1. Ntoko etharihiwaaya mu Éfeso 6:10-13 tuuvi ori mukhalelo Yehova onooniheryeiye wi onnaapwacha alapeli awe? Mutharihe.

YEHOVA Muluku oosivela nave onnateteiwa vancipale ni alapeli awe. Tinthowa nene owo onanikhaviheryeiye okhala aweemeleleya ntakhara amwiicani ahu. Amwiicani ahu atokweene ti Satana ni masololo awe. Yehova onnanivaha olopola ntakhara yaawo nave onnanivaha soothene nnachunaahu wi niheemererye ovolowela waya. (Mwaalakhanye Éfeso 6:10-13.) Mukhalelo mmoha wa otitelela okhala aweemeleleya ntakhara ovolowela wa Satana ori weemererya nikhaviheryo na Yehova ni omuroromela moomalela. Nnaphwanela wuupuwelaka hiiha ntoko murummwa Paulo. Owo oorepa: “Muluku akhala wa hiyo, taani anii aniwerye?”—Aro. 8:31.

2. Tiheeni nnahaalaahu ohuserya mmwaha yoola?

² Ntoko Akristu eparipari, hannathitimanela vancipale mwa Satana ni masololo awe. Hiyo noothanla omalihaka elukuluku ahu yawaaca mu ohuserya vooloca sa Yehova ni mukhalelo wa omulapa. (Sal. 25:5) Naamwihiiha, nnaphwanela osuwela mavyakelo a Satana. Ntakhara heeni? Nthowa nawi eyo enahaala onikhaviherya ohiwokiwa ni yoowo. (2 Kor. 2:11) Mmwaha yoola, nnahaala othokororya mikhalelo seiyo Satana ni masololo awe anapharihelaaya wi yaawoke achu. Nnahaala ohuseryatho mukhalelo nnahaalaahu okhoma ni yaawo.

3-4. (1) Onamulosiwe tiheeni? (2) Tiheeni otholathola onooniheryaaya vooloca sa waaca wa achu aneemererya owerya wa onamulosiwe?

³ Satana ni masololo awe annapaka soothene anaweryaaya wi yaawoke achu. Mukhalelo mmoha anatepaaya opharihela ori onamulosiwe. Yaale anapharihela onamulosiwe anneererya osuwela naari ovareryela ichu seiho achu ahinaweryaaya osuwela naari  ovareryela. Ntoko yootakiherya, akina analoca wi aakhalano owerya wa osuwela sa muhoolo moorweela wa waavyerya ihako naari moorweela wa ovarerya itheneeri. Akina annaloca wi annawerya oloca ni yaale akhwile. Aakhalavotho anapharihela wiisaciherya naari olowa, nave awo ananwerya waavonyerya akina okhwiri. *

⁴ Olelo, achu ancipale orukurerya elapo anneemererya owerya wa onamulosiwe. Otholathola opakiwe mu ilapo sawaakhwana khumi nathanu nararu so Amerika Latina ni o Karipe wohooniherya wi muchu mmoha mwa achu araru apakeliwe okoha ni waakhula anneemererya, masica, waavya ihako naari okhwiri, nave achu awaaca aneemererya wi ti wooweryeya oloca ni minepa. Otholathola okina opakiwe mu ilapo sawaakhwana khumi nathanu nararu so Afrika. Weiwo, emeya ya achu apakeliwe okoha ni waakhula alonce wi anneemererya okhwiri. Mweeparipari, moohiphwacha nipuro nnakhalaahuvo, nnaphwanela okhala awiikasoopa ntakhara onamulosiwe. Mweevelevelo, Satana onneererya waawoka “achu a eelapo yoothene.”—Wup. 12:9.

5. Yehova onoona hai onamulosiwe?

⁵ Yehova “Muluku eeparipari.” (Sal. 31:5, TNM) Vano, owo onoona hai onamulosiwe? Owo onniica! Yehova ahiloca wa Aisarayeli: “Ahikhalevo mwa nyuwo anii ampahe mwanawe mwaamulopwana naari mwamuthiyana amuhelelaka mukucho amuluku atheru. Ahikhale anii iisaciherye nari weeherya ihako, okhalano masica nari omwaaciha, wiina okhwiri nari ophepa mirece. Ahikhale anii akoheke minepa nari wiitokoserya nari mano waakoha alipa ookhwa. Oothene yaawo aneerano seiya toothanyeya vamiithoni va Aphiya [Yehova].” (Malam. 18:10-12) Eparipari wi Akristu hanaphwanela wiiwelela Nlamulo Yehova aavanheiye Aisarayeli. Nyenya hiyo noosuwela wi moonelo awe vooloca sa onamulosiwe hotoroken’ye.—Malak. 3:6.

6. (1) Mukhalelo taani Satana onaphariheleiye onamulosiwe wi aahoose achu? (2) Mwawiiwanana ni Eklesiyaste 9:5, teevi eri yeeparipari vooloca sa mukhalelo wa alipa ookhwa?

⁶ Yehova onnanlopola vooloca sa onamulosiwe nthowa nawi oosuwela wi Satana onapharihela wi aahoose achu. Ni onamulosiwe, Satana onnamwaramwasa sawootha sawe— ophitaanyerya sawootha sawi alipa ookhwa annatitelela okhala akumi mu nipuro nammoori. (Mwaalakhanye Eklesiyaste 9:5) Satana onnapharihela tho onamulosiwe wi achu ekhale awoova nave emuhiye Yehova. Echu owo onachuneiye chiryene tiyawi achu epakeke onamulosiwe eroromelaka minepa soonanara omuhiya Yehova.

7. Tiheeni Yehova onanleeleiye?

⁷ Ntoko elociwaaya woopaceryani, Yehova onnanleela echu nnaphwanelaahu osuwela wi nihiwokiwe ni Satana ni masololo awe. Nnahaala woona makhalelo oophara muteko yaawo nnaphwanelaahu weera wi ntitelele okhala aweemeleleya mmukhico ahu ni Satana vamoha ni masololo awe.

8. (1) Tuuvi ori mukhalelo woochuneyaxa wa wiisaakiha orweela wa minepa soonanara? (2) Salumu 146:4 onavaanya hai yawootha ya Satana vooloca sa okhwa?

⁸ Mmwaalakhanye Piipiliya nave muupuwelele mwa yeeyo. Ola mukhalelo woochuneyaxa wi niisaakihe ni sawootha sa minepa soonanara. Masu a Muluku ari ntoko nsipaaca noonoliwa. Ananwerya ovootha sawootha Satana onamwaramwaxeiye ni wooniherya yeeyo  eri yeeparipari. (Éfe. 6:17) Ntoko yootakiherya, Piipiliya onnooniherya wi alipa ookhwa hanawerya oloca ni achu akumi. (Mwaalakhanye Salumu 146:4) Nave tho Piipiliya onnanuupuserya wi muchu mmoha onawerya oloherya sa muhoolo mwawaakhwanela ti Yehova. (Isa. 45:21; 46:10) Mwa yeeyo, ikwaha soothene mwiilipiserye omwaalakhanya Piipiliya ni wuupuwelela. Eyo enahaala wookhaviheryaani okhooca ni wiica sawootha seiyo minepa soonanara inalocaaya.

9. Meerelo taani makina aniiwanana ni onamulosiwe?

⁹ Mukhooce opaka echu eri yoothene eniiwanana ni onamulosiwe. Akristu eeparipari hanapaka mukhalelo ori woothene wa onamulosiwe. Ntoko yootakiherya, hannaavya ihako naari weererya waavya mukhalelo wa oloca ni alipa ookhwa. Hiiha ntoko mwaha woopacerya woonihenryaaya, hannapaka makupa a sookhovelela sa omvitha muchu seiyo iniiwanana ni yoororomela yawi alipa ookhwa annatitelela okhala akumi mu nipuro vyakala. Nave tho hannapaka makupa mu ovarerya itheneeri naari mano mukhalelo mukina wa weererya osuwela sa muhoolo. (Isa. 8:19) Meerelo sintoko yaala tawoopiha vancipale woona wi annaneeriha olocihana ni Satana ni masololo awe.

10-11. (1) Mu nsana noopacerya tiheeni akina o Éfeso yaapankaaya emanle ohuserya eparipari? (2) Mwawiiwanana ni 1 Korinto 10:21, ntakhara heeni nnaphwanelaahu ochariha yootakiherya ya Akristu oopacerya nave nni neereno hai?

¹⁰ Mwiivalaanye ni ichu soothene siniiwanana ni onamulosiwe. Mu nsana noopacerya, achu akina a epooma yo Éfeso yaanapaka onamulosiwe. Nyenya vaavaa yaahusenryaaya eparipari, awo yaahipaka echu yoophwanelela. Piipiliya oni: “Ancipale yeenreno miteko sa omwaaciha, yaahaathukumanya aliivuru aya eweeyela vamiithoni wa oothene.” (Saw. 19:19) Mweeparipari achu o Efeso yaachuna wiivalaanya ni minepa soonanara. Aliivuru a masica yaaraayano yaanatepa owalamela. Nyenya ohiya waavaha aliivuru awo wa achu akina naari weererya waatumiha, awo yaahiweeyela oothene.  Wa achu yaawo o Efeso, omuhakalaliha Yehova yaari echu yoochuneyaxa opwaha owalamela wa aliivuru.

¹¹ Nni ncharihe hai yootakiherya ya Akristu yaala a nsana noopacerya? Wakhala wi nyuwo mookhalano echu vyakala eniiwanana ni onamulosiwe— ntoko ehasiri naari echu enaphariheliwa wi emwaakihe muchu ntakhara minepa soonanara— yaahaala okhala yaphaama wiivalaanya ni yeeyo.—Mwaalakhanye 1 Korinto 10:21.

12. Makoho taani nnaphwanelaahu wiipakela ntakhara mathatelo ahu?

¹² Mwaalikhele phaama mathatelo anyu. Mwiikohe: ‘Apwanne kinnasiveliwa owaalakhanya aliivuru, irevista naari miyaha mu interneti sinaloca sa onamulosiwe? Hanka vooloca sa macipo, ixilema, miyaha sa TV ni apasakhwe? Apwanne ikina sa seiho sinniiwanana ni onamulosiwe? Apwanne iho sinnaloca ichu ntoko anaaminepa, masempwani, naari ichu samalavi? Apwanne awo annapaka meerelo awiisaciherya, okhwiri ni olowa inakhala ntoko ochekula ohinapahula?’ Mweeparipari tahi wi mathatelo oothene analoca miyaha sa malavi naari sawaanyiherya anavolowela onamulosiwe. Mwa yeeyo, vaavaa muneeraanyu mwaalikhele mukhalelo wa mathatelo anyu, mulakelele osepa ichu seiye Yehova oniiceiye. Nnaphwanela opaka owetha wahu wi nikhaleno “eleela murima . . . ya phaama” vamiithoni va Muluku.—Saw. 24:16, 16. *

13. Tiheeni nihinaphwanelaahu opakaka?

¹³ Musepe oloca miyaha sa masololo. Nnaphwanela weera hiiha ntoko Yesu eereiye. (1 Ped. 2:21) Ahaakumve orwa veelaponi ya vathi, Yesu aakhala wirimu nave aanasuwela sincipale vooloca sa Satana ni masololo awe. Nyenya  owo haamaliha elukuluku alocaka ichu seiyo minepa soonanara saapankaaya. Yesu aachuna oloca ni achu vooloca sa Yehova, nave ohiya ovuwiha miyaha sa Satana. Hiyo nnanwerya omutakiherya Yesu moorweela wa ohimwaramwasa miyaha sa masololo. Ohiya yeeyo, nnaphwanela wooniherya wi “masu ooreera annasareya mmurimani” mwahu, eyo tiwi, ni eparipari.—Sal. 45:1.

14-15. (1) Ntakhara heeni hannaphwanela okhalano woova woopwahererya ntakhara minepa soonanara? (2) Tiheeni enooniherya wi Yehova onnaakhapelela achu awe?

¹⁴ Muhikhaleno woova woovirelela ntakhara minepa soonanara. Mu elapo yoohiphameya nnakhalaahumo, ichu soonanara inanwerya okhumelela mootutusa: ipahu, ireca nave tho ophiyerya okhwa. Nyenya hannaphwanela wuupuwela wi minepa soonanara sineeriha soothene seiya. Piipiliya onnathariha wi “elukuluku ni saweereya soohiwehereryeya” sinnawerya omphacuwela muchu vyakala. (Ekle. 9:11, TNM) Wa masololo, Yehova ohooniherya wi owo tooweryaxa waapwaha yaawo. Ntoko yootakiherya, Yehova hamweemerenrye Satana omwiipha Yupu. (Yobi 2:6) Mu elukuluku ya Mose, Yehova aahooniherya wi ookhalano owerya waapwaha alipa a masica o Yikuputu. (Muk. 8:18; 9:11) Yehova aahimvaha tho Yesu owerya wa omwiikara Satana ni masololo awe wirimu nave amvonyerya veelaponi yavathi. Moohilekela, awo anahaala owaleliwa omukotini wa wiisawo nave herwa tho epaka echu yoonanara wa achu.—Wup. 12:9; 20:2, 3.

¹⁵ Olelo nookhalano sawooniherya sincipale seiyo sinooniherya wi Yehova onnaakhapelela achu awe. Muupuwele ela: hiyo nnaphwanela olaleerya ni ohusiha eparipari mu elapo yoothene. (Mat. 28:19, 20) Muteko yoola onnakumiherya vanlakani ichu soothene soonanara Musaserya onapakeiye. Moohikhwa minikwa, waakhanle wi Satana ookhalano owerya, owo aahaala weererya opaka mukhalelo wammoori wi amaalihe muteko ahu woolaleerya. Nyenya owo hanawerya. Mwa yeeyo, hannaphwanela okhalano woova woopwahererya ntakhara minepa soonanara. Hiyo noosuwela wi “Apwiya [Yehova] annavarerya phaama elapo yoothene wi yaalipihe yaale aniiveleela mwa yaawo ni murima aya woothene.” (2 Math. 16:9) Wakhala wi nri oororomeleya wa Yehova, masololo hewerya onipahula moomalela.

16-17. Mvahe yootakiherya enooniherya wi okhala aweemeleleya ntakhara minepa soonanara onnachuneya olipa murima.

¹⁶ Okhala aweemeleleya ntakhara minepa soonanara onnachuneya olipa murima, xaxaxa vaavaa asinthamwene naari amusi ahiniiwexexaaya mukhalelo ahu. Nyenya Yehova onnaareeliha yaale anooniherya olipa murima. Moone yootakiherya ya murokora oniichaniwa Erika, onakhala o Kana. Vaavaa aareiyeno iyaakha makhumi meeli nammoha, Erika aheemererya omuhuserya Piipiliya. Nyenya owo aari mwaana a namukucho aapaka masica. Mwa yeeyo, ahimaawe yaaweherya wi owo apakeke makupa mu sookhovelela seiyo saavolowela okhuura emece yeeyo yaaveleeliwe wa amuluku a atiithi awe. Vaavaa Erika aakhonceiye opaka makupa, ahima awe yoonne ntoko wi owo aaruwanne amuluku. Awo yeemererya wi amuluku yaahaala omuhoosa ni ereca.

¹⁷ Ahima awe yaaheererya omukhinyererya Erika opaka makupa mu yookhovelela, nyenya owo heemerenrye. Wa nthowa nenla, owo aaphwanela opwahavo vaate. Nyenya Anamoona a Yehova akina yaahimwaakhela mmavaate mwaya. Yehova oomureeliha Erika ni emusi evyaani—achu a nroromelo nimoha yaawo ari anna ni arokora awe. (Mar. 10:29, 30) Naamwi iikariwe ni ahimaawe nave yeeyenle ichu sawe, Erika ootitelela okhala oororomeleya wa Yehova. Owo oopatisiwa nave onarumeela ntoko piyoneera ookilaatheya. Owo hanoova masololo. Vooloca sa ahimaawe, Erika onnaloca: “Miyaano kinnavekela mahiku oothene wi amusi aka emusuwele tho Yehova ni yoone otaphuwa yoowo nnaweryaahu okhalano pahiru vaava nnamulapelaahu Muluku oosivela.”

18. Mareeliho taani nnahaalaahu okhalano wakhala wi ninnamuroromela Yehova?

¹⁸ Tahi wi oothene nnahaala ohoolela yaweeha ya nroromelo yoowalamela ntoko yeela. Nyenya oothene nnaphwanela okhala aweemeleleya ntakhara minepa soonanara nave nimuroromele Yehova. Wakhala wi noopaka yeela, Yehova onahaala onivaha mareeliho mancipale nave hinnahaala ochariha sawootha sa Satana. Nave tho hinni neemererye wi woova woopwahererya ntakhara masololo onihiihe omurumeela Yehova. Opwaha soothene, nnahaala okhalano onthamwene woolipaxa ni Muluku. Mwa yeeyo, mukhale oolakelela ochariha ekano yeeyo murummwa Yakopo ovanheiye: “Mmucicimiheryeke Muluku nave mumvaanyeke musaserya; owo onarwa oochawaani nyuwo. Mwaacameleeni Muluku, yoowo onarwa awaacamelaani nyuwo.”—Tiy. 4:7, 8.