Nkaanyiheryani wi munakhala o Kalileya mmahiku a Yesu. Nyuwaano moopaka mukwaha mutokweene oya o Yerusalemu ntakhara Efesta ya Misakala. Epooma yoosareiwa ni achu ancipale yaawo anakhuma woorakamawo. Vano munachuna omvaha Yehova yamahala anyu. Mukapance epucepuche anyu, munnapacerya mukwaha mutokweene mviraka variyari va achu ancipale muyaaka mu Empa ya Muluku. Vaavaa munaphiyaanyu mu Empa ya Muluku munnaaphwanya achu ancipale, yaawo yaarwenle tho omvaha Yehova yamahala aaya. Vano yoophiya elukuluku anyu ya oveleela epucepuche wa mulipa eephepa. Mu elukuluku yeeyo, munnuupuwela wi munninyu, yoowo akhweya ori variyari va muloko yoole wa achu naari ori mu epooma yeeyo, ohoochekelani. Yesu ooloca tiheeni munaphwanelaanyu weera. (Mwaalakhanye Mateu 5:24.) Ti mwawiihai nyuwaano vamoha ni munninyu oochekenleni muneeraanyu mutikitherye murecele hiiha ntoko Yesu olonceiye? Mwa meerelo anaphwanyeya vathi, muthanle mamoha ari oophwanelela mu makupa ti makupa.

NYUWAANO MUNAPHWANELA . . . 

• oloca ni munninyu wakhala wi pahiru munnoona wi owo ookhalano mathowa oophwanelela a okhala oonyeenyeya.

• weererya wookolola muupuwelo wa munninyu wakhala wi munoona wi owo tawaakuveya onyeenyeya naari oloca ni achu akina vooloca sa mwaha yoowo.

• owiriyana moomaaleleya vaavaa munninyu onaloceiye moonelo awe, nave naamwi muhiiwexexaka phaama, mumveke nikhurumuwelo ni murima woothene wa yeeyo yeeren’ye.

MUNNINYU OOCHEKENLENI ONAPHWANELA . . . 

• waavya nikhaviheryo na anna akina mmulokoni aaleelaka ichu soothene soonanara mmweerenlaanyu.

• woosamelani, alocaka soonanara soothene mpankaanyu, ni wookhinyereryaani weemererya soothene.

• woona wiiyeviha ni olipa murima nyuwaano moonihenryaanyu wi mmwaacamele, nave alevelele ni murima woothene.

Naamwi omulapa wahu Muluku olelo, ohivolowelaka opaka mikucho sa axinama, nni nipharihele hai nihusiheryo na Yesu vooloca sa otikitherya murecele ni annihu?