seiho sihinamuhakalaliha Muluku? Mwaha ola, onahaala othokororya ohoolela yoowo Yehova onanivaheiye. Voopacerya, hankooni noone yeeyo Piipiliya onanihusiheiye vooloca sa okhwa.

3. Teevi ekhumelenle mu wootha woopacerya?

³ Muluku hantonko wuupuwela wi achu ekhweeke. Nyenya wi ekhalano ekumi okhala wookhala, Atamu ni Eva yaaphwanela omwiiwelela Yehova, yoowo aavanhe nlamulo nookhweya: “Kaahi mwiri woosuweliha yaphaama ni yoonanara. Ohilye. Walya onamookhwa chiri.” (Map. 2:16, 17) Voocharela Satana aahitannya makacamiho. Alocaka orweela wa enowa, owo aahi wa Eva: “Nari! Nyuwo hamukhwaru.” Moothananiha, Eva aaheemererya yawootha nave alya yawiima. Voocharela, iyawe aalya tho yawiima. (Map. 3:4, 6) Ntoko yookhumelela, yoocheka ni okhwa sohaavolowela achu oothene.—Aro. 5:12.

4-5. Yawootha taani ekina Satana onaloceiye wi aawoke achu?

⁴ Atamu ni Eva yaahikhwa, hiiha ntoko Muluku aalonceiye. Nyenya  Satana hahin’ye waawoka achu vooloca sa okhwa. Moovira wa elukuluku, owo aahipaceryiha sawootha ikina. Emoha wa sawootha seiyo tiyawi, vaavaa mwiili onakhwaaya, muchu onnatitelela okhala, akhweya ntoko munepa. Sookhalavo mikhalelo mincipale sa wootha yoola, nave ophiyerya olelo achu ancipale annawokiwa ni wootha yoola.—1 Tim. 4:1.

⁵ Ntakhara heeni achu ancipale annuuwela mu sawootha seiho? Ti nthowa nawi haavo mmoha a hiyo onachuna okhwa. Nipatusiwe wi nikhaleno ekumi okhala wookhala. (Ekle. 3:11) Wa hiyo, okhwa mwiicani. (1 Kor. 15:26) Mwa yeeyo, Satana onnapharihela muteko moonelo yoowo achu aryaayano wi aawoke.

6-7. (1) Apwanne Satana owerya ovitha wa achu oothene iparipari vooloca sa alipa ookhwa? Mutharihe. (2) Iparipari sa Piipiliya sinanikhaviherya hai ohiwoova alipa ookhwa?

⁶ Moohiphwacha wiilipixerya woothene, Satana hawenrye ovitha iparipari wa achu oothene vooloca sa okhwa. Nnakhala mu elukuluku yeeyo achu ancipale opwaha khalai asuwenlaaya nave anahusihaaya yeeyo Piipiliya onaloceiye sa mukhalelo wa alipa ookhwa ni ovinya mookhwani. (Ekle. 9:5, 10; Saw. 24:15) Iparipari seiha sinnanihakararya, nave sinnaviihavo woova wahu ni minikwa. Ntoko yootakiherya, hannawoova alipa ookhwa; naari wuupuwela wi awo anamuhooseya mu nipuro vyakala. Noosuwelatho wi haanono ekumi nave wi heni epake yoonanara eri yoothene ntakhara muchu. Eri ntoko wi ari mu ikhove sawiiseela. (Yoh. 11:11-14) Hiyo noosuwela tho wi alipa ookhwa hanoona elukuluku ovira waya. Mwa yeeyo, vaavaa ovinya mookhwani onahaalaaya opacerya, ophiyerya wi yaale akhwile mu iyaakha masana hewerya osuwela wi yoovira elukuluku yincipale, onahaala okhala ntoko onyupula wa niitho.

