Onthamwene onnatharihiwa ntoko “mukhalelo wa osivelana mukina ni mukhwaawe mwa nimakelo naari mwa ncicimiho.” Ntoko yootakiherya, Yonata ni Tavite yaapacenrye okhalano onthamwene woolipa Tavite amanle omwiipha Koliyati. (1Sam 18:1) Mmoha ti mmoha aanooniherya mikhalelo seiho saamweerinhe mukina ochuna okhala nthamwene awe. Mwa yeeyo, onthamwene woolipa onathipeleya mu masuwelelo eeparipari. Omusuwela muchu mukina onnachuneya elukuluku ni wiilipixerya. Nyenya tho, mu interneti, achu annapaka “onthamwene” pahiru moorweela wa ophinya ekootiku. Woona wi achu a mu interneti ananwerya orehererya phaameene yeeyo analocaaya ni ovareryela yeeyo akina anahaalaaya wuupuwela vooloca sa yaawo, ti wookhweya wa yaawo okhuwa omuchu aya. Mwawiihiiha, ti waphaama wuupuwelela moopwacha vooloca sa yoolakelela ya waapaka asinthamwene mu interneti. Muhoovelele okhooca naari ovaanya sooveka sa achu yaawo muhaasuwenlaanyu moovelelaka ophoreiha moonelo aya. Yoonaka sookhumelela sene sawoopiha, akina aalakelela ohipaka onthamwene wa mu interneti. Nyenya, wakhala wi moolakelela opaka onthamwene wa mu interneti, tiheeni munaphwanelaanyu wuupuwela?

MOONE EXILEMA MUKHALE OOVYAKA VAAVAA MUNAMPHARIHELAANYU INTERNETI, NAVE MWAAKHULE MAKOHO ANACHARELA:

• Tiheeni munaphwanelaanyu othokororya muhaakumve ovaha moonelo anyu ni iruku?

• Ntakhara heeni munaphwanelaanyu waathanlela mweephoole asinthamwene anyu a mu interneti?

• Ntakhara heeni munaphwanelaanyu otikitherya mphimo vooloca sa elukuluku munamalihaanyu ni onthamwene wa mu interneti? —Éfe 5:15, 16