Moolikana ni mithukumano sa muloko, mithukumano ntakhara muteko woolaleerya, yoovaha yoorweela wa Yehova yeeyo enanceenyerya olipihana mukina ni mukhwaawe mu osivela ni mwa miteko saphaama. (Ahe 10:24, 25) Iho inaphwanela omaliha aminutu athanu naari athanu napiili, yeeyo enaphitaanyerya orehererya makhuuru, othanla ekulucu ni nivekelo. (Wakhala wi muthukumano owo onnacharelana ni muthukumano mukina, onaphwanela okhala wookhuveyaxa.) Mulipa a weeciha onaphwanela orehererya echu yeeyo enahaala waakhaviherya oothene yaale anaya opaka makupa mmuteko woolaleerya nihiku nenlo. Ntoko yootakiherya, nihiku Nawoorowa, woona wi ancipale yaawo ari va muthukumano hakele mmuteko woolaleerya variyari va esumana, onamukhala waphaama othokororya yeeyo nnayaahu oloca ni akaneene a vaate. Miyaha taani ikina seiho inahaala okhala saphaama othokororya?

• Ochekula wa ntakiheryo orweela mu Okumi ni Muteko Ahu Weekristu—Yoochariha ya Mithukumano

• Mukhalelo wa opharihela yaweereya ya hiihaanoru naari yoolokoha evyaani wi nipaceryihe ochekula

• Mukhalelo wa waakhula waakaaha wawunlaana

• Mukhalelo wa ovaanela ni muchu yoowo ohinaroromela wi Muluku ookhala, muchu yoowo onaroromela othatuwa, muchu yoowo onaloca elocelo ekina, naari muchu yoowo ori mmalapelo yaawo ahiri awunlaana mu ekulucu anyu

• Mukhalelo wa opharihela ichu seiho inaphwanyeya mu esaiti jw.org, mu aplikativo JW Library naari Mpiipiliyani

• Mukhalelo wa opharihela Ikaruma Soohusihano

• Mukhalelo wa weererya mikhalelo mikina sa olaleerya, ntoko olaleerya ni telefoni, orepa ikaarata, onamoona wa vanlakani, oxekurya, naari weeciha soohuserya sa Piipiliya

• Wuupuxeryana vooloca sa okhapeleleya, waakuveya, makhalelo aphaama, moonelo woophwanelela naari echu ekina

• Nihusiheryo naari exilema yoorweela mu eproxura Mwiikhovelelihe Waalakhanya ni Ohusiha

• Mukhalelo wa omulipiha ni omukhaviherya nthamwene yoowo nencaahuno vamoha mmuteko woolaleerya

• Yoorepa yeeyo eniiwanana ni muteko woolaleerya naari yaweereya yoolipiha vooloca sa muteko woolaleerya