Piipiliya aaloherya wi achu a elapo yeela ya Satana yaahaala owiikaraka Akristu wi emalihe muteko wa olaleerya. (Yoh 15:20; Wup 12:17) Nni naakhaviherye hai Akristu yaawo aniikariwa mu ilapo ikina? Nnaphwanela waavekelela. “Ovekela wa mutxhu awokololowa oneriwa ni nthiti, wotepa okhalano ikuru.”—Tiy 5:16.

Tiheeni nnaphwanelaahu oveka? Ti yaphaama omveka Yehova wi aavahe ikuru anna ni arokora ni waakhaviherya ohikhala awoova. (Isa 41:10-13) Nnanwerya tho ovekela wi alipa oolamulela yeemereryeke muteko wa olaleerya, “wi niwerye okhala ni muretxele ni witxhala.”—1Tim 2:1, 2.

Vaavaa Paulo ni Petro yiikariwaaya, Akristu a nsana noopacerya yaanaavekelela elocaka masina aya. (Saw 12:5; Aro 15:30, 31) Naamwi nihisuwenle masina a oothene yaawo aniikariwa olelo, nnanwerya oromola muloko aya, elapo, naari ekulucu aya.