Anamoona a Yehova aakhalano ekari yavameekhaaya. Ntoko Akristu awiiveleela ni oopatisiwa, ninnatitelela wunnuwiha onthamwene ahu ni Tiithi ahu a Wirimu Yehova. Owo onikeriha wa yene moorweela wa Mwanawe. (Yoh 6:44) Owo onnawiriyana mavekelo ahu.—Sal 34:15.

Nni naakihe hai onthamwene ahu woochuneyaxa ni Muluku? Echu emoha, nnaphwanela osepa opaka soocheka ntoko seiho Aisarayeli yaapankaaya. Emanle opaka nlakano na waataana ni Yehova, awo yaapaka emope ya ewooro nave yaapacerya okokhorela. (Muk 32:7, 8; 1Kor 10:7, 11, 14) Hiyaano nnaphwanela wiikoha: ‘Kinaakhulela hai vaavaa kinakumanaaka ni yaweeha? Saweera saka sinnooniherya wi kinnakhapelela onthamwene aka ni Yehova?’ Omusivela wahu mwawiiseela Tiithi ahu a wirimu enamunikhaviherya osepa ichu seiho oniiceiye.—Sal 97:10.

MOONE EXILEMA MUKHAPELELE ONTHAMWENE ANYU NI YEHOVA (KOL 3:5), NAVE VOOCHARELA MWAAKHULE MAKOHO ALA:

• Nrima tiheeni?

• Ntakhara heeni ninnaphwanela osepa olapela soophwaniherya?

• Wiiwanana taani orivovo vooloca sa ocapaheya ni olapela soophwaniherya?

• Ntakhara heeni xaxaxa yaale arino mirici mmulokoni annaphwanela othokororyaka soothowa sa oothelana aya?