⁷ Eparipari vooloca sa yeeyo eneereya ni muchu ookhwa ti yookwakwaleya, yookhweya ni yeeparipari, hamuneemererya? Nihusiheryo nla ti noohiyana ni sawootha sa Satana, seiyo sinawaakanyerya achu. Sawootha sawe tahi wi pahiru sinaawoka achu ancipale, nyenya sinnananariha ni onyemula nsina na Mpatusa ahu. Wi niiwexexe phaama epahu enatannyiwa ni Satana, hankooni nthokororye maakhulo a makoho anacharela: Ti mwawiihai sawootha sa Satana sinamunyemulaaya Yehova? Mmukhalelo taani sawootha iho sinnaweeriha achu wuupuwela wi mukucho wa yawoopola wa Yesu hiwaano esisapo? Mukhalelo taani sawootha iho sinaaceereryaaya wiicela ni makacamiho a achu?

8. Ntoko yooniheryiwaaya mu Yeremiya 19:5, sawootha sa Satana vooloca sa alipa ookhwa sinanyemula hai ophwanelela wa Yehova?

⁸ Sawootha sa Satana vooloca sa alipa ookhwa sinnanyemuliha ophwanelela wa Yehova.  Sawootha iho sinaphitaanyerya nihusiheryo natheru nawi alipa ookhwa annahooseya mu cukucha a mooro. Ola ophuca yoowo oneereliweiye Yehova! Mwawiihai? Sawootha seiho sinnaweeriha achu wuupuwela wi Yehova tawuuma murima ntoko Musaserya. (1 Yoh. 4:8) Nyuwo munoona hai vaavaa munuupuwelaanyu wi akina ananwerya wuupuwela hiiha ntakhara Yehova? Opwaha soothene, ti mwawiihai Yehova onooneiye? Mweeparipari, Yehova onniica mukhalelo ori woothene wa otakhala.—Mwaalakhanye Yeremiya 19:5.

9. Sawootha sa Satana sinaweeriha achu wuupuwela eheeni vooloca sa mukucho wa Yesu yoowo otharihiwe mu Yohani 3:16 ni 15:13?

⁹ Sawootha sa Satana vooloca sa okhwa sinneeriha mukucho wa woopola wa Kristu ohikhalano esisapo. (Mat. 20:28) Yawootha ekina ya satana ti yawi achu aakhalano munepa ohinakhwa. Waakhanle wi eyo eparipari, muchu ti muchu aahaala okhala okhala wookhala. Kristu hiyaahaala ovaha ekumi awe ntoko woopola ntakhara hiyo wi nikhaleno ekumi yoohimala. Nyenya mukucho wa Yesu yawooniherya etokweene ya osivela yoowo emusi yaachu yaakhenlaaya. (Mwaalakhanye Yohani 3:16; 15:13.) Sawootha sa Satana sinnaweeriha achu wuupuwela wi mukhalelo yoola mutokweene wa osivela hiwaano mphurelo. Apwanne munnawerya waanyiherya mukhalelo Yehova ni Yesu anoonaaya vooloca sa yeeyo?

10. Sootakiherya taani sinooniherya wi sawootha sa Satana vooloca sa okhwa pahi sinaaceererya wiicela ni makacamiho wa achu?

¹⁰ Sawootha sa Satana sinnaaceererya wiicela ni ohooseya wa Achu. Vaavaa mwaana onakhweiye, akhweya asitiithi awe anniiwa elociwaka: ‘Muluku oomukuxa mwaninyu wi aye wirimu woona wi aanamuchuna munkeelo mukhaani.’ Apwanne yawootha yeela ya Satana ennaviihavo osooseya naari wi enamwaacererya wiicela wa asitiithi? Muupuwele yawootha ekina: Nihusiheryo na cukucha a mooro. Nihusiheryo nla natheru ninnaphariheliwa wi nivahererye yootaphulela ya meerelo ootakhala. Akina yaawo yaheemererya mahusiheryo a ekerexa yaanakuxiwa ekerihiwa va mwiri nave yaaneeyeliwa ni mooro. Liivuru onaloca sa Inquisição Espanhola oothariha wi yaawo yaapaka meerelo yaawo ootakhala akhweya yuupuwela wi pahiru yaaweerela yaawo yaheemererya meerelo a wunlaana “mukhalelo woopacerya wa yeeyo enalikana ni cukucha a mooro oohimala.” Mwa yeeyo, ehakumve okhwa, awo yaaphwanela ocharuwa wi ehiye mu cukucha a mooro. Nave moone yeeyo eneereya mu ilapo sincipale. Achu aniisoona okhala okhinyereryiwa waalapela amusi aya akhwile naari owuupuwelela ni waaveka mareeliho. Akina anneererya okhala mmureceleni ni amusi aya akhwile nthowa nawi annoova wi anahaala olakiwa ni yaawo mmukhalelo vyakala. Ti yoothananiha woona mukhalelo soororomela seiyo sinarweela wa Satana sihinavahaaya nihakararyo wa achu. Ohiya yeeyo, sawootha iho sinnaweeriha achu okhalano woova ni okhala awuukhuwa nihirivo nthowa.

11. Ti mwawiihai amusi ni asinthamwene akhweya eneeraaya yeererye onikhinyererya?

¹¹ Hiyo ninnamusivela Yehova ni mahusiheryo a Piipiliya. Osivela yoola onnanivaha ikuru wi niheemererye vaavaa asinthamwene ni amusi, akhweya yaawo arino soolakelela saphaama, ananikhinyereryaaya opaka makupa mu sookhovelela seiho Piipiliya ohineemereryeiye. Akhweya awo anamweererya onoopopiha, elocaka wi hiyo hinaamusivela muchu yoowo okhwile. Naari awo ananwerya oloca wi, wa nthowa nahu, muchu yoowo okhwile onahaala okooka wi aahooxe ale ari akumi. Mmikhalelo sintoko seiha, nni naakihe hai eparipari? Moone malakiheryo makina a Piipiliya yaawo anahaala onikhaviherya ni mukhalelo nneeraahu nipharihele.

12. Sookhovelela taani seiho Piipiliya ohinakhavihereiye?

¹² Mukhale oolakelela wi “mmwalane” ni soororomela ni sookhovelela seiyo sihiniiwanana ni Piipiliya. (2 Kor. 6:17) Mu elapo emoha yo Karipe, ancipale anaroromela wi, vaavaa muchu onakhweiye, “munepa awe” onanwerya okhala  mu elukuluku vakhaani variyari va achu yaawo ari akumi nave winle ikuhu wa yaale yamukhaliha moonanara. Yoothoonyerya emoha yooloca wi “munepa awe” onanwerya tho “ompaka namvutuka mutokweene vamucecheni.” O Afrika, achu aakhalano yookhovelela ya okhuneela iweheryo inakhala mpa wa mulipa ookhwa nave orukunusela iruku sawe vasirini. Ntakhara heeni awo anapakaaya yeela? Akina analoca wi alipa ookhwa hanaphwanela woona mwiili aya mmukhalelo ori woothene! Woona wi nnamulapela Yehova, hiyo hinneemererya soororomela vyakala naari hannapaka makupa mu sookhovelela seiho sinakhaviherya sawootha sa Satana.—1 Kor. 10:21, 22.

13. Ntoko elociwaaya mu Tiyako 1:5, wakhala wi munnakhwa minikwa vooloca sa yookhovelela yammoori, tiheeni munaphwanelaanyu weera?

¹³ Wakhala wi nyuwo munnakhwa minikwa waakhanle wi yookhovelela yammoori ennamuhakalaliha Yehova, munaphwanela ovekela wa yene mumvekaka miruku. (Mwaalakhanye Tiyako 1:5.) Voocharela, mpake otholathola nave moone yeeyo soolaleeryiwa sinaloca sa mwaha yoowo. Wakhala wi ti woochuneya, muloce ni atokweene. Awo hanahaala oloca yoolakelela taani munaphwanelaanyu opaka, nyenya anamookhaviheryani wuupuwelela ikano soochuneyaxa sa Piipiliya, ntoko seiho nonnaahu woopaceryani. Mucharihaka sooleeliherya seiya, nyuwaano munavyakiha “owerya wa waanyiherya” wanyu, nave owerya yoowo onahaala wookhaviheryaani osuwela “yeeyo eri yaphaama ni yoonanara.”—Ahe. 5:14, TNM.

14. Mmukhalelo taani nnahaalaahu osepa waakwaculiha akina?

¹⁴ “Mweereno soothene wi mmucicihiheke Muluku. Muhaakwaculihe [akina].” (1 Kor. 10:31, 32) Vaavaa nnalakelelaahu opaka makupa mu soolakelela, nnaphwanela wuupuwela mukhalelo soolakelela sahu sinahaalaaya ovolowela yawuupuserya-ya-murima ya akina, xaxaxa annihu. Mweeparipari, hinnachuna omukwachuliha muchu! (Mar. 9:42) Opwaha yeeyo, nnaphwanela okhalano ekaasoope wi nihiwuukhule yaale ahiri Anamoona. Osivela onahaala onikhaviherya oloca ni yaawo mmukhalelo woocicimiha, yoowo onamusivela Yehova. Hinnachuna waakhulana ni achu naari mano waakacakaca ni sookhovelela saya naari waanyemula yaawo. Ilukuluku soothene muupuwele: Osivela ti wakuru! Vaavaa nnooniheryaahu osivela, nipakaka ichu moocicimiha, ni moothokororya, nnanwerya woolowiha murima wa ahimaahu ni asinthamwene yaawo ahiri Akristu.

15-16. (1) Ntakhara heeni ti waphaama waaleela akina wi nyuwo mwa Namoona a Yehova? Mvahe yootakiherya. (2) Ti mwawiihai masu a Paulo anaphwanyeya mu Aroma 1:16 anaphariheleyaaya wa hiyo?

¹⁵ Mweerihe wi achu oothene va mucecheni esuwele wi mwa mmoha a Anamoona a Yehova.  (Isa. 43:10) Ahima ni asinthamwene anyu anamukhala oonyeenyeya nthowa na ohipaka wanyu makupa mu sookhovelela. Nyenya wakhala wi awo aasuwela wi mwa Namoona a Yehova, onamukhala wookhweya wa nyuwo ovilela ni mikhalelo seiyo. Franxisko, yoowo onakhala o Mosampike wenno, oorepa: “Vaavaa miyo ni mwaaraka, Karolina, naahusenryaahu eparipari, naahaaleela ahimaahu wi hinaahaala opakaka isatakha ntakhara alipa ookhwa. Yoolakelelaahu yaaheehiwa vaavaa murokora a Karolina aakhwileiye. Yookhovelela ya va mucecheni tiyawi mulipa ookhwa arapihiwe mwa muhapo. Voocharela, mmusi awaacameleya a mulipa ookhwa onaphwanela okona ohiyu oraru mu nipuro orapihiwevo muruchu. Achu aneemererya wi eyo ennamaaliha esara ya munepa wa mulipa ookhwa. Woona wi Karolina aari mmusi awaacameleya, ahimaawe yachuna wi owo acharihe yookhovelela aya.

¹⁶ Tiheeni Franxisko ni Karolina yaapankaaya? Franxisko onnathariha: “Hiyo ninnamusivela Yehova nave nnachuna omuhakalaliha. Mwa yeeyo, naahiikhooca opaka makupa mu yookhovelela. Ahima a Karolina yaahitepa onyeenyeya. Awo yaahiloca wi waari mukhalelo woohaacicimiha alipa ookhwa nave wi hiyaahaala onixekuryaka naari mano onikhaviherya. Woona wi naahaatharihela soororomela sahu, naahithanla ohiloca sa soororomela sahu elukuluku yaaryaaya oonyeenyeya. Ahima akina yaahiphiyerya okhala mu makupa ahu, elocaka wi naahaatharihela soororomela sahu. Moovira wa elukuluku, ahima a Karolina yaahikhurumuwa nave niwerya opaka murecele ni yaawo. Akina yaahirwa owaani nave eveka soolaleeryiwa sa Piipiliya.” Mmikhalelo sintoko seiha, hamunaphwanela wuuliwa muru mwa yeeyo munaroromelaanyu. Mwaakihe eparipari vooloca sa ookhwa!—Mwaalakhanye Aroma 1:16.

17. Tiheeni enahaala onikhaviherya okhala nthamwene eeparipari wa munna naari murokora Eekristu yoowo okhweliwe?

¹⁷ Vaavaa munna naari murokora Eekristu onamuyeleeleiye oosiveliwa awe mookhwani, nnaphwanela opaka owetha wahu wi nikhale, ‘nthamwene [eeparipari] . . . mu elukuluku ya wuukhuwa onakhala munna oyariwano.’ (Masi. 17:17) Nni nikhale hai “nthamwene [eeparipari]” xaxaxa wakhala wi munna naari murokora onnakhinyereriwa opaka makupa mu sookhovelela ikina sihiniiwanana ni Piipiliya? Aakhalavo malakiheryo meeli a Piipiliya yaawo eni enikhaviherye waahakararya yaale akhweliwe.

18. Ntakhara heeni Yesu aahinla, nave tiheeni nnahuseryaahu orweela wa yootakiherya awe?

 ¹⁸ “Munleke ni yaawo ananla.” (Aro. 12:15) Ikwaha ikina, hannasuwela echu nnaphwanelaahu oloca ni muchu yoowo ori oohica ntakhara omuyeleela oosiveliwa awe mookhwani. Mu ikwaha ikina, miithori ahu annaloca vancipale opwaha masu ahu. Vaavaa Lasaro aakhwileiye, arokorawe, Marta ni Mariya, ni asinthamwene akina yaahinla ntakhara yene. Vaavaa Yesu aaphin’yeiye evinrevo mahiku masese, owo tho “aahinla.” Vano ntakhara heeni Yesu aahinla asuwelaka wi aahaala omviiha nthamwene awe? (Yoh. 11:17, 33-35) Miithori a Yesu yaahooniherya wi owo aahikhalano moonelo woolikana ni Tiithi awe. Nave miithori awo yaahooniherya ophiyerya mweeryo taani Yesu aasiveleiye emusi ya Lasaro. Mukhalelo yoowo waahimvaha nihakararyo Marta ni Mariya. Mmukhalelo woolikana, vaavaa anna mmulokoni anoonaaya osivela ni opwacha wahu, awo annakhala oolekecheya wi haari meekhaaya. Awo annasuwela wi arukureryiwe ni asinthamwene oosivela yaawo aanaapwacha.

19. Wakhala wi munna naari murokora oomuyeleela oosiveliwaawe mookhwani, nni ncharihe hai nlakiheryo nnaphwanyeya mu Eklesiyaste 3:7?

¹⁹ “Elukuluku yoomaala ni elukuluku yooloca.” (Ekle. 3:7) Mukhalelo mukina wa omvaha nihakararyo Mukristu yoowo omuyelenle osiveliwa awe mookhwani ori okhala namawiriyana aphaama. Mmuhiye wi owo aloce moonelo awe woothene nave muhithokororye masu “oohisuwanyeya.” (Yobi 6:2, 3) Akhweya munna naari murokora owo ori awuukhuwasa nthowa na ahima awe ahiri Anamoona. Mwa yeeyo, mvekele vamoha ni yoowo. Mvekele moopachaanyerya wi Yehova, yoowo ori ‘namawiriyana a mavekelo,’ amukhaviherye munna okhalano ikuru ni wuupuwela mookwakwaleya. (Sal. 65:2) Wakhala wi mikhalelo sinneemererya, mmwaalakhanye Piipiliya vamoha ni yoowo. Naari mwaalakhanye vamoha ni yoowo mwaha woochuneya mu soolaleeryiwa sahu, ntoko yaweereya ya okumi yeeyo enahaala omvaha nihakararyo.

20. Tiheeni nnahaalaahu othokororya mmwaha onacharela?

²⁰ Yehova oonivaha ekari etokweene: osuwela eparipari ntakhara alipa ookhwa ni ewehereryo yoohakalaliha ya ovinya mookhwani! (Yoh. 5:28, 29) Mwa yeeyo, muhoove waakiha eparipari ya Piipiliya. Ikwaha soothene wakhala wooweryeya, muloce iparipari seiho wa achu. Nyenya wookhalavo mukhalelo mukina Satana onaphariheleiye wi achu ekhale mweepiiphini: Onamulosiwe. Meerelo makina ni mathatelo ananwerya oovoloweliwa ni muraakho yoola wa masololo. Mmwaha onacharela, nnahaala othokororya ntakhara heeni ninnaphwanela okhala ocai wa yaawo.