Olelo, ipahu sa maphacuwelo sinanvira saaceereryeyaka. Vaava ipahu sa maphacuwelo sineereyaaya, wiilipixerya yoowo onapakiwa wi nivahereryiwe nikhaviheryo onaphwanela okhala wooreheryeya ni wawaakhwanela mmukhalelo waphaama. Ni mathowa yaala, Nikhuuru Noolamulela noorehererya Nikhuuru na Muteko na Okhaviherya mu ifiliyale soothene.

Vaavaa anna a nikhuuru nenla anasuwelaaya sa epahu ya maphacuwelo, awo mwawaakuveya annaloca ni atokweene a muloko wa vanipuroni wi esuwele ti mwawiihai aneeraaya ekhaviherye soothowa sa alaleeryi. Wakhala wi epahu yootannya makacamiho mancipale yaawo alaleeryi a vanipuroni ahinaweryaaya oreherya mukhataaya, efiliyale ennaathanla anna oophwanelela wi ehoolele muteko wookhaviherya. Anna yaala ananwerya waaveka awiiveleela naari ananwerya oveka sooveleela sa ichu sammoori, naari awo ananwerya othuma ni okawa ichu soothene sookhweleya sa vanipuroni.

Sookhalavo miphurelo sincipale sa ohoolela ichu mmukhalelo yoola. Musepe opaka wiilipixerya woohiphwanelela, ohiiwanana ni opharihela ikhorowa ni ichu moohiphwanelela, yeeyo enahaala okumiherya mphurelo vaava anna analapaaya mwawiiveleela wi ekhaviherye.

Anna anathanliwa ni efiliyale ananwerya olakelela waaca wa ikhorowa ni wa awiiveleela yaawo anaachunaaya wi ekhaviherye muteko yoola. Awo tho ananwerya weererya osuwela vooloca sa ahooleli a vanipuroni, yaawo vakina vaya akhweya anahaala onikhaviherya waaceererya wiilipixerya wahu ntakhara okhaviherya. Mwawiihiiha, muheererye oveka sooveleela, orumiha ichu ntakhara nikhaviheryo naari opaka mukwaha muyaaka makupa yaawo avoloweliwe ni epahu ya maphacuwelo wakhala wi hanvekiwe weerano yeeyo.

Mweeparipari, vaava eneereyaaya epahu ya maphacuwelo, hiyaano ninnachuna okhaviherya. (Ahe 13:16) Hiyaano ninnaasivela anna ni arokora ahu! Nni neereno hai yeela? Echu yoochuneyaxa, nnaphwanela ovekela ntakhara yaawo evoloweliwe ni epahu vamoha ni yaawo anavahererya nikhaviheryo. Nnaphwanela tho opakaka sooveleela ntakhara muteko wa elapo yoothene. Vathi va ohoolela wa Nikhuuru Noolamulela, ifiliyale sinnasuwela phaama ti woowi ikhorowa iho sinahaalaaya okhaviheryawo vancipale. Nave wakhala wi ninnachuna okhaviherya, nnanwerya weerano eyo moorweela wa orepela Petição Para Voluntário do Departamento Local de Projeto/Construção (DC-50).

MOONE EXILEMA INUNDAÇÕES DEVASTADORAS NO BRASIL, NAVE VOOCHARELA MWAAKHULE NIKOHO NLA NNACHARELA:

Tiheeni enootikhinihaani vooloca sa wiilipixerya wa Anamoona a Yehova ntakhara okhaviherya emanle weereya epahu ya osara wa maahi o Prasili mu eyaakha ya 2020?