OKUMI WEEKRISTU
Wunnuwiha Mavyakelo Ahu Mmuteko wa Olaleerya—Ohiyererya Yoohuserya ya Piipiliya Ehinaya Vahoolo
NTAKHARA HEENI TI YOOCHUNEYA: Achu anaphwanela wiichana nsina na Yehova wi ewerye ovuluxiwa. (Aro 10:13, 14) Nyenya, tahi wi oothene yaawo aneemererya omuhuserya Piipiliya annachuna okhala mwawiiwanana ni Malamulo a Yehova. Hiyaano ninnapharihela phaama elukuluku ahu mmuteko woolaleerya moorweela wa waakhaviherya yaale anachuna chiryene opaka matorokelo wi emuhakalalihe Yehova. Wakhala wi oohuserya a Piipiliya hanapaka matorokelo oophwanelela evinrevo elukuluku yincipale, mwamiruku hiyaano ninniilipixerya wi naakhaviherye yaale Yehova onawiichaneiye wi evolowe mmarehereryo awe. (Yoh 6:44) Nyenya, wakhala wi omwaahiyu muchu owo onnavaha sawooniherya wi ‘ohaalakhanyeryiwa waakhela okumi woohimala,’ nnanwerya okookela yoohuserya ya Piipiliya.—Saw 13:48.
MUKHALELO WA WEERANO:
-
Mmuthamalele oohuserya a Piipiliya nthowa na nchuno nawe na okhalano masuwelelo awaakhwanela.—1Tim 2:4
-
Mucicimiherye ochuneya waya opharihela yeeyo owo ohusenryeiye.—Luka 6:46-49
-
Moopixa murima muthokororye ni yoowo niphwanaphwaniho na Yesu na mulipa oomisa, nave mumveke wi aavye osuwela echu enamuhiiha oya vahoolo.—Mat 13:18-23
-
Mwa ncicimiho mmuleele echu enaweerihaani ohiyererya omuhusiha Piipiliya.
-
Mmuleele wi ilukuluku ikina munahaala omuxekuryaka wi mmulipihe nave wi ti wooweryeya okookela ohuserya wakhala wi oopaka matorokelo.
MOONE EXILEMA, NAVE VOOCHARELA MWAAKHULE MAKOHO ALA:
-
Tiheeni muhusenryaanyu orweela wa ovaanela yoowo onooniherya wi oohuserya hanaya vahoolo omunepani?
-
Ti mwawiihai mulaleeryi omukhavihenryeiye oohuserya wiiwexexa wi onaphwanela opaka matorokelo?
-
Ti mwawiihai mulaleeryi oonihenryeiye wi ti wooweryeya okookela ohuserya omwaahiyu?