Ovinyerya eyaakha yeela, nnahaala okhalakano elukuluku yincipale ya wiirehererya wi nuupuwelele okhwa wa Yesu. Wakhala wi nihiku na Mukonelo naakhwanenle veeri va esumana, muthukumano wa Ekumi ni Muteko Ahu Weekristu hokhalakavo. Wakhala wi nihiku na Mukonelo naakhwanenle omakuchuwelo wa esumana, mwaha wa vanlakani ni Yoohuserya ya Mulipeleli hekhalakavo. Apwanne munahaala opharihelaka phaama elukuluku enahaala okhalakavo? Hiiha ntoko yeereyaaya mu nsana noopacerya, wiirehererya woomwiilini waanachuneya wa yaweereya yeela yavameekhaaya. (Luka 22:7-13; km 3/15 epaax. 1) Nyenya, oothene hiyo nnaphwanela orehererya mirima sahu. Nni neereno hai?

• Wuupuwelela ochuneya waya ophiya va Mukonelo.—1Kor 11:23-26

• Ovekela ni waalikhela onthamwene ahu ni Yehova.—1Kor 11:27-29; 2Kor 13:5

• Waalakhanya ni wuupuwelela Soorepa sinathariha yootaphulela ya okhwa wa Yesu.—Yoh 3:16; 15:13

Alaleeryi akina annaalakhanya ni wuupuwelela makupa a waalakhanyiwa wa Piipiliya ntakhara Mukonelo anaphwanyeya mu liivuru Muthokororye Yoorepa ya Nihiku. Akina annaalakhanya soorepa sa Mpiipiliya ntoko seiha inaphwanyeya vathi va. Nave tho akina annuuluulela waalakhanya miyaha sa Mulipeleli seiho inaloca sa Mukonelo ni osivela yoowo Yehova vamoha ni Yesu yoonihenryaaya wa hiyo. Moohiphwacha Mukhalelo wa ohuserya muneeraanyu muthanle, nnaweherya wi onahaala wookhaviheryaani omwaacamela Yehova vamoha ni Mwanawe.