Mu ekaarata yoovereliwa wa Tito, murummwa Paulo aavereliwa orepa wi amiravo, ophitaanyerya Tito, yaaphwanela wiilipixerya wi ekhale ‘yootakiherya mwa miteko yaphaama.’ (Tito 2:6, 7) Voocharela tho, mu ecima emohamoha owo aaloca wi achu a Yehova ari aweeliheryiwa, wa nthowa na yeeyo, awo anaphwanela wiilipixerya “weera miteko yaphaama.” (Tito 2:14) Ophara miteko yaphaama onnavolowela olaleerya ni ohusiha vooloca sa Omwene wa Muluku. Waakhanle wi mwa mmiravo, apwanne mwanwerya opharihela omiravo anyu wi murumeele ntoko piyoneero ookhaviherya naari a elukuluku yoothene?—Masi 20:29.

Waakhala wi munnachuna orumeela ntoko piyoneero, munaphwanela wiirehererya wi okhale wooweryeya okhala piyoneero. (Luka 14:28-30) Mwawiihiiha, muni mwiikhaviherye hai mmakupa oomwiilini wi nwerye orumeela mmuteko wa elukuluku yoothene? Muni nwerye hai waakhwaniha iwora inaweheriwa wa mapiyoneero? Mumveke Yehova nikhaviheryo. (Sal 37:5) Muloce sa marehereryo anyu ni asitiithi anyu vamoha ni yaale ari mapiyoneero a mvai. Nave voocharela, mweerevo echu wi mwaakhwanihe yoolakelela anyu. Yehova onahaala oreeliha wiilipixerya wanyu okhala a mvai mmuteko awe!

MOONE EXILEMA MPHARIHELE OMIRAVO ANYU WI MMUCICIMIHE YEHOVA, NAVE VOOCHARELA MWAAKHULE MAKOHO ANACHARELA:

• Makacamiho taani anna avonthaaya wi erumeele ntoko mapiyoneero, nave eenreno hai?

• Asitiithi eni yaakhaviherye hai anaaya okhala mapiyoneero a elukuluku yoothene?

• Ntakhara heeni oryaaya woochuneya okhalano yoochariha ya olaleerya?

• Ti mwawiihai anna ni arokora mmulokoni eneeraaya yaalipihe ni waakhaviherya mapiyoneero?

• Mareeliho taani mapiyoneero anaakhelaaya